Boloka “Lenti la Meloxô e Meraro” la Lenyalo le Tiile

“Lenti la meloxô e meraro xa le fo kxaoxa.”​—MMO. 4:12.

1. Ke mang yo a tlemagantšego batho ba babedi ba pele ka lenyalo?

GE A feditše go hlola dimela le diphoofolo, Jehofa Modimo o ile a bopa motho wa pele, e lego Adama. Modimo ka morago o robaditše Adama boroko bjo bogolo, gomme a diriša kgopo ya Adama go mo direla mothuši yo a mo lebanego. Ge Adama a bona mothuši yoo, o ile a re: “Byalo xomme šó, e lexo lešapô la mašapô a-ka, le nama ya nama ya-ka.” (Gen. 1:27; 2:18, 21-23) Jehofa o ile a bontšha gore o thekga tokišetšo ye ka go tlemaganya batho ba pele ba babedi le go ba šegofatša.—Gen. 1:28; 2:24.

2. Sathane o kgonne bjang go lohlanya Adama le Efa?

² Ka manyami, go se go ye kae lenyalo leo Modimo a le rulagantšego le ile la hlaselwa. Bjang? Motho yo kgopo wa moya, yo a ilego a bitšwa Sathane, o ile a fora Efa gore a je sehlare seo se bego se ileditšwe banyalani ba. Ke moka, Adama o ile a thekga mosadi wa gagwe go rabeleng kgahlanong le tshwanelo ya Modimo ya go buša le tlhahlong ya gagwe ya go loka. (Gen. 3:1-7) Ge Jehofa a botšiša banyalani bao gore ba dirile’ng, go bile molaleng gore tswalano ya bona e be e šetše e senyega. Adama o ile a sola mosadi wa gagwe, a re: “Mosadi yo O mmeilexo xore a bê le nna, ké yêna a mphilexo sehlare seo, ka ja.”—Gen. 3:11-13.

3. Ke kgopolo efe e fošagetšego yeo Bajuda ba bangwe ba ilego ba e phatlalatša?

³ Nywaga-kgolo e latetšego go tloga ka nako yeo, Sathane o be a dutše a diriša mekgwa e fapa-fapanego ya boradia go phatlalatša go se kwane gare ga balekane lenyalong. Ka mohlala, ka dinako tše dingwe o dirišitše baetapele ba bodumedi go phatlalatša pono ya lenyalo yeo e sego ya Mangwalo. Baetapele ba bangwe ba Bajuda ba ile ba theoša ditekanyetšo tša Modimo, ba dumelela banna go hlala basadi ba bona ditabeng tše nyenyane tše bjalo ka go noka letswai le lentši ka dijong. Eupša Jesu o ile a bolela gore: “Mang le mang yo a hlalago mosadi wa gagwe ge e se ka lebaka la bootswa, a nyala yo mongwe, o a hlotlola.”—Mat. 19:9.

4. Thulaganyo ya lenyalo e hlasetšwe bjang lehono?

⁴ Sathane o sa tšwela pele a leka go kgaola tlemo ya lenyalo. Manyalo a bosodoma, balekane ba dulago gotee ba se ba nyalana gotee le ditlhalo tšeo go lego bonolo go di hwetša di bontšha gore o a atlega boemong bjo. (Bala Baheberu 13:4.) Ka ge re le Bakriste, re ka dira’ng go efoga go tutuetšwa ke pono e lego gona e fošagetšego ya mabapi le lenyalo? A re hlahlobeng dika tše dingwe tša lenyalo leo le thabišago le le le atlegago.

Boloka Jehofa Lenyalong

5. Ke’ng seo se bolelwago ke polelwana “meloxô e meraro,” mabapi le lenyalo?

⁵ Gore lenyalo le atlege, Jehofa o swanetše go ba karolo ya lona. Lentšu la gagwe le re: “Lenti la meloxô e meraro xa le fo kxaoxa.” (Mmo. 4:12) Polelwana “meloxô e meraro” ke ya seswantšhetšo. Ge polelwana ye e dirišwa lenyalong, e akaretša monna le mosadi, e lego ditlhale tše pedi tša mathomo tšeo di ohlilwego, bao ba logagantšwego le tlhale ya motheo, e lego Jehofa Modimo. Go tlemaganywa le Modimo go nea banyalani matla a go lebeletšana le mathata, gomme ke senotlelo sa go hwetša lethabo le legolo lenyalong.

6, 7. (a) Ke’ng seo Bakriste ba ka se dirago go kgonthišetša gore Modimo o ba gona lenyalong la bona? (b) Ke’ng seo kgaetšedi yo mongwe a se tšeelago godimo mabapi le monna wa gagwe?

⁶ Eupša ke’ng seo balekane ba lenyalo ba ka se dirago go kgonthišetša gore lenyalo la bona le swana le lenti la melogo e meraro? Mopsalme Dafida o opetše ka gore: “Ke kxahlwa ke xo dira tše di thabêlwaxo ke Wêna Modimo wa-ka; molaô  wa xaxo o dula ò le pelong ya-ka.” (Ps. 40:8) Ka mo go swanago, go rata ga rena Modimo go re tutueletša go mo hlankela ka pelo e feletšego. Ka gona, balekane ba swanetše go hlagolela tswalano e borutho le Jehofa le go thabela go dira thato ya gagwe. Le gona, balekane ba lenyalo ba swanetše go katanela go matlafatša lerato la balekane ba bona la go rata Modimo.—Die. 27:17.

⁷ Ge e ba molao wa Modimo o tloga o le ka dipelong tša rena, dika tše bjalo ka tumelo, kholofelo le lerato di tla bonagala gomme di tla thuša go matlafatša tlemo ya lenyalo. (1 Bakor. 13:13) Mokriste yo a bitšwago Sandra, yo a nago le nywaga e 50 a nywetšwe, o re: “Seo ke se ratago ka monna wa-ka ke tlhahlo le keletšo ya gagwe ya moya le lerato leo a ratago Jehofa ka lona, e lego leo le tiilego go feta leo a nthatago ka lona.” Lena banna ba lego lenyalong, na go ka bolelwa se se swanago ka lena?

8. Ke’ng seo se nyakegago gore re ‘boelwe ke tše botse’ lenyalong?

⁸ Bjalo ka banyalani, na dilo tša moya le dikgahlego tša Mmušo di tla pele bophelong bja lena? Go feta moo, na o lebelela molekane wa gago e le modirišani wa gago go hlankeleng Jehofa? (Gen. 2:24) Kgoši e bohlale Solomone e ngwadile gore: “Boló ké mola è le ba babedi, e sexo o tee; ké bôná ba tl’o xo boèlwa ké tše botse ka boitapišô.” (Mmo. 4:9) Ee, monna le mosadi ba swanetše go šoma ka thata e le gore ba ‘boelwe ke tše botse,’ e lego tlemo e lerato le e swarelelago yeo e šegofatšwago ke Modimo.

9. (a) Banna ba na le boikarabelo bofe? (b) Go ya ka Bakolose 3:19, monna o swanetše go swara mosadi wa gagwe bjang?

⁹ Boiteko bjoo monna le mosadi ba bo dirago go fihlelela seo Modimo a se nyakago ke sona se se bontšhago ge e ba Modimo a le lenyalong goba go se bjalo. Banna ba na le boikarabelo bjo bogolo bja go hlokomela malapa a bona ka dilo tša moya le tša nama. (1 Tim. 5:8) Le gona ba kgothaletšwa gore ba naganele dinyakwa tša maikwelo tša basadi ba bona. Go Bakolose 3:19, re bala gore: “Lena banna, tšwelang pele le rata basadi ba lena gomme le se ke la ba galefela o šoro.” Seithuti se sengwe sa Beibele se hlalositše gore polelwana “galefela o šoro” e akaretša “go ba botša mantšu a hlabago, goba go ba betha, le go se ba bontšhe maikwelo a borutho, tlhokomelo, thušo, tšhireletšo le thekgo.” Go molaleng gore boitshwaro bjo bjalo bo ka se swanele ka lapeng la Mokriste. Monna yo a dirišago bohlogo bja gagwe ka tsela e lerato o dira gore mosadi wa gagwe a ikemišetše go ikokobetša.

10. Basadi ba Bakriste ba swanetše go bontšha boemo bofe bja kgopolo?

¹⁰ Basadi ba Bakriste bao ba nyakago gore Jehofa a dule a le lenyalong la bona ba swanetše go phela ka ditekanyetšo tša Modimo. Moapostola Paulo o ngwadile gore: “Basadi ba ikokobeletše banna ba bona go etša ge ba ikokobeletša Morena, gobane monna ke hlogo ya mosadi wa gagwe go etša ge Kriste le yena e le hlogo ya phuthego.” (Baef. 5:22, 23) Sathane o forile Efa, a phatlalatša maaka a gore go ipuša ka ntle le Modimo go tla tliša lethabo le le sa felego. Ka ge go le molaleng, moya wa go ipuša ga bjale o bonagala manyalong a mantši. Lega go le bjalo, go basadi bao ba ratago Modimo, go ikokobeletša bohlogo ga se selo se se thata. Ba gopola gore Jehofa o dirile gore Efa e be “modiriši” goba mothuši wa monna wa gagwe, e lego boemo bjoo go lego molaleng gore Modimo o bona bo hlomphega. (Gen. 2:18) Mosadi wa Mokriste yo a amogelago thulaganyo ye ka go rata ruri ke “’ala” sa monna wa gagwe.—Die. 12:4.

11. Ke’ng seo ngwanabo rena yo mongwe a boletšego gore se thušitše lapa la gagwe?

¹¹ Selo se sengwe seo se ka thušago banyalani go dira gore Modimo a dule a le lenyalong la bona ke gore ba ithute Lentšu la Modimo ba le gotee. Gerald, yo a bilego lenyalong le le thabišago ka nywaga e 55, o re: “Selo sa bohlokwa lenyalong leo le atlegilego ke go bala le go ithuta Beibele gotee.” O oketša ka gore, “Go dira dilo le le gotee, kudu-kudu tša moya, go dira gore balekane ba batamelane kudu, le go batamela Jehofa.” Go ithuta Beibele gotee, go thuša lapa go gopola ditekanyetšo tša Jehofa, go matlafatša tswalano ya lona le Yena, e bile go le thuša go dira tšwelopele ya moya.

12, 13. (a) Ke ka baka la’ng go rapela gotee go le bohlokwa go banyalani? (b) Ke mediro efe e mengwe ya moya yeo e matlafatšago ditlemo tša lenyalo?

¹² Le gona, balekane ba lenyalo ba thabilego ba rapela gotee. Tlemo ya bona ya lenyalo e ka  matlafala ge monna a ‘tšholla pelo ya gagwe’ mabapi le maemo ao a sego a tlwaelega ao a tšwelelago maphelong a bona. (Ps. 62:8) Ka mohlala, ka morago ga ge le kgopetše tlhahlo go Ramatla-ohle, go tla ba bonolo kudu go beela go se kwane le ge e le gofe ga lena ka thoko! (Mat. 6:14, 15) Ka go dumelelana le thapelo yeo, e tla ba mo go swanetšego gakaakang gore molekane yo mongwe a ikemišetše go thuša yo mongwe, gotee le go ‘tšwela pele ba kgotlelelana gomme ba lebalelana ka bolokologi.’ (Bakol. 3:13) Gopola gore thapelo ke sešupo sa go ithekga ka Modimo. Kgoši Dafida o boletše gore: “Mahlô a diphedi tšohle a lebeletše Wêna.” (Ps. 145:15) Ge re rapela Modimo re e-na le kholofelo, dipelaelo tša rena di a fokotšega, ka ge re tseba gore ‘o a re hlokomela.’—1 Pet. 5:7.

¹³ Tsela e nngwe e bohlokwa ya go boloka Jehofa lenyalong ke ya go ba gona dibokeng tša phuthego le go šoma gotee bodireding. Dibokeng tša rena, banyalani ba ithuta kamoo ba ka lwantšhago “maano a bohwirihwiri” ao Sathane a a dirišago go aroganya malapa. (Baef. 6:11) Le gona monna le mosadi bao ba šomago gotee bodireding gantši ba ithuta go ba “ba tiilego [le] ba ba sa šišinyegego.”—1 Bakor. 15:58.

Ge go Tsoga Mathata

14. Ke dilo dife tšeo di ka bakago kgateletšo lenyalong?

¹⁴ Ke therešo gore ditšhišinyo tše di lego ka mo godimo di ka kwagala e se tše difsa, eupša ke ka baka la’ng o sa boledišane le molekane wa gago ka tšona? Bona ge e ba go e-na le seo se nyakago go lokišwa lenyalong la gago. Lega go le bjalo, Beibele e lemoša gore gaešita le bao ba dirilego gore Modimo e be karolo ya lenyalo la bona ba tla “ba le tlaišego nameng.” (1 Bakor. 7:28) Ka baka la go se phethagale ga batho, tutuetšo ya lefase le leo le se nago molao le ka baka la diteko tša Diabolo, gaešita le manyalo a bahlanka ba Modimo ba botegago a ka ba kgateletšong e kgolo. (2 Bakor. 2:11) Eupša Jehofa o re thuša go lebeletšana le kgateletšo e bjalo. Ee, o a re thuša. Monna yo a botegago Jobo o ile a lahlegelwa ke diruiwa tša gagwe, bahlanka ba gagwe gotee le bana ba gagwe. Lega go le bjalo Beibele e re: “Jobo, le xe dilô tšeo di mo wetše tšohle, xa a ka a senya a tsôta Modimo.”—Jobo 1:13-22.

15. Kgatelelo e ka baka gore batho ba itshware bjang, gomme balekane ba ka lebeletšana bjang le boemo bjo bjalo?

¹⁵ Ka lehlakoreng le lengwe mosadi wa Jobo o ile a bolela le yena a re: “A O sa fêla O tieletše bothakxa  bya xaxo? Laêla Modimo O ikhwêlê!” (Jobo 2:9) Ee, ge masetlapelo goba maemo a mangwe ao a lego thata a tsoga, kgatelelo ya maikwelo yeo e bakwago ke maemo a bjalo e ka dira gore re dire dilo re sa nagane. Monna yo bohlale o ile a lemoga gore “kgatelelo e ka gafiša yo bohlale.” (Mmo. 7:7, NW) Ge e ba molekane wa gago a go botša mantšu a hlabago ka baka la mathata goba “kgatelelo,” leka go dula o thekgile ditho. Go arabela ka tsela e swanago go ka dira gore yo mongwe goba bobedi bja lena le bolele dilo tšeo di ka dirago gore boemo bo gakale. (Bala Psalme 37:8.) Ka gona hlokomologa ‘polelo e gakantšhago’ le ge e le efe yeo e ka bakwago ke go gakanega goba go nyama.—Jobo 6:3.

16. (a) Mantšu a Jesu a hwetšwago go Mateo 7:1-5 a šoma bjang lenyalong? (b) Ke ka baka la’ng teka-tekano e le bohlokwa gakaakaa lenyalong?

¹⁶ Balekane ba swanetše go ba le ditebelelo tše di kwagalago. Molekane yo mongwe a ka lemoga dika tše itšego tše sa kgahlišego tša yo mongwe gomme a ipotša gore, ‘Nka mo fetola.’ Ka lerato le go se fele pelo, o ka kgona go thuša molekane wa gago go dira diphetogo ganyenyane-ganyenyane. Lega go le bjalo, o se ke wa lebala gore Jesu o swantšhitše motho yo a šetšago mafokodi a manyenyane a yo mongwe le motho yo a bonago “lehlokwa” ka leihlong la ngwanabo eupša a palelwa ke go lemoga “kota” ka leihlong la gagwe. Jesu o re kgothaditše ka gore: “Tlogelang go ahlola gore le se ahlolwe.” (Bala Mateo 7:1-5) Se ga se bolele gore mafokodi a magolo a swanetše go tshedišwa mahlo. Robert yo a bilego lenyalong ka nywaga e 40, o boletše gore: “Go boledišana ka bolokologi le ka potego le go amogela dipono tše kwagalago go ka nyaka gore balekane ba dire diphetogo maphelong a bona.” Ka gona e ba yo a leka-lekanego. Go e na le go ngongorega ka dika tšeo o ka dumago gore molekane wa gago a be le tšona, ithute go amogela le go thabela dika tše dibotse tšeo ga bjale a nago le tšona.—Mmo. 9:9.

17, 18. Ge mathata a gola, re ka hwetša kae thušo?

¹⁷ Diteko di ka tšwelela ge maemo a bophelo a fetoga. Banyalani ba ka lebeletšana le ditlhohlo ge ba e-ba le bana. Molekane goba ngwana a ka babja o šoro. Batswadi ba tšofetšego ba ka nyaka tlhokomelo e kgethegilego. Bana ba gotšego ba ka dula kgole kudu le gabo bona. Go phetha dikabelo tša phuthego go ka tšweletša diphetogo tše dingwe. Diphetogo tše ka moka di ka baka kgateletšego le dipelaelo lenyalong.

¹⁸ Ke’ng seo o ka se dirago ge e ba kgateletšego lenyalong la gago e dira gore o ikwe o se sa kgona go kgotlelela? (Die. 24:10) O se ke wa langwa! Ga go na seo se ka thabišago Sathane go feta go bona ge yo mongwe wa bahlanka ba Modimo a tlogela borapedi bjo bo sekilego. O tla thaba kudu le go feta ge banyalani ba ka dira bjalo. Ka baka leo, dira sohle seo o ka se kgonago go kgonthišetša gore lenyalo la gago le dula le e-na le melogo e meraro. Beibele e na le dipego tše dintši tša bao ba ilego ba dula ba botega go sa šetšwe diteko tše šoro. Ka mohlala, lebakeng le lengwe Dafida o ile a tšhollela Jehofa sa mafahleng a gagwe, a re: “Nkgaugele hle Modimo, gobane motho wa nama le madi . . . o dulela go nkgatelela.” (Ps. 56:1, NW) Na o ile wa ikwa o gateletšwe ke “motho wa nama le madi”? Go sa šetšwe gore kgateletšego yeo o e kwago e tšwa go motho yo o sa mo tlwaelago go yo a lego kgaufsi le wena, gopola: Dafida o ile a hwetša matla a go kgotlelela, le wena o ka a hwetša. Dafida o itše: “Morêna mola kè mo nyaka ó nkwile, a mphološa mo xo tšohle tše ke bexo ke di šia.”—Ps. 34:4.

Ditšhegofatšo tše Oketšegilego

19. Re ka phema bjang ditlhaselo tša Sathane?

¹⁹ Mo nakong ye ya bofelo, balekane ba lenyalo ba swanetše go “tšwela pele ba homotšana e bile ba agana.” (1 Bathes. 5:11) O se ke wa lebala, Sathane o sa dutše a kgomaretše la gore re botegela Jehofa ka baka la boithati. O tla diriša mekgwa ka moka yeo a ka e kgonago go roba potego  ya rena ya go botegela Modimo, go akaretša le go senya manyalo. Gore re fenye ditlhaselo tša Sathane, re swanetše go bota Jehofa ka mo go feletšego. (Die. 3:5, 6) Paulo o ngwadile gore: “Dilong tšohle ke na le matla ka baka la yo a mphago matla.”—Bafil. 4:13.

20. Ke ditšhegofatšo dife tšeo di tlišwago ke go boloka Modimo e le karolo ya lenyalo?

²⁰ Ditšhegofatšo tšeo di tlišwago ke go dira gore Modimo e be karolo ya lenyalo la rena ke tše dintši. Se e bile therešo go Joel le mosadi wa gagwe yo a bilego le yena ka nywaga e 51. O re: “Ke leboga Jehofa ka mehla bakeng sa mosadi wa-ka le tswalano ya rena e thabišago. E bile molekane yo a swanetšego.” Sephiri sa bona ke sefe? “Ka mehla re be re leka go bontšhana botho, go se fele pelo, le lerato.” Ga go le o tee wa rena yo a ka bontšhago seo ka mo go phethagetšego mo tshepedišong ye ya dilo. Lega go le bjalo, a re šomeng ka thata go diriša melao ya Beibele ya motheo le go boloka Jehofa e le karolo ya lenyalo la rena. Ge re dira bjalo, gona lenyalo la rena le tla swana le “lenti la meloxô e meraro [leo le ka se kego la] fo kxaoxa.”—Mmo. 4:12.

Na o a Gopola?

• Ke’ng seo se bolelwago ke go dira gore Jehofa e be karolo ya lenyalo?

• Balekane ba lenyalo ba swanetše go dira’ng ge mathata a tšwelela?

• Re tseba bjang ge Modimo e le karolo ya lenyalo?

[Dipotšišo tša Thuto]

[Diswantšho go letlakala 18]

Go rapela ba le gotee go thuša balekane ba lenyalo go lebeletšana le maemo a thata