Gilead Gradueisen Namba 124

Misinari Taudia be Kwadi Bamona

HUA siks, hua siks muridiai, Gilead Sikuli be gradueisen program ta idia karaia bona United States ena Betele famili ibounai be unai gradueisen dekenai idia boiria. March 8, 2008 ai, tano idauidau 30 mai kahana amo idia mai taudia danu be Gilead Sikuli ena gradueisen namba 124 dekenai idia mai. Idia mai taudia ibounai 6,411 be stiuden taudia ida unai dina badana idia moalelaia hebou.

Program ena seamani, Hakaua Oreana tauna ta, Stephen Lett ese ia henia tok ginigunana ena sinado be, “Iehova Ena Kwadi Oreana ida Umui Gaukara Hebou.” Apokalupo 9:​1-4 ese ia hahedinaraia lagani 1919 ai horoa Keristani taudia be kwadi oreana bamona edia gaukara idia goadalaia lou. Stiuden taudia ia hamaoroa idia be “mamoe idaudia” taudia dainai, idia be unai kwadi oreana ida idia gaukara hebou.​​— Ioa. 10:16.

Tok iharuana be, United States ena Brens Komiti tauna ta Lon Schilling ese ia henia, bona ena sinado be “Ta Ta Umui Durua.” Unai hereva lalonai, Baibel amo Keristani taudia ginigunadia Akwila bona ena adavana Prisikila edia sivarai ia herevalaia. (Roma 16:​3, 4) Unai klas lalonai headava taudia ibounai 28 idia noho. Tadikaka Schilling ia gwau, misinari gaukara idia karaia namonamo totona, namona be edia headava ia goada. Baibel be nega ibounai Akwila ia herevalaia neganai, ena hahine, Prisikila danu ia herevalaia. Unai ese ia hahedinaraia, aposetolo Paulo bona kongrigeisen taudia idia abia dae idia ruaosi be mai lalotamona ida idia gaukara hebou. Unai hegeregerena, idia headava misinari taudia be idia gaukara hebou, Iehova idia tomadiho henia hebou, bona tano idauna dekenai do idia davaria hekwakwanai idauidau lalonai ta ta idia durua be namo.​​—Gen. 2:​18.

Tok ihatoina ena sinado be, “Iehova Ena Kara Namodia Dainai Kara Namo Oi Karaia” bona Hakaua Oreana tauna ta Guy Pierce ese ia henia. Tadikaka Pierce ese ia hahedinaraia kara namo ena anina be kara dika oi dadaraia sibona lasi, to kara namo tauna be kara namodia ia karaia bona ma haida edia namo ia laloa bada. Iehova Dirava be kara namo ibounai ena badina. (Sek. 9:​16, 17) Dirava ena kara namodia bona ena lalokau ese ita ia doria ma haida dekenai kara namodia ita karaia totona. Tadikaka Pierce ese stiuden taudia ibounai ia hanamoa bona ia gwau: “Umui be gaukara namodia umui karaia vadaeni. Ai diba momokani, Iehova Dirava ese umui ia siaia tanodia dekenai Iena kara namodia do umui hahedinaraia noho.”

Guna misinari gaukara ia karaia bona Gilead Sikuli ena hadibaia tauna ta, Michael Burnett ese tok namba foa ena sinado, “Emu Baguna Dekenai Oi Atoa” ia henia. Israela taudia be Iehova ese hoa dalana ai Aigupito amo ia hamauridia karana be edia baguna dekenai toa ta bamona idia atoa, anina be unai kara do idia laloatao. (Eso. 13:16) Unai hegeregerena stiuden taudia be Gilead Sikuli dekenai idia abia hadibaia herevadia ibounai do idia laloatao, unai be edia baguna dekenai toa ta idia atoa bamona. Tadikaka Burnett ese ia hahedinaraia, misinari taudia bona ma haida ida hekwakwanai idia hamaoromaoroa neganai,  namona be idia manau bona Baibel ena hakaua herevadia idia badinaia.​​—Mat. 5:​23, 24.

Lagani momo lalonai Gilead Sikuli ai ia hadibaia tadikaka ta, Mark Noumair ese tok namba faiv ena sinado, “Umui Totona Dahaka Ane Do Idia Abia?” ia henia. Idaunegai, tuari taudia be tuari dekenai idia kwalimu neganai ane idia abia. Unai bamona ane ese Rubena, Dano, bona Asere edia lahedo karana ia hahedinaraia, to Sebuluno ia hanamoa badina mai gari lasi ida tuari dekenai ia lao. (Gun. 5:​16-​18) Unai ane hegeregerena, Keristani taudia ta ta edia kara be ma haida ese idia itaia diba. Ta be mai ena kudouna ibounai ida Dirava ena hesiai gaukara ia karaia neganai, ia hahedinaraia ia be Dirava ena orea amo ia mai hakaua dalana ia badinaia, Iehova ia hamoalea, bona tadikaka haida dekenai ia be haheitalai namona. Kongrigeisen lalonai tadikaka bona taihu ese emu kara idia itaia neganai, unai be hegeregere ane ta idia kamonai bona unai ese idia ia  veria emu haheitalai namona do idia tohotohoa totona.

Gilead Sikuli lalonai, gradueisen klas namba 124 be hora ibounai 3,000 idia gaukaralaia haroro gaukarana idia karaia totona. Tadikaka Sam Roberson, Tiokratik Sikuli Dipatmen amo hereva ta ia henia ena sinado be, “Lauma Helaga Ena Hakaua Dalana Badinaia.” Ena hereva lalonai stiuden taudia be haroro gaukara dekenai idia davaria ekspiriens idia herevalaia bona edia ekspiriens haida idia haheitalaia. Unai murinai, United States ena Brens Komiti ena seamani, Patrick LaFranca ese guna Gilead Sikuli idia haorea bona hari tano ma haida dekenai misinari gaukarana idia karaia stiuden taudia haida ia inteviu henidia. Stiuden taudia be idia moale badina unai tok idia henia tadikaka amo hadibaia hereva namodia idia abia.

Hakaua Oreana tauna ta Anthony Morris ese hereva dokona ena sinado, “Matana Dekenai Ita Itaia Gaudia be Idia Noho Nega Daudau Lasi” ia henia. Baibel ese ita ia hadibaia namo lasi hari inai nega kwadogina lalonai ita davaria hekwakwanai ita laloa momo, to Iehova ese vaira negai do ia havaraia hahenamodia do ita laloa bada. (2 Kor. 4:​16-​18) Ogogami, kara gageva, dagedage, gorere, bona mase be hari inai nega lalonai idia vara noho gaudia. Misinari taudia be unai bamona hekwakwanai do idia davaria danu. To, bema ita laloatao unai gaudia be nega kwadogi sibona lalonai do idia noho, unai ese ita do ia durua iseda mauri lalonai Iehova ita atoa guna bona do idia vara gau namodia totona ita naria noho.

Gradueisen program ena dokonai, klas namba 124 stiuden taudia ibounai be platfom dekenai idia helai bona Tadikaka Lett ena tok orena idia kamonai henia. Tadikaka Lett ese idia ia hagoadaia, do idia hesiku lasi bona ia gwau: “Bema Iehova be ita ia durua, herevana dahaka hekwakwanai ita davaria to iseda abidadama dekenai do ita gini goada.” Ia gwau, misinari matamatadia be kwadi bamona, Iehova ena hesiai gaukara idia karaia goadagoada, idia haheauka, bona Ia idia badinaia ela bona hanaihanai.

[Box on page 30]

KLAS TAUDIA

Edia tano idauidau: 7

Idia lao henia tanodia idauidau: 16

Klas taudia iboudiai: 56 Edia mauri lagani edia averes: 33.8

Lagani hida hereva momokani lalonai, edia averes: 18.2

Lagani hida ful-taim hesiai gaukara idia karaia, edia averes: 13.8

[Picture on page 31]

Watchtower Bible School of Gilead Ena Klas Namba 124

Inai lista ai, laini edia namba be vairana kahana amo ia daekau murina kahana, bona edia ladadia be lauri kahana amo ela bona idiba kahana.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Picture on page 32]

Gilead Sikuli be Watchtower Educational Center dekenai