Aníkena jaiko ko múndope ojeikoháicha

‘Noñemeʼẽivaʼekue ñandéve ko yvy arigua espíritu, oñemeʼẽ guei ñandéve Ñandejára espíritu sánto.’ (1 COR. 2:​12, JMP.)

1, 2. a) Mbaʼérepa ojeguerekovaʼerã mokõi guyraʼi umi minas de carbónpe? b) Mbaʼérepa Ñandejára siervokuéra oikotevẽ avei ojesalva?

 AÑO 1911-pe umi mburuvicha Gran Bretañaygua oguenohẽ peteĩ léi osalva hag̃ua umi ombaʼapóvape minas de carbónpe. Pe léi heʼi umi mínape ojeguerekovaʼerãha mokõi guyraʼi. Maʼerãpa upéva? Peichahágui okáiramo pe mína, umi ohóva oporosalva ogueraha hag̃ua umi guyraʼi. Koʼãva ningo ohetũramo pe gás sapyʼaitépe ikangypa ha omano. Péicha, oikuaáta hikuái igás mbaretépa upe mína ha osẽvaʼerãha upégui. Haʼekuéra oikuaa upe gás ikatuha ojuka chupekuéra. Ha ndogueraháiramo umi guyraʼi sapyʼaitépe ikangypáta ha omanóta hikuái.

² Upéicha avei Ñandejára siervokuéra oĩ peteĩ múndo añáme oikotevẽhápe ojesalva. Jahechamína mbaʼérepa. Jesús heʼírõ guare hemimboʼekuérape opredika hag̃ua oparupiete ko  yvy ape ári, oikuaamavaʼekue voi ko múndo oĩha Satanás ha idemoniokuéra poguýpe (Mat. 10:16; 1 Juan 5:19). Jesús ningo ojepyʼapyeterei hemimboʼekuérare. Upévare omano mboyvemi oñemboʼe Jehovápe péicha: ‘Ndajeruréi ndéve reipeʼa hag̃ua chupekuéra ko múndogui, ajerure guei, Nde reñangarekomi hag̃ua hesekuéra iñañávagui’ (Juan 17:​15, ÑÑB).

3, 4. Mbaʼépa Jesús oavisa porã vaʼekue hemimboʼekuérape? Ha mbaʼérepa ñanepytyvõ Jesús heʼivaʼekue?

³ Jesús oavisa porã vaʼekue hemimboʼekuérape ikatuha ikangy ijerovia ha upévare avei ikatuha omano hikuái. Jaikógui ára pahápe tuichaiterei ñanepytyvõ Jesús heʼivaʼekue: ‘Peñeñangarekóke, ikatu hag̃uáicha pejehekýi opa mbaʼe vai oikótavagui ha peime hag̃ua Ñandejára Raʼy renondépe’ (Luc. 21:​34-36). Péro Jesús opromete avei hemimboʼekuérape Itúva omboutaha ijespíritu sánto oipytyvõ hag̃ua chupekuéra. Upéicharõ imanduʼáta hikuái oaprendevaʼekuére, oñeñangarekóta ha ojepytaso mbaretéta Ñandejára ykére (Juan 14:26).

⁴ Ñandévepa ikatu avei ñanepytyvõ Ñandejára espíritu sánto? Mbaʼépa jajapovaʼerã omeʼẽ hag̃ua ñandéve? Mbaʼépa pe ‘yvy arigua espíritu’? Mbaʼépa ojapo ha mbaʼéichapa ikatu ñañemoĩ pe ‘yvy arigua espíriture’? (Jaleemína 1 Corintios 2:12.)

Ñandejára espíritu sánto ha ‘ko yvy arigua espíritu’

5, 6. Mbaʼéichapa ñanepytyvõ avei koʼág̃a rupi Ñandejára espíritu sánto? Ha mbaʼépa jajapovaʼerã Ñandejára omeʼẽ hag̃ua ñandéve ijespíritu sánto?

⁵ Pe espíritu sánto ningo ndahaʼeivaʼekue umi kristiáno ypykuépe g̃uarãnte. Koʼág̃a rupi ñanepytyvõ avei Ñandejára espíritu sánto jajapo hag̃ua iporãva ha ñambaʼapo kyreʼỹ hag̃ua Jehová servísiope (Rom. 12:11; Fili. 4:13). Ñandejára espíritu sánto ikatu avei ñanepytyvõ japorohayhu, ñandepyʼaporã ha ñanembaʼeporã hag̃ua ñande rapichakuérandi (Gál. 5:​22, 23). Jehová ningo nomeʼẽmoʼãi ñandéve mbaretépe ijespíritu sánto ndajaipotáiramo.

⁶ Iporã ningo ñañeporandu mbaʼépa jajapovaʼerã Ñandejára omeʼẽ hag̃ua ñandéve ijespíritu sánto. La Biblia heʼi mbaʼépa jajapovaʼerã. Ñepyrũrã jajerurevaʼerã chupe (jaleemína Lucas 11:13). Jastudiavaʼerã avei la Biblia ha jajapo heʼíva pype (2 Tim. 3:16). Ndahaʼeihína jaleénte haguére la Biblia Jehová omeʼẽtamava ñandéve ijespíritu sánto. Omeʼẽ guei umi kristiáno ipyʼaporãvape ostudiáva la Biblia, oñehaʼãva oñandu ha opensa Ñandejáraicha. Avei Ñandejára omeʼẽ hag̃ua ñandéve ijespíritu jajeroviavaʼerã ombou hague Jesúspe ha hérape jajerurevaʼerãha espíritu sánto (Col. 2:6). Ñañehaʼãvaʼerã jajapo Jesús heʼivaʼekue ha jasegi iñehémplo (1 Ped. 2:21). Ñañehaʼã meméramo jajapo opa mbaʼe Jesús ojapo haguéicha, Ñandejára omeʼẽvéta ñandéve ijespíritu sánto.

7. Mbaʼépa ojapouka yvyporakuérape ‘ko yvy arigua espíritu’?

⁷ ‘Ko yvy arigua espíritu’ katu omokyreʼỹ yvyporakuérape osegi hag̃ua Satanás ehémplo (jaleemína Efesios 2:​1-3). Ha opa rupiete ojekuaa mbaʼéichapa ojagarrapa Satanás espíritu, ojapouka heta mbaʼe vai. Omokyreʼỹ yvyporakuérape opuʼã hag̃ua Ñandejárare, oiko hag̃ua umi mbaʼe ‘oipotáva ha oguerohorýva rapykuéri, ha oñemombaʼeguasu hag̃ua umi mbaʼe orekóvare’ (1 Juan 2:16). Omokyreʼỹ avei opavavépe hekovai hag̃ua, omombaʼe hag̃ua taʼangakuéra, espiritísmo, taryrýi, ipochyrei ha okaʼu hag̃ua (Gál. 5:​19-21). Ha oiporu avei umi apóstata oñeñeʼẽ vai hag̃ua Ñandejárare (2 Tim. 2:​14-18). Jahejáramo ‘ko yvy arigua espíritu’ ñanesãmbyhy, jajoguáta Satanáspe.

8. Mbaʼépa káda uno odesidivaʼerã?

⁸ Káda uno odesidivaʼerã ohejátapa Ñandejára espíritu sánto oisãmbyhy chupe térãpa ‘ko yvy arigua espíritu’. Péro opavave oĩva ‘ko yvy arigua espíritu’ poguýpe ojeíramo upégui, ikatu oheja oisãmbyhy chupe Ñandejára espíritu sánto. Ha ikatu oĩ avei ohejáva Jehovápe hoʼa rupi Satanás ñuhãme ha upéicha oñemoĩ ipoguýpe (Fili. 3:​18, 19). Jahechamíta mbaʼéichapa ikatu ñañemoĩ ‘ko yvy arigua espíriture’.

 Jahechakuaákena ñanemokangypañaína ‘ko yvy arigua espíritu’

9-11. Mbaʼéichapa ikatu jahechakuaa jahejapañaína ñanemokangy ‘ko yvy arigua espíritu’?

⁹ Umi ombaʼapóva mínape ningo oguerahavaʼerã mokõi guyraʼi opilla hag̃ua igás mbaretépa upe mína. Ha ohechávo hikuái ikangypa umi guyraʼi, oikuaa pyaʼe osẽvaʼerãha upégui ani hag̃ua omano. Ha ñande mbaʼéichapa ikatu jahechakuaa jahejapañaína ñanemokangy ‘ko yvy arigua espíritu’?

¹⁰ Jaikuaa ypýrõ guare Ñandejára rembipota ha ñañemeʼẽ chupe, oiméne pyʼỹinte jalee la Biblia ha ñañemboʼe ñande pyʼaite guive. Ha oiméne javyʼaiterei rreunionhápe ñanemokyreʼỹ ha ñanembopyʼaguapy haguére. Koʼã mbaʼe ningo ñanepytyvõ jajei hag̃ua ‘ko yvy arigua espíritu’ poguýgui.

¹¹ Ñañehaʼãpa gueteri jalee la Biblia káda día? (Sal. 1:2.) Pyʼỹintepa ñañemboʼe Jehovápe ñandepyʼaite guive? Ñamombaʼépa umi rreunión ha ndajafaltái voi ni peteĩme? (Sal. 84:10.) Ñanekangypañaína koʼã mbaʼépe? Jaikuaa ningo hetaitereiha ñane rembiapo ha ñanekaneʼõiterei, upévare ijetuʼu jepi ñamotenonde hag̃ua Ñandejára servísio. Péro jahechakuaáramo ñanekangyha peteĩ mbaʼépe, oiméne jahejañaína mbeguekatúpe ñanesãmbyhy ko yvy arigua espíritu. Upéicharõ, ñañehaʼãmbaitékena ñaime porã jey Ñandejárandi.

‘Peñeñangarekóke ani peʼa mbaʼeveichagua mbaʼe vaípe’

12. Mbaʼépa Jesús heʼi hemimboʼekuérape ha mbaʼérepa?

¹² Mbaʼépa ikatu avei jajapo ñañemoĩ hag̃ua ‘ko yvy arigua espíriture’? Jesús heʼi hemimboʼekuérape ojehekyivaʼerãha heta mbaʼe vaígui ko múndo añáme. Upéi heʼi chupekuéra: ‘peñeñangarekóke peikóvo’. Ha heʼive chupekuéra: ‘Peñeñangarekóke, ani peʼa mbaʼeveichagua mbaʼe vaípe. Ani peiko tembiʼu ha víno rapykuéri, térã pejepyʼapyeterei heta mbaʼére, ha pehaʼarõʼỹve jave og̃uahẽ pe Ñandejára oporohustaha ára’ (Luc. 21:​34, 35, ÑÑB).

13, 14. Mbaʼépa iporã ñañeporandu?

¹³ Jesús piko heʼíraʼe pe téystope naiporãiha jakaru ha jaʼu vevída? Nahániri. Haʼe ningo oikuaa porã Salomón heʼivaʼekue: ‘Aikuaa iporãveha javyʼa ha jajapo iporãva, jakaru ha jaʼu víno, ha javyʼa ñanerembiapokuére. Jaikuaa rupi Ñandejára voi omeʼẽha ñandéve’ (Ecl. 3:​12, 13). Péro Jesús oikuaa avei ko yvy arigua espíritu omokyreʼỹha yvyporakuérape okaru rasa ha okaʼu hag̃ua.

¹⁴ Mbaʼéichapa ikatu jahechakuaa ñaimepañaína ‘ko yvy arigua espíritu’ poguýpe? Jahechakuaápa jakaru ha jaʼu rasaha vevída? Iporã ñañeporandu: “Mbaʼéichapa añeñandu alee jave la Bíbliape térã puvlikasionkuérape, naiporãiha akaru rasa? Amboyképa umi konsého aimoʼãgui vyroreinteha? Ambojápa  oimeraẽ mbaʼére ani hag̃ua ajapo umi konsého? * Mbaʼépa apensa umi konsého heʼívare naiporãiha haʼu rasa vevída térã akaʼu? Aimoʼãpa ndahaʼeiha chéve g̃uarã umi konsého? Ha oĩramo heʼíva ojepyʼapyha cherehe haʼueterei rupi vevída, chepochýtapa hese ha nahenduséi heʼíva? Haʼépa che rapichakuérape umi konsého vyroreinteha?”. Umi mbaʼe ñapensa ha ñañandúvare jahechakuaáta ñaimepahína ‘ko yvy arigua espíritu’ poguýpe (ñambojojami Romanos 13:​11-14).

‘Anive jajepyʼapyeterei’

15. Mbaʼépa Jesús heʼi ndajajapoivaʼerãha?

¹⁵ Ñañemoĩ hag̃ua ‘ko yvy arigua espíriture’ ñañehaʼãvaʼerã avei ani jajepyʼapyeterei. Jesús oikuaa ñaneimperfékto rupi, oimeraẽ mbaʼérente jajepyʼapyha. Upévare heʼi hemimboʼekuérape: ‘Anive pejepyʼapy’ (Mat. 6:25). Ndaivaíri ningo jajepyʼapy umi mbaʼe iñimportantevévare. Pór ehémplo, ñaime porãpa Ñandejára ndive, jajapópa ñane rembiapo Jehová servísiope, ha ñamoĩpa ñane famíliape hemikotevẽ (1 Cor. 7:​32-34). Upéicharõ mbaʼére piko Jesús ndoipotái jajepyʼapy?

16. Mbaʼe ojapo hag̃uápa omokyreʼỹ yvyporakuérape ‘ko yvy arigua espíritu’?

¹⁶ ‘Ko yvy arigua espíritu’ ningo omokyreʼỹ yvyporakuérape ‘oñemombaʼeguasu hag̃ua umi mbaʼe orekóvare’. Ha heta oĩ avei oipotágui umi mbaʼe, ojepyʼapyetereíva. Ko múndope oñemombaʼe la héntepe ipláta ha oiko porã haguére, ndahaʼéi oñehaʼã haguére oservi porã Jehovápe. Ha umi opensáva upéicha ombaʼapo vúrroicha ipláta heta hag̃ua ha noñekontentái voi ohupytývare, oipotapotave guei umi mbaʼe tuichavéva ha osẽramovéva (Pro. 18:11). Koʼã mbaʼe oipyʼapyeterei chupekuéra ha ombotapykue Jehová servísio (jaleemína Mateo 13:​18, 22).

17. Mbaʼépa jajapovaʼerã ani hag̃ua ñambotapykue Jehová servísio?

¹⁷ Ani hag̃ua ñambotapykue Jehová servísio, jajapovaʼerã Jesús heʼivaʼekue ‘pejepyʼapyvaʼerã Ñandejára sãmbyhýre ha pejapo hembipota’. Haʼe opromete omeʼẽtaha ñandéve ñane remikotevẽ jajapóramo upéicha (Mat. 6:33). Mbaʼéichapa jahechaukáta jajeroviaha ko promésare? Upéva ikatúta jajapo ñamotenondéramo ‘Ñandejára hustísia’ jaiporu jave pláta. Pór ehémplo, japaga ñane impuésto ha nañandejapúi ñavendéta jave peteĩ mbaʼe. Ñañehaʼãmbaite japaga tekotevẽhápe guive. Ha jadevéramo ñande rapichápe ha jaʼe chupe japagataha, jajapovaʼerã ñapromete hagueichaite (Mat. 5:37; Sal. 37:21). Jajapóramo upéicha ikatu nañandeplatahetái, péro ñaime porãta Ñandejára ndive, ñane konsiénsia potĩta ha ndajajepyʼapyetereimoʼãi.

18. Mbaʼe ehémplopa Jesús omoĩ ñandéve? Mbaʼépa ikatu jahupyty ñañehaʼãramo jasegi Jesús ehémplo?

¹⁸ Ñamotenonde hag̃ua Ñandejára Rréino jahechakuaavaʼerã mbaʼépa iñimportanteve ñande rekovépe. Jahechami koʼág̃a Jesús ehémplo. Jaikuaa ningo haʼe oñemonde porã jepi hague (Juan 19:23). Haʼe okaru ha hoʼumivaʼekue víno iñamigokuérandi (Mat. 11:​18, 19). Jesúspe g̃uarã ningo vyʼarã ha pláta haʼete vaʼekue juky omoheʼẽ porãva peteĩ tembiʼu. Péro chupe g̃uarã iñimportanteve ojapo Jehová rembipota (Juan 4:​34-36). Javyʼave ningo ñañehaʼãramo jasegi Jesús ehémplo. Javyʼa ñaipytyvõ rupi ñande rapichakuérape oikuaa hag̃ua Ñandejárape. Avei kongregasiónpe oĩ heta ermáno ñanderayhúva, ha iporãveha katu ñambovyʼa Jehovápe. Ñamotenondéramo Ñandejára Rréino ndajaikomoʼãi vyʼarã ha pláta rapykuéri. Jaiporúta guei umíva jaservi porãve hag̃ua Jehovápe. Ñamotenondéramo kyreʼỹme ñanderekovépe Ñandejára Rréino ikatu ñañemoĩ ‘ko yvy arigua espíriture’.

 Jaikókena Ñandejára espíritu sánto oipotaháicha

19-21. Mbaʼépa ikatu jajapo ani hag̃ua ñapensa ha jaiko ‘ko yvy arigua espíritu’ oipotaháicha? Ha mbaʼépa jahupytýta jajapóramo upéicha?

¹⁹ Ñande ningo katuete ñapensa raẽ jajapo mboyve peteĩ mbaʼe. Ñaimoʼãramo sapyʼánte jajapoha peteĩ mbaʼe ñapensaʼỹre, ndahaʼéi upéicha, katuete ñapensaʼimi jepe hese. Upévare apóstol Pablo heʼi ñandéve ñañatende hag̃ua mbaʼe rehépa ñapensa. Haʼe ohai: ‘Umi oikóva hete rembipota rapykuéri, ojepyʼamongeta ha ojapose hete rembipota. Ha umi oikóva Ñandejára espíritu oipotaháicha katu, oñehaʼã ombovyʼa Ñandejárape’ (Rom. 8:​5, JMP).

²⁰ Mbaʼépa ikatu jajapo ani hag̃ua ñapensa ha jaiko ‘ko yvy arigua espíritu’ oipotaháicha? Jaiporavo porã vaʼerã umi mbaʼe jahecháva ha ñahendúva ani hag̃ua ñapensa umi mbaʼe vai ko múndope oñepensáva. Pór ehémplo, ndajahechaivaʼerã pelíkula itieʼỹva térã ivioléntova. Jaikuaa porã ningo Ñandejára nomeʼẽmoʼãiha ñandéve ijespíritu sánto ñapensáramo ivaívarente (Sal. 11:5; 2 Cor. 6:​15-18). Péro akóinte ñañemboʼéramo, jalee la Biblia ha jajepyʼamongeta hese, jaha meméramo rreunionhápe ñahendúta iporãva ha Jehová omeʼẽta ñandéve ijespíritu. Upéicha avei japredika pyʼỹiramo, jajapotañaína Ñandejára espíritu oipotaháicha.

²¹ Jasegíkena ñañemoĩ ‘ko yvy arigua espíriture’ ha umi mbaʼe vai ñande rete oipotávare. Apóstol Pablo heʼi: ‘Pe ñande rete rembipota rapykuéri jeiko ningo ogueru ñemano, péro espíritu sánto katu omeʼẽ jeikove ha pyʼaguapy’. Upévare ñañehaʼãkena jahupyty umi mbaʼe porã (Rom. 8:​6, JMP).

[Nóta]

Ñanemanduʼápa koʼã mbaʼére?

• Mbaʼépa jajapovaʼerã Ñandejára omeʼẽ hag̃ua ñandéve ijespíritu sánto?

• Mbaʼéichapa ikatu jahechakuaa ñaimepañaína ‘ko yvy arigua espíritu’ poguýpe?

• Mbaʼéichapa ikatu ñañemoĩ ‘ko yvy arigua espíriture’?

[Porandu ñahesaʼỹijóva]

[Nóta oĩva taʼanga ndive páhina 26]

Jaha mboyve ñambaʼapo térã koléhiope jajerurékena Jehovápe ijespíritu sánto

[Nóta oĩva taʼanga ndive páhina 28]

Ñapensavaʼerã iporãvarente, japaga ñapromete hag̃uéicha, ha ani jakaru ha jaʼu rasa vevída