Basikubala Balabuzya

Nkaambo Nzi Ncotweelede Kubelesya Zyina Lya Leza Ikuti Katutalizyi Mboliitwa?

Mazuba aano kunyina uulizyi kabotu izyina lya Leza mbolyakali kwiitwa abana Hebrayo basinku. Nokuba boobo, izyina lya Leza lilajanika mu Bbaibbele ziindi zitandila ku 7,000. Jesu wakalizyibya zyina lya Leza naakali anyika alimwi wakalailila basikwiiya bakwe kupaila kutegwa izyina eelyo lilemekwe. (Matayo 6:9; Johane 17:6) Aboobo, kulayandika kapati kuti Banakristo kabalibelesya zyina lya Leza. Ino nkaambo nzi ncolitazyibidwe mbolyeelede kwiitwa izyina eelyo mazuba aano? Kuli twaambo tupati tobilo.

Kaambo kakutaanguna nkakuti, myaaka iili zyuulu zyobilo yainda, bama Juda bamwi bakatalika cilengwa cibi cakutabelesya zyina lya Leza. Ikuti sikubala Bbaibbele walijana izyina eelyo, wakali kulicinca akulibala kuti “Mwami.” Kwiinda mukucita boobo, nokwakainda myaanda wamyaka kabali bacileka kale kulibelesya, bantu bakaluba mbolyakali kwiitwa izyina lya Leza.

Kaambo kabili nkakuti, mabala aa Chihebrayo lyansiku akali kulembwa kakunyina mavawelo mbubonya mbuli mabala amwi mbwaalembwa mu Chingisi amumisyobo imwi. Sikubala wakali kubikka mavawelo aatako naakali kubala. Mukuya kwaciindi, kwakabikkwa bubambe bwakuti mabala aa Chihebrayo atalubilwi limwi mbwaambwa. Kwakayungizyigwa tutondezyo tumwi twiiminina mabala mu Bbaibbele lya Chihebrayo. Kujatikizya zyina lya Leza, kweelede kuti kwakabikkwa tutondezyo tumwi twakayungizyigwa twazyina lya “Mwami” kutegwa sikubala abale kuti Mwami naa tiibakali kubikka cili coonse.

Aboobo cakacaala buyo mu Bbaibbele akali mabala one aambwa kuti Tetragrammaton. Ibbuku limwi lipandulula mabala lyaamba kuti “mabala aa Chihebrayo one kanji-kanji aasandululwa kuti YHWH naa JHVH aiminina zyina lya Leza mu Bbaibbele.” Ikuti mabala aaya JHVH abikkwa mavawelo, ncuubauba kubona kuti alakonzya kubalwa kuti “Jehova,” izyina lizyibidwe mu Chitonga.

Basikwiiya bamwi baamba kuti lyeelede kubalwa kuti “Yahweh.” Sena lilikonzyene ambolyakeelede kuti kalibalwa? Kunyina uuzyi kabotu. Basikwiiya zyamu Bbaibbele bamwi baamba twaambo ncolitabelesyelwi bbala eeli. Masimpe, mazyina aamu Bbaibbele naambwa mazuba aano taalimvwisyi mbuli mbwaakali kwaambwa kaindi mumwaambo wa Chihebrayo alimwi banji tabatongooki. Eeci cili boobu akaambo kakuti mazyina aaya twaazyibila alimwi taakatazyi. Oobo mbocibede akuzyina lya Jehova.

Banakristo bamumwaanda wakusaanguna bakali kwiitwa azyina lya Leza. Bakali kukambauka kujatikizya izyina eelyo alimwi bakali kubakulwaizya bantu kulibelesya. (Incito 2:21; 15:14; Ba-Roma 10:13-15) Aboobo, Leza uyanda kuti katulibelesya zyina lyakwe mumisyobo yoonse njotubelesya, kuzyiba ncolyaamba akucita zyintu kweelana ancolyaamba.

Majwi aakwelelezya sikubala aali apeeji 32]

Iciteelede kulubwa ncakuti, izyina lya Leza lilajanika mu Bbaibbele ziindi zitandila 7,000