Sukli ang “Espiritu sa Kalibotan”
Sukli ang “Espiritu sa Kalibotan”
“Atong nadawat, dili ang espiritu sa kalibotan, kondili ang espiritu nga gikan sa Diyos.”—1 COR. 2:12.
1, 2. (a) Nganong gigamit kaniadto ang langgam nga canary diha sa mga minahan sa Britanya? (b) Unsang mga kapeligrohan ang giatubang sa mga Kristohanon?
SA 1911, ang mga awtoridad sa Britanya nagpasakag balaod nga manalipod sa kinabuhi sa mga minero ug karbon. Ang matag minahan kinahanglang magbaton ug duha ka langgam nga gitawag ug canary. Unsay katuyoan niini? Kon adunay sunog diha sa minahan, dalhon sa mga tigsalbar ang mga langgam diha sa tunel. Kon makahilo ang hangin, kining mga langgama maapektohan dayon, ug mahulog pa gani sa ilang gibatogan. Importante kaayo nga dalhon sa mga tigsalbar kining mga langgama aron mailhan dayon nila ang maong kapeligrohan ug malikayan kana. Kon wala kini, mahimong mawad-an silag panimuot ug mamatay nga wala mahibalo nga nahiloan diay sila.
2 Sa espirituwal nga diwa, ang kahimtang sa mga Kristohanon susama sa maong mga minero. Ngano man? Sa dihang gihatag ni Jesus ang sugo ngadto sa iyang mga tinun-an maylabot sa pagsangyaw sa maayong balita sa tibuok kalibotan, siya nahibalo nga maladlad sila sa makadaot nga impluwensiya ni Satanas ug sa espiritu sa kalibotan. (Mat. 10:16; 1 Juan 5:19) Si Jesus nabalaka pag-ayo sa iyang mga tinun-an mao nga sa gabii una siya mamatay, siya miampo sa iyang Amahan: “Naghangyo ako kanimo, dili nga kuhaon sila gikan sa kalibotan, kondili nga bantayan sila tungod sa usa nga daotan.”—Juan 17:15.
3, 4. Unsang pasidaan ang gihatag ni Jesus sa iyang mga tinun-an, ug nganong interesado kita niana?
3 Si Jesus nagpasidaan sa iyang mga sumusunod bahin sa makamatay nga epekto sa makadaot nga impluwensiya sa ilang palibot. Ang iyang mga pulong makahuloganon kaayo alang kanato nga nagkinabuhi sa kataposang mga adlaw niini nga sistema sa mga butang. Iyang giawhag ang iyang mga tinun-an: “Magpadayon sa pagtukaw . . . aron molampos kamo sa pag-ikyas niining tanang butanga nga gitakdang mahitabo, ug sa pagbarog atubangan sa Anak sa tawo.” (Luc. 21:34-36) Apan ikalipay nga si Jesus nagsaad usab nga ang iyang Amahan magtaganag balaang espiritu aron ipahinumdom kanila ang espirituwal nga mga butang ug tabangan sila nga makapabiling nagtukaw ug lig-on sa espirituwal.—Juan 14:26.
4 Motabang ba usab ang balaang espiritu kanato karon? Kon oo, unsay kinahanglan natong buhaton aron madawat kini? Unsa ang espiritu sa kalibotan, ug sa unsang paagi kini nagalihok? Ug sa unsang paagi kita makasukol sa espiritu sa kalibotan?—Basaha ang 1 Corinto 2:12.
Balaang Espiritu o Espiritu sa Kalibotan?
5, 6. Unsay mahimo sa balaang espiritu alang kanato, apan unsay kinahanglan natong buhaton aron madawat kini?
5 Ang balaang espiritu wala lamang itagana sa unang siglo. Kini mabatonan usab karon ug makahatag kanatog kusog sa pag-alagad ug sa pagbuhat kon unsay maayo. (Roma 12:11; Filip. 4:13) Kini usab makapatungha diha kanato ug maayong mga hiyas sama sa gugma, kalulot, ug pagkamaayo, nga bahin sa “bunga sa espiritu.” (Gal. 5:22, 23) Apan, dili ipugos ni Jehova nga Diyos ang iyang balaang espiritu niadtong dili buot modawat niana.
6 Nan, makataronganon nga mangutana kita, ‘Unsay angay nakong buhaton aron ako makadawat sa balaang espiritu?’ Ang Bibliya nagpakita nga adunay daghang butang nga atong mahimo. Ang usa ka hinungdanong lakang mao ang paghangyo niana sa Diyos. (Basaha ang Lucas 11:13.) Ang laing hinungdanong lakang mao ang pagtuon ug pagpadapat sa tambag nga makaplagan diha sa dinasig-sa-espiritu nga Pulong sa Diyos. (2 Tim. 3:16) Siyempre, ang basta pagbasa lang sa Bibliya dili garantiya nga madawat sa usa ang espiritu sa Diyos. Apan kon tun-an gayod sa usa ka sinserong Kristohanon ang Pulong sa Diyos, iyang masabtan ang mga pagbati ug panglantaw nga gibanaag diha niana. Hinungdanon usab nga atong dawaton si Jesus ingong tinudlong hawas ni Jehova, ug nga pinaagi kaniya gitagana sa Diyos ang iyang espiritu. (Col. 2:6) Busa, buot natong ipahiuyon ang atong kinabuhi sa panig-ingnan ug mga pagtulon-an ni Jesus. (1 Ped. 2:21) Kon kita maningkamot sa pagsundog kang Kristo, ato gayong madawat ang balaang espiritu.
7. Sa unsang paagi giimpluwensiyahan sa espiritu sa kalibotan ang mga tawo?
7 Sa kasukwahi, ang espiritu sa kalibotan nag-impluwensiya sa mga tawo sa pagsundog sa personalidad ni Satanas. (Basaha ang Efeso 2:1-3.) Kining espirituha naglihok sa daghang paagi. Sumala sa atong makita karon, ang espiritu sa kalibotan nagdasig sa mga tawo sa pagsupak sa mga sukdanan sa Diyos. Kini nagpasiugda sa ‘tinguha sa unod ug sa tinguha sa mga mata ug sa mapagawalong pagpasundayag sa mga kahinguhaan sa kinabuhi sa usa.’ (1 Juan 2:16) Kini mobungag unodnong mga buhat, sama sa pakighilawas, idolatriya, espiritismo, pangabugho, pagsinta sa kasuko, ug paghuboghubog. (Gal. 5:19-21) Kini usab nagpasiugdag apostatang mga ideya nga nagpasipala kon unsay balaan. (2 Tim. 2:14-18) Dayag nga kon magpaimpluwensiya ang usa ka tawo sa espiritu sa kalibotan, iyang gisundog ang personalidad ni Satanas.
8. Unsang desisyon ang kinahanglan natong himoon?
8 Dili gayod nato kalikayan nga kita maladlad sa tanang matang sa impluwensiya. Ang matag usa kanato kinahanglang mopili kon unsay magkontrolar kaniya—ang balaang espiritu ba o ang espiritu sa kalibotan. Kadtong naimpluwensiyahan sa espiritu sa kalibotan mahimong makalingkawas niini ug magpagiya sa balaang espiritu. Apan mahimo usab nga kasukwahi niana ang mahitabo. Kadtong dugay nang gigiyahan sa balaang espiritu mahimong malit-agan sa espiritu sa kalibotan. (Filip. 3:18, 19) Tagdon nato kon sa unsang paagi kita makasukol sa espiritu sa kalibotan.
Ilha ang Unang mga Timailhan
9-11. Unsa ang pipila ka timailhan nga kita naimpluwensiyahan na sa espiritu sa kalibotan?
9 Ang mga minero sa Britanya nga gihisgotan ganina naggamit ug langgam aron ila dayong mailhan kon makahilo ba ang hangin. Kon makita sa usa ka minero nga mahulog ang langgam sa gibatogan niini, timailhan kana nga kinahanglan siyang molihok dayon aron dili mamatay. Sa espirituwal nga diwa, unsa ang unang mga timailhan nga kita naimpluwensiyahan na sa espiritu sa kalibotan?
10 Sa dihang kita nakakat-on sa kamatuoran ug nagpahinungod sa atong kinabuhi kang Jehova, tingali kanunay kitang nagbasa sa Bibliya. Tingali makanunayon ug sinsero ang atong pag-ampo. Ganahan usab tingali kitang motambong sa mga tigom, ug nag-isip niana nga makapalagsik, sama sa usa ka bugnawng tubig alang sa tawong giuhaw. Tungod niana, kita nakalingkawas sa espiritu sa kalibotan.
11 Adlaw-adlaw pa ba gihapon kitang nagbasa sa Bibliya? (Sal. 1:2) Makanunayon ug kinasingkasing pa ba kitang nag-ampo? Ganahan pa ba gihapon kitang motambong sa tanang tigom kada semana? (Sal. 84:10) O basin wala na nato buhata ang pipila niini? Siyempre, daghan tingali kitag mga atimanonon, ug lisod ang pagmentinar ug maayong rutina sa espirituwal. Apan kon nabatasan na nato nga magpabaya sa espirituwal, wala kaha kita maimpluwensiyahi sa espiritu sa kalibotan? Molihok ba dayon kita aron ibalik ang atong maayong rutina sa espirituwal?
Pagbantay nga ‘Dili Mabug-atan’
12. Gipasidan-an ni Jesus ang iyang mga tinun-an nga ‘magbantay’ maylabot sa unsa, ug ngano?
12 Unsa pay atong buhaton aron kita makasukol sa espiritu sa kalibotan? Sa wala pa tambagi ni Jesus ang iyang mga tinun-an nga “magpadayon sa pagtukaw,” iya silang gipasidan-an sa pipila ka kapeligrohan. Siya miingon: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat kaninyo ingon nga usa ka lit-ag.”—Luc. 21:34, 35.
13, 14. Unsa nga mga pangutana ang angay natong isukna sa atong kaugalingon bahin sa pagkaon ug pag-inom?
13 Hunahunaa ang maong pasidaan. Gihukman ba ni Jesus ang pagkaon ug pag-inom? Wala! Siya nahibalo sa mga pulong ni Solomon: “Nasayran ko nga walay mas maayo alang [sa anak sa mga tawo] kay sa pagmaya ug sa pagbuhat ug maayo samtang buhi pa; ug usab nga ang matag tawo mokaon ug moinom ug magpahimulos ug maayo sa tanan niyang kahago. Kini ang gasa sa Diyos.” (Eccl. 3:12, 13) Apan, si Jesus nahibalo nga ang espiritu sa kalibotan nag-impluwensiya sa mga tawo sa pagpatuyang nianang mga butanga.
14 Unsaon nato pagseguro nga wala kita mahiloi sa espiritu sa kalibotan maylabot sa kapeligrohan sa pagpalabig kaon ug inom? Mahimo natong pangutan-on ang atong kaugalingon: ‘Unsay akong sanong sa dihang makabasa kog tambag sa Bibliya o sa atong mga publikasyon bahin sa pagkaulitan? Mobati ba ko nga dili kana hinungdanon o sobra ra ka estrikto, ug pakamatarongon ang akong gibuhat? a Unsa ang akong panglantaw sa tambag nga dili magpatuyang ug inom ug maglikay sa “paghuboghubog”? Ibalewala ba nako ang maong tambag, ug mobati nga kana dili mapadapat kanako? Kon tambagan ko sa uban bahin niini, mangatarongan ba ko o kaha masuko? Ako bang ginaimpluwensiyahan ang uban nga dili tagdon ang maong tambag sa Bibliya?’ Oo, ang tinamdan sa usa maoy magpaila kon siya naimpluwensiyahan na sa espiritu sa kalibotan.—Itandi ang Roma 13:11-14.
Likayi nga Madaog sa Kabalaka
15. Si Jesus nagpasidaan batok sa unsang kiling sa tawo?
15 Ang laing hinungdanong lakang sa pagsukol sa espiritu sa kalibotan mao ang dili pagpadaog sa kabalaka. Si Jesus nahibalo nga ingong dili-hingpit nga mga tawo, kita adunay kiling nga mabalaka sa atong inadlaw-adlaw nga mga panginahanglan. Sa kamahigugmaon, iyang giingnan ang iyang mga tinun-an: “Hunong na sa pagkabalaka.” (Mat. 6:25) Normal ra nga mabalaka kita sa mas hinungdanong mga butang sama sa pagpahimuot sa Diyos, pagtuman sa Kristohanong mga responsabilidad, ug pagtagana sa mga panginahanglan sa atong pamilya. (1 Cor. 7:32-34) Nan, unsay atong makat-onan sa pasidaan ni Jesus?
16. Unsay epekto sa espiritu sa kalibotan diha sa daghang tawo?
16 Ang espiritu sa kalibotan nagpasiugda sa mapagawalong pagpasundayag sa mga kahinguhaan sa usa. Tungod niini, daghang tawo ang nabalaka pag-ayo. Patuohon kita niining mga tawhana nga ang kuwarta makahatag ug kasegurohan ug ang pagkatawo sa usa masukod, dili sa iyang espirituwal nga mga hiyas, kondili sa gidaghanon sa iyang kabtangan. Kadtong nalimbongan niini maulipon sa pagpangagpas sa salapi ug kanunayng mangandoy sa kinabag-ohang mga butang. (Prov. 18:11) Kon sayop ang panglantaw sa usa sa materyal nga mga butang, siya madaog sa kabalaka ug dili mouswag sa espirituwal.—Basaha ang Mateo 13:18, 22.
17. Unsay atong buhaton aron dili kita madaog sa kabalaka?
17 Dili kita madaog sa kabalaka kon atong sundon ang sugo ni Jesus: ‘Padayon sa pagpangita pag-una sa gingharian ug sa pagkamatarong sa Diyos.’ Si Jesus nagpasalig nga kon buhaton nato kini, ang mga butang nga atong gikinahanglan igadugang ra. (Mat. 6:33) Sa unsang paagi atong ikapakita nga kita nagtuo niini? Ang usa ka paagi mao ang pagpangita pag-una sa pagkamatarong sa Diyos—ang pagsunod sa sukdanan sa Diyos maylabot sa pinansiyal nga mga butang. Pananglitan, dili kita manglimbong sa atong mga buluhisan o mohimog “ginagmay” nga pagpamakak diha sa atong mga transaksiyon sa negosyo. Maningkamot gayod kita nga bayran ang atong mga utang, ug himoong ‘Oo ang atong Oo.’ (Mat. 5:37; Sal. 37:21) Dili tingali modato ang usa tungod sa iyang pagkamatinud-anon, apan iyang mabatonan ang pag-uyon sa Diyos ug ang hinlong tanlag, ug dili usab siya madaog sa kabalaka.
18. Unsang panig-ingnan ang gihatag ni Jesus kanato, ug sa unsang paagi kita makabenepisyo kon ato kanang sundogon?
18 Ang pagpangita pag-una sa Gingharian nagpasabot nga atong unahon ang mas hinungdanong butang. Tagda ang panig-ingnan ni Jesus. Dihay mga higayon nga nagsul-ob siyag mahalon nga sinina. (Juan 19:23) Siya usab mikaon ug miinom uban sa iyang mga higala. (Mat. 11:18, 19) Apan ang materyal nga mga butang ug kalingawan lamas lamang ug dili panguna sa iyang kinabuhi. Ang pagkaon ni Jesus mao ang pagbuhat sa kabubut-on ni Jehova. (Juan 4:34-36) Kita magmalipayon gayod kon atong sundogon ang panig-ingnan ni Jesus! Kita malipay sa pagtabang sa magul-anong mga tawo nga mahupayan sa Kasulatan. Atong maangkon ang gugma ug pagpaluyo sa kongregasyon. Mapalipay usab nato ang kasingkasing ni Jehova. Kon atong unahon ang mas hinungdanong mga butang, dili kita maulipon sa kalingawan ug sa atong mga kabtangan. Hinunoa, ang maong mga butang mahimong galamiton lamang sa atong pag-alagad kang Jehova. Kon mas madasigon kita sa buluhaton sa Gingharian, mas sayon alang kanato ang pagsukol sa espiritu sa kalibotan.
Padayong ‘Hunahunaa ang Espiritu’
19-21. Sa unsang paagi kita ‘maghunahuna kanunay sa espiritu,’ ug nganong angay natong buhaton kana?
19 Ang atong lihok nag-agad sa kon unsay anaa sa atong hunahuna. Ang dili maayong mga buhat sagad maoy resulta sa unodnong panghunahuna. Busa, si apostol Pablo nagpahinumdom kanato nga kinahanglang bantayan ang atong hunahuna. Siya misulat: “Kadtong nahiuyon sa unod nagtumong sa ilang mga hunahuna diha sa mga butang sa unod, apan kadtong nahiuyon sa espiritu diha sa mga butang sa espiritu.”—Roma 8:5.
20 Sa unsang paagi atong malikayan nga maimpluwensiyahan ang atong hunahuna ug lihok sa espiritu sa kalibotan? Kinahanglang atong panalipdan ang atong hunahuna ug maningkamot gayod nga dili maladlad niana. Pananglitan, dili nato tugotan nga ang atong hunahuna mahugawan sa mga salida nga nagpasiugda ug imoralidad ug kapintasan. Atong nasabtan nga ang balaan, o hinlo, nga espiritu sa Diyos dili molihok sa hugaw nga hunahuna. (Sal. 11:5; 2 Cor. 6:15-18) Gawas pa, ang espiritu sa Diyos molihok lamang diha sa atong hunahuna kon kita regular nga magbasa sa Bibliya, mag-ampo, mamalandong, ug motambong sa mga tigom. Kita giyahan sa balaang espiritu kon kita regular nga makigbahin sa buluhatong pagsangyaw.
21 Kinahanglan gayod nga atong suklan ang espiritu sa kalibotan ug ang unodnong tinguha nga gipasiugda niini. Ang pagbuhat niana takos gayod sa atong paningkamot tungod kay si Pablo nag-ingon, “ang paghunahuna sa unod nagkahulogan ug kamatayon, apan ang paghunahuna sa espiritu nagkahulogan ug kinabuhi ug kalinaw.”—Roma 8:6.
[Footnote]
a Ang pagkaulitan maoy kinaiya nga mailhan pinaagi sa kadalo ug pagpatuyag kaon. Kini dili makita sa gidak-on sa lawas sa usa, kondili sa kon unsay iyang tinamdan maylabot sa pagkaon. Busa ang usa ka tawo nga normal ug gidak-on sa lawas, o niwang pa gani, mahimo gihapong ulitan. Sa laing bahin, ang usa tambok tingali tungod sa abnormalidad sa lawas o kaha mao kanay ilang kaliwat. Ang hinungdanong butang dili ang gidak-on sa iyang lawas kondili ang kaulit niya sa pagkaon.—Tan-awa ang “Mga Pangutana Gikan sa mga Magbabasa” sa Nobyembre 1, 2004, nga gula sa Ang Bantayanang Torre.
Nahinumdom Ka Ba?
• Aron makadawat sa balaang espiritu, unsay atong buhaton?
• Unsa ang pipila ka paagi nga ang espiritu sa kalibotan makaimpluwensiya kanato?
• Sa unsang paagi kita makasukol sa espiritu sa kalibotan?
[Mga Pangutana sa Pagtuon]
[Hulagway sa panid 21]
Sa dili pa mosulod sa trabaho o sa klase, pag-ampo alang sa balaang espiritu
[Mga hulagway sa panid 23]
Kinahanglang huptan natong hinlo ang atong hunahuna, magmatinud-anon diha sa negosyo, ug magmakasaranganon sa buhat