Resistian so “Espiritu na Mundo”

“Inawat tayo, aliwan say espiritu na mundo, noag say espiritu manlapu ed Dios.”​—1 COR. 2:12.

1, 2. (a) Akin a kaukolan iray siwit diad saray panagminasan ed Britanya nensaman? (b) Anton kaatapan so kidudungetan na saray Kristiano natan?

 NEN taon 1911, inaprobaan na saray manuley ed Britanya so sakey a ganggan a denisinyo pian nisalbay bilay na saray minero na karbon. Kinaukolan a nawalaan na duaran canarie (sakey a klase na siwit) so amin a panagminasan. Parad anton gagala? Awiten iraya na saramay manag-rescue ed dalem na saray panagminasan no walay sinmabog ditan. Sarayan angkekelag a siwit et sensitibo ed saray makasamal a gas, a singa say carbon monoxide. No say dagem et alaokan la na makasamal a gas, agla makareen irayan siwit, a napaktak ni ra ingen manlapud totoonan da. Makanakana iyan primeron sinyalis. Say carbon monoxide et sakey a kemikal ya andiay kolor, angob, tan makapatey, lapud patundaen na satan so ambalangan selula a mangisuplay na oksiheno ed interon laman. No anggapoy mamasakbay ed saray manag-rescue ed saya, sikaray nayengyeng tan ompatey ni ingen ya agda anggan amta a nasasamalan la ra manaya.

² Saray Kristiano natan et nidudunget met ed kipapasen a mipara ed saray minero. Panon? Sanen inikdan nen Jesus iray babangatan to na ganggan ya ipulong so maong a balita ed sankamundoan, amta ton say pangibabakian to’d sikara et sakey a pasen a walaray peligro, ta sakey itan a lugar ya uuleyan nen Satanas tan say espiritu na mundo. (Mat. 10:16; 1 Juan 5:19) Ontan lay impampaga nen Jesus ed saray babangatan to, kanian diad samay labi sakbay na ipatey to et oniay impikasi to ed Ama to: “Agko pikasi ya ekalen mo ra ed mundo,  noag ingen ilaban mo ra ed mauges.”​—Juan 17:15.

3, 4. Anton pasakbay so inter nen Jesus ed saray babangatan to, tan akin a nepeg tayon magmaliw ya interesado ed satan?

³ Pinasakbayan nen Jesus iray papatumbok to a no ag-ira alerto ed saray impluensya na kaliberliber da, nayarin manresulta itan ed espiritual ya ipapatey da. Saray salita to et importante ed sikatayo lapud manbibilay itayo ed anggaan na sistema na saray bengabengatla. Oniay impaseseg to ed saray babangatan to: “Manbantay kayo . . . pian ontalona kayo a nilaban ed sarayan amin a bengatlan nagawa, tan makaalagey kayo ed arap na Anak na too.” (Luc. 21:34-36) Ingen makapaliket ta insipan nen Jesus a say Ama to et mangiter na masanton espiritu, a mangipanonot ed saray bengatlan naaralan da, ya ontulong ed sikaran magmaliw ya alerto ed panaon a pambibilayan da, tan pian nawalaan ira na inkakpel.​—Juan 14:26.

⁴ Kumusta tayo met natan? Kasin wala met so ontan a masanton espiritu a makatulong ed sikatayo? No ontan, anto so gawaen tayo pian naawat itan? Anto so espiritu na mundo, tan panon itan ya onkukurang? Tan panon tayon matalonan naresistian iyan espiritu na mundo?​—Basaen so 1 Corinto 2:12.

Masanton Espiritu odino Espiritu na Mundo?

5, 6. Anto so nagawaan na masanton espiritu parad sikatayo, tan anto so nepeg tayon gawaen pian naawat itan?

⁵ Aliwa labat a parad saramay walad inmunan siglo so probisyon a masanton espiritu. Anggad natan et nitatarya itan, tan satan ya espiritu na Dios et makapangiter ed sikatayo na biskeg a nakaukolan pian gawaen so duga. Ontan met, pabiskegen itayo na saya diad panaglingkor tayo’d si Jehova. (Roma 12:11; Fil. 4:13) Pawalaen met na saya ed sikatayo iray maabig a kalidad a kabiangan ed “bunga na espiritu,” a singa say aro, kaabigan, tan kamaongan. (Gal. 5:22, 23) Bangbalet, ag-ipipilit nen Jehova a Dios so masanton espiritu to ed saray agmalabay a mangawat ed satan.

⁶ Kanian manepeg labat sirin ya itepet tayo, ‘Anto so gawaen ko pian makaawat na masanton espiritu?’ Bueno, ipapabitar na Biblia a walaray bengatlan nayarin gawaen tayo. Say sakey ya importantin kundang et say ikerew a mismo ed Dios. (Basaen so Lucas 11:13.) Makatulong met ed sikatayo so panaral tan pangiyaplika ed saray simbawa a walad Salita na Dios ya apuyanan na espiritu. (2 Tim. 3:16) Siempre aliwan amin a basta manbasa labat ed Biblia et makaawat la na espiritu na Dios. Balet no say sakey a masimoon a Kristiano et manaral na Salitay Dios, ontanek itan ed puso to tan sikatoy onkiwas unong ed ibabaga na satan ya apuyanan a Salita. Importanti met ya awaten tayon si Jesus et tinuro nen Jehova a mangirepresenta ed Sikato tan diad panamegley to et mangitatarya so Dios na espiritu to. (Col. 2:6) Sirin labay tayon itunos so kabibilay tayo unong ed ehemplo tan bangabangat nen Jesus. (1 Ped. 2:21) No kapigan tayo panseseetan ya aligen si Kristo, diman tayo mas lalon makaawat na masanton espiritu.

7. Panon so pangiimpluensya na espiritu na mundo ed saray totoo?

⁷ Diad pisunian, say espiritu na sayan mundo et mangiimpluensya ed saray totoo pian ipatnag iray kagagawa nen Satanas. (Basaen so Efeso 2:1-3.) Sayan espiritu et  onkikiwas ed pigaran paraan. Singa papaneknekan na saray nagagawa ed kaliberliber tayo, isasagyat na satan so isusumpa ed saray estandarte na Dios. Iyaalibansa na satan so “pilalek na laman tan pilalek na mata tan say panangipangta na paraan na panagbilay.” (1 Juan 2:16, NW) Papawalaen na satan iray gawa na laman, singa say pikakalugoran, pididios ed saray talintao, panag-anito odino espiritismo, imon, sanok, tan panagbuanges. (Gal. 5:19-21) Tan isusugsog na satan iray bangat na apostata a sumlang ed no anto so masanto. (2 Tim. 2:14-18) Kanian, no kapigan manpapaimpluensya so sakey a too ed espiritu na sayan mundo, diman to mas lalon naaalig si Satanas.

8. Anton panagpili so kaukolan a gawaen na balang sakey ed sikatayo?

⁸ Walan wala so makaimpluensya ed sikatayo. Kanian, nepeg a pilien tayon maong no siopa so pampa-impluensyaan tayo, say masanton espiritu odino say espiritu na mundo. Saramay naaripen natan na espirituy mundo et sarag day makalukpos ed impluensya na satan tan paigiya so kabibilay da ed masanton espiritu. Bangbalet, nayari met a say kasunian so nagawa. Saramay abayag lan paigigiya ed masanton espiritu et nayarin napatitan na espiritu na mundo. (Fil. 3:18, 19) Konsideraen tayo pa natan sirin no panon tayon naresistian so espiritu na mundo.

Bidbiren Iray Primero ni Labat a Sinyalis

9-11. Anto iray pigaran primeron pakapatnagan a naiimpluensyaan itayo la na espirituy mundo?

⁹ Saramay abitla nen niman a Britanon minero et manguusar na saray siwit pian napasakbayan iran tampol no walay makasamal a gas. No nanengneng na minero a naplag so siwit manlapud akatoonan to, kaukolan a sikatoy onkiwas a tampol pian manbilay. No diad espiritual a paraan, anto ta iray primeron pakapatnagan a naiimpluensyaan tayo la na espiritu na sayan mundo?

¹⁰ Sanen unaan tayon naaralan so katuaan a lugan na Salitay Dios tan insan indedika tayoy bilay tayo ed si Jehova, nayarin agaylay seet tayon manbasa na Biblia. Maseguron maparanay tan masimoon itayo met a manpikasi. Malikeliket itayo met ya onaatendi ed saray pantitipon, ya ipapasen tayo a talagan makaparepresko so balang sakey ed saratan, a singa ambetebetel a danum ed sakey a toon napnapgaan. Satan a paraan na panagbilay et tinmulong ed sikatayon makalukpos tan mansiansian bulos manlapud espiritu na mundo.

¹¹ Kasin anggad natan et maseet tayo nin babasaen so Biblia ya inagew-agew? (Sal. 1:2) Kasin siansia nin maparanay tan masimoon iray pikakasi tayo? Pabpablien tayo ni kasi iray sinimban pantitipon, ya aatendian tayo iratan ya amin? (Sal. 84:10) Odino atundaan tayo la so arum ed sarayan maabig ya ugali? Iyan tayo lan dakel so responsabilidad tayo a mankaukolan na panaon tan sagpot, tan talagan makapaangat ed sikatayo so pamasiansia na maabig ya espiritual a rotina. Balet no pigara ed sarayan maabig iran ugali tayo et abayag lan napapaulyan, agkasi lapud aabuloyan tayo lan naimpluensyaan itayo na espiritu na mundo? Manggawa itayo la kasi natan na impasyan sagpot pian nagawaan lamet irayan maabig ya ugali?

‘Agbalot Pabebelatan’

12. Anto so impasakbay nen Jesus ed saray babangatan to, tan akin?

¹² Anto ni so nagawaan tayo pian naresistian so espiritu na mundo? Sanen imbaga nen Jesus ed saray babangatan to a “manbantay kayo,” kaykayari to ni labat iran pinasakbayan sumpad pigaran espisipikon kaatapan. Inkuan to: “Manlikas kayo ed inkasikayo [pian] saray puso yo [“agbalot nabelatan na,” NW] inkasiba, tan panagbuek, tan saray kapagaan ed sayan bilay, et onsabi ed sikayo ed kasanlilikna so saman ya agew a singa sakey a patit.”​—Luc. 21:34, 35.

13, 14. Anto iray kaukolan tayon itepet ed inkasikatayo nipaakar ed panangan tan kakainum?

¹³ Nonoten pa itan a pasakbay. Kasin kokondenaen nen Jesus so panliket ed pangan tan iyinum? Andi! Kabat to iray balikas nen Solomon: “Amtak ya anggapo so bengatla a magmaong nipaakar ed [saray anak na katooan], nen say panliket, tan panggawa na maong ed leleg na panbilay da. Et ontan met a balang too mangan tan oninum, tan manliket a maong ed amin a kimey to, sikato so pamalangkap na Dios.” (Ecl. 3:12, 13) Ingen ta kabat nen Jesus ya isusugsog na espirituy mundo so pagmaliw ya andian na kontrol ed sarayan pamaakaran.

¹⁴ Panon itayon makaseguro ya agni asamalan na espiritu na mundo so pakalikas tayo ed saray kapeligroan na alablabas a panangan tan kakainum? Nayarin tepetan tayoy inkasikatayo: ‘Antoy reaksion ko no makabasa ak na simbawa ed Biblia odino diad saray  publikasyon tayo nipaakar ed inkasiba? Kasin ibagak a tampol a, ‘Sobsobra la irayan bilin,’ tan ‘Aliwan parad siak iraya,’ a manbaraan tan manrason ak ni? * Anto so panmoriak ed simbawa nipaakar ed de-alkohol iran iinumen, a no bilang ta uninum ak, kaukolan et kabkaabigan labat tan agak balot ‘manbuanges’? Kasin melmelagen ko irayan simbawa, ya isipen kon duma so kipapasen ko kanian ag-iraya onaplika ed siak? No ibano na arum so panag-inum ko, kasin mankatunongan odino manpasnok ak? Kasin lalagyaten koy arum ya ibaliwala so simbawa na Biblia?’ On, naamtaan ed awawey na sakey no kasin sikatoy naiimpluensyaan la na espirituy mundo.​—Ikompara so Roma 13:11-14.

Agkayo Palelener ed Saray Kapagaan

15. Amasakbay si Jesus sumpad anton tendensia na too?

¹⁵ Say pangontrol ed kapagaan so sakey nin importantin kundang pian naresistian so espiritu na mundo. Kabat nen Jesus a lapud ag-itayo ayadyari, magmainomay tayon pampagaan iray inagew-agew a pankaukolan tayo. Kanian simamaaro ton pinasakbayan iray babangatan to: “Agkayo mapaga.” (Mat. 6:25) Natural labat a pampagaan tayo iray importantin bengatla, a singa say pamaliket ed Dios, panumpal ed saray responsabilidad tayo bilang Kristiano, tan pangitarya ed saray pankaukolan na pamilya tayo. (1 Cor. 7:32-34) Kanian, anto sirin so naaralan tayo ed samay pasakbay nen Jesus?

16. Anto so epekto na espirituy mundo ed dakel a totoo?

¹⁶ Say espiritu na mundo, a say isusugsog to et say pangipangta ed paraan na panagbilay, et mangiimpluensya ed dakel lan totoo tan manreresulta itan ed panagpagan aliway epekto to’d sikara. Papanisiaen itayo na sayan mundo a say pagmaliw a makuarta et mankabaliksan na seguridad, tan say pakasukatan kunoy kakanaan na sakey a too et say karakel tan karakep na saray kayarian to, aliwan say espiritual iran kalidad to. Saramay manigsisia ed sayan lingon ideya et anggano manpaaripen la ra basta labat onyaman ira, tan naynay a say labay da et nawalaan a tampol na sankabaloan, sankabalgan, tan sankarakepan iran kagawaan. (Uli. 18:11) Say onian pikewet a panmoria ed saray materyal a bengatla et manresulta ed saray kapagaan a manlener ed espiritual ya iyaaligwas na sakey.​—Basaen so Mateo 13:18, 22.

17. Panon tayon napaliisan so pakalener ed saray kapagaan ed bilay?

 ¹⁷ Napaliisan tayoy pakalener ed kapagaan no tuloken tayoy ingganggan nen Jesus: “Anapen yo nin unona so panarian, tan say inkatunong [na Dios].” Seseguroen to ed sikatayo a no gawaen tayo iya, amin a bengatlan talagan kaukolan tayo et niarum ed sikatayo. (Mat. 6:33) Panon tayon nipanengneng a talagan papanisiaan tayo iyan sipan? Say sakey a paraan et say pananap nin unona ed inkatunong na Dios, a kabaliksan toy itulok ed saray estandarte To no antoy duga nipaakar ed pinansyal iran pamaakaran. Singa bilang, agtayo mansasaol sano manbabayar itayo na buis, odino agtayo mantitila anggan diad “angkekelag” labat a detalye ed saray transaksion tayo. Gawaen tayoy anggaay nayarian tayo pian sumpalen iray pinansyal iran obligasyon tayo, a say ‘On tayo et On,’ nagkalautla ed panagbayar na utang tayo. (Mat. 5:37; Sal. 37:21) Anggaman ag-iya yamanan na sakey, naawat to balet so abobon na Dios, nawalaan na malinis a konsiensia, tan baleg iyan makabawas ed saray kapagaan to.

18. Anton maabig ya ehemplo so impanengneng nen Jesus ed sikatayo, tan panon itayon nagunggonaan ed pangalig ed sikato?

¹⁸ Say pangiyuna ed Panarian et manasaglawi ed panangiyuksoy na saray prayuridad tayo. Imanoen pa so ehemplo nen Jesus. Wala iray pankanawnawan sikatoy nansulong na de-kalidad iran kawes. (Juan 19:23) Nanliketan toy mananam iran tagano tan malamis ya alak ed limog na saray kakaaro to. (Mat. 11:18, 19) Balet parad sikato, saray kagawaan tan panagligliwaan et aliling day panagtimpla labat ed tagano, aliwan sikara’tay manunan rekado. Say tagano nen Jesus et say ‘panggawa ed linawa nen Jehova.’ (Juan 4:34-36) Makabkabaliksan so bilay no aligen tayoy ehemplo nen Jesus! Naliketan itayo diad itulong ed saray nabebelatan a makaawat na ilalo manlapud Kasulatan. Nagamoran tayo so panangaro tan suporta na kongregasyon tan napaliket tayo so puso nen Jehova. No sustoy inka-uksoy na saray prayuridad tayo, ag-itayo magmaliw ya aripen na saray kagawaan tan panliliket. Noagta, sikara ingen so magmaliw ya aripen tayo, odino kagawaan ya ontulong ed sikatayo diad panagdayew ed si Jehova. No kapigan mas maseseg itayo ed kimey a manusuporta ed Panarian na Dios, diman tayo mas naresistian so espiritu na mundo.

Itultuloy ya ‘Iteen so Nonot ed Espiritu’

19-21. Panon tayon nitultuloy a ‘niteen so nonot tayo ed espiritu,’ tan akin a nepeg tayon gawaen itan?

¹⁹ Diad kaslakan, no antoy nononoten mo sikatoy gawaen mo. Samay ibabaga na karaklan ya agninonot a kiwas et mebetbet a lapud impluensya na makalaman a panagnonot. Kanian pinanonotan itayo nen apostol Pablo a kaukolan tayon bantayan so panagnonot tayo. Inkuan to: “Saray wala ed unong ed laman anapen da so saray ag-agamil a kien na laman; sara balet so unong ed espiritu, anapen da so ag-agamil a kien na espiritu.”​—Roma 8:5.

²⁰ Anto so nepeg tayon gawaen pian aliwan say espiritu na mundo so mangontrol ed kanonotan tan saray kiwas tayo? Kaukolan a mangiyan itayo na sapit ed nonot tayo, a singa panangibaga, a gawaen tayoy anggaay nayarian tayo ya amperen iray makapuy ya ideya na mundo. Singa bilang, no manpili itayo na panagligliwaan, agtayo abuloyan a narutakan so kanonotan tayo ed saray babantayan a mangisasagyat na imoralidad tan karawalan. Amta tayon say masanto, odino malinis ya espiritu na Dios et ag-onkurang ed marutak a kanonotan. (Sal. 11:5; 2 Cor. 6:15-18) Kaaruman ni, aabuloyan tayon onkurang so espiritu na Dios ed kanonotan tayo panamegley na regular a panagbasa na Biblia, panagpikasi, panagdalepdep tan iyaatendi ed saray pantitipon. Tan mikokoopera itayo ed sayan espiritu legan tayon regular a mibibiang ed panagpulong a kimey.

²¹ On, kaukolan a resistian tayo so espiritu na sayan mundo tan say makalaman iran kalkaliktan ya isasagyat na satan. Balet talagan nagunggonaan itayo no pansagpotan tayon gawaen itan lapud say inkuan nen Pablo et “say pangiteen na nonot ed laman et mankabaliksay patey; balet say pangiteen na nonot ed espiritu et mankabaliksay bilay tan kareenan.”​—Roma 8:6, NW.

[Paimano ed leksab]

Kasin Nanonotan Yo?

• Anto so kaukolan tayon gawaen pian naawat tayoy masanton espiritu?

• Panon itayon nayarin naimpluensyaan na espirituy mundo?

• Panon tayon naresistian so espiritu na mundo?

[Tepetepet Parad Panagaral]

[Litrato ed pahina 21]

Kerewen so masanton espiritu panamegley na pikakasi sakbay ya onlan mantrabaho odino maneskuela

[Saray litrato ed pahina 23]

Kaukolan tayon pansiansiaen a malinis so kanonotan tayo, maabig iray pitratransaksion tayo, tan magmaliw a kabkaabigan ed saray ugali tayo