Muhamekenu Yehova Kuhitila muKumwekesha Kalemesha

‘Mudimu [waYehova] walema nawa wawuha.’—MASAMU 111:3.

1, 2. Malwihwinyi yitukuhanjekahu munichi chibaba?

 CHIYAMWIHWILIWU Madison wayaaka yakuvwalika ikumi kulumbulula izu dakwila nawu “kulema,” washikeneni kwakula nindi, ‘kuvwala chiwahi.’ Chuma chabuliliyi kwiluka iwu kansi wamumbanda chidi chakwila nawu Bayibolu yahoshaña nawu Nzambi ‘wavwala kulema.’ (Masamu 104:1) Kudi antu, kumwekesha kalemesha mpinji yikwawu kwabombelamu kuvwala chachiwahi. Chakutalilahu, kapostolu Pawulu wakeñeleña nindi ambanda akwaKristu “adiwahishi nakuvwala mahina chalumbuluka, nansonyi nikuwundisha mumesu; bayi nakuyindayinda nsuki, hela nawuru hela namperola, hela mahina asweja kulema wuseyaku.” (1 Timotewu 2:9) Ilaña yililu yayiwahi yamwekeshaña ‘kulema nikuwaha’ kwaYehova yabadika chikupu.—Masamu 111:3.

² Kwosi muntu wutwatela kulemesha chikupu kubadika Yehova. Dichi, etu hamu neyi ambuñindi adihana, nhoshelu niyililu yetu yatela yileteña kalemesha kudi yena. Muloñadi antu chiyatela kumwekeshela kalemesha? Indi kulema kwaYehova niwukeleñi awumwekesha ñahi? Kulema kwaNzambi kwatela kutwileñela kwiladi? Chumanyi chatudizishañayi Yesu Kristu kutalisha hakumwekesha ichi chililu? Nawa tunateli kumulemesha ñahi Nzambi?

Muloña Wutwatela Kumwekesha Kalemesha

3, 4. (a) Chumanyi chitwatela kwila nakulema kwatumwekeshelayi Yehova? (b) Indi wuprofwetu wekala haMasamu 8:5-9 wahosha hadinyi? (Talenu mazu aheshina.) (c) Kumpinji yakunyima Yehova walemeshelinyi?

³ Antu ejima akweti wuswa wakumwekesha kalemesha, muloña ayileña muchifwikija chaNzambi. Yehova wamulemesheli iyala watachi kuhitila mukumwinka mudimu wakuhemba iseki. (Kutachika 1:26, 27) Nichelili muntu yakañanyi kwikala wawanina, Yehova wahosheli cheñi hamudimu wamwinkeliyi muntu kutalisha kwiseki. Dichi Nzambi wuchidi ‘kuvwika antu chibañula’ chakulema. (Tañenu Masamu 8:5-9.) * Kalemesha kiyatwinka kakeñekaña kukitambwila namakasa ayedi, kuhitila mukuhameka ijina daYehova dadiwahi nawoma nikalemesha.

⁴ Yehova walemeshaña antu amukalakelaña mudimu wajila. Nzambi wamulemesheli Abeli kuhitila mukwiteja mulambu windi, ilaña wakaanini mulambu waheni mana kwindi Kena. (Kutachika 4:4, 5) Yehova wamulejeli Mosi kumulemesha Yoshuwa, iyala wamuswanini hamu neyi nlomboli yawaIsarela. (Kuchinda 27:20) Bayibolu yahoshaña hadi Solomoni mwana kaDavidi nawu: “Yehova hakumutohesha Solomoni nankashi, kumesu awaIsarela ejima hakumwinka wanta walema nankashi, wakadi kwinkañahu dehi mwanta wacheñi muIsarela.” (1 Kushindulula 29:25) Nzambi wakalemesha chikupu akwaKristu awayishewa asañulañayi, anashimwini nakashinshi “mpuhu yakulema kwawanta windi.” (Masamu 145:11-13) Hamuloña wakumuhameka Yehova, “anyikoku acheñi” aYesu niwena ayilemeshaña kudi Yehova.—Yowanu 10:16.

Kulema kwaYehova niKuwaha Akwimwekesha

5. Indi kulema kwaYehova kwashika hachipimwinyi?

⁵ Mukamina kahosha hakulema kwaNzambi nakukeha kwamuntu, Davidi ñimbi yamasamu  wembili nindi: “Eyi Yehova, Mwanta wetu, ijina deyi o chidalema hejima heseki!” (Masamu 8:1) Kufuma tuhu henohu kanda aleñi “nimawulu nimaseki” kushika nimpinji yakushikija nkeñelu yaNzambi yalema yakubalumuna iseki kwikala paradisa nikwilisha chisaka chawantu kwikala chawanina, Yehova Nzambi Diyi wasweja kulema chikupu mukuleña kwejima haya nyaka nanyaka.—Kutachika 1:1; 1 Akorinda 15:24-28; Chimwekeshu 21:1-5.

6. Muloñadi ñimbi yamasamu chahosheleliyi nindi Yehova wadivwika kulema?

⁶ Ñimbi yamasamu wamwakamineña Nzambi watela wahayamini chikupu chamweniyi nawufuku wukeleñi wewulu datutumbwa, dawahishawu neyi nakukekema “kwamalola awuseya.” Chineli wahayamini chikupu nanochu Nzambi ‘chatanjikayi mawulu neyi ihina dakukudika muchisu,’ ñimbi yamasamu wamulumbulwili Yehova hamu neyi wadivwika kulema muloña wamudimu windi wakuleña kwalubanji. (Tañenu Masamu 104:1, 2.) Kulema niwukeleñi waNleñi watwesha yejima, wabulaña kumwekana kwamwekenaña munyidimu yindi yitwamonaña namesu.

7, 8. Wunsahwinyi wakulema kwaYehova niwukeleñi wutwamonaña mwiwulu?

⁷ Chakutalilahu, toñojokenu hamulalanji watutumbwa watenañawu nawu Milky Way. Haniwu mukanka watutumbwa, mapulaneti, ninyilalanji yanyeñumukaña itañwa, Iseki damwekanaña kukeha chikupu neyi kadibuji kawusekulula kakuchikumu chakaluñalwiji chasweja kutoha. Mumulalanji wumu mwekala tutumbwa twakubadika ha 100 biliyoni. Neyi muchindaña katumbwa kamu musekondi yimu chakadi kunooka hadi mawola 24 hefuku, chikuyisendela yaaka kubadika ha 3,000 hakwila mushikiji 100 biliyoni.

⁸ Neyi mulalanji watutumbwa waMilky Way mwekala tutumbwa 100 biliyoni, indi iwulu dejima dekala natutumbwa tuñahi? Akwakutala hatutumbwa hiyanateli kutwesha kuchinda yihita yatutumbwa twekala mwiwuluku. Indi mwiwulu mwejima mwekala tutumbwa tuñahi? Yitoñojoka yetu hiyinateli kwiluka naambala yatutumbwaku, muloña twasweja kuvula. Ilaña, Yehova “wachindaña tutumbwa, watutumbaña twejima majina.” (Masamu 147:4) Chimuneluki ochu Yehova chadivwikayi kulema niwukeleñi, komana hichinayisañumuni kuhameka ijina dindi dabadikaku?

9, 10. Indi yakudya yatwinkañawu yamwekeshaña ñahi maana aNleñi?

⁹ Ichi dinu tubalumunenu yitoñojoka yetu kufuma mwiwulu mwabadika kulema nakushinshika hayakudya yitwadyaña. Yehova “Diyi welili nimawulu nimaseki” nawa cheñi diyi ‘wayinkaña adi nanzala yakudya.’ (Masamu 146:6, 7) ‘Kulema niwukeleñi’ waNzambi wamwekenaña munyidimu yindi yamaneni, kubombelahu nikukulisha yuma yamenaña heseki kwafumaña yakudya. (Tañenu Masamu 111:1-5.) Yesu walejeli atumbanji twindi kulomba nawu: “Twinki kudya kwetu kutukukeña lelu.” (Matewu 6:11) Mankendi adiña yakudya yadyileñawu antu amavulu kushankulu, kubombelahu niaIsarela. Hela chakwila mankendi ayimonaña neyi hiyakudya yapela, yuma yazatishañawu hakutuña dinkendi dadiwahi hiyapelaku.

¹⁰ Hampinji yasonekeleñawu Bayibolu, aIsarela azatishileña wuña watidiku hela wabali nimenji hakutuña dinkendi. Iluñi, mpinji yikwawu adizatishileña hakutuña dinkendi.  Iyi yuma yapela yazatishañawu ayibombaña hamu nakutuña yuma yakuhayamisha yadikwataña hamu. Hitweluka chikupu chazatikaña iyi yuma yazatishañawu hakutuña dinkenduku. Kubombelahu, dinkendi chidasuñunukaña mwivumu hichuma chikwawu chakuhayamisha chakala kwiluka. Dichaleñeleli ñimbi yamasamu kwimba nindi: “Eyi Yehova, o nyidimu yeyi o kuvula! Wunayili yejima namaana; iseki dinenzali to-o namaheteyi.” (Masamu 104:24) Komana ninenu chinayisañumuni kumuhameka Yehova?

Indi Kulema kwaYehova niKuwaha Kwindi Kukuyileñela Kwiladi?

11, 12. Kutoñojoka hanyidimu yaleñayi Nzambi kwatela kutwileñela kwiladi?

¹¹ Hitwatela kwikala akwakudiza hatutumbwa hakwila tuhayami yuma yamwiwulu nawufuku hela antu eluka yuma yazatishañawu hakutuña dinkendi kulonda tutiyeña kuwaha hakudidyaku. Hakwila nawu tuhameki kulema kwaNleñi yetu, twatela kwikala nampinji yakutoñojoka hanyidimu yamakasindi. Indi iku kutoñojokahu kwatela kutuleñela kwiladi? Chuma chafumañamu chidi hohamu nachafumaña mukutoñojoka hanyidimu yaYehova yikwawu.

¹² Kutalisha hanyidimu yamaneni yakoñeleliyi Yehova antu Jindi, Davidi wembili nindi: ‘Nukutoñojoka hakuwaha kwakulema kweyi kwampuhu, ninyidimu yeyi yakuhayamisha.’ (Masamu 145:5) Twamwekeshaña kuta muchima kunyidimu yeniyi kuhitila mukudiza Bayibolu nikutoñojoka chikupu hayuma yitwatañañamu. Chumanyi chafumaña muniku kutoñojokahu? Kuhameka kwetu hakulema kwaNzambi nikuwaha kwaswejelañaku. Mwalala, chatuleñelaña kumulemesha Yehova neyi chelileña Davidi nikuhosha netu: “Nukushimuna kutoha kweyi.” (Masamu 145:6) Kutoñojokaña chikupu hanyidimu yaNzambi yayiwahi kwatela kukolesha wubwambu wetu naYehova nikutusañumuna kushimwina kudi antu neyena ninamukoyu. Komana munakudikita nakushimwina nsañu yayiwahi nikukwasha antu kuhameka kulema, kuwaha, niwukeleñi waYehova Nzambi?

Yesu Wamwekeshaña Chikupu Kulema kwaNzambi

13. (a) Kwesekeja naDanyeli 7:13, 14, Yehova wamwinkeli Mwanindi yumanyi? (b) Hamu neyi Mwanta, Yesu wayakamenaña ñahi antu jindi?

¹³ Yesu Kristu, Mwana kaNzambi, washimwinini chikupu nsañu yayiwahi nawa walemesheli Tata yindi wamwiwulu walemeshewa. Yehova wamulemesheli chikupu Mwanindi wumu hohu kuhitila mukumwinka ‘kuyula niwanta.’ (Tañenu Danyeli 7:13, 14.) Ilaña, Yesu hadivwimbaña hela kudinyamunaku. Kwambukaku, hiNyuli wawushona weluka kuzeya kwawantu jindi nawa wayilemeshaña. Shinshikenu chakutalilahu chaYesu Mwanta Atondawu chakameneneñayi antu abulakeneñayi, sweje-e antu akaanineñawu nikuyihela kudi akwawu.

14. Indi akwambumba ayimweneña ñahi muIsarela wakushankulu?

¹⁴ Kushankulu antu akatileña mbumba kakavulu afwileña nachineñi. Mujimba wamuyeji wekalileña namusoñu kuhita kwamafuku. Chadiña chakala chikupu kuuka mukwambumba, neyi chochakala kusañula muntu. (Kuchinda 12:12; 2 Anyanta 5:7, 14) Akwambumba ayiteneneña nawu amajilu nawa ayiheleleña nikuyihaña muchituñilu. Neyi hiyakushika kwakwihi nawantu, adiña nakubilela nawu: “Majilo! Majilo!” (Alevi 13:43-46) Mukwambumba wadiña neyi muntu wafwa. Kwesekeja nanyikanda yawaLabi, mukwambumba amwitejeleña hohu kwimena kwakulehi namamita 1.7 nahadi muntu wejima. Ashimwineña nawu neyi amona mukwambumba, hahalehi, mukulumpi wumu wansakililu wamwasileña malola kulonda yabuli kushika hakamwihi.

15. Indi Yesu wamukwashili ñahi mukwambumba?

¹⁵ Hela chochu, chuma chalema chitwatela kwiluka chidi chakushinshika hachamweneñayi Yesu akwambumba enjileña kudi yena nakumulembelela nawu yayuuki. (Tañenu Maku 1:40-42.) Chatela yahañi mukwambumba, Yesu wamutiyilili luwi nikumulemesha ona iyala  akaaninuwu kudi akwawu. Yesu wamumweni iwu iyala waneñeli nawa wakeñeleña kumukwasha. Hamuloña wakutiya wushona, Yesu wamutiyilili luwi nakumukwasha mukunyakashana. Wolweli chikasa chindi, nakumukwata mukwambumba, nawa wamukili.

16. Chumanyi chimunadizili kudi Yesu munjila yakwashilileñamu antu?

¹⁶ Hamu neyi atumbanji twaYesu, tunateli kwimbujola ñahi njila yamwekeshelelumu Yesu kulema kwaTata yindi? Njila yimu yidi yakwiluka netu antu ejima, hichidi namuloña nachifulu chikwetuwu, kukola kwamujimba, hela yaakaku, twatela kuyilemesha. (1 Petulu 2:17) Sweje-e adi hayifulu yakutala akwawu, adi neyi anfumu jawantu, anvwali, naeluda akwaKristu, atela kulemesha antu anakuhembawu nikuyikwasha kwikala nakalemesha. Hakukonkomwena nawu ichi chakeñekaña kudi akwaKristu ejima, Bayibolu yahoshaña nawu: “Keñañanenu nawana kwenu nawushona; itejenu mwinenu abadiki kulema.”—Aroma 12:10.

Kumwekesha Kalemesha haKudifukula

17. Chumanyi chitwatela kudiza kufuma muNsona kutalisha hakumwekesha kalemesha hakudifukula kudi Yehova?

¹⁷ Twatela kushaku kashinshi chikupu kakumwekesha kalemesha hakudifukula kudi Yehova. Mukwakutañisha 5:1 yahosha nawu: “Chiwukuya kwitala daNzambi kahembi mwendu weyi.” Mosi niYoshuwa ayilejeli kusubula nkwabilu jawu neyi adi mwiluña dajila. (Kwidika 3:5; Yoshuwa 5:15) Adiña nakwila mwenimu kulonda kumwekesha kalemesha hela kutiya woma. Atupristu amuIsarela ayilejeli kuvwala tuputula twamahina amawahi “twakuyibuta nachu abuli kwikala nzekesi.” (Kwidika 28:42, 43) Ichi chayikañesheleña kubula kushakama nzekesi hakukalakala kukameña. Muntu wejima wamuchisaka chawatupristu wateleleli kulondela nshimbi yaNzambi yakumwekesha kalemesha.

18. Twamwekeshaña ñahi kalemesha mukudifukula kwetu kudi Yehova?

¹⁸ Dichi twatela kumwekesha kalemesha hakudifukula. Hakwila nawu twikali atelela kulemeshewa, twatela kumwekesha kalemesha. Kalemesha kitwamwekeshaña bayi kekala kakunyivumbu hela kachaaku chakutwilukilahuku. Katela kubadika hachamonañawu antu nakwesekana nachamonañayi Nzambi washinshikaña mumuchima wetu. (1 Samweli 16:7; Yishimu 21:2) Twatela kwikala nakalemesha nawa katela kumwekena muyililu yetu, muwubwambu wetu nawakwetu, nichitwadimonaña etwaweni. Mwalala, mpinji yejima kalemesha katela kumwekenaña munhoshelu nimuyuma yitwelaña. Kutalisha kuyililu yetu, munvwalilu nikudiwahisha, twatiyililaña mazu akapostolu Pawulu akwila nawu: “Bayi mwila chuma chakudimbwisha nachu muntu hela chimuku, kulonda mudimu wetu abuli kuwumona kutama. Twadimwekeshaña mwakwila nawu tuyakwakukalakala mudimu waNzambi muyuma yejima.”  (2 Akorinda 6:3, 4) ‘Twawahishaña kuleja kwaNzambi, Chamwinu chetu, muyuma yejima.’—Titusa 2:10.

Twalekenuhu Kumwekesha Kulema kwaNzambi

19, 20. (a) Njilanyi yayiwahi yakulemeshelamu amakwawu? (b) Chumanyi chitwatela kufuukulahu kutalisha hakumwekesha kalemesha?

¹⁹ AkwaKristu awayishewa amwekeshaña kalemesha, diwu ‘atuñanda twaKristu.’ (2 Akorinda 5:20) “Anyikoku acheñi,” ayikwashaña mukashinshi, hiyantemesha alemeshewa aWanta wawuMesiya. Kañanda hela ntemesha wahoshaña chakadi woma nawa nakalemesha hakwimenaku nfulumendi yindi. Dichi, twatela kuhosha nakalemesha nawa chakadi woma hakwimenaku nfulumendi yaNzambi, Wanta windi. (Aefwesesa 6:19, 20) Nawa neyi tutwalila antu “nsañu yayiwahi yayuma yayiwahi,” komana hitwayilemeshañaku?—Isaya 52:7.

²⁰ Twatela kufuukulahu kumulemesha Nzambi kuhitila mukudihemba kwesekeja nakulema kwindi. (1 Petulu 2:12) Mpinji yejima tumwekesheña kalemesha kakeni kudi Nzambi, kukudifukula kwindi, nikudi akwetu akwakudifukula. Nawa njila yetu yakalemesha yakudifukwilamu kudi yena, yimuzañalesheña Yehova, wadivwika kulema nikuwaha.

[Tumazu twaheshina]

Mukwakula Nenudi?

• Kuhameka kuwaha kwakulema kwaYehova kwatela kutwileñela kwiladi?

• Kutalisha hakalemesha, chumanyi chitwatela kudizilaku hanochu Yesu chamukwashiliyi mukwambumba?

• Tunateli kumuhameka ñahi Yehova munjila yakalemesha?

[Malwihu aKuzatisha haKudiza]

[Mwevulu wudi hefu 18]

Indi Yehova wamulemesheli ñahi Abeli?

[Mwevulu wudi hefu 20]

Kutalisha hakalemesha, chumanyi chimunadiziliku hanochu Yesu chakwashiliyi iyala mukwambumba?