Silarsuup anersaava akioruk

„Uagut silarsuup anersaava pinnagu Anersaaq Guutimit pisoq pissarsiaraarput.“ — 1 KORINTHIMIUT 2:12.

1, 2. (a) Sooq inimiutannguit tuluit aamarsuarsiorfiini siornatigut atorneqartarpat? (b) Kristumiut qanoq ilillutik navianartorsiorfimmiippat?

TULUIT Nunaanni 1911-mi inatsit aamarsuarsiorfinni sulisut inuunerannik annaassissutaasussaq atulersinneqarpoq. Aamarsuarsiorfiit tamarmik eqqaanni marlunnik inimiutannguaqartartussaavoq. Aamarsuarsiorfimmi ikuallattoqalerpat annaassiniartut inimiutannguit nassarlugit aamarsuarsiorfimmukassapput. Timmiaaqqat taakkua toqunartumik silaannaqarnersoq, assersuutigalugu kulilteqarnersoq, ingerlaannaq malugisinnaavaat. Toqunartumik silaannaqarsimappat timmiaaqqat inuummarliorpasilersinnaapput allaallu mitsimaffimminnit nakkarsinnaallutik. Taamatut siusissukkut mianersoqquneqarneq inuunermut pingaaruteqarluinnarpoq, kuliltemi silaannaavoq qalipaateqaranilu tipeqanngitsoq aap aappaluttortaanik timip ipiutaasartaanut silaannalersuiunnaartitsilluni toqutitsisartoq. Annaassiniartut aamarsuarsiortullu navianartoq eqqumaffiginngikkunikku ilisimajunnaassapput toqunartumillu najuussuisimanertik maluginngivillugu toqullutik.

² Kristumiut pissutsinik aamarsuarsiorfinni sulisut atugaannut assingusunik assersuutaasumik atugaqarput. Qanoq? Jiisusip ajoqersukkani nutaarsiassamik nuannersumik silarsuarmi tamarmi oqaluussissutiginneqqugamigit nalunngilaa sumiiffimmut navianartumut aallartillugit, tassa sumiiffimmut Saatanimit silarsuullu anersaavanit naalakkersorneqartumut. (Matthæusi 10:16; 1 Johannesi 5:19) Jiisusip ajoqersukkat ingerlalluarnissaat ima soqutigitigaa toqunissaminut aqaguttoq Ataataminut qilammiusumut ima qinulluni: „Qinnutinngilakka silarsuarmit peerseqqullugit, paareqqullugilli ajortumut peqqunagit.“ — Johannesi 17:15.

3, 4. Jiisusip ajoqersukkani qanoq mianersoqquai, aamma sooq tamanna ullumikkut uagutsinnut pingaaruteqarpa?

³ Jiisusip ajoqersukkani anersaakkut sininnermut toqussutaasinnaasumut assersuunneqarsinnaasup  navianaataanut mianersoqquai. Oqaasii uagutsinnut pissutsit aaqqissuussaanerata maanna atuuttup naggataatungaani inuusunut immikkut pingaaruteqarput. Ajoqersukkani ima oqaaqqissaarpai: „Mianersoritsi . . . nukissaqartitaaqqullusi pisussat suut tamaasa qimarratigisinnaaqqullugit Inuullu Ernerata saavani atasinnaaqqullusi.“ (Lukasi 21:34-36) Qujanartumilli aamma Jiisusip neriorsorpai Ataatami anersaamik illernartumik, oqaluttuarisimasaminik tamanik eqqaasitsisussamik nukittunissamullu eqqumajuarnissamullu iluaqutaasussamik, aallartitsivigiumaarai. — Johannesi 14:26.

⁴ Uagummi ullumikkut? Anersaaq illernartoq taanna aamma uagut iluaqutigisinnaavarput? Iluaqutigisinnaagutsigu, taava pisinnaajumallugu qanoq iliortariaqarpugut? Silarsuup anersaava suua? Qanoq sunniuteqartarpa, aamma qanoq ililluta silarsuup anersaava akiorsinnaavarput? — Atuaruk 1 Korinthimiut 2:12.

Anersaaq illernartoq imaluunniit silarsuup anersaava?

5, 6. Anersaaq illernartoq qanoq iluaqutigisinnaavarput, piumallugulu qanoq iliortariaqarpugut?

⁵ Ukiuni hundredelinni siullerniinnaanngitsoq anersaamik illernartumik pisoqarsinnaavoq. Ullumikkuttaaq tamatuminnga pisoqarsinnaavoq. Guutip anersaava eqqortumik iliornissamut nakussatsissutigisinnaavarput Guutimullu kiffartornissamut nukissaqalissutigisinnaallugu. (Romamiut 12:11; Filippimiut 4:13) Aamma pissuserineqartussanik pitsaasunik, soorlu asanninnermik, inussiarnisaarnermik, ajunngitsuunermillu Guutip anersaavata inerititaanut ilaasunik, uagutsinni ineriartortitsisinnaavoq. (Galatiamiut 5:22, 23) Jehovali anersaaminik illernartumik piumanngitsunut pinngitsaaliilluni tunniussineq ajorpoq.

⁶ Taamaattumik naleqqutissaaq tamatta immikkut imminut ima aperigutta: ’Guutip anersaava illernartoq piumallugu qanoq iliorsinnaavunga?’ Biibilimi ersersinneqarpoq arlalinnik iliuuseqartoqarsinnaasoq. Iliuuserineqarsinnaasoq pisariunngitsoq pingaaruteqangaartorli tassaavoq taassuminnga qinnutiginninneq. (Atuaruk Lukasi 11:13.) Aammattaaq siunnersuutit Guutip oqaasiani isumassarsiarititaasumiittut atuaqqissaarlugillu maleruarneqarsinnaapput. (2 Timotheusi 3:16) Biibilimilli atuartartut tamakkeratik Guutip anersaavanik pisarput. Guutilli oqaasia ilumoorluni atuaqqissaartaraanni misigissutsit eqqarsaatillu Guutip oqaasiani isumassarsiarititaasumiittut pigiliunneqarsinnaapput. Aamma Jehovap Jiisusimik aallartitassamisut anersaaminillu ingerlatitseqqiisartussatut toqqaasimaneranik akuerinninnissarput pingaaruteqarpoq. (Kolossemiut 2:6) Taamaattumik inuunerput Jiisusip maligassiaa ajoqersuutaalu malillugit ilusilersorusupparput. (1 Petrusi 2:21) Jiisusimik ilaarsinissarput ilungersuutiginerujartortillutigu anersaamik illernartumik tunineqarnerujartuinnassaagut.

7. Silarsuup anersaava qanoq sunniisarpa?

⁷ Silarsuulli anersaava inunnik sunniisarpoq Saatanitut pissuseqalersillugit. (Atuaruk Efesosimiut 2:1-3.) Silarsuup anersaava arlalitsigut sunniisarpoq. Guutip najoqqutassiaanut pikitsitsisoqarneranut silarsuup anersaavata pissutaasarneranut sumiluunniit uppernarsaatissaqarpoq. ’Uinngup pilerigisaanik, isit pilerigisaannik nunallu piinik usorsisimaaruteqarnermik’ siuarsaavoq. (1 Johannesi 2:16)  Aamma uinngup suliai, soorlu kinguaassiuutitigut inuunerlunneq, guutipilussiorneq, anersaarsiorneq, sinnganeq, kamajassuseq imerajunnerlu, siuarsarpai. (Galatiamiut 5:19-21) Aamma tunussisorpalaartumik, illernartunik kanngunarsaasunik, oqalutsitsisarpoq. (2 Timotheusi 2:14-18) Silarsuup anersaavanit sunnertinnerujartortilluni Saatani assiginerujartuinnarneqartarpoq.

8. Tamatta sumik aalajangigassaqarpugut?

⁸ Avataanit sunniutinut tamanut illersorneqarluni inuusoqarsinnaanngilaq. Inuit tamarmik immikkut aalajangertariaqarput sumit sunnertinniarnerlutik — anersaamit illernartumit imaluunniit silarsuup anersaavanit. Inuit maanna silarsuup anersaavanit naalakkersorneqartut tamatumannga aniguisinnaapput anersaamillu illernartumit inuunerminni siulersortilerlutik. Tamatumali akerlia aamma pisinnaavoq. Piffissap ilaani anersaamit illernartumit siulersortissimasut silarsuup anersaavanit napitinneqarsinnaapput. (Filippimiut 3:18, 19) Silarsuup anersaava qanoq akiorsinnaaneripput misissoriartigu.

Siusissukkut mianersoqqussutigineqartut eqqumaffigikkit

9-11. Silarsuup anersaavanut artorsalersimanitsinnut suut ersiutaasinnaappat?

⁹ Soorlu eqqaaneqareersoq aamarsuarsiorfinni sulisut tuluit silaannaap kulilteqarneranik siusissukkut kalerrisaarneqarsinnaaniassagamik inimiutannguit atortarpaat. Taakkua ilaata timmiaaraq mitsimavimminit nakkartoq takugaangamiuk naluneq ajorpaa inuuinnarumalluni iliuuseqapallattariaqarluni. Silarsuup anersaavanit sunnerneqalernitsinnik suna assersuutaasumik siusissukkut kalerrisaarutaasinnaava?

¹⁰ Sallusuissutit Guutip oqaasianiittut paasigatsigit Jehovamullu tunniulluinnaratta qularnanngitsumik eqiasuilluta Biibilimik atuartarlutalu Guutimut qamannga pisumik qinukulavugut. Ilagiit ataatsimiinnerinut ataatsimiigiarneq nuannaraarput taakkualu anersaakkut ineriartuutaasutut isigalugit. Taakku qilalersumut inoqajuitsumi puilasutut ipput. Tamakkua tamaasa silarsuup anersaavanit aniguinissamut tamatumanngalu nigorsimanissamut iluaqutigaavut.

¹¹ Biibilimik suli ullut tamaasa atuarniartarpugut? (Tussiaat 1:2) Eqiasuilluta qamanngalu pisumik Guutimut qinusarpugut? Ilagiit ataatsimiinnerinut ataatsimiigiartarneq nuannaraarput, taakkualu tamaasa sapaatip-akunneri tamaasa najuuffigisarpavut? (Tussiaat 84:11) Imaluunniit ileqqut pitsaasut taakkua ilaat ileqqoriunnaarsimavavut? Soorunami piffissamik nukinnillu atuinartunik pisussaaffippassuaqarpugut, aamma anersaakkut ittunik ileqqoqarluartuarnissaq unamminiarnarsinnaavoq. Ileqqorisimasavulli pitsaasut piffissap ingerlanerani ileqqoriunnaarsimagutsigik, tamanna silarsuup anersaavanut artorsalersimanitsinnik pissuteqarsinnaava? Aamma ileqqorisimasavut pitsaasut ileqqorileqqinniarlugit maanna iliuuseqarniarpugut?

’Malussarlersitaaqinak’

12. Jiisusip ajoqersukkani qanoq mianersoqquai?

¹² Silarsuup anersaava akiorniarlugu sunik allanik iliuuseqarsinnaavugut? Jiisusip ajoqersukkani ’eqqumajuaqqullugit’ oqaaqqissaaramigit navianartunut aalajangersimasunut mianersoqqoqqammerpai. Ima oqarpoq: „Mianersoritsi uummatisi malussarlersitaaqqunagit aalakoornermit [nerrersuallaarnermit, NV] imerajunnermillu inuunerullu matuma piinik isumakuluutinit, pakasarteqqunasi ullup taassuma tassanngaannaq tikiunneranit.“ — Lukasi 21:34-36.

13, 14. Nerisassanut imigassanullu tunngatillugu imminut qanoq aperisoqarsinnaava?

¹³ Mianersoqqussut taanna eqqarsaatigiuk. Jiisusip nerinermik imernermillu nuannaarutiginninneq assuaraa? Naamik! Taassuma Salomop oqaasii uku ilisimavai: „Paasivara inunnut pitsaanerpaassasoq inuunertik atorunikku nuannaarlutik inuunermilu pilluarneq nanillugu. Inuit nerillutillu imersinnaammata suleruloornermillu inerititaat inuulluutigisinnaallugit tamannaavortaaq Guutip tunissutaa.“ (Oqaluussisartup oqaasii 3:12, 13) Taamaakkaluartorli Jiisusip nalunngilaa silarsuup anersaava tamakkununnga tunngatillugu imminut naalakkersorsinnaannginnermik siuarsaasartoq.

¹⁴ Silarsuup anersaavata nerivallaarnerup imerpallaarnerullu navianartuinik takunnissinnaajunnaarsitsinnginnissaa qanoq ililluta qulakkeersinnaavarput? Imminut ima aperisinnaavugut: ’Nerivallaannginnissamut imerpallaannginnissamullu tunngasunik Biibilimi atuagassiaatitsinniluunniit atuaraangama qanoq periartarpunga? Mianersoqqussut taanna ingasattajaartutut soqutaanngitsutullu isigalugu akuerinngeqqajaasarpara, immaqa taamatut ileqqoqarninnut utoqqatsissutissarsiorlunga imaluunniit taamatut ileqqoqarnera illersorniartarlugu? *  Imigassartorneq pillugu siunnersuutit qanoq isigaakka? Imigassartortaruma, killilimmik imigassartortarpunga ’aalakoornaveersaarluinnarlungalu’? Siunnersuutit taakkua soqutaanngitsutut isigaakka isumaqarama arlaannik pissuteqartumik uannut tunnganngitsut? Imigassartornermut isiginnittaasera pillugu isumakuluutiginninnerartoqaraangat kamalertarpunga imminullu illersornialertarlunga? Allat siunnersuutinik Biibilimeersunik tamatumunnga tunngasunik pimoorusseqqunagit kajumissaartarpakka?’ Aap, silarsuup anersaavanut artorsalersimaneq isiginnittaatsimi ersertarpoq. — Naleqqiuguk Romamiut 13:11-14.

Isumakuluuteqarpallaarnaveersaarit

15. Soqqajaasarneq Jiisusip mianersoqqussutigaa?

¹⁵ Silarsuup anersaava akiorniarlugu iliuuserineqarsinnaasoq pingaarutilik alla tassaavoq isumakuluuteqarpallaarnaveersaarneq. Jiisusip nalunngilaa naammalluinnanngitsuugatta ulluinnarni nalinginnaalluinnartunik isumakuluuteqaqqajaasartugut. Ajoqersukkani asannittumik ima oqarfigai: ’Isumakuloqinasi.’ (Matthæusi 6:25) Pingaarutilinnik, soorlu Guutimut iluarisaanissamik, kristumiutut akisussaaffitsinnik isumaginninnissamik ilaquttatsinnillu isumassuinissamik, isumakuluuteqartarnerput paasinarpoq. (1 Korinthimiut 7:32-34) Taavami Jiisusip mianersoqqussutaa sumik ilinniarfigisinnaavarput?

16. Silarsuup anersaava inuppassuarnut qanoq sunniuteqartarpa?

¹⁶ Silarsuup anersaava, nunap piinik usorsisimaaruteqarnermik pingaartitsisoq, inuppassuarnik sunniisarpoq peqqinnanngitsumik isumakululersitsilluni. Silarsuarmiittut isumaqalersikkusuppaatigut aningaasat toqqissisimalersitsisartut, aamma inuup pingaaruteqassusia aalajangerneqartartoq qanoq pigisaqartigineranit pigisallu pitsaassusiannit, kristumiutut pissuserisanit pinnani. Paasinnittaatsimit tamatumannga salloqittarneqarsimasut pisuunngorumallutik imminut inussiaatinngortissapput nutaanerpaanillu annerpaanillu atortorissaarnerpaanillu pissarsinissartik isumakuluutigiuassallugu. (Ussatit 18:11) Pigisanut taama mumingatigisumik isiginnittaaseqarneq  anersaakkut ineriartorunnaassutaasumik isumakululersitsisarpoq. — Atuaruk Matthæusi 13:18, 22.

17. Qanoq ililluta isumakuluuteqarpallaarnaveersaarsinnaavugut?

¹⁷ Isumakuluuteqarpallaarnaveersaarsinnaavugut Jiisusip peqqussutaa una malikkutsigu: „Taamaattumik naalagaaffik naapertuilluassuserlu [Guutip] pia ujaqqaartuarsigik.“ Aamma neriorsoqqissaarpaatigut taamaaliorutta pisariaqartilluinnakkavut ilanngullugit uagutsinnut tunniunneqarumaartut. (Matthæusi 6:33, NV) Neriorsuummik tamatuminnga upperinninnerput qanoq ililluta ersersissinnaavarput? Ilaatigut Guutip naapertuilluassusianik ujaaseqqaarnitsigut — Guutip aningaasaqarniarnermut tunngatillugu suut eqqortuunerannut najoqqutassiaa maleruarlugu. Assersuutigalugu nammineerluta nalunaarsukkatsinni eqqunngitsunik paasissutissiineq ajorpugut niueraangattaluunniit ’salloqittaalaarneq’ ajorluta. Iliuuserisinnaasavut tamaasa iliuuserisarpavut aningaasatigut pisussaaffivut eqqortinniarlugit, akiitsunik akiliinermut tunngatillugu ’angernerput aappimik isumaqartillugu’. (Matthæusi 5:37, NV; Tussiaat 37:21) Taamatut unneqqarissaarneq immaqa pigisatigut pisuunnguutiginavianngilarput, Guutimilli akuerisaanermik ilerasuuteqannginnermillu kinguneqartarpoq assullu isumakuluuteqannginnerulersitsisarluni.

18. Jiisusi uagutsinnut qanoq maligassaalluarpa, taassuminngalu malinninnerput qanoq iluaqutigissavarput?

¹⁸ Guutip naalagaaffia ujaqqaassagutsigu eqqortumik pingaarnersiuisariaqarpugut. Jiisusip maligassiaa maluginiariaruk. Ilaannikkut atisaqartarpoq pitsaalluinnartumik sanaajusumik. (Johannesi 19:23) Ikinngutinik pitsaasunik nereqateqarneq viinnisoqateqarnerlu nuannaraa. (Matthæusi 11:18, 19) Pigisalli aliikkutassallu inuunerani pingaarnerpaajunatik akuutissatut iinnarput. Jiisusip ’nerisassaraa’ Jehovap piumasaanik iliornissaq. (Johannesi 4:34-36) Inuuneq nalerisimaarnangaassaaq Jiisusip maligassiaa malikkutsigu! Inunnik nikallungallutillu qunusiarineqartunik Allakkani allassimasut atorlugit tuppallersaanerup nuannersua misigisarparput. Ilagiit asanninnerat tapersersuinerallu malugisarparput. Aamma Jehovap uummataa nuannaartittarparput. Eqqortumik pingaarnersiuigaangatta pigisat aliikkutassallu naalagarineq ajorpavut. Kiffarisarpavulli Jehovamut kiffartornermi atortoralugit. Guutip naalagaaffianut tunngasumik suliaqarnerujartortilluta silarsuup anersaavanit ajugaaffigineqarnissarput ilimanannginnerujartuinnassaaq.

’Anersaamik eqqarsaatinniititsiuarit’

19-21. Qanoq ililluta ’anersaamik eqqarsaatitsinniititsiuarsinnaavugut’, aamma sooq taamaaliortariaqarpugut?

¹⁹ Iliuuseqannginnermi isumaliortoqartarpoq. Inuppassuit isumaatsuliornerunerartagaat amerlanertigut iliuusiusarput uinimmut atasumik eqqarsartaaseqarnermit aallaaveqartartut. Taamaattumik apustilip Paulusip eqqaasippaatigut suut eqqarsaatigisarnerlugit mianersuutigeqqullugu. Ima allappoq: „Uinik malillugu inuusut uinimmut atasut kajungerisarpaat [eqqarsaatiminniitittarpaat, NV], Anersaarli malillugu inuusut anersaamut atasut kajungerisarpaat [eqqarsaatiminniitittarpaat, NV].“ — Romamiut 8:5.

²⁰ Eqqarsaatitta — aammattaaq iliuutsitta — silarsuup anersaavanit naalakkersorneqarnissaat qanoq ililluta pinngitsoortissinnaavarput? Isumarput sorujuiartutut illugu illersortariaqarparput, silarsuup sunniiniarnerinit akornuserneqaqqunagu. Assersuutigalugu aliikkutassanik toqqaagaangatta isumarput aallakaatitanik nakuusernermik kinguaassiuutitigullu inuunerlunnermik siuarsaasunik mingutsikkumasanngilarput. Paasivarput Guutip anersaava illernarlunilu minguitsoq isumamut minguttuumut sunniuteqarnavianngitsoq. (Tussiaat 11:5; 2 Korinthimiut 6:15-18) Aammattaaq Guutip anersaava uagutsinni sunniuteqartissavarput Biibilimik atuartuarnitsigut, eqqarsaatiginneqqissaartarnitsigut, qinusarnitsigut ataatsimiigiartarnitsigullu. Aamma Guutip anersaava suleqatigisarparput kristumiutut oqaluusseqataajuartarnitsigut.

²¹ Sapinngisarput tamaat silarsuup anersaava uinngullu kajungerisai tamatuma siuarsagai akiortariaqarpavut. Ilungersornerli imminut akilersinnaavoq, Paulusimmi oqarneratut, „uinimmik eqqarsaatiniititsiuarneq toqumik kinguneqartarpoq, anersaamilli eqqarsaatiniititsiuarneq inuussutaallunilu eqqississutaavoq“. — Romamiut 8:6, NV. (w08 09/15-E)

[Quppernerup ataani ilanngussaq]

Eqqaamavigit?

• Anersaaq illernartoq piumallugu susariaqarpugut?

• Silarsuup anersaavanit qanoq sunnertissinnaavugut?

• Silarsuup anersaava qanoq ililluta akiorsinnaavarput?

[Atuaqqissaarnermi apeqqutit]

[Qupp. 29-mi assiliartaq]

Suliartunnginninni atuariartunnginninniluunniit anersaaq illernartoq qinnutigisaruk

[Qupp. 31-mi assiliartat]

Isumarput minguitsuutittariaqarparput, niuernermut tunngatillugu najoqqutassianik pitsaasunik malitaqartariaqarluta ileqqutsigullu ingasaassinaveersaartuusariaqarluta