Te 124 Karatuatianga Gileada

Akaaiteia te Au Mitinari ki te Au Tapaki

I TE au ono marama, e rave ana te Apii Pipiria Punanga Tiaki o Gileada i tetai porokaramu karatuatianga, e kua patiia te katoaanga o te au taeake Betela o Marike kia tae mai. I roto ia Mati 8, 2008, kua kapitiia mai tetai au manuiri no tetai atu au enua e 30 ma te au taeake o Betela no te karatuatianga o te pupu 124 o te Apii Gileada. Kua rekareka te au taeake e 6,411 tei tae mai ma ta ratou aronga apii no to ratou ra puapinga tikai.

Kua akamata te akaaere o te porokaramu, ko Stephen Lett o te Pupu Akaaere, i tetai tuatua e “E Aere ki Mua ma te Au Tapaki Akatutu o Iehova.” Te akaaite ra a Apokalupo 9:1-4 i te pupu meangiti Kerititiano akatainuia tei maroiroi akaou mai i roto i ta Iehova angaanga i te mataiti 1919 ki tetai pupu tapaki maata tei akamata akaou i te angaanga pakari. Kua akamaaraia ki te au taeake apii e ei mema no te “mamoe ke atu,” kua kapitiia mai ratou ki teia pupu tapaki maata akatutuia.​—Ioa. 10:16.

Te tuatua i aru mai na Lon Schilling e mema aia no te Kumiti Manga o Marike, koia oki e “Kia Riro ei Tauturu Tau.” Kua akatumuia te reira ki runga i te akaraanga Pipiria o Akuila raua ko Peresila (me kore, Periseka), e nga tokorua Kerititiano akaipoipo o te anere mataiti mua. (Roma 16:3, 4) Te o maira e 28 tokorua akaipoipo i roto i te pupu Gileada. Kua akamaaraia kia ratou e kia puapinga ia ratou ei mitinari, te anoanoia ra ratou kia akatumu pakari i to ratou pirianga akaipoipo. Kare rava te Pipiria i taiku ana ia Akuila anake ua e kare tana vaine ko Peresila. No reira, kua manako te apotetoro ko Paulo e te putuputuanga ia raua, ei kopapa okotai. Pera katoa, ka anoanoia kia angaanga kapiti, kia akamori kapiti, e kia akono kapiti te au tokorua mitinari o teia tuatau i te au manamanata o te au angaanga i tetai au enua ke, ei tauturu tau no tetai e tetai.​—Gene. 2:18.

Te tuatua tei aru mai, koia oki, “Ariu Anga ki to Iehova Tu Meitaki,” na Guy Pierce o te Pupu Akaaere i oronga mai. Kua akamarama te Taeake ko Pierce e ko te aiteanga o te rave anga i te meitaki e kare e kia kopae ua i te rave i te kino. E rave ana tetai tangata meitaki i tetai mea meitaki kia puapingaia tetai ke. E tu teitei rava atu te meitaki o te Atua ko Iehova. (Zeka. 9:16, 17) Ka riro te tu meitaki e te aroa o te Atua ei akakeu anga ia tatou kia rave i te au mea meitaki no tetai ke. I te akameitakianga i te au taeake apii, kua taopenga te Taeake ko Pierce na te karanga anga e: “Kua rave kotou i te meitaki. Kua papu ia matou e ka ariu ua atu rai kotou ki te tu meitaki o te Atua na te raveanga i te meitaki i roto i ta kotou tukuanga angaanga i te tuatau ki mua ta te Atua ko Iehova i oronga mai na kotou.”

Aru mai, kua oronga te Taeake ko Michael Burnett, tetai mitinari o mua ana, e i teianei e puapii no Gileada, i te tuatua e “E Aao i te Tarae i Mua Tikai i to Kotou Mata.” Mei te mea rai e te aao ra ratou i te “tarae” i mua tikai i to ratou mata, kia akamaara te ngati Iseraela i te akaora temeio anga a Iehova ia ratou mei Aiphiti mai. (Exo. 13:16) Kua akoia te au taeake apii kia akamaara i te au ikuikuanga e manganui tei rauka  mai ia ratou i te Apii Gileada mei te mea rai te aao ra ratou i te reira ei tarae i mua tikai i to ratou mata. Kua akataka te Taeake ko Burnett i te anoano kia akaaka e kia manako tu tau e kia taangaanga i te au kaveinga Pipiria me akatikatika i tetai au manamanata ma to ratou au oa mitinari e e etai ke atu.​—Mata. 5:23, 24.

Kua oronga te Taeake ko Mark Noumair, e puapii kua roa te apii anga i Gileada, i te tuatua e “Eaa te Imene ka Imeneia no Runga ia Kotou?” I te tuatau taito, e peu matauia i te akaepaepa i te au autuanga tamaki ki te imene. Te akaari maira tetai o taua au imene ra i te tu inangaro kore o te kopu tangata o Reubena, Dana, e Asera i te rave i te angaanga, i tetai tua kua akapaapaaia te ngati Zebuluna no to ratou tu ngakau akaatinga. (Aka. 5:16-18) Mei te au tuatua o tetai imene, ka kiteaia te au angaanga a te au Kerititiano ravarai e tetai ke. Ka maara ia Iehova te rekoti meitaki no te tu maroiroi o tetai tangata no te angaanga a te Atua e te tu tiratiratu ope kore ki te akauenga no ko mai i te akaaereanga a Iehova e ka riro ei  akaraanga meitaki ki tona au taeake. I te akarongo anga tetai aronga i roto i te putuputuanga ki te imene akatutuanga tei akaariia mai i roto i ta tatou au angaanga, ka akakeuia ratou kia aru i te reira akaraanga meitaki.

Ei tuanga no ta ratou terenianga i Gileada, e akapou ana te pupu 124 e 3,000 ora katoa i roto i te angaanga tutu anga. I raro ake i te tumu tuatua “Aru i te Arataki Anga a te Vaerua Tapu,” kua akakite te au taeake apii kia Sam Roberson o te Tipatimani o te Apii Teokaratiki i tetai au tupuanga i runga i te ngai tutu anga, e te akatutuanga i tetai pae o te reira. Kua aru mai teia au tupuanga akamaroiroianga na roto i tetai uiui anga, tei raveia e te Taeake ko Patrick LaFranca o te Kumiti Manga o Marike, ma tetai au taeake Gileada tei karatuati, te tavini nei i teianei i roto i te au enua tukeke. Kua ariki rekareka te au taeake apii i te akoanga tau tei rauka mai no ko mai i teia au taeake.

Kua oronga a Anthony Morris o te Pupu Akaaere i te tuatua openga, “Kia Akamaara e e Tuatau Poto ua te Au Mea Akaraia.” Te ako maira te au irava ia tatou kia akara mou i te au akameitakianga i te tuatau ki mua no ko mai ia Iehova kare ki runga i te au tumatetenga tuatau poto ua ta tatou ka kite atu. (2 Kori. 4:16-18) E au tupu anga tikai te au turanga putaua, te tu tika kore, te takinga kino, te au maki, e te mate e kite nei tatou i teia tuatau. Penei ka aro atu te au mitinari i tetai o teia au turanga kino. Inara na te akamaara anga e e tuatau poto to teia au mea nei ka tauturu ia tatou kia tuku ua rai ia Iehova ko te mea mua i roto i to tatou oraanga e kia vai manakonako ua rai.

Kua akaoti te porokaramu ma te au taeake katoatoa i runga i te paata tei karatuati, te akarongo ra ratou ki te au tuatua openga a te Taeake ko Lett. Kua akamaroiroi aia ia ratou e auraka e tuku i te au e kua karanga e: “Noatu te au timataanga ta tatou ka aro atu, ka rauka ia tatou i te tamou marie e te akono tamou i to tatou tu tiratiratu me te turuturu maira a Iehova ia tatou.” Kua akamaroiroi aia i te au mitinari ou kia riro mai mei te au tapaki rai, i te aruaru anga atu i roto i ta Iehova angaanga e kia vai maroiroi, kia tiratiratu, e kia akarongo e tuatau ua atu.

[Pia i te kapi 30]

TU AU TU O TE PUPU

Numero o te au enua tei komonoia: 7

Numero o te au enua tei tukuia: 16

Numero o te aronga apiipii: 56

Mataiti avereti: 33.8

Au mataiti avereti i roto i te tuatua mou: 18.2

Au mataiti avereti i roto i te angaanga orometua tamou: 13.8

[Tutu i te kapi 31]

Pupu Karatuati 124 o te Apii Pipiria Punanga Tiaki o Gileada

I te papaanga i raro ake, kua tanumeroia te au pa mei mua ki muri, e kua papaia te au ingoa mei te kaui ki te katau i te pa takitai.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Tutu i te kapi 32]

Te Apii Gileada i ko i te Ngai Apii Anga Punanga Tiaki