Resisti “e Spiritu di Mundu”

“Nos a risibí, no e spiritu di mundu, sino e spiritu ku ta bini di Dios.” ​—1 KOR. 2:12.

1, 2. (a) Pakiko ántes nan tabata pone kanari den minanan britániko? (b) Ki peliger kristiannan ta konfrontá?

NA AÑA 1911, outoridatnan britániko a pasa un lei diseñá pa skapa bida di hende ku ta traha den mina di karbon. Tur mina mester tabatin dos kanari. Pakiko? Si a surgi un kandela den un mina, reskatistanan lo a bai ku e kanarinan den e tùnelnan bou di tera. E paranan chikitu ei ta sensitivo pa gas venenoso, manera por ehèmpel monóksido di karbon. Si e aire a bira kontaminá, e paranan lo a duna señal ku nan ta anshá, i asta lo a kita kai for di nan palu. E promé señal di spièrtamentu akí ku e paranan a duna tabata sumamente importante. Monóksido di karbon ta un gas sin koló i sin holó ku ta mata bo dor di stòp e sèlnan kòrá di sanger di entregá oksígeno na e kurpa. A ménos ku e reskatistanan a keda alertá pa e peliger, nan lo por a kai flou i muri sin realisá mes ku nan tabata ser venená.

² Den sentido spiritual, kristiannan ta konfrontá kasi e mesun situashon ku e mineronan. Kon asina? Wèl, ora Hesus a duna su disipelnan e tarea pa prediká e bon notisia mundialmente, e tabata sa ku e tabata mandando nan den un ambiente peligroso, dominá pa Satanas i e spiritu di mundu. (Mat. 10:16; 1 Juan 5:19) Hesus tabata asina preokupá pa su disipelnan ku e anochi promé ku el a muri, el a pidi su Tata den orashon: “Mi no ta pidi bo pa saka nan for di mundu, ma pa bo warda nan di e malbado.”​—Juan 17:15.

3, 4. Ki spièrtamentu Hesus a duna su disipelnan, i dikon esei mester interesá nos?

³ Hesus a spièrta su siguidónan pa e peliger di  no ta alerta pa e influensianan ku tin rònt di nan ku lo por kousa nan morto. Su palabranan tin un nifikashon spesial pa nos, ya ku nos ta biba durante konklushon di e sistema di kosnan. El a urgi su disipelnan: “Sea alerta . . . pa boso por tin forsa pa skapa di tur e kosnan akí ku ta bai tuma lugá, i pa para dilanti di e Yu di hende.” (Luk. 21:​34-36) Pero afortunadamente Hesus a primintí tambe ku su Tata lo a perkurá spiritu santu pa refreská nan memoria i pa yuda nan keda alerta i fuerte.​—Juan 14:26.

⁴ Kiko di nos awe? E mesun spiritu santu ei ta disponibel pa yuda nos? Si ta asina, kiko nos tin ku hasi pa risibié? Kiko ta e spiritu di mundu, i kon e ta obra? Anto kon nos por logra resistí e spiritu di mundu akí?​—Lesa 1 Korintionan 2:12.

Spiritu Santu òf Spiritu di Mundu?

5, 6. Kiko spiritu santu por hasi pa nos, pero kiko nos mester hasi pa risibié?

⁵ No ta den promé siglo so hende a risibí spiritu santu. E ta disponibel awe tambe, i Dios su spiritu por duna nos e fortalesa pa hasi loke ta korekto i tambe e energia pa traha den su sirbishi. (Rom. 12:11; 1 Ped. 4:11) Ademas, e por produsí den nos kualidatnan ku ta reflehá ternura, manera amor, kariño i bondat, kuanan ta aspektonan di e “fruta di e spiritu.” (Gal. 5:​22, 23) Sinembargo, Yehova Dios no ta fòrsa su spiritu santu riba hende ku no ke.

⁶ Pues anto, lo ta rasonabel pa nos puntra nos mes: ‘Kiko mi por hasi pa risibí spiritu santu?’ Wèl, Beibel ta mustra ku tin vários kos ku nos por hasi. Un paso importante i simpel ta di pidi Dios p’e. (Lesa Lukas 11:13.) Un otro paso práktiko ta di studia i apliká e konseho ku tin den e Palabra di Dios inspirá pa spiritu santu. (2 Tim. 3:16) Klaru ku no ta tur hende ku djis lesa Beibel ta risibí Dios su spiritu. Pero ora un kristian sinsero ta studia e Palabra di Dios, e por kapta e sintimentunan i punto di bista ku e Palabra inspirá ta trese dilanti. Tambe ta masha importante pa nos aseptá ku Yehova a apuntá Hesus komo su representante i esun pa medio di ken Dios a perkurá su spiritu. (Kol. 2:6) Na armonia ku esei, nos lo ke sigui e ehèmpel di Hesus i biba na armonia ku su siñansanan. (1 Ped. 2:21) Mas esfuerso nos hasi pa nos ta manera Kristu, mas spiritu santu nos lo risibí.

7. Kon e spiritu di mundu ta influensiá hende?

⁷ Na kontraste, e spiritu di mundu ta influensiá hende pa reflehá e personalidat di Satanas. (Lesa Efesionan 2:​1-3.) E spiritu di mundu ta obra na vários manera. E ta instigá rebelion kontra e normanan di Dios manera nos por mira bon kla tur rònt di nos awe. E ta promové “deseonan pekaminoso, gana di kosnan ku ta atraé bista di hende i kana prònk ku loke bo tin.” (1 Juan 2:16, BPK) E ta produsí obranan di karni, manera inmoralidat, idolatria, bruheria, yalursheit, rabiamentu i buracheria. (Gal. 5:​19-21) I e ta fomentá papiamentu di ideanan apóstata ku ta violá loke ta santu. (2 Tim. 2:​14-18) Inevitablemente, mas un hende laga e spiritu di mundu influensi’é, mas manera Satanas e ta bira.

8. Ki eskoho nos tur tin ku hasi?

⁸ Nos no por isolá nos mes  for di tur influensiá djafó. Kada hende mester skohe kiko lo e laga dirigí su bida: spiritu santu òf spiritu di mundu. Esnan ku awor ta laga e spiritu di mundu dominá nan por libra nan mes di su influensia i laga spiritu santu guia nan bida. Sinembargo, lo kontrario tambe ta posibel. Esnan ku un tempu tabata ser guiá pa spiritu santu por kai den e trampa di spiritu di mundu. (Fil. 3:​18, 19) Laga nos konsiderá kon nos por resistí e spiritu di mundu.

Rekonosé e Promé Señalnan di Spièrtamentu

9-11. Menshoná algun señal di spièrtamentu ku lo por indiká ku nos ta kayendo den gara di e spiritu di mundu.

⁹ E mineronan britániko menshoná den introdukshon a usa kanari pa spièrta nan for di trempan pa presensia di gas venenoso. Si un minero a mira un para kita kai for di su palu, e tabata sa ku e tabatin ku aktua lihé pa keda na bida. Den sentido spiritual, kiko ta algun di e promé señalnan di spièrtamentu ku ta indiká ku e spiritu di mundu ta influensiando nos?

¹⁰ Na prinsipio, ora nos a siña e bèrdatnan ku tin den e Palabra di Dios i despues a dediká nos bida na Yehova, probablemente nos tabata lesa Beibel ku masha smak. Kasi sigur nos tabata hasi orashon ferviente tambe i ku frekuensia. Ademas, nos tabata gusta asistí na e reunionnan di kongregashon, pasobra nos a konsiderá kada un di nan komo un fuente di refreskamentu spiritual, manera un oásis pa un hende ku tin set. E kustumbernan ei a yuda nos libra nos mes di e spiritu di mundu i keda leu for di dje.

¹¹ Ainda nos ta purba lesa Beibel tur dia? (Sal. 1:2) Nos ta hasi orashon di kurason i frekuentemente? Nos ta stima e reunionnan di kongregashon, i ta asistí tur siman na nan tur? (Sal. 84:10) Òf nos a pèrdè algun di e bon kustumbernan akí? Naturalmente, nos por tin hopi responsabilidat ku ta eksigí tempu i energia, i podisé p’esei no ta fásil pa nos mantené un bon rutina spiritual. Pero si atraves di tempu nos a pèrdè algun di nos bon kustumbernan, ta posibel ku nos ta kayendo den gara di e spiritu di mundu? Nos lo hasi un gran esfuerso awor pa rebibá e bon kustumbernan ku nos tabatin un tempu?

“Tene Kuidou pa Boso Kurason No Ta Kargá”

12. Ki spièrtamentu Hesus a duna su disipelnan, i dikon?

¹² Kiko mas nos por hasi pa resistí e spiritu di mundu? Ora Hesus a konsehá su disipelnan pa nan ta “alerta,” el a kaba di spièrta nan pa algun peliger spesífiko. El a bisa nan: “Tene kuidou pa boso kurason no ta kargá pa kousa di paranda i buracheria i e preokupashonnan di bida, i e dia ei no bin diripiente riba boso manera un trampa.”​—Luk. 21:​34, 35.

13, 14. Lo ta bon pa nos hasi nos mes ki pregunta tokante komementu i bebementu?

¹³ Pensa riba e spièrtamentu ei. Akaso Hesus tabata ke men ku ta malu pa hende disfrutá di kos di kome i di bebe? Nò! E tabata konosé e palabranan di Salomon: “Mi sa ku no tin nada mihó pa hende, ku regosihá i hasi bon den su bida, i tambe ku tur hende por kome i bebe i mira e bon ku tin den tur su trabou—esaki ta e regalo di Dios.” (Ekl. 3:​12, 13) Sinembargo, Hesus tabata sa ku e spiritu di mundu ta promové un falta di dominio propio den komementu i bebementu.

¹⁴ Kon nos por ta sigur ku e spiritu di mundu no a siega nos pa e peligernan di kome òf bebe di mas? Nos lo por puntra nos mes: ‘Kon mi ta reakshoná ora mi lesa konseho den Beibel òf den nos publikashonnan tokante golosidat òf ser haragan? Mi ta inkliná na pone e konseho un banda komo algu ku no ta al kaso òf ku ta ekstremo, i podisé bini ku èksküs òf hustifikashon pa loke mi ta hasi? * Ki punto di bista mi tin di konseho  tokante alkohòl? Te na ora mi ta bebe mes, mi ta bebe ku moderashon i definitivamente ta evitá “buracheria”? Mi ta minimisá tal konseho, pensando ku pa un motibu òf otro e no ta apliká na mi? Si otro hende ta ekspresá nan preokupashon pa mi bebementu, mi ta bira defensivo òf ta rabia? Mi ta animá otro hende pa no tuma e konseho di Beibel ei muchu na serio?’ Sí, un persona su kontesta riba e preguntanan akí ta indiká si e ta kayendo den gara di e spiritu di mundu òf nò.​—Kompará ku Romanonan 13:​11-14.

No Laga Preokupashonnan di Mundu Hoga Bo

15. Hesus a spièrta nos pa tene kuidou ku ki tendensia humano?

¹⁵ Un otro paso masha importante pa resistí e spiritu di mundu ta enserá kon nos ta kontrolá inkietut i preokupashon. Hesus tabata sa ku komo kriaturanan imperfekto, nos tin e tendensia di bira anshá i preokupá pa asuntunan di bida diario. El a bisa su disipelnan amorosamente: “No preokupá boso mes.” (Mat. 6:25) Ta di komprondé ku nos ta preokupá pa kuestionnan importante, manera por ehèmpel, kon nos por agradá Dios, atendé responsabilidatnan kristian i perkurá e nesesidatnan di bida pa nos famia. (1 Kor. 7:​32-34) Pues anto, kiko nos por siña for di e spièrtamentu di Hesus?

16. Ki efekto e spiritu di mundu tin riba hopi hende?

¹⁶ E spiritu di mundu, ku su énfasis riba “kana prònk ku loke bo tin,” ta pega hopi hende ku un inkietut i preokupashon ku no ta saludabel. Mundu lo ke pa nos kere ku plaka ta igual ku siguridat i ku bo ta midi un persona su balor, no a base di su kualidatnan spiritual, sino na e kantidat i kalidat di su pertenensianan. Hende ku ta bai tras di e ideanan engañoso akí ta traha manera katibu pa yega na rikesa i ta den un ansha konstante pa haña e artíkulonan di mas nobo, di mas grandi i di mas avansá. (Pro. 18:11) Tal punto di bista trosí di kos material ta fomentá inkietut i preokupashon ku ta hoga e desaroyo spiritual di un persona.​—Lesa Mateo 13:​18 i 22.

17. Kon nos por evitá ku inkietut i preokupashon ta hoga nos?

¹⁷ Pa inkietut i preokupashon no hoga nos,  nos tin ku obedesé e mandamentu di Hesus: “Buska promé e reino di Dios i su hustisia.” Hesus ta sigurá nos ku si nos hasi esaki, Dios lo sòru pa nos haña e kosnan ku di bèrdat nos tin mester di dje. (Mat. 6:33) Kon nos por demostrá ku nos ta kere e promesa akí? Un manera ta dor di buska promé e hustisia di Dios, es desir, sigui Dios su norma di loke ta korekto den asuntunan finansiero. Por ehèmpel, nos ta nenga di falsifiká papel di belasting i nos no ta konta ni sikiera mentiranan “chikitu” ora nos ta hasi negoshi. Nos ta hasi tur loke ta na nos alkanse pa kumpli ku nos kompromisonan finansiero, i ta laga nos “‘sí’ ta ‘sí,’” den e asuntu di paga nos debenan bèk. (Mat. 5:37; Sal. 37:21) Tal onestidat podisé no ta hasi nos riku, pero sí e ta duna nos e aprobashon di Dios i un konsenshi limpi, i ta kita hopi di nos inkietut- i preokupashonnan.

18. Ki bon ehèmpel Hesus a pone pa nos, i kon nos ta benefisiá si nos imit’é?

¹⁸ Buska promé e Reino ta enserá sa kiko ta mas importante den nos bida. Tuma e ehèmpel di Hesus. Tabatin biaha ku el a bisti paña di bon kalidat. (Juan 19:23) El a disfrutá di kuminda i biña den kompania di bon amigu. (Mat. 11:​18, 19) Pero kos material i entretenimentu tabata manera speserei den su bida, no e plato prinsipal. Hesus su kuminda tabata pa hasi e boluntat di Yehova. (Juan 4:​34-36) Bida ta bale la pena ora nos ta imitá e ehèmpel di Hesus! Nos tin e goso di yuda hende oprimí haña konsuelo for di e Skritura. Nos ta haña e amor i sosten di e kongregashon. I nos ta hasi e kurason di Yehova kontentu. Ora nos sa loke mester ta mas importante den nos bida, kos material i plaser no ta bira nos doño. Al kontrario, nan ta bira manera sirbidó òf hèrmènt ku ta yuda nos adorá Yehova. Anto mas aktivo nos ta den e trabou ku ta apoyá e Reino di Dios, ménos chèns tin ku e spiritu di mundu ta vense nos.

Keda ku Bo “Mente Fihá Riba e Spiritu”

19-21. Kon nos por keda ku nos “mente fihá riba e spiritu,” i dikon nos mester hasié?

¹⁹ Normalmente, hende ta pensa promé ku nan aktua. Loke hopi hende ta yama akshon deskabeyá, hopi biaha ta akshonnan motivá pa pensamentu karnal. P’esei apòstel Pablo a kòrda nos ku nos tin ku protehá nos manera di pensa. El a skirbi: “Esnan ku ta segun e karni ta fiha nan mente riba e kosnan di karni, ma esnan ku ta segun e spiritu, riba e kosnan di e spiritu.”​—Rom. 8:5.

²⁰ Kon nos por evitá ku e spiritu di mundu ta dominá nos pensamentunan—i pues nos akshonnan? Nos tin ku pone un filter na nos mente, hasiendo esfuerso pa blòkia e ideanan inkorekto di mundu mas tantu posibel. Por ehèmpel, ora di skohe entretenimentu, nos ta nenga di laga programanan ku ta promové inmoralidat i violensia susha nos mente. Nos sa ku e spiritu santu, òf limpi, di Dios lo no biba den un mente sushi. (Sal. 11:5; 2 Kor. 6:​15-18) Ademas, nos ta invitá e spiritu di Dios den nos mente dor di lesa Beibel regularmente, hasi orashon, meditá riba kosnan spiritual i asistí na reunion. Anto nos ta koperá ku e spiritu ei segun ku nos ta partisipá regularmente den e trabou kristian di prediká.

²¹ Un kos ta sigur, nos tin ku resistí e spiritu di mundu i e deseonan karnal ku e ta promové. Anto ta bale la pena pa nos hasi esfuerso sinsero pa logra esei, pasobra manera Pablo a deklará, “e mente fihá riba e karni ta morto, ma e mente fihá riba e spiritu ta bida i pas.”​—Rom. 8:6.

[Nota]

Bo Ta Kòrda?

• Kiko nos mester hasi pa risibí spiritu santu?

• Kon asina e spiritu di mundu lo por influensiá nos?

• Kon nos por resistí e spiritu di mundu?

[Preguntanan di Estudio]

[Plachi na página 25]

Promé ku bo sali bai trabou òf skol, pidi pa haña spiritu santu

[Plachi na página 27]

Nos mester tene nos mente limpi, ser onrado den asuntunan di negoshi i moderá den nos kustumbernan