Amumulemeke Jehova Kwiinda Mukutondezya Bulemu

“Kucita kwa [Jehova] nkwabulemu loko, bululami bwakwe bulijisi lyoonse.”—INT. 111:3.

1, 2. Ino mibuzyo nzi iitiilangwe-langwe mucibalo eeci?

NAAKALOMBWA kuti apandulule bbala lyakuti “bulemu,” mwana musimbi wamyaka iili kkumi uutegwa Madison wakainda akuti: “Nkusama kabotu.” Iciboneka kuti ooyu mwana musimbi ncaatakazyi ncakuti Ibbaibbele lyaamba kujatikizya Leza kuti “ulisakatide bulemu.” (Int. 104:1) Ziindi zimwi bantu balatondezya bulemu kwiinda mukusama kabotu. Mucikonzyanyo, mwaapostolo Paulo wakalombozya kuti bamakaintu Banakristo “kabasama cakulibombya mbubonya mbokweelede, babe aciwa cibotu. Lusakatilo ndobalisakatizya talweelede kuba lwakupesa masusu akusama ingolida neziba ingale naaba malogwe aaulwa mali manjimanji.” (1 Tim. 2:9) Pele kulilemeka ikusumpula ‘bulemu alimwi akweebeka’ kwa Jehova takugoleli buyo waawa pe.—Int. 111:3.

² Kunyina naba omwe iweelela kulemekwa alimwi akusumpulwa kwiinda Jehova. Aboobo mbwaanga tuli babelesi bakwe, tuleelede kwaambaula cabulemu akucita zyintu cabulemu. Pele ino nkaambo nzi bantu ncobakonzya kutondezya bulemu? Ino mbuti bulemu abweebesi bwa Jehova mbobutondezyegwa? Ino bulemu bwa Jehova tweelede kububona buti? Ino ncinzi Jesu Kristo ncakonzya kutuyiisya caboola kukutondezya bube oobu? Alimwi ino mbuti mbotukonzya kutondezya bulemu ibuli mbuli bwa Leza?

Icipa Kuti Tukonzye Kutondezya Bulemu

3, 4. (a) Ino tweelede kucita nzi akaambo kabulemu mbotupedwe? (b) Ino bbuku lya Intembauzyo 8:5-9 lisinsima ni? (Amubone bupanduluzi buyungizyidwe.) (c) Ino mbaani Jehova mbaakapa bulemu ilyansiku?

³ Bantu boonse balakonzya kutondezya bulemu nkaambo bakalengwa mucinkozya ca Leza. Jehova wakamulemeka muntu wakusaanguna kwiinda mukumubikka kuti alanganye nyika. (Matl. 1:26, 27) Nociba ciindi bantu kabatalondokede kale, Jehova wakainduluka kwaamba mulimo ngwaakapa bantu kunyika. Aboobo, Leza ‘ucibasamikide munsini’ wabulemu bantu. (Amubale Intembauzyo 8:5-9.) * Ibulemu mbotupedwe buyanda kuti atuswe tucite cintu cimwi cabulemu—nkokuti kutembaula bupati bwa zyina lya Jehova cakuyoowa alimwi akumulemeka.

⁴ Jehova wapa ibulemu ibuli mbobubede ikapati kuli baabo babeleka milimo yakwe iisetekene. Leza wakamulemeka Abelo kwiinda mukutambula cipaizyo cakwe akukaka  cipaizyo camunyina uutegwa Kaini. (Matl. 4:4, 5) Musa wakalaililwa kupa ‘bwami bwakwe bumwi’ kuli Joshua, walo iwakeelede kumulida busena mukusololela bana Israyeli. (My. 27:20) Ikujatikizya mwana wakwe Solomoni, Ibbaibbele lyaamba kuti: “Jehova wakasumpula Solomoni mumeso aaba-Israyeli boonse akumupa bulemu bugambya kwiinda bami boonse ba-Israyeli ibakamutaangunina.” (1 Mak. 29:25) Leza uyoobapa bulemu bweelede Banakristo bananike baakubusyigwa, balo cakusyomeka ibakaambilizya “bulemu bwabupati bwabwami bwakwe.” (Int. 145:11-13) Inkamu iyaabukomena iya “mbelele zimwi” zya Jesu, ayalo yalongezyegwa kwiinda mukupegwa mulimo wabulemu mukusumpula Jehova.—Joh. 10:16.

Bulemu Abweebesi bwa Jehova Zyatondezyegwa

5. Ino bulemu bwa Jehova mbupati buti?

⁵ Mulwiimbo lwiindanya mbwali mupati Jehova akuceya kwamuntususu, sintembauzyo Davida wakaimba kuti: “O Jehova Mwami wesu, izina lyako lilatembaulika munyika yoonse! Uwe uli abulemu buyandeele kujulu.” (Int. 8:1) Kuzwa ciindi “julu anyika” kazitanalengwa mane kusikila ciindi aakumana kuzuzikizyigwa makanze aa Leza aakubamba nyika kuti ibe paradaiso akupa bantu kuti balondoke—kusikila kukabe kutamani, Jehova Leza nguwiinda bupati alimwi abulemu mububumbo boonse.—Matl. 1:1; 1 Kor. 15:24-28; Ciy. 21:1-5.

6. Nkaambo nzi sintembauzyo ncaakaambila kuti Jehova usamide bulemu?

⁶ Sintembauzyo uuyoowa Leza weelede kuti wakayaswa kumoyo naakabona bubotu bwajulu lizwide nyenyeezi masiku, ilibikkidwe kabotu-kabotu mabwe aaŋaima! Kagambidwe naakabona mbuli Leza ‘mbwaakatandabika julu mbuli mulembo,’ sintembauzyo wakaamba Jehova kuti usamide bulemu akaambo kaluzyibo ndwajisi mukulenga. (Amubale Intembauzyo 104:1, 2.) Ibulemu alimwi abweebesi bwasinguzu zyoonse, Mulengi uutaboneki ameso bulalibonya mumilimo yakwe iiboneka ameso.

7, 8. Ino ncitondezyo nzi cabulemu alimwi abweebesi bwa Jehova ncotubona muzyintu nzyaakalenga kujulu?

⁷ Mucikozyanyo, atubandike kujatikizya mulalabungu uutegwa Milky Way. Mukati kanyenyeezi eezyi zitalivwulili amanyika aambi alimwi nyenyeezi zipati izizunguluka zuba, inyika ino yoonse ili buyo mbuli kabwe komwe kamuseenga ikali kunkomwe mpati yalwizi iijisi museenga luzutu. Kayi mumulalabungu omwe kuli nyenyeezi ziinda ku 100,000,000,000! Ikuti kamubala nyenyeezi yomwe mukavwalu-vwalu komwe kakunyina kulyookezya kwamawoola aali 24 abuzuba, inga camutolela myaka iinda ku 3,000 kutegwa muzibale zyoonse zili 100,000,000,000.

⁸ Ikuti mulalabungu uutegwa Milky Way ulikke buyo kuujisi nyenyeezi zili 100,000,000,000, ino kuli nyenyeezi zyongaye mububumbo boonse? Basikwiiya zyamujulu beezyeezya kuti kunze lyamulalabunga uutegwa Milky Way, kuli milalabungu iimbi iibalilwa ku 50,000,000,000 kusikila ku 125,000,000,000. Ino mububumbo boonse kuli nyenyeezi zyongaye? Ibwiinguzi kumubuzyo ooyu masimpe bulakatazya. Pele walo Jehova “ulabala mweelwe wanyenyeezi; ulaziita zyoonse kumazina aazyo.” (Int. 147:4) Mwamana kubona mbuli Jehova mbwasamide bulemu alimwi abweebesi, sena tamukulwaizyigwi kusumpula zyina lyakwe?

9, 10. Ino mbuti ikupa zilyo kwa Mulengi wesu ncokutondezya busongo bwakwe?

⁹ Lino atuleke kwaamba makani aabupati bwajulu, atubandike cintu ncotuzyi kabotu toonse, nkokuti zilyo. Takuli kuti Jehova “wakalenga [buyo] ijulu anyika” pe, pele alimwi ‘ngonguwe waabila basinzala zilyo.’ (Int. 146:6, 7) “Bulemu” abweebesi bwa Leza bulatondezyegwa mumilimo yakwe mipati, kubikkilizya akulenga misamu iizyala micelo iiligwa. (Amubale Intembauzyo 111:1-5.) Jesu wakayiisya batobeli bakwe kupaila kuti: “Utupe sunu zilyo nzitubula.” (Mt. 6:11) Bantu banji bansiku kubikkilizya abana Israyeli, bakali kusyoma cinkwa akati kazilyo zyabo. Nokuba kuti cinkwa ciboneka mbuli kuti ncakulya cuuba-uba, zyintu zisanganizyigwa mbozivwelana ikutegwa  cinkwa cibambwe cizingulusya mutwe.

¹⁰ Mumazuba Ibbaibbele nolyakali kulembwa, bana Israyeli bakali kubelesya busu bwabbaale alimwi amaanzi kutegwa babambe cinkwa. Ziindi zimwi bumena bwakali kubelesyegwa nobakali kubamba cinkwa. Zyintu eezyi zyuuba-uba zilavwelengana akunjilana munzila iigambya akutalika kubelekela antoomwe. Zyintu eezyi mbozijatana kutegwa zibelekele antoomwe tabuzyibidwe kabotu pe. Kunze lyaboobo, icinkwa mbocigaigwa mumubili abwalo mbubambe nsini bugambya. Nkakaambo kaako sintembauzyo wakaimba kuti: “O Jehova, milimo yako yavula! Zyoonse wakazicita mubusongo bwako!” (Int. 104:24) Sena andinywe mulakulwaizyigwa kutembaula Jehova?

Ino Bumujatikizya Buti Bulemu Alimwi Abweebesi bwa Leza?

11, 12. Ino kuyeeya milimo ya Leza yakulenga inga kwatugwasya buti?

¹¹ Takuyandiki kuba akati kabaabo baiya zyamujulu kutegwa tugambwe aziboneka kujulu masiku antela kuba basyaazibwene mukuzyiba mbwiisangana misamu kutegwa cinkwa citugambye. Nokuba boobo, ikutegwa tuzyibe bupati bwa Mulengi wesu, tuleelede kujana ciindi cakuyeeya milimo yamaanza aakwe. Ino kuzinzibala kuyeeya ooku inga kwatugwasya nzi? Icikonzya kucitika cilikozyene aceeco cicitika notuzinzibala kuyeeya milimo ya Jehova iimbi.

¹² Naakali kwaamba milimo mipati Jehova njaakacitila bantu bakwe, Davida wakaimba kuti: “Bulemu bupati bwabwami bwako, amilimo yako iigambya, zyoonse nooziyeeya.” (Int. 145:5) Tulakonzya kubikkila maano kumilimo eeyi ikuti katuliyiisya Bbaibbele alimwi akujana ciindi cakuzinzibala kuyeeya ncotwabala. Ino kuzinzibala kuyeeya ooku inga kwatugwasya buti? Tulakonzya kubuzyiba kabotu bulemu bwa Leza alimwi abweebesi bwakwe. Masimpe tulakonzya kukulwaizyigwa kusangana Davida mukulemeka Jehova, walo iwakati: “Ambebo njooluula bupati bwako.” (Int. 145:6) Kuzinzibala kuyeeya milimo mibotu ya Leza kweelede kuyumya cilongwe cesu a Jehova alimwi akutukulwaizya kwaambila bantu cabusungu alimwi cakutajoka munsi. Sena muli basungu mukwaambilizya makani mabotu alimwi akugwasya bantu kuzyiba bulemu, bweebesi alimwi abupati bwa Jehova Leza?

Jesu Wakabutondezya Bulemu bwa Leza Cakulondoka

13. (a) Kweelana abbuku lya Daniele 7:13, 14, ino ncinzi Jehova ncaakapa Mwana wakwe? (b) Ino Mwami Jesu ubalanganya buti bantu mbalela?

¹³ Jesu Kristo Imwana wa Leza, wakaambilizya makani mabotu alimwi akulemeka Bausyi bakujulu. Jehova wakamulemeka mwana wakwe simuzyalwa alikke munzila yaalubazu kwiinda mukumupa ‘bweendelezi alimwi abwami.’ (Amubale Daniele 7:13, 14.) Pele Jesu talisumpuli naa kulizandula pe. Walo Mweendelezi silubomba uuzyi kabotu kuti bantu mbalela balalezya,  alimwi ulabalemeka. Amubone cikozyanyo eeci icitondezya mbuli Jesu Mwami uubikkidwe mbwaakali kubalanganya bantu, ikapati aabo bakalisulidwe abantu.

14. Ino basicinsenda bakali kubonwa buti mu Israyeli yansiku?

¹⁴ Ibantu bakajisi cinsenda lyansiku ziindi zinji bakali kupenga kapati mumoyo mane bafwa. Zibeela zyamubili zyakali kuyaabuligwa abulwazi asyoonto-syoonto. Kusilika muntu uujisi cinsenda cakali ciyumu mbuli kubusya muntu wafwa. (My. 12:12; 2 Bam. 5:7, 14) Basicinsenda bakali kwaambwa kuti balisofweede alimwi tiibakali kukkala antoomwe abantu bambi. Ikuti naa uyanda kwiinda aali bantu, wakeelede kubacenjezya kati: “Kusofwaala! Kusofwaala!” (Lev. 13:43-46) Muntu uuciswa cinsenda wakali mbuli muntu uufwide kale. Kweelana amakani aamba milawo iili muziyiisyo zyabamayi babukombi iba Juda, sicinsenda wakeelede kwiimina alaale amuntu uuli woonse kwamamita aatandila ku 1.7. Kuluulwa kuti, ikuti sicinsenda bamubona nokuba kuti uli alamfwu-lamfwu, musololi wabukombi umwi wakali kumufwusa mabwe kutegwa atasweni munsi.

15. Ino Jesu wakamugwasya buti sicinsenda umwi?

¹⁵ Nokuba boobo, cilagambya kubona mbuli Jesu mbwaakacita sicinsenda naakaboola kulinguwe akumulomba kuti amuponye. (Amubale Marko 1:40-42.) Muciindi cakumutanda sicinsenda, Jesu wakamufwida luse alimwi akumulemeka mulombwana ooyu iwakali kutantamukwa abantu. Jesu wakeetezyegwa amuntu ooyu, aboobo wakabona kuti wakali kuyandika kugwasya. Moyo wa Jesu wakabbubba calo cakapa kuti amumvwide lubomba akumugwasya. Wakatandabika janza akujata sicinsenda, eelyo wakamuponya.

16. Ino nciiyo nzi ncomwaiya kunzila Jesu mbwaakabagwasya bantu?

¹⁶ Lino mbwaanga swebo tuli batobeli ba Jesu, ino mbuti mbotukonzya kwiiya nzila Jesu mbwaakatondezya bulemu bwa Bausyi? Inzila imwi nkwiinda mukuzyiba kuti bantu boonse—kufwumbwa naa bali buti, mbazumi naa balaciswa-ciswa antela kucembaala, baleelede kulemekwa. (1 Pet. 2:17) Ibeelede kulemeka akugwasya baabo mbobalanganya kutegwa kabalilemeka ikapati mbaabo ibeendelezya, mbuli balumi, bazyali alimwi abaalu Banakristo. Ikukankaizya kuti eeci cilayandika ku Banakristo boonse, Ibbaibbele lyaamba kuti: “Amuyandane aluyandisyo lwabunyina. Amusungwaale kukulemekana.”—Rom. 12:10.

Kutondezya Bulemu Mubukombi

17. Ino ncinzi ncotweelede kwiiya mu Magwalo caboola kumakani aakutondezya bulemu ciindi notuunka kukukomba Jehova?

¹⁷ Cilayandika kapati kubikkila maano kukutondezya bulemu ciindi notukomba Jehova. Bbuku lya Mukambausi 5:1 lyaamba kuti: “Bamba kabotu kweenda kwako ciindi cakuya kuŋanda ya-Leza.” Musa alimwi a Joshua bakaambilwa kuti basamunune mpato zyabo nobakali mubusena busalala. (Kul. 3:5; Jos. 5:15) Bakeelede kucita boobu ikutondezya bulemu naa kuyoowa. Bapaizi bana Israyeli bakalaililwa kuti  kabasama tubbudula mukati “twakusamika zinswe zyabo.” (Kul. 28:42, 43) Eeci cakali kupa kuti batatondezyi mubili aanze ciindi nobakali kubelekela kucipaililo. Mukwasyi woonse iwakajisi bapaizi wakeelede kutobela ceelelo eeci cabulemu.

18. Ino mbuti bulemu mbobutondezyegwa notukomba Jehova?

¹⁸ Aboobo, mbotuli bakombi ba Jehova, tuleelede kutondezya bulemu mubukkale bwesu boonse. Ikutegwa tweelele kulemekwa, tuleelede kucita zyintu cabulemu. Ibulemu mbotutondezya tabweelede kuba bwakulicengeezya pe antela bwakusama buya mbuli cisani. Tabweelede kubonwa buyo ameso aabantu luzutu, pele Leza uubona moyo weelede kububona awalo. (1 Sam. 16:7; Tus. 21:2) Bulemu bweelede kunjila mubulowa bwesu akucinca mbotulilemeka, ciimo cesu, mbotukkala abantu, mane buya ambotuzibona zyintu ambotulimvwa. Ee, bulemu bweelede kulibonya ciindi coonse alimwi amuzyintu zyoonse nzyotwaamba alimwi akucita. Caboola kunzila mbotulilemeka alimwi ambotusama akulibamba, tatweelede kuluba majwi aamwaapostolo Paulo aakuti: “Swebo tatubiki imfumpu niiba yomwe munzila yamuntu, kuti milimo yesu itasampauki, pele muzintu zyoonse tulatondezya kuti tuli basimilimo benibeni ba-Leza.” (2 Kor. 6:3, 4) Tulalemeka “muziyanza zyoonse lwiisyo lwa-Leza Mufutuli wesu.”—Tit. 2:10.

Amuzumanane Kutondezya Bulemu BwabunaIeza

19, 20. (a) Ino ninzila nzi mbotu mbotukonzya kubalemeka bantu? (b) Caboola kumakani aakulemeka, ino tweelede kuba amakanze nzi?

¹⁹ Bulemu bulatondezyegwa a Banakristo bananike “bangambela ba-Kristo.” (2 Kor. 5:20) “Mbelele zimwi” izibagwasyilizya cakusyomeka zilalemekwa kwiinda mukuba batumwa ba Bwami bwa Mesiya. Ngambela amutumwa balaamba twaambo cabusicamba alimwi cabulemu ikwiiminina mfwulumende yacisi cabo. Aboobo tuleelede kwaambaula cabulemu alimwi cabusicamba notwiiminina mfwulumende ya Leza, Ibwami bwakwe. (Ef. 6:19, 20) Alimwi notwaambila bantu “makani mabotu loko,” sena tatutondezyi kuti tulabalemeka?—Is. 52:7.

²⁰ Tuleelede kuba amakanze aakulemeka Leza kwiinda mukulilemeka kweelana abulemu bwakwe. (1 Pet. 2:12) Aboobo lyoonse atutondezye kuti tulamulemeka kapati walo, bukombi bwakwe alimwi abakombima. Alimwi Jehova uusamide bulemu alimwi abweebesi aayikkomanine nzila mbotumukomba cabulemu.

Bupanduluzi buyungizidwe

Ino Inga Mwaingula Buti?

• Ino kuzyiba bweebesi bwabulemu bwa

Jehova kweelede kutugwasya buti?

• Ino ncinzi ncotukonzya kwiiya kuli Jesu

kumakani aabulemu kwiinda munzila

Jesu mbwaakagwasya sicinsenda?

• Ino mbuti mbotukonzya kumulemeka

Jehova kwiinda mukucita zyintu

cabulemu?

[Mibuzyo yaciiyo]

[Cifwanikiso icili apeeji 12]

Ino Jehova wakamulemeka buti Abelo?

[Cifwanikiso icili apeeji 14]

Milimo ya Jehova iigambya ilalibonya kwiinda munzila mbwapa zilyo

[Cifwanikiso icili apeeji 15]

Ino ncinzi ncomwaiya kujatikizya bulemu kwiinda munzila Jesu mbwaakamugwasya sicinsenda?

[Cifwanikiso icili apeeji 16]

Tuleelede kukomba Jehova cabulemu