Hupti “ang Tulo ka Bakukon nga Pisi” Diha sa Kaminyoon
Hupti “ang Tulo ka Bakukon nga Pisi” Diha sa Kaminyoon
“Ang tulo ka bakukon nga pisi dili daling mabugto.”—ECCL. 4:12.
1. Kinsay nagkasal sa unang lalaki ug babaye?
HUMAN lalanga ni Jehova nga Diyos ang mga tanom ug mananap, siya nag-umol sa unang tawo, si Adan. Sa ulahi, gipahinabo sa Diyos nga si Adan mahinanok, ug Siya naghimog hingpit nga katabang ni Adan pinaagi sa usa sa iyang mga gusok. Sa pagkakita ni Adan sa babaye, siya miingon: “Kini sa kataposan bukog sa akong mga bukog ug unod sa akong unod.” (Gen. 1:27; 2:18, 21-23) Gipakita ni Jehova ang iyang pag-uyon sa unang babaye, ug iyang gihiusa ang unang lalaki ug babaye pinaagi sa pagkasal ug pagpanalangin kanila.—Gen. 1:28; 2:24.
2. Sa unsang paagi gidaot ni Satanas ang kaminyoon ni Adan ug Eva?
2 Ikasubo nga wala madugay human niana, nadaot ang kahikayan sa Diyos sa kaminyoon. Sa unsang paagi? Ang usa ka daotang espirituhanong linalang, nga gitawag sa ulahi ug Satanas, naglimbong kang Eva sa pagkaon sa bunga sa kahoy nga gidili sa Diyos kanila. Human niana, si Adan miduyog sa iyang asawa sa pagrebelde sa matarong nga pagmando ug pagtultol sa Diyos. (Gen. 3:1-7) Sa dihang gipangutana ni Jehova ang magtiayon bahin sa ilang gihimo, nadayag nga diha nay problema sa ilang kaminyoon. Gibasol ni Adan ang iyang asawa, nga nag-ingon: “Ang babaye nga imong gihatag aron makauban nako, siya ang naghatag kanako sa bunga gikan sa kahoy ug busa ako mikaon.”—Gen. 3:11-13.
3. Unsang sayop nga panglantaw ang naugmad sa pipila ka Hudiyo?
3 Sulod sa daghang siglo human niadto, si Satanas migamit ug daghang malipatlipatong paagi aron daoton ang kaminyoon. Pananglitan, iyang gamiton usahay ang mga lider sa relihiyon aron ipasiugda ang dili-Kasulatanhong panglantaw bahin sa kaminyoon. Gipakamenos sa pipila ka Hudiyong mga lider ang mga sukdanan sa Diyos pinaagi sa pagtugot sa mga bana sa pagdiborsiyo sa ilang mga asawa tungod lamang sa gagmayng mga butang sama sa parat nga tinimplahan. Apan si Jesus miingon: “Bisan kinsa nga makigdiborsiyo sa iyang asawa, gawas kon tungod sa pakighilawas, ug magminyog lain makapanapaw.”—Mat. 19:9.
4. Sa unsang paagi gidaot karon ang kaminyoon?
4 Si Satanas padayong naningkamot sa pagdaot sa kaminyoon. Ang pagminyo sa duha ka tawo nga samag sekso, pagpuyopuyo, ug ang pagdiborsiyo nga walay igong basehanan nagpakita nga nagmalamposon gayod si Satanas sa pagdaot sa kaminyoon. (Basaha ang Hebreohanon 13:4.) Ingong mga Kristohanon, unsay atong mahimo aron dili kita maimpluwensiyahan sa kaylap apan sayop nga panglantaw bahin sa kaminyoon? Atong tagdon ang pipila ka sekreto sa usa ka malipayon ug malamposong kaminyoon.
Iapil si Jehova Diha sa Kaminyoon
5. Unsay kahulogan sa ekspresyong “tulo ka bakukon nga pisi” diha sa kaminyoon?
5 Aron magmalamposon ang kaminyoon, kinahanglang iapil si Jehova diha niana. Ang Pulong sa Diyos nag-ingon: “Ang tulo ka bakukon nga pisi dili daling mabugto.” (Eccl. 4:12) Ang ekspresyong “tulo ka bakukon nga pisi” masambingayon. Sa pagpadapat niini nga ilustrasyon diha sa kaminyoon, ang duha ka bakukon mao ang bana ug asawa, ug ang pangunang bakukon mao si Jehova nga Diyos. Kon ang magtiayon nahiusa sa Diyos, sila makabaton ug kusog sa pagsagubang sa mga problema, ug kini mao ang sekreto aron magmalipayon gayod ang kaminyoon.
6, 7. (a) Unsay mahimo sa mga Kristohanon aron ilang matino nga ang Diyos anaa sa ilang kaminyoon? (b) Unsay gipabilhan sa usa ka sister diha sa iyang bana?
6 Apan unsay angayng himoon sa magtiayon aron ang ilang kaminyoon magpabiling samag tulo ka bakukon nga pisi? Si salmistang David miawit: “Sa pagbuhat sa imong kabubut-on, Oh Diyos ko, ako nagakalipay, ug ang imong balaod ania sa akong kahiladman nga mga bahin.” (Sal. 40:8) Sa samang paagi, ang atong gugma sa Diyos mopalihok kanato sa pag-alagad kaniya nga bug-os kasingkasing. Busa, kinahanglang ugmaron sa bana ug asawa ang personal nga relasyon kang Jehova ug magkalipay sa pagbuhat sa iyang kabubut-on. Kinahanglan usab nga magtinabangay sila aron molig-on ang ilang gugma sa Diyos.—Prov. 27:17.
7 Kon gihigugma gayod nato ang balaod sa Diyos, atong ikapakita ang mga hiyas sama sa pagtuo, paglaom, maingon man ang gugma, ug kini makapalig-on sa kaminyoon. (1 Cor. 13:13) Ang usa ka Kristohanon nga si Sandra, kinsa 50 ka tuig nang minyo, miingon: “Ang gipabilhan nako pag-ayo sa akong bana mao ang Kasulatanhong giya ug tambag nga iyang gihatag kanako maingon man ang iyang gugma kang Jehova, nga mas lig-on pa kay sa iyang gugma kanako.” Mga bana, ingon ba usab niana ang ikakomento sa inyong mga asawa bahin kaninyo?
8. Unsay gikinahanglan aron mabatonan ang “maayong balos” diha sa kaminyoon?
8 Ingong magtiayon, inyo bang ginauna ang espirituwal nga mga butang ug ang intereses sa Gingharian? Dugang pa, inyo ba gayong gilantaw ang inyong kapikas isip kauban sa pag-alagad kang Jehova? (Gen. 2:24) Ang maalamong Haring Solomon misulat: “Ang duha mas maayo kay sa usa, tungod kay sila adunay maayong balos sa ilang kahago.” (Eccl. 4:9) Sa pagkatinuod, kinahanglang maningkamot gayod ang bana ug asawa aron ilang mabatonan ang “maayong balos”—ang malipayon ug malungtarong kaminyoon uban sa panalangin sa Diyos.
9. (a) Unsa ang responsibilidad sa bana? (b) Sumala sa Colosas 3:19, sa unsang paagi pagatagdon sa bana ang iyang asawa?
9 Aron maanaa ang Diyos sa kaminyoon, kinahanglang maningkamot ang bana ug asawa nga magkinabuhi sumala sa Iyang mga kinahanglanon. Ang pangunang responsibilidad sa mga bana mao ang pagtagana sa materyal ug espirituwal nga panginahanglan sa pamilya. (1 Tim. 5:8) Gidasig usab sila nga magmahunahunaon sa emosyonal nga panginahanglan sa ilang asawa. Ang Colosas 3:19 nag-ingon: “Kamong mga bana, magpadayon sa paghigugma sa inyong mga asawa ug ayaw pagkasuko nga hilabihan kanila.” Gipatin-aw sa usa ka eskolar sa Bibliya nga ang ekspresyong “pagkasuko nga hilabihan” nalangkit sa “pagsultig sakit, o pagbun-og, ug paghikaw kanila sa pagmahal, pag-atiman, panginahanglan, panalipod, ug pagpaluyo.” Kini nga tinamdan dili gayod angayng makita diha sa Kristohanong panimalay. Kon gamiton sa bana ang iyang pagkaulo sa mahigugmaong paagi, ang iyang asawa dili malisdan sa pagpasakop kaniya.
10. Unsa nga tinamdan ang kinahanglang ipasundayag sa Kristohanong mga asawa?
10 Kon buot sa Kristohanong mga asawa nga maanaa si Jehova sa ilang kaminyoon, kinahanglan usab nilang buhaton ang mga kinahanglanon sa Diyos. Si apostol Pablo misulat: “Ang mga asawa kinahanglang magpasakop sa ilang mga bana ingon nga sa Ginoo, tungod kay ang bana maoy ulo sa iyang asawa ingon nga si Kristo usab maoy ulo sa kongregasyon.” (Efe. 5:22, 23) Si Satanas naglimbong kang Eva, nga nagpasiugda sa bakak nga pangatarongan nga makahatag ug dumalayong kalipay ang dili pagpasakop sa Diyos. Dayag nga makita karon diha sa daghang kaminyoon ang pagkadili-mapinasakopon. Apan ang diyosnong mga babaye wala mag-isip nga makapaubos sa ilang dignidad ang pagpasakop sa ilang mahigugmaong ulo. Sila nahibalo nga si Jehova nagtudlo kang Eva ingong “katimbang” sa iyang bana, nga tin-awng giisip sa Diyos ingong usa ka dungganong posisyon. (Gen. 2:18) Ang Kristohanong asawa nga andam magpasakop nianang kahikayana maoy “purongpurong” sa iyang bana.—Prov. 12:4.
11. Unsa ang nakatabang sa kaminyoon sa usa ka brader?
11 Ang laing butang nga makatabang aron maanaa ang Diyos sa kaminyoon mao ang pagtuon sa Pulong sa Diyos nga magkauban. Si Gerald, nga nagmalipayon sa iyang kaminyoon sulod na sa 55 ka tuig, miingon, “Ang labing hinungdanong butang nga makapalampos sa kaminyoon mao ang pagbasa ug pagtuon sa Bibliya nga magkauban.” Siya midugang, “Ang pagbuhat sa mga butang nga magkauban ilabina diha sa pag-alagad, mas makapasuod sa magtiayon sa usag usa ug kang Jehova.” Ang pagtuon sa Bibliya ingong pamilya motabang kanato sa paghinumdom sa mga sukdanan ni Jehova ug sa pagpalig-on sa atong espirituwalidad, ug makaamot usab aron kita mouswag.
12, 13. (a) Nganong hinungdanon kaayo nga ang magtiayon mag-ampo nga magkauban? (b) Unsang laing espirituwal nga mga kalihokan ang makapalig-on sa kaminyoon?
12 Ang malipayong mga magtiayon magkauban usab sa pag-ampo. Kon ang bana moampo nga kinasingkasing ug espesipiko sumala sa ilang mga kahimtang, mas molig-on ang ilang kaminyoon. (Sal. 62:8) Pananglitan, mas dali ra ninyong masulbad ang dili pagsinabtanay kon moampo dayon kamo kang Jehova alang sa giya ug pagtultol! (Mat. 6:14, 15) Maylabot sa pag-ampo, haom gayod nga ang bana ug asawa magmadeterminado nga magtinabangay ug “magpadayon sa pag-antos sa usag usa ug kinabubut-on nga magpasaylo sa usag usa.” (Col. 3:13) Hinumdomi nga ang pag-ampo maoy kapahayagan sa atong pagsalig sa Diyos. Si Haring David nag-ingon: “Ang tanang mata nagalantaw nga malaomon kanimo.” (Sal. 145:15) Kon kita nagalantaw nga malaomon sa Diyos diha sa pag-ampo, dili kaayo kita mabalaka kay kita nahibalo nga ‘siya nahingawa kanato.’—1 Ped. 5:7.
13 Ang laing hinungdanong butang nga makatabang aron maanaa si Jehova sa kaminyoon mao ang pagtambong sa mga tigom ug ang pagsangyaw nga magkauban. Diha sa atong mga tigom, makakat-on ang mga magtiayon kon unsaon pagsukol sa “mga malipatlipatong kaugdahan” nga gigamit ni Satanas aron mabahin ang mga pamilya. (Efe. 6:11) Kon kanunayng mag-uban ang bana ug asawa sa pagsangyaw, sila ‘mahimong lig-on ug dili matarog.’—1 Cor. 15:58.
Sa Dihang Motungha ang mga Problema
14. Unsa nga mga kahimtang ang makadugang sa kapit-os sa kaminyoon?
14 Ang mga sugyot nga gihisgotan sa ibabaw dili man hinuon bag-o, apan nganong dili kini hisgotan uban sa imong kapikas? Tan-awa kon unsa ang pipila ka bahin sa inyong panagtiayon nga nanginahanglag dugang pagtagad. Apan ang Bibliya nag-ingon nga bisan pag magpagiya sa Diyos ang mga magtiayon, sila sa gihapon “makaagom ug kasakitan sa ilang unod.” (1 Cor. 7:28) Tungod sa pagkadili-hingpit, daotang impluwensiya sa malinapasong kalibotan, ug sa mga lit-ag sa Yawa, bisan ang kaminyoon sa matinumanong mga alagad sa Diyos makasinati gihapog mga kalisdanan. (2 Cor. 2:11) Apan si Jehova motabang kanato sa pagsagubang niana. Oo, kita mahimong molampos sa pagbuhat niana. Ang matinumanong si Job nawad-an sa iyang kahayopan, sulugoon, ug mga anak. Apan ang Bibliya nag-ingon: “Niining tanan si Job wala makasala ni magpasangil ug bisan unsang butang nga dili angay batok sa Diyos.”—Job 1:13-22.
15. Unsay mahimong reaksiyon sa mga tawo tungod sa kalisdanan, ug unsay maayong buhaton sa magtiayon ubos sa maong mga kahimtang?
15 Sa laing bahin, ang asawa ni Job miingon kaniya: “Nagahupot ka ba gihapon sa imong integridad? Tungloha ang Diyos ug magpakamatay!” (Job 2:9) Sa pagkatinuod, kon mahitabo ang mga trahedya o uban pang malisod nga mga kahimtang, ang hilabihang kaguol makapahinabo sa usa sa paghimog dili-maalamong mga desisyon. “Ang pagpanglupig makapabuang sa usa ka maalamon,” miingon ang usa ka maalamong tawo. (Eccl. 7:7) Kon makasultig sakit ang imong kapikas tungod sa kalisdanan o “pagpanglupig,” paningkamoti nga magpabilin kang kalmado. Kon mosulti pod kag sakit, basin magkatinubagay na hinuon kamo ug mosamot ang problema. (Basaha ang Salmo 37:8.) Busa palabya lang ang bisan unsang sinultihan nga “pinasagad” tungod sa kahigawad ug kaluya sa buot.—Job 6:3.
16. (a) Sa unsang paagi ang mga pulong ni Jesus diha sa Mateo 7:1-5 mapadapat diha sa kaminyoon? (b) Nganong gikinahanglan ang pagkatimbang sulod sa kaminyoon?
16 Kinahanglang realistiko ang mga magtiayon sa ilang mga pagdahom. Tingali makita sa usa ang pipila ka kahuyangan sa iyang kapikas ug maghunahuna, ‘Mausab ra siya pinaagi sa akong tabang.’ Pinaagi sa gugma ug pailob, tingali matabangan nimo ang imong kapikas aron hinayhinay siyang mouswag. Apan, hinumdomi nga gipakasama ni Jesus ang usa nga hinawayon sa ginagmayng kahuyangan sa uban ngadto sa tawo nga nakakita sa “uhot” sa mata sa iyang igsoon apan wala makakita sa “salagunting” diha sa iyang mata. Si Jesus nag-awhag kanato: “Hunong na sa pagpanghukom aron dili kamo pagahukman.” (Basaha ang Mateo 7:1-5.) Kini wala magpasabot nga pasagdan na lamang ang dagkong mga sayop. Si Robert, nga halos 40 ka tuig nang minyo, miingon: “Aron mahimong prangka sa usag usa ug andam nga modawat ug mga sugyot, basin kinahanglang bag-ohon sa mga magtiayon ang ilang tinamdan.” Busa magmatimbang. Imbes maglagot tungod kay wala nimo makita sa imong kapikas ang mga hiyas nga imong gidahom kaniya, pabilhi kon unsay iyang maayong mga hiyas.—Eccl. 9:9.
17, 18. Kon daw dili na maantos ang mga problema, kang kinsa kita modangop alang sa tabang?
17 Ang mga pagsulay mahimong motungha kon mausab ang mga kahimtang sa kinabuhi. Makaatubang tingalig mga problema ang usa ka magtiayon kon aduna na silay mga anak. Mahimong masakit ug grabe ang kapikas o usa ka anak. Kinahanglan tingaling atimanon ang tigulang na nga mga ginikanan. Basin maglain na ug puyo ang dagko nang mga anak. Basin makapahinabo usab ug mga kausaban ang mga pribilehiyo ug mga kaakohan sa kongregasyon. Kini nga mga kausaban mahimong makahatag ug kapit-os ug kabalaka sa magtiayon.
18 Kon daw dili ka na makaantos tungod sa mga problema sa kaminyoon, unsay angay nimong buhaton? (Prov. 24:10) Ayawg surender! Gusto gayod ni Satanas nga mobiya ang usa ka alagad sa Diyos gikan sa putling pagsimba. Apan mas gusto niya nga mahitabo kana sa magtiayon. Busa, himoa ang imong maarangan aron padayon nimong mahuptan diha sa imong kaminyoon ang tulo ka bakukon nga pisi. Ang Bibliya naundan ug mga asoy sa mga tawo nga nagpabiling matinumanon bisan pag nakasinatig grabeng pagsulay. Pananglitan, sa usa ka okasyon, si David nangaliyupo kang Jehova nga nag-ingon: “Pakitai ako ug kaluoy, Oh Diyos, tungod kay ang may-kamatayong tawo . . . nagalupig kanako.” (Sal. 56:1) Ikaw ba mibating gilupigan sa imong isigkatawo? Kon mobati kag kapit-os tungod sa imong palibot, hinumdomi nga si David nakabatog kusog aron makalahutay ug ikaw makahimo usab niana. Nag-ingon si David: “Nagpakisayod ako kang Jehova, ug gitubag niya ako, ug giluwas niya ako gikan sa tanan kong gikalisangan.”—Sal. 34:4.
Dugang nga mga Panalangin
19. Sa unsang paagi kita makasukol sa mga pag-atake ni Satanas?
19 Niining panahon sa kataposan, ang bana ug asawa kinahanglang “magpadayon sa paghupay sa usag usa ug sa paglinig-onay sa usag usa.” (1 Tes. 5:11) Hinumdomi nga si Satanas padayong nangangkon nga tungod lang sa kahakog nga kita nagmaunongon kang Jehova. Siya mogamit sa bisan unsang paagi, lakip na sa pagdaot sa kaminyoon, aron atong biyaan ang Diyos. Aron kita makasukol sa mga pag-atake ni Satanas, kinahanglang bug-os kitang mosalig kang Jehova. (Prov. 3:5, 6) Si Pablo misulat: “Sa tanang butang ako adunay kusog pinaagi kaniya nga naghatag ug gahom kanako.”—Filip. 4:13.
20. Unsang mga panalangin ang matagamtam kon anaa si Jehova sa kaminyoon?
20 Daghang panalangin ang matagamtaman kon anaa ang Diyos sa kaminyoon. Kana ang nasinati ni Joel ug sa iyang asawa sulod sa 51 ka tuig. Si Joel miingon: “Ako mapasalamaton gayod kang Jehova tungod sa akong asawa ug sa among malipayong panag-uban. Siya buotan kaayo nga asawa.” Unsa ang ilang sekreto? “Kami kanunayng maningkamot nga magmaluloton, magmapailobon, ug magmahigugmaon sa usag usa.” Walay usa kanato karon ang makahimo niana sa hingpit nga paagi. Bisan pa niana, maningkamot gayod kita sa pagpadapat sa mga prinsipyo sa Bibliya ug sa paglangkit kang Jehova diha sa atong kaminyoon. Kon buhaton nato kana, ang atong kaminyoon mahisamag “tulo ka bakukon nga pisi [nga] dili daling mabugto.”—Eccl. 4:12.
Nahinumdom Ka Ba?
• Unsay kahulogan sa paglangkit kang Jehova diha sa kaminyoon?
• Unsay angayng buhaton sa mga magtiayon kon motungha ang mga problema?
• Unsaon nato pagkahibalo kon ang Diyos anaa ba sa kaminyoon?
[Mga Pangutana sa Pagtuon]
[Mga hulagway sa panid 18]
Ang pag-ampo nga magkauban motabang sa mga magtiayon sa pagsagubang sa malisod nga mga kahimtang