“Inai Tanobada Ena Lauma” Dadaraia
“Inai Tanobada Ena Lauma” Dadaraia
“Ita be inai tanobada ena lauma ita abia lasi. To Dirava dekena amo ia mai Lauma ita abia vadaeni.”—1 KOR. 2:12.
1, 2. (a) Dahaka dainai guna Britain ena maini dekenai manu rua idia gaukaralaia? (b) Dahaka ese Keristani taudia ia hadikaia diba?
LAGANI 1911 ai, Britain ena gavamani ese coal maini dekenai idia gaukara taudia gimaia totona taravatu ta ia karaia. Maini ta ta dekenai manu rua idia noho be gau badana. Dahaka totona? Bema maini lalonai lahi ia vara, durua taudia ese unai manu rua be maini lalonai do idia abia diho. Unai manu maragidia idia moru neganai, durua taudia do idia diba maini lalonai gesi dikana ia noho. Unai dainai manu rua idia abia diho be gau badana. Bema lasi, durua taudia be do idia mase diba, badina do idia diba lasi idia be gesi dikana idia hahodia.
2 Unai haheitalai hegeregerena, Keristani taudia be dika idia davaria diba. Edena dala ai? Iesu ia diba ena hahediba taudia ese sivarai namona be tanobada dekenai idia harorolaia neganai, dika do idia davaria, badina Satani bona tanobada ena lauma ese inai tanobada idia biagua. (Mat. 10:16; 1 Ioa. 5:19) Iesu be iena hahediba taudia ia laloa bada dainai ena hanuaboi ginigabena ai, Tamana ia guriguri henia ia gwau: “Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria.”—Ioa. 17:15.
3, 4. Iesu ese dahaka sisiba ia henia ena hahediba taudia dekenai, bona ia be mai anina bada ita dekenai, a?
3 Iesu ese ena murinai idia raka taudia ia hadibaia bema inai tanobada gaudia dekenai idia naria namonamo lasi, dika idia davaria diba. Ena hereva be mai anina bada ita dekenai, badina ita be inai nega dokona ai ita noho. Ena hahediba taudia ia sisiba henidia: “Umui noga noho . . . unai amo do idia vara gaudia amo do umui heau mauri bona taunimanima ena Natuna ena vairanai do umui gini.” (Luka 21:34-36, NW ) To, Iesu be idia dekenai ia gwauhamata, ena Tamana ese lauma helaga do ia siaia, bona unai ese do ia durudia Iesu ia hadibaia gaudia idia laloatao, do idia laloparara idia be nega dikana ai idia noho, bona idia gini goada totona.—Ioa. 14:26.
4 To, hari ita be edena bamona? Hari, unai lauma helaga ese ita ia durua diba, a? Bema ita ia durua diba, vadaeni dahaka ita karaia diba lauma helaga ita abia totona? Tanobada ena lauma be dahaka bona edena dala ai ia gaukara? Bona edena dala ai tanobada ena lauma ita dadaraia diba?—1 Korinto 2:12 duahia.
Lauma Helaga o Tanobada Ena Lauma?
5, 6. Edena dala ai lauma helaga be ita ia durua? Dahaka ita karaia lauma helaga ena heduru ita abia totona?
5 Lauma helaga be aposetolo edia negai sibona ia gaukara lasi, to hari danu ita ia durua diba. Dirava ena lauma helaga ese ita ia hagoadaia iena hesiai gaukara ita karaia bona kara namo ita hahedinaraia totona. (Roma 12:11; Fili. 4:13) Danu, ita ia durua diba kara namodia hegeregere lalokau, hebogahisi bona kara maoromaoro ita hahedinaraia totona. (Gal. 5:22, 23) To, Iehova Dirava be idia ura lasi taudia dekenai iena lauma helaga ia henia lasi.
6 Vadaeni, reana do ita henanadai, ‘Dahaka lau karaia diba lauma helaga ena heduru lau abia totona?’ Baibel ese ia hahedinaraia, gau haida ita karaia be namo. Mai anina bada dalana ta be: Lauma helaga totona Dirava do ita noia. Unai be auka lasi. (Luka 11:13 duahia.) Dala ma ta be, Dirava ena lauma helaga ese ia torea Baibel do ita stadilaia bona badinaia. (2 Tim. 3:16) Oibe, Baibel idia duahia kava sibona taudia be lauma helaga ena heduru idia abia lasi. To, Keristani tauna momokanina be Baibel ia stadilaia neganai, ia ese Dirava ena hemami bona lalohadai ia lalopararalaia diba. Danu, gau badana be ita abia dae Iesu be Iehova ese ia abia hidi gwaukau tauna bona iena lauma helaga be Iesu amo ia hahedinaraia. (Kol. 2:6) Unai dainai, namona be iseda mauri lalonai Iesu ena hadibaia herevadia bona haheitalai ita badinaia. (1 Pet. 2:21) Iseda kara ita haidaua bona Iesu ena kara ita hahedinaraia momo neganai, lauma helaga ese ita do ia durua bada.
7. Tanobada ena lauma be edena dala ai taunimanima edia lalona ia veria?
7 To, tanobada ena lauma be idau, ia ese taunimanima edia lalona ia veria Satani ena kara idia hahedinaraia totona. (Efeso 2:1-3 duahia.) Tanobada ena lauma be dala idauidau ai ia gaukara. Hari inai negai, ia ese Dirava ena taravatu gwau-edeede henia karana ia havaraia. Ia ese “tauanina ena ura dikadia, matabodaga ena ura dikadia, bona hekokoroku” karadia ia havaraia. (1 Ioa. 2:16) Ia ese tauanina ena kara ia havaraia, hegeregere heudahanai, kaivakuku tomadiho henia kara, meamea, mama, heai, badu bona inuinu kekero. (Gal. 5:19-21) Ia ese aposteit taudia edia hereva ia habadaia, bona edia hereva ese Dirava ena lalohadai idia hakoikoia. (2 Tim. 2:14-18) Oibe, bema tau ta be tanobada ena lauma ese ia havaraia karadia ia karaia, ia be Satani ena kara ia hahedinaraia unai.
8. Ita ibounai vairanai be edena abia hidi ia noho?
8 Ita vairanai be abia hidi gaudia rua idia noho—lauma helaga eiava tanobada ena lauma. Ita ta ta be edena do ita abia hidi iseda mauri ia biagua totona? Tanobada ena lauma ese ia biagua taudia haida be unai lauma idia dadaraia, bona lauma helaga ese idia ia hakaua diba. To danu, Keristani taudia haida be Dirava ena lauma helaga idia dadaraia, bona tanobada ena lauma ese idia ia tarapua diba. (Fili. 3:18, 19) Mani ita tahua edena dala ai tanobada ena lauma ita dadaraia diba.
Toa amo Diba Ita Abia
9-11. Edena toa haida ese idia hahedinaraia ita be tanobada ena lauma ese ia biagua?
9 Paragraf 1 ai ita herevalaia Britain ena maini taudia be gesi dikana ia noho eiava lasi idia diba totona, manu idia gaukaralaia. Bema durua tauna ta ia itaia manu ta ia moru, ia mauri totona karaharaga kara ta ia karaia be namo. Iseda Keristani mauri lalonai, edena toa haida amo ita diba tanobada ena lauma be kahirakahira ita do ia hadikaia?
10 Nega ginigunana ai, Baibel amo hereva momokani ita dibaia bena iseda mauri ita gwauhamatalaia neganai, reana nega ibounai Baibel ita duahia. Reana, nega ibounai ita guriguri goadagoada. Bona mai moale ida kongrigeisen heboudia dekenai ita lao, badina hebou ta ta ese ita idia durua, ranu ese ranu mase tauna ia durua bamona. Unai bamona kara ese ita idia durua tanobada ena lauma ita rakatania bona ita dadaraia noho totona.
11 Hari, ita be dina ta ta ai Baibel ita duahia, a? (Sal. 1:2) Mai iseda kudouna ibounai ida Dirava ita guriguri henia hanaihanai, a? Kongrigeisen heboudia ita ura henia, bona hebou ibounai ita lao, a? (Sal. 84:10) Eiava, unai kara namodia haida ita hadokoa vadaeni? Momokani, maduna be momo dainai, nega haida reana ita be nega lasi Dirava ita tomadiho henia namonamo totona. To, bema iseda Keristani kara namodia haida ita hadokoa vadaeni, reana tanobada ena lauma ese ita ia biagua noho, a? Ita hekwarahi unai kara namodia do ita goadalaia lou totona, a?
“Emui Lalona Do Idia Guia Garina”
12. Iesu ese daika dekenai ia gwau “naria namonamo,” bona dahaka gaudia dainai do idia naria namonamo?
12 Dahaka gaudia ma haida ita karaia diba tanobada ena lauma ita dadaraia totona? Iesu ese ena hahediba taudia ia sisiba henidia do idia “noga noho,” bona ia hamaorodia gau haida dekenai do idia naria namonamo. Ia gwau: “Do umui naria namonamo, aniani momo, inuinu momo bona mauri ena lalohekwarahi amo emui lalona umui hametaua garina, bona karaharaga unai dina be umui latanai do ia ginidae tarapu ta bamona.”—Luka 21:34, 35, NW.
13, 14. Aniani momo bona kekero muramura inua karadia dekenai edena henanadai ita lalodia be namo?
13 Mani unai sisiba ita laloa. Iesu ese aniani bona inuinu gaudia moalelaia karana ia gwauraia dika, a? Lasi! Iesu be Solomona ena hereva ia diba: “Lau diba taunimanima edia dala namona tamona be inai: Do idia moale, bona idia edia mauri dina ibounai lalonai, kara namodia do idia karaia. Ita ibounai ese iseda gaukara ena anina do ita moalelaia, do ita aniani bona inuinu. Inai be Dirava ena harihari gauna.” (Had. 3:12, 13) To, Iesu ia diba tanobada ena lauma ese taunimanima edia lalona ia veria, aniani momo bona inuinu kekero karadia idia habadaia totona.
14 Edena bamona do ita diba, iseda aniani bona kekero muramura inua karadia be tanobada ena lauma ese ia biagua o lasi? Ita sibona do ita nanadaia: ‘Baibel o iseda buka bona magasin haida lalonai aniani momo karana ena sisiba lau duahia neganai, egu hemami be edena bamona? Lau gwau unai sisiba be anina lasi, auka momokani, o egu kara dainai ekskius ma haida lau gwauraia o lau gwau lau karaia karana be kerere lasi, a? * Kekero muramura sisina sibona do ita inua bona inuinu kekero karana dadaraia ena sisiba lau kamonai henia neganai, lauegu lalohadai be dahaka? Unai sisiba lau laloa bada lasi, badina lau laloa ia be anina lasi lau dekenai, a? Lau inuinu momo dainai haida ese lau idia hereva henia neganai, idia dekenai lau badu, a? Lau ese ma haida lau hamaoroa unai Baibel sisiba do idia laloa momo lasi o dadaraia totona, a?’ Oibe, tau ta ena lalohadai amo ia hedinarai diba, ia be tanobada ena lauma ese ia biagua o lasi.—Roma 13:11-14 hahegeregerea.
Laloa Momo Lasi
15. Iesu be dahaka sisiba ia henia?
15 Tanobada ena lauma ita dadaraia dalana ma ta be inai, laloa momo karana do ita dadaraia. Iesu ia diba ita be goevadae lasi taudia dainai, dina ta ta ena hekwarahi bona anina lasi gaudia idauidau ita laloa momo. Mai lalokau ida ena hahediba taudia ia sisiba henia: “Umui laloa momo lasi.” (Mat. 6:25) Vaia, ita be inai gaudia haida ita laloa momo: Ita ura Dirava ita hamoalea, Keristani maduna ita huaia bona iseda ruma bese taudia ita naria. (1 Kor. 7:32-34) Vadaeni, Iesu ena sisiba amo dahaka ita dibaia?
16. Tanobada ena lauma ese edena dala ai taunimanima momo edia lalona ia veria?
16 Tanobada ena lauma ese taunimanima edia lalona ia veria edia kohu o moni idia hekokorokulaia totona, bona momo be unai kara idia laloa momo dainai idia moale lasi. Tanobada ena lauma ese inai lalohadai ia havaraia: Moni ese noho namo ia havaraia, bona Keristani kara namodia be anina lasi, to ta be mai ena kohu namodia momo herea neganai, ia be ladana bada tauna. Unai lalohadai idia abia dae taudia be kohu o moni ena hesiai taudia ai idia lao, bona idia laloa momo badina idia ura kohu matamata bona badadia ma haida do idia abia. (Aon. 18:11) Bema Keristani tauna ta ese unai lalohadai kererena ia abia dae, iena hetura karana Dirava ida ia hadikaia diba.—Mataio 13:18, 22 duahia.
17. Edena dala ai laloa momo karana ita koua diba?
17 Bema Iesu ena hahegani ita badinaia, do ita laloa momo lasi. Ia gwau: “Umui ese Dirava ena Basileia bona iena kara maoromaoro do umui tahua guna.” Iesu ia gwauhamata bema unai bamona ita karaia, Dirava ese iseda ura gaudia do ia henia. (Mat. 6:33) Edena bamona ita hahedinaraia, ita be unai gwauhamata ita abidadama henia momokani? Dala ta be inai: Dirava ena kara maoromaoro do ita tahua guna—anina be Dirava ena kara maoromaoro taravatudia moni o kohu dekenai do ita badinaia. Hegeregere, iseda takisi henia fom dekenai hereva momokani ita torea bona bisinesi lalonai koikoi karadia ita karaia lasi. Bema gau ta davana do ita karaia eiava abiatorehai ita henia lou ena gwauhamata ita karaia, vadaeni iseda “Oibe be Oibe” hegeregerena, ita hekwarahi unai ita hamomokania totona. (Mat. 5:37, NW; Sal. 37:21) Unai bamona kara maoromaoro karadia ese taga taudia ai ita idia halaoa lasi, to Dirava ena lalonamo do ita abia, iseda lalomamina do ia goeva bona do ita laloa momo lasi.
18. Edena dala ai Iesu be haheitalai namona ita dekenai, bona ia ita tohotohoa neganai dahaka namo ita davaria?
18 Basileia ita tahua guna anina be, iseda mauri lalonai mai anina bada gaudia ita atoa guna. Iesu ena haheitalai mani ita laloa. Nega haida, ia be dava bada dabua namona ia hahedokilaia. (Ioa. 19:23) Mai moale ida ena tura namodia ida ia aniani bona uaina ia inua hebou. (Mat. 11:18, 19) To iena mauri lalonai, kohu bona moale karadia be damena bamona, idia be anina bada gaudia lasi. Iesu ena aniani be Iehova ena ura ia karaia guguru. (Ioa. 4:34-36) Taunimanima ese Iesu ena mauri dalana idia tohotohoa neganai, edia mauri be namo herea! Ita moale badina lalohisihisi taudia be Baibel siri namodia amo ita durudia diba. Kongrigeisen tadikaka taihu ese ita idia lalokau henia bona durua. Bona Iehova ena kudouna ita hamoalea. Mai anina bada gaudia ita atoa guna neganai, kohu bona moale karadia ese ita idia biagua lasi. To, unai gaudia ese ita idia durua Iehova ita tomadiho henia totona. Bema iseda nega bada be Dirava ena Basileia ena gaukara ita karaia, tanobada ena lauma ese ita do ia veria diba lasi.
‘Lauma Helaga Ena Kara Karaia Noho’
19-21. Edena dala ai ‘lauma helaga dekenai ita laloa’ noho, bona dahaka dainai unai ita karaia be namo?
19 Ita laloa gaudia be iseda kara amo ita hahedinaraia. Tauanina ena ura idia laloa taudia be kavakava karadia momo idia karaia. Unai dainai, aposetolo Paulo ese ita ia sisiba henia ita laloa gaudia do ita naria namonamo. Ia gwau: “Tauanina ena kara idia karaia noho taudia ese tauanina ena ura gaudia sibona idia laloa. To Lauma Helaga ena kara idia karaia noho taudia ese Lauma Helaga ena ura gaudia sibona idia laloa.”—Roma 8:5.
20 Tanobada ena lauma ese iseda lalona bona kara idia biagua lasi totona, dahaka ita karaia be namo? Namona be iseda lalona ita gimaia bona ita laloa gaudia do ita biagua, unai amo tanobada ena lalohadai koikoidia ita dadaraia diba. Hegeregere, muvini piksa ita ura itaia neganai, matabodaga o dagedage karadia idia hahedinaraia piksa ita dadaraia, badina ita ura lasi iseda lalona do idia hadikaia. Oibe, ita laloparara, Dirava ena lauma helaga goevana be kara bodaga lalona ai do ia gaukara lasi. (Aon. 3:31; 2 Kor. 6:15-18) Danu, hanaihanai Baibel duahia karana, guriguri, laloa dobu, bona hebou lao henia karadia amo, Dirava ena lauma helaga ita boiria iseda lalona ai ia gaukara totona. Ma danu, Keristani haroro gaukara ita karaia hanaihanai neganai, ita be lauma helaga ida ita gaukara hebou unai.
21 Oibe, tanobada ena lauma bona ia havaraia tauanina ena ura dikadia do ita dadaraia. Ita hekwarahi unai do ita karaia totona, badina Paulo ia gwau, “tauanina dekenai oi laloa, be mase oi davaria, to Lauma Helaga dekenai oi laloa, be mauri bona maino oi davaria.”—Roma 8:6.
[Footnote]
^ par. 14 Mataganigani tauna be lalona dekenai ia ura dikadika aniani momo ia ania. Unai dainai, bema ita ura diba daika be mataganigani tauna, ena tauanina ia bada eiava ia maragi be gau badana lasi, to ena lalohadai aniani dekenai do ita laloa. Tau ta ena tauanina ia bada badina reana ena bese taudia be vaia unai bamona o ia be mai ena gorere ta. Gau badana be inai: Ta ena tauanina ia bada eiava maragi be anina lasi, to ia be ia ura dikadika aniani momo ia ania, a?—The Watchtower, November 1, 2004 ena “Questions From Readers” itaia.
Oi Laloatao, A?
• Lauma helaga ena heduru ita abia totona, dahaka ita karaia be namo?
• Edena dala idauidau ai tanobada ena lauma ese iseda lalona ia veria diba?
• Edena dala ai tanobada ena lauma ita dadaraia diba?
[Study Questions]
[Picture on page 21]
Gaukara o sikuli dekenai oi do lao lasi neganai, lauma helaga totona oi guriguri guna
[Pictures on page 23]
Namona be iseda lalona ia goeva, dala maorona ai bisinesi karadia ita karaia bona aniani bona inuinu momo karana do ita naria namonamo