Kaanenu ‘Spiritu Yamunu Mwishina’

‘Etu hitunatambuli spiritu yamunu mwishinaku, tunatambuli spiritu yakudi Nzambi.’—1 AKORINDA 2:12.

1, 2. (a) Kumpinji yakunyima, muloñadi tupendi chiyatushileña munyikoti yawakaBritish? (b) Wubanjinyi wamonaña akwaKristu?

 MUMWAKA wa 1911, akwanfulumendi yaBritain aheni lushimbi kulonda kukiña mawumi awakwakwimba malasha hamukoti. Mukoti wudi wejima wakeñekeleña kuhemba tupendi tuyedi. Muloñadi? Neyi kesi kabutuka hamukoti, akwakupulwisha antu akusenda tupendi nakwiñila natu heseki. Itu tujila twamwekeshaña chinjikijilu chakukeña kufwa, twaholokaña hitunashakami neyi hamukoti hadi mpepela yafwana. Akwakupulwisha chiña ayisoñamisha kuwubanji, mutenewu anateli kuhwidila nikufwa chakadi kwiluka nawu anoni mpepela yafwana.

² Munjila yoyimu, akwaKristu amonaña kukala kwokumu neyi kwamonaña akwakuzata hamukoti. Munjilanyi? Hampinji yayinkeliyi Yesu atumbanji twindi mudimu wakushimwina nsañu yayiwahi mwahita kaayi kejima, welukili nindi wayitumineña mumaluña afwana, mwayulañayi Satana nispiritu yamunu mwishina. (Matewu 10:16; 1 Yowanu 5:19) Dichi Yesu wayakameneneña atumbanji twindi chikupu chakwila hawufuku wakwila kanda yafwi, walombeli kudi Tata yindi nindi: “Hinalombi nami wuyifumishi mumpata yamunu mwishinaku, ilaña nami wuyihembi kudi watama.”—Yowanu 17:15.

3, 4. Indi Yesu wayisoñamishili nindidi atumbanji twindi, nawa muloñadi wutwatela kushaku kashinshi?

³ Yesu wasoñamishili atumbanji twindi hawubanji wakubula kwikala asoñama kuyuma yamweneñawu yatela kuyileñela kufwa. Mazu ahosheliyi  alema chikupu kudetu, tunakushakama muyinu mpinji yakukumisha kwakanu kaayi. Wakonkomweneni atumbanji twindi nindi: “Tonenu . . . kulonda mwakemiki mushindu, mwakapuluki kuyuma yejimiyi, mwakemani kumesu aMwana kamuntu.” (Luka 21:34-36) Chamuzañalu hakwiluka nawu, Yesu wakanini nindi, Tata yindi wukayinka spiritu yajila kulonda kuyanukisha nikuyikwasha kwikala asoñama nawa akola.—Yowanu 14:26.

⁴ Komana spiritu yajila yatukwashaña ninetu makonu? Neyi dimu, chumanyi chitwatela kwila kulonda yitwikwasheña? Indi spiritu yamunu mwishina hichumanyi, nawa yazatikaña ñahi? Nawa tunateli kutwesha ñahi kukaana iyi spiritu yamunu mwishina?—Tañenu 1 Korinda 2:12.

Komana Twatela Kwiteja Spiritu Yajila Ntahindi Spiritu Yamunu Mwishina?

5, 6. Indi spiritu yajila yatela kutukwasha ñahi, nawa chumanyi chitwatela kwila hakutambwila spiritu yajila?

⁵ Spiritu yajila hiyayihanini hohu muyaaka nkulakaji yatachiku. Eña, ayihanaña nimakonu, nawa spiritu yaNzambi yinateli kutwinka ñovu yakukoña yuma yayiwahi nikutukolesha kukalakala mumudimu windi. (Aroma 12:11; Afwilipi 4:13) Cheñi yinateli kusoña yililu yayiwahi mudetu, yidi neyi kukeña, luwi, nikuwaha, yekala “nyikabu ya[s]piritu.” (Aŋalija 5:22, 23) Hela chochu, Yehova Nzambi hakanjikijaña spiritu yindi yajila kudi antu abulaña kuyilombaku.

⁶ Chachiwahi kudihula netu, ‘Chumanyi chinatela kwila kulonda kutambwila spiritu yajila?’ Eña, Bayibolu yamwekeshaña nawu kudi yuma yayivulu yitwatela kwila. Njila yapela nawa yalema yidi yakulomba spiritu yajila kudi Nzambi. (Tañenu Luka 11:13.) Njila yikwawu yalema yidi yakudiza nikuzatisha kufumba kwaMwizu daNzambi diyonena naspiritu. (2 Timotewu 3:16) Hela chochu, bayi neyi muntu wejima watañaña Bayibolu watambwilaña spiritu yaNzambuku. Ilaña neyi mukwaKristu walala yadizaña Izu daNzambi, nateli kwiluka yitoñojoka yasonekawu Mwizu diyonenawu. Cheñi, chalema kwiteja netu Yehova watonda Yesu hamu neyi ñimenu Yindi nawa kuhitila mudi yena dimu mwahaninañayi Nzambi spiritu yindi. (Akolose 2:6) Dichi, twatela kwimbujola chakutalilahu chaYesu nikulondela ntañishilu yindi. (1 Petulu 2:21) Chitukufwilaña kwikala neyi Kristu, tukutambwilaña chikupu spiritu yajila.

7. Indi spiritu yamunu mwishina yaluwañeshaña ñahi antu?

⁷ Kwambukaku, spiritu yamunu mwishina yaleñelaña antu kwimbujola yililu yaSatana. (Tañenu Aefwesesa 2:1-3.) Spiritu yamunu mwishina yazatikaña munjila jamboka-mboka. Neyi chitunakumona makonu, spiritu yamunu mwishina yakoleshaña kudikaña nanshimbi yaNzambi. Yaleñelaña “kufwila kwachisemwa chaheseki, nikufwila kwamesu, nikudisamba kwamukunkulwayi kwawumi wunu.” (1 Yowanu 2:16) Yasoñaña nyidimu yachisemwa chaheseki, yidi neyi wuvumbi, kupesha, kupanda, ichima, madombu, nikusheta. (Aŋalija 5:19-21) Nawa kwaleñela kubobola kwakusekesha kwajilolaña yuma yajila. (2 Timotewu 2:14-18) Chakadi nikujina, muntu neyi yasweja kwiteja spiritu yamunu mwishina kumulombola, dihaswejañayi kwimbujola yililu yaSatana.

8. Indi wejima wetu twatalañanaña nakufuukula kwamuchidinyi?

 ⁸ Hichekala chaswayi kushakama chakadi kuluwañeshewa nayuma yamukaayiku. Muntu wejima watela kusakulahu chuma chikulombolaña wumi windi, spiritu yajila hela spiritu yamunu mwishina. Antu anakulombolewa naspiritu yamunu mwishina atela kuyikaana nakwiteja spiritu yajila yiyilomboleña. Hela chochu, amakwawu anateli kusakulahu kuyilombola kudi spiritu yamunu mwishina. Antu anakulombolewa naspiritu yajila anateli kufwa mumuhetu waspiritu yamunu mwishina. (Afwilipi 3:18, 19) Tushinshikenu hanjila yitwatela kukaaninamu spiritu yamunu mwishina.

Ilukenu Yinjikijilu Yatachi Yakusoñamisha

9-11. Yinjikijilwinyi yakusoñamisha yatela kumwekesha nawu tunakwiteja spiritu yamunu mwishina?

⁹ Mukoti wawakaBritish wamalasha wutwatena hakusambila azatishileña tupendi kulonda kwiluka kusoñamisha kwatachi kwakuyilukisha nawu kudi mpepela yafwana henohu kanda eluki. Neyi mukwakwimba malasha yamona kajila kanaholoki hikashakama, welukileña nindi watela kunyakala kutemuka kulonda yapuluki. Kwesekeja nachihandilu chetu chawakwaKristu, yinjikijilwinyi yatachi yakusoñamisha yinakumwekesha nawu anakutuluwañesha kudi spiritu yamunu mwishana?

¹⁰ Chitwadizili chalala chekala Mwizu daNzambi, nakudihana kudi Yehova, twatela twatañileña Bayibolu chikupu. Kakavulu twatela twalombeleña namukoyi. Dichi twatiyileña kuwaha kuwanika kukupompa kwachipompelu, twamweneña neyi kupompa kwejima hinsulu yakukolesha, kufwana muntu wunafwi mpwila wunawani ishima damenji dabulaña kuuma. Ichi, chatwikwashili kuleka chikupu nikutondolwela spiritu yamunu mwishina.

¹¹ Komana twafwilaña kutaña Bayibolu ifuku nifuku? (Masamu 1:2) Komana twalombaña mpinji yejima nawa kulomba kwetu kwafumaña hamuchima? Komana twakeña kupompa kwachipompelu, nawa twamwekeshaña mwenimu kuhitila mukuwanika kukupompa kwejima mulungu nimulungu? (Masamu 84:10) Indi kwiji tunaleki dehi kwikala naniyi yaaku yayiwahi? Eña, hadaha tukweti nyidimu yayivulu yakeñekaña mpinji niñovu, nawa chinateli kutwikalila kutwalekahu nandandanda yayiwahi hakudifukulaña kudi Nzambi. Neyi yaaku yetu yayiwahi yinafunti mwishina mukuhita kwampinji, kwilahu anakutulombola kudi spiritu yamunu mwishina nehi? Komana  ichi dinu tukushaku ñovu kulonda tusañumuni yaaku yayiwahi yitwadiña nayu?

Bayi Mufunta Hanyimaku

12. Yesu walejeli atumbanji twindi ‘kubabala nawanyi, nawa muloñadi?

¹² Yumanyi yikwawu yitwatela kwila kulonda kukaana spiritu yamunu mwishina? Hampinji Yesu yakolesheliyi atumbanji twindi kwikala ‘atona,’ wafumini hohu hakuyisoñamisha hawubanji wukwawu. Wahosheli nindi: “Ilaña babalenu enu aweni, nyichima yenu yakenda kasweja kwikuta, nakusheta walwa, nikwakama yuma yawumi wunu, ifuku odu dakenda kayikasumwisha neyi muhetu.”—Luka 21:34, 35.

13, 14. Chikuwaha neyi tudihula malwihwinyi kutalisha hakudya nikunwa?

¹³ Toñojokenu haniku kusoñamisha. Komana Yesu watanyishili kudiluñisha nayakudya yayiwahi niyakunwa? Inehi! Wadiña weluka mazu ahosheli Solomoni akwila nawu: “Neluki dehi kwami nami, hikudi chuma chacheñi chikuyiwahila [anyana kamuntuku], chiña yowu kuzañalala nakwila yayiwahi hiyachiduwu amomi. Mwalala, antu ejima adyi, anwi, kunyidimu yejima yakukabakanawu amwenuku kuwaha; hichamukunkulu chakudi Nzambi.” (Mukwakutaŋisha 3:12, 13) Ilaña, Yesu welukili nindi spiritu yamunu mwishina yaleñelaña kubula kudihemba muyuma yidi neyi kudya nikunwa walwa.

¹⁴ Tukwiluka ñahi netu spiritu yamunu mwishina hiyinaputishi yitoñojoka yetu kutalisha kuwubanji wakusweja kudya nikunwaku? Tunateli kudihula netu: ‘Natiyaña ñahi neyi nitaña kufumba kwamuBayibolu hela munyikanda kwahoshaña hakufwa kudya? Komana nadiwulaña kufumba kwamuchidiwu nakukwimona neyi kwamukunkulwayi, hela kwakala, hadaha naleyaña hela kuyiñisha kufuukula kwami? * Indi kufumba kwahosha hawalwa nikunwa nakwesekeja neyi chakwila nanwaña nakwimonaña ñahi, nawa nanwaña nakutondolwela ‘kusheta’? Komana nadiwulaña kufumba kwamuchidiwu, nakutoñojoka nami hamuloña wayuma yimu iku kufumba hikwazatikaña kudamuku? Neyi antu ahosha hanwinu yami, komana nadikañaña hela nahilaña? Komana nakoleshaña amakwawu kudiwula kufumba kwamuchidiwu kwamuBayibolu?’ Mwalala, yililu yamuntu diyamwekeshaña neyi chakwila nakwiteja spiritu yamunu mwishina.—Esekejenu Aroma 13:11-14.

Bayi Mwiteja Kwakama Kuyizeyeshuku

15. Yesu wasoñamishili hachaaku chamuchidinyi chekala nawantu?

¹⁵ Njila yikwawu yalema yakukañeshelamu spiritu yamunu mwishina yabombelamu njila yitwakañeshelañamu kwakama. Yesu welukili nindi hamu neyi yileñaleña yabula kuwanina, twekala nachaaku chakwakama hayuma yitwakeñaña ifuku nifuku. Wayilejeli atumbanji twindi chachiwahi nindi: “Bayi mwakama mwokuku.” (Matewu 6:25) Chachiwahi kwakama hayuma yalema, yidi neyi kumutiyisha Nzambi kuwaha, kwakamena nyidimu yawakwaKristu, nikuloñeshela chisaka chetu yuma yakumujimba. (1 Akorinda 7:32-34) Chumanyi chitunateli kudizila kukusoñamisha kwaYesu?

16. Spiritu yamunu mwishina yaluwañeshaña ñahi antu amavulu?

¹⁶ Spiritu yamunu mwishina, chineli yakoleshaña kudisamba kwamukunkulu kwawumi wunu, yaleñelaña antu amavulu kudakamena kwaleñelaña kuluwañesha chihandilu chawu. Kaayi kakeñaña twitejeña netu mali atwikiñaña nawa maheta amuntu hiyayilukilaña kuyililu yindi yakuspirituku, ilaña kukuvula nikuwaha kwamaheta indi. Antu adimbañawu nansañu jakutwamba adiñijaña muwuduñu wakukeña maheta nawa akamaña mpinji yejima hakukeña yuma yayiha, yamaneni, yabadika kuwaha. (Yishimu 18:11) Yitoñojoka yaheña yamuchidiwu kutalisha hamaheta yaleñelaña kwakama kwakañeshaña muntu kubula kuyilaku hambidi hamu neyi mukwaKristu.—Tañenu Matewu 13:18, 22.

17. Munjilanyi mutunateli kutondolwela kutuzeyesha kudi kwaakama?

¹⁷ Tunateli kutondolwela kutuzeyesha kudi  kwakama neyi tutiyilila kuleja kwaYesu kwahosheliyi nindi: “Sambilenu kukeña wanta [waNzambi] nikuloña kwindi.” Yesu watukonkomwena nindi neyi twila mwenimu, yuma yitwakeñaña chikupu akatushilaku. (Matewu 6:33) Tunateli kumwekesha ñahi netu twakuhwelela iku kukana? Njila yimu yidi yakusambila kukeña kuloña kwaNzambi, kuhitila mukulondela nshimbi yaNzambi yahoshaña hayuma yaloña kutalisha hansañu yamali. Chakutalilahu, twakaanaña kusoneka nsañu yakutwamba hamafomu anfulumendi anyisonku hela kushimuna wunsahu wakutwamba munyidimu yetu yakulanda nakulandulula. Twazataña nañovu kulonda kufweta nyisonku, kulonda mazu etu akwila nawu ‘Eña, ekali yowu eña’ hakufweta nyikudi. (Matewu 5:37; Masamu 37:21) Kashinshi kamuchidiwu hikaleñelaña muntu kuhetaku, ilaña kaleñelaña kutwiteja kudi Nzambi, kwikala nachinleji chachiwahi, nikukañesha kwakama chikupu.

18. Chakutalilahwinyi chachiwahi chatwimikililiyi Yesu, nawa twahetelañamu ñahi mukumwimbujola?

¹⁸ Kusambila kukeña Wanta kwabombelamu kwiluka chikupu yuma yitwatela kutwamijaku muchihandilu chetu. Talenu chakutalilahu chaYesu. Mpinji jikwawu, wavwalileña ihina dadiwahi. (Yowanu 19:23) Wadyileña nikunwina vinyu hamu nawamabwambu jindi amawahi. (Matewu 11:18, 19) Ilaña maheta niyuma yakuzañalesha, muchihandilu chindi yadiña neyi yuma yawahishaña mafu, bayi neyi yakudya yayeniku. Kudya kwaYesu kwadiña yowu kwila nkeñelu yaYehova. (Yowanu 4:34-36) Neyi twimbujolaña chakutalilahu chaYesu, chihandilu chawahaña chikupu. Tukweti muzañalu wakuzatisha Nsona kulonda kukundeja nachu antu anakuyadishawu. Neyi twilaña mwenimu antu muchipompelu atwikeñaña nikutwikwasha. Nawa twazañaleshaña muchima waYehova. Neyi tutwamijaku yuma yalema, maheta nichiseki hiyinateli kututadika wuduñuku. Ilaña, hiyuma, hela yitwa, yatwikwashañaku hakudifukula kudi Yehova. Neyi tusweja kudikita mumudimu watwalaña Wanta waNzambi hambidi, dikwila nawu tunateli kushinda spiritu yamunu mwishina.

Twalekenuhu ‘Nayitoñojoka yaSpiritu’

19-21. Munjilanyi mutwatelela ‘kwikalila nayitoñojoka yaspiritu,’ nawa muloñadi wutwatelela kwila mwenimu?

¹⁹ Yuma yitwelaña yatachikilaña muyitoñojoka. Yililu yatenaña antu amavulu nawu yililu yabula kushikilamu kakavulu hiyililu yaletaña yitoñojoka yachisemwa chaheseki. Dichi, kapostolu Pawulu watwanukisha kuhemba yitoñojoka yetu. Wasonekeli nindi: “Antu endaña mwaya chisemwa chaheseki atoñojokaña yuma yachisemwa chaheseki. Antu endaña mwaya [s]piritu atoñojokaña yuma ya[s]piritu.”—Aroma 8:5.

²⁰ Tunateli kukañesha ñahi yitoñojoka yetu, niyililu kubula kuyilombola kudi spiritu yamunu mwishina? Twatela kukiña yitoñojoka yetu kuhitila mukuyula yuma yitwatoñojokaña, nakufwila kutondolwela chikupu nsañu yakutwamba yamukaayi. Chakutalilahu, neyi tunakusakula yisela yakuzañalesha, twakaanaña yitoñojoka yetu kuyiluwañesha namaprogiramu akoleshaña yililu yatama hela ndombu. Twelukaña netu spiritu yaNzambi yajila, hela yakadi majilu hiyinateli kwikala muyitoñoka yamajiluku. (Masamu 11:5; 2 Akorinda 6:15-18) Kubombelahu, twetejaña spiritu yaNzambi kwikala muyitoñojoka yetu kuhitila mukutañaña Bayibolu, kulomba, kutoñojoka chikupu, nikuwanika kukupompa. Nawa twazatilaña hamu naniyi spiritu hakuzata mpinji yejima mumudimu wakushimwina wawakwaKristu.

²¹ Mwalala, twatela kukaana spiritu yamunu mwishina nikufwila kwachisemwa kwasañumunañawu kudiyi spiritu. Ilaña kuzata nañovu kulonda kwila mwenimu chachiwahi, muloña Pawulu wahosheli nindi: “Yitoñojoka yachisemwa chaheseki hikufwa, ilaña yitoñojoka ya[s]piritu hiwumi nikuwunda.”—Aroma 8:6.

[Tumazu twaheshina]

Munakwanuka?

• Chumanyi chitwatela kwila kulonda kutambwila spiritu yajila?

• Njilanyi jikwawu spiritu yamunu mwishina muyatela kutuluwañeshela?

• Tunateli kukaana ñahi spiritu yamunu mwishina?

[Malwihu aKuzatisha haKudiza]

[Mwevulu wudi hefu 25]

Henohu kanda tuyi kunyidimu hela kushikola, twatela kulomba spiritu yajila

[Nyevulu yidi hefu 26]

Twatela kwikala nayitoñojoka yakadi majilu, yililu yayiwahi hakulanda nakulandulula niyaaku yayiwahi