Kalasi Kia 124 kia Sikola ya Ngiladi

Misionario Betezaneswanga ye Makonko

MUNA konso ngonde sambanu, ampangi besalanga kuna Betele ya Estados Unidos bebokelwanga mu lukutakanu luvangamanga kuna mfoko a kalasi kia Sikola ya Ngiladi. Kina kia 8 kia ngonde Malusu ya mvu wa 2008, mpangi zatuka mu tezo kia nsi 30 bakutakana y’esi Betele muna lumbu kiafokoka e kalasi kia 124 kia Sikola ya Ngiladi. Awonso 6.411 bakala muna lukutakanu lwalu bayangalala kumosi y’alongoki muna lumbu kiaki kiamfunu.

O mfidi a lukutakanu, mpangi Stephen Lett wa mwisi Buka kia Selo Yambuta, wayantika lukutakanu mun’elongi diakala yo ntu a diambu vo, “Nwenda Kumosi ye Makonko ma Mwanda ma Yave.” E sono kia Lusengomono 9:​1-4 kitezanisanga e fibuka fia Akristu akusua ana bavutukila etima diau muna salu kia Yave muna mvu wa 1919 ye buka kia makonko. Alongoki basungameswa vo, wau vo esi buka kia “mameme makaka,” bezidi yikama kimana basala kumosi ye buka kiaki kia makonko ma mwanda.​—⁠Yoa. 10:⁠16.

I bosi, mpangi Lon Schilling, mosi muna afidi a Vula dia Estados Unidos, wavova elongi diakala yo ntu a diambu vo: “Nusalaziananga.” Elongi diadi diabongelwa muna lusansu luna muna Nkand’a Nzambi, lwa Akwila yo nkaz’andi Peresikila, Akristu a tandu kiantete. (Roma 16:​3, 4) Muna kalasi kiaki kia Ngiladi mwakala ye akazi 28. Basungameswa vo, muna kala ye kiese muna salu kia kimisionario, bafwete siamisa longo lwau. Konso ntangwa iyikwanga Akwila muna Nkand’a Nzambi, kumosi keyikwanga yo Peresekila wa nkaz’andi. Ekiaki i kuma babadikilwa kwa Paulu wa ntumwa ye ampangi muna nkutakani vo yakala yo nkento ana bazolanga sala kumosi. Diau adimosi mpe yo unu, akazi bena vo misionario bafwete salanga kumosi, sambila kumosi yo vava sunda yau awole konso nkakalakani balenda wanana zau muna nsi zina befilwanga. Muna mpila yayi, bekala se nsadisi kwa muntu yo nkw’andi.​—⁠Etu. 2:⁠18.

Elongi dialanda, diakala yo ntu a diambu vo “Tanginina o Wete wa Yave,” diafilwa kwa mpangi Guy Pierce wa mwisi Buka kia Selo Yambuta. Mpangi Pierce wasonga vo, o kala muntu ambote ke sia kaka ko vo lembi vanga edi diambi. Muntu ambote kafwete vanganga o wete kw’akaka. Yave wa Nzambi wambote mu mpila isundidi. (Zak. 9:​16, 17) O wete yo zola kwa Nzambi kulenda kutufila mu vanga wete kw’akaka. Mpangi Pierce wasanisina alongoki mu vova vo: “Diambote nuvanganga. Tuna ye vuvu vo nukwamanana tanginina wete wa Nzambi muna vangang’aka wete muna konso fulu kekunufila o Yave wa Nzambi.”

I bosi, mpangi Michael Burnett, ona wasala kala salu kia kimisionario, owau se nlongi a Sikola a Ngiladi, wavova elongi diakala yo ntu a diambu vo: ‘Nukanga kio se Yayamu Vana Nkut’a Lose Lweno.’ Ekolo bakanganga e “yayamu” vana nkut’a lose lwau, Aneyisaele basungamenanga e mpila y’esivi kabavaikisila o Yave muna Engipito. (Luv. 13:​16) Alongoki bakasakeswa mu  sungamena ulolo wa mambu balongwa muna Sikola ya Ngiladi nze yau bakangidi yayamu vana nkut’a lose lwau. Mpangi Burnett wasonga o mfunu wa kala nsakaladi yo nlembami yo sadila nkanikinu mia Nkand’a Nzambi vava besingikanga konso diambu ye akw’au misionario ye akaka mpe.​—⁠Mat. 5:​23, 24.

Mpangi Mark Noumair, wa nlongi a Sikola ya Ngiladi, wafila elongi diakala yo ntu a diambu vo: “Nkia Nkunga Usinga Yimbilwa mu Kuma Kiaku?” Kuna nz’ankulu, bakala ye fu kia yimbila nkunga vava kiasundwanga e vita. Umosi muna nkunga miami, wasenzeka e mbi yavanga ekanda dia Rubeni, ye dia Dani ye kanda dia Asire ana balembi kuyivana, kansi ekanda dia Zebulune diasanisinwa mu kuma kia fu basonga kia kuyivana kuna mvevo. (Afu. 5:​16-​18) Mavangu ma konso Nkristu mezayakananga  kw’akaka nze ezu dia nkunga. Etima kesonganga o muntu muna salu kia Nzambi ye kwikizi kiandi kia landa luludiku lwa nkubik’a Yave, disinga sungamenwa kwa Yave yo kala se mbandu ambote kwa mpangi zandi. Vava akaka muna nkutakani bewanga e nsangu za mavangu meto, dilenda kubafila mu tanginina e mbandu eto yambote.

Ekolo bakala mu Sikola ya Ngiladi, ampangi za kalasi kia 124 tezo kia 3.000 ma ola basala muna salu kia umbangi. Mun’elongi diakala yo ntu a diambu vo “Nuyambula vo Mwand’avelela Wanufila,” mpangi Sam Roberson, osalanga mu Departamento ya Sikola za Kimfumu, wamokena y’alongoki mu kuma kia mana bawanana mau muna salu kia umbangi yo songesela maka mambu. I bosi mpangi Patrick LaFranca, mosi muna afidi a Vula dia Estados Unidos, wamokena ye mpangi zakota kala Sikola ya Ngiladi ana besalanga owau mu nsi zayingi. Alongoki batoma yangalela mambu mamfunu bawa kwa mpangi zazi.

Mpangi Anthony Morris wa mwisi Buka kia Selo Yambuta wafila elongi diansuka diakala yo ntu a diambu vo “Sungamena vo e Lekwa Imonekanga ya Kolo Kiandwelo.” Nkand’a Nzambi ukutulukisanga mu sia sungididi muna nsambu kekutuvana o Yave kuna sentu, vana fulu kia sia sungididi muna mpasi tumonanga o unu zina vo za kolo kiandwelo. (2 Kor. 4:​16-​18) Usukami, kondwa unsongi, lubangamu, mayela ye lufwa i mambu malenda kutubwila o unu. Misionario mpe balenda bwilwa mambu mama mampasi. Kansi, o sungamena vo mambu mama ma kolo kiandwelo, dilenda kutusadisa mu sikila muna mwanda yo kala ye vuvu. Lukutakanu lwalu lwafokoka vava alongoki awonso bayenda vwanda kun’evovelo mu wa mvovo miansuka mia mpangi Lett. Wabakasakesa mu lembi yoya yo kubavovesa vo: “Ke vena mpasi ko zilenda fwasa kwikizi kieto, kele vo Yave una yeto.” Wakasakesa misionario zampa mu kala nze makonko, mu sikila muna salu kia Yave yo kwamanana kala yo vema, kwikizi yo kunlemvokela yakwele mvu.

[Babu kina muna lukaya lwa 30]

OMA M’ALONGOKI

Lutangu lwa nsi zina batuka: 7

Lutangu lwa nsi zina bafilwa: 16

Lutangu lw’alongoki: 56

Tezo kia mvu: 33,8

Tezo kia mvu bena mu ludi: 18,2

Tezo kia mvu bena muna salu kia ntangwa ke ntangwa: 13,8

[Foto ina muna lukaya lwa 31]

Kalasi kia 124 kia Sikola ya Ngiladi

Nlonga bakiatamene miyantikidi ku ntwala yakuna nima, e nkumbu zau zasonekwa tuka kuna koko kwalumonso yaku koko kwalunene muna konso nlonga.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Foto ina muna lukaya lwa 32]

E Sikola ya Ngiladi kuna Centro Educational da Torre de Vigia iviokelanga