E Patoi i te ‘Vaerua o Teianei Ao’

‘Te vaerua i rauka ia tatou nei, kare ïa to teianei ao, ko te vaerua ra no ko mai i te Atua ra.’​—1 KORI. 2:12.

1, 2. (a) I te tuatau i topa, eaa ra te au manu kaneri i tukuia ai ki roto i te ngai ko ngarau i Peritane? (e) Eaa te kino ta te au Kerititiano e aro atura?

I TE mataiti 1911, kua akatika te aronga mana o Peritane i tetai ture tei akanooia ei akaora i te oraanga o te aronga angaanga i roto i te ngai ko ngarau. Kua anoanoia e rua nga manu kaneri, mei te manu kerearako rai, i roto i te au ngai ko ngarau. Eaa te akakoroanga? Me ka mai tetai ai i roto i te ngai ko ngarau, ka apai te aronga tauturu i tetai au manu kaneri ki raro i te enua. Ka kino vave ua teia au manu rikiriki i te au gas poitini. Me kino te reva, ka kitea rai te au akairo i roto i te tu o te manu, e ka topa katoa mai mei runga i to ratou tauranga. E mea puapinga tikai teia akamatakiteanga vave ua. Ko tetai o teia au gas poitini, kare ona kara kare e aunga, ka tamate ra te reira i te au teera muramura o te toto kia kore e rauka i te apai i te reva meitaki ki roto i te kopapa. Me kare e akamatakiteia atu te kino, ka matapoiriia te aronga tauturu e ka mate ma te kore e kite e te poitiniia ra ratou.

² I roto i taua tu rai, te aro atura te au Kerititiano i tetai turanga mei te aronga angaanga rai i roto i te ngai ko ngarau. Akapeea ra? I te oronga anga a Iesu i te angaanga ki tana au pipi kia tutu aere i te tuatua meitaki i te ao katoa, kua kite aia e te tono ra aia ia ratou ki roto i tetai ngai kino, ko Satani e te vaerua o teianei ao te akaaere ra. (Mata. 10:16; 1 Ioa. 5:19) No to Iesu manamanata no runga i tana au pipi, i te po i mua ake ka mate ei aia, kua pure aia ki tona Metua e: “Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou, [“no te vaerua kino ra oki,” NW].”​—Ioa. 17:15.

3, 4. Eaa te akamatakiteanga ta Iesu i oronga ki tana au pipi, e eaa tatou ka inangaro ei i te akamanako atu i te reira?

 ³ Kua akamatakite a Iesu i tana au pipi no runga i te kino pae vaerua te ka riro ei mate no ratou. E aiteanga puapinga tana au tuatua no tatou, ia tatou e noo nei i roto i teia akatereanga o te au mea nei. Kua raurau aia i tana au pipi e: “E ara kotou . . . kia tau ia kotou te ora i teianei au mea katoa e vaitata mai nei, e kia tu kotou ki mua i te aroaro o te Tamaiti a te tangata.” (Luka 21:34-36) Ko te mea mataora ra, kua taputou katoa a Iesu e ka oronga mai tona Metua i te vaerua tapu ei akaaraara i to ratou manako e ei tauturu ia ratou kia vai ara ua e kia vai maroiroi ua.​—Ioa. 14:26.

⁴ Akapeea tatou i teia tuatau? Te tauturu maira ainei taua vaerua tapu ra ia tatou? Me koia ia, eaa ta tatou ka rave e rauka mai ei te reira? Eaa te vaerua o teianei ao, e akapeea ana te reira me angaanga? E ka akapeea tatou e puapingaia ai i te patoi atu i te vaerua o teianei ao?​—E tatau ia 1 Korinetia 2:1, 2.

Ko te Vaerua Tapu me ko te Vaerua o Teianei Ao?

5, 6. Eaa ta te vaerua tapu ka rave no tatou, inara eaa ta tatou ka rave e rauka ai te reira?

⁵ Kare te oronga anga mai i te vaerua tapu i takotinga uaia ki te anere mataiti mua. Ka rauka ua te reira i teia tuatau, e ka oronga mai te vaerua o te Atua i te maroiroi kia tatou kia rave i te mea tau e pera katoa i te akamaroiroi mai ia tatou i roto i tana angaanga. (Roma 12:11; Phili. 4:13) Ka akatupu katoa te reira i te au tu maru i roto ia tatou, mei te aroa, te takinga meitaki, e te meitaki, e au tu ia no “te ua o te vaerua.” (Gala. 5:22, 23, NW) Inara, kare te Atua ko Iehova e maro ana i tona vaerua tapu ki rungao i te au tangata kare e inangaro ana i te reira.

⁶ E mea tau i reira, no tatou kia ui e, ‘Eaa taku ka rave kia rauka te vaerua tapu?’ Te akaari maira te Pipiria e e maata te au apinga ka rauka ia tatou i te rave. Tetai takainga puapinga e te mama ua koia oki e pati ki te Atua no te reira. (E tatau ia Luka 11:13.) Tetai takainga puapinga katoa koia oki, kia apii e kia akono i te akoanga i roto i te Tuatua akauruia e te vaerua o te Atua. (2 Timo. 3:16) E tika oki e, kare te vaerua o te Atua e rauka i te aronga katoatoa e tatau ra i te Pipiria. Inara me apii tetai Kerititiano ngakau tae i te Tuatua a te Atua, ka marama aia i te tu e te manakonakoanga tei akakiteia mai i roto i te Tuatua akauruia. E mea puapinga katoa kia ariki tatou e kua akamana a Iehova ia Iesu ei komono Nona e koia te mataara e oronga maira te Atua i tona vaerua. (Kolo. 2:6) Kia tau ki te reira, ka inangaro tatou i te akarotai i to tatou oraanga ki to Iesu akaraanga e tana au apiianga. (1 Pete. 2:21) Te maata atu i ta tatou tauta anga kia riro mei ia Karaiti rai, te maata atu ia o te vaerua tapu ka rauka ia tatou.

7. E akapeea ana te vaerua o teianei ao i te akakeu anga i te au tangata tataki tai?

⁷ Ei tukeanga, te akakeu nei te vaerua o teianei ao i te tangata kia akaari mai i to Satani tu. (E tatau ia Ephesia 2:1-3.) E maata te au mataara e angaanga nei te vaerua o teianei ao. Mei tei kiteaia takapini ia tatou i teia tuatau, te akamaroiroi maira te reira i te meameaau anga i to te Atua au turanga. Te akamaroiroi maira te reira i “te anoano tika kore o te kopapa nei, e te anoano tika kore o te mata nei, e te akatietie o te ora anga nei.” (1 Ioa. 2:16) Te akatupu ra te reira i te au  angaanga o te kopapa, mei te moeaana, te akamori itoro, te purepure, te vareae, te rotoriri, e te kona kava. (Gala. 5:19-21) E te akatupu ra te reira i te tuatua a te aronga tei akaruke i te tuatua mou e tei patoi i te mea tapu. (2 Timo. 2:14-18) Te papu ua ra e, ko te maata atu i ta tetai tangata akatika anga iaia uaorai kia akakeuia e te vaerua o teianei ao, ko te maata atu ia iaia i te aru i te tu o Satani.

8. Eaa te ikianga ta tatou pouroa e aro atu nei?

⁸ Kare e rauka ia tatou i te akatakake mai mei te au akakeuanga ravarai o vao mai. Kia iki rai te tangata tataki tai e eaa tana ka akatika kia akatere i tona oraanga​—ko te vaerua tapu me ko te vaerua o teianei ao. Ka rauka i te aronga e akatereia ra e te vaerua o teianei ao i te akaatea mai mei tana au akakeuanga e kia akatika i te vaerua tapu kia arataki i to ratou oraanga. Inara, ko teia katoa tetai ka tupu. Te aronga tei aratakiia ana e te vaerua tapu no tetai tuatau, ka topa katoa ratou ki roto i te ereere a te vaerua o teianei ao. (Phili. 3:18, 19) Ka akamanako ana tatou e ka akapeea e rauka ai ia tatou i te patoi atu i te vaerua o teianei ao.

Kia Kite Vave i te Au Akairo Akamatakite

9-11. Eaa tetai au akairo e akamatakite maira e te akakeuia nei tatou e te vaerua o teianei ao?

⁹ Kua taangaanga ana te aronga ko ngarau i Peritane tei taikuia i mua akenei i te au manu kaneri ei akamatakite vave mai e e gas poitini tetai. Me kite atu tetai tangata ko ngarau i te manu e topa ra mei runga i tona tauranga, kua kite aia i reira e ka anoanoia aia kia akaatea viviki mai kia ora aia. Me akapiri tatou i teia manako ki to tatou oraanga Kerititiano, eaa tetai au akairo e akamatakite vave maira e te akakeuia nei tatou e te vaerua o teianei ao?

¹⁰ I to tatou apii mua anga i te tuatua mou i roto i te Tuatua a te Atua e kua akatapu i to tatou oraanga kia Iehova, penei e e mea inangaro na tatou i te tatau i te Pipiria. Kare e kore e e pure akatenga putuputu ua ana tatou. E reka ana tatou i te aere ki te au uipaanga a te putuputuanga, i te akamanako anga i te reira ei tumu no te akamaroiroianga, mei tetai ngai vai rai i roto i te metepara no tetai tangata kaki vai. Kua tauturu taua au mea ra ia tatou kia matara mai e kia vai takake ua mai rai mei te vaerua o teianei ao.

¹¹ Te tauta ra ainei rai tatou i te tatau i te Pipiria i te au ra ravarai? (Sala. 1:2) Te pure putuputu ra ainei rai tatou ma te ngakau tae? Te inangaro tikai ra ainei tatou i te au uipaanga a te putuputuanga, e te tae anga ki te au uipaanga katoatoa i te au epetoma ravarai? (Sala. 84:10) Me kua ngaro ainei teia au tu meitaki? Penei e maata ta tatou au angaanga e te anoanoia ra to tatou taime e te maroiroi, ka riro te akonoanga i to tatou turanga pae vaerua ei akaaoanga. Inara me kua kino tetai o to tatou au tu meitaki i te au tuatau i aere ia, ka tano ainei i te karanga e te akakeuia nei tatou e te vaerua o teianei ao? Ka tauta pakari ainei tatou i teianei i te akaora akaou mai i te au tu meitaki i rauka ana ia tatou i mua ana?

“Ko te Opue Aea to Kotou Ngakau”

12. No runga iaai ma i akakite ei a Iesu e “kia matakite” tana au pipi, e no teaa ra?

¹² Eaa atu tetai ka rauka ia tatou i te rave i te patoi atu i te vaerua o teianei ao? I te akoanga a Iesu i tana au pipi kia “ara,” koi akamatakite ua atura aia ia ratou i tetai au kino. Kua tuatua aia e: “E matakite ra ia kotou, ko te opue aea to kotou ngakau i te maata o te kai e te kona, e te pekapeka o teianei ao, ka rokoia mai ei kotou e taua rā ra, kare i manakoia atu. E rokoia mai oki tei noo i te ao katoa nei i te reira, mei te ereere ra.”​—Luka 21:34, 35.

13, 14. Eaa te au uianga ka tau tatou kia ui kia tatou uaorai no runga i te kaikai e te inu kava?

¹³ E akamanako ana no runga i taua akamatakiteanga ra. Te akaapa ra ainei a Iesu i te mataora o te kaianga e te inuanga? Kare! Kua kite aia i ta Solomona au tuatua e e: “Kite akera au e, kare atu e meitaki i taua au mea ra, mari ra kia rekareka te tangata e kia takinga-meitaki i te ora anga nei. Kareka ra kia kaikai anake ra te tangata e kia inu, e kia rave aia i te meitaki no tana katoa ra au angaanga; e mea o maiia mai ïa e te Atua.” (Kohe. 3:12, 13) Inara, kua kite a Iesu e te akamaroiroi ra te vaerua o teianei ao i te tangata kia kore e rauka i te akatere iaia uaorai no runga i te kai e te inu anga i te kava.

¹⁴ Akapeea tatou e kite ei e kare to tatou manako i poitiniia e te vaerua o teianei ao no runga i te au kino no te kaikai maata e te inu maata i te kava? Penei ka ui tatou kia tatou uaorai e: ‘Eaa te manako no runga i te tatau anga i te akoanga i roto i te Pipiria me kore i roto i ta tatou au puka no runga i te kaituauau? Me ka kopae ainei au i teia akoanga ei mea puapinga kore ua e te pakari roa, penei te kotoe anga e te tano ua nei taku tukuanga  tika? * Eaa ra toku manako no runga i te kava, i te inu anga i te reira, kia tau ua e kia kopae takiri i te ‘kona kava’? Me te akaiti ua ra au i te puapinga o taua akoanga ra, i te manako anga e kare noku tera akoanga? Me akakite mai tetai ke e te manamanata ra ratou no runga i taku inuinu anga, ka riri ainei au e ka patoi atu? Me te akamaroiroi ra ainei au i tetai ke e eiaa e akarongo atu ki taua akoanga a te Pipiria?’ Ae, te akaari maira te tu o te tangata e te akakeuia ra aia e te vaerua o teianei ao.​—E akaaite ia Roma 13:11-14.

E Kopae i te Tu Apiapi

15. I akamatakite mai a Iesu no runga i teea tu manako apiapi o te tangata?

¹⁵ Tetai takainga puapinga i te patoi atu i te vaerua o teianei ao te o maira te mataara e akono ana tatou i te tu apiapi. Kua kite a Iesu e ei au tangata apa ua, e apiapi ana tatou no runga i te au mea noa ua nei o te oraanga. Kua tuatua aroa atu aia ki tana au pipi e: “Auraka e apiapi.” (Mata. 6:25) Te marama uaia atura e e manamanata ana tatou no runga i te au mea puapinga, mei te akamareka anga i te Atua, i te akono anga i ta tatou au apainga ei Kerititiano, e te oronga anga i te au mea tei anoanoia no te oraanga no to tatou ngutuare tangata. (1 Kori. 7:32-34) Eaa i reira ta tatou ka kite mai mei te akamatakiteanga a Iesu?

16. Eaa te tu ta te vaerua o teianei ao e akatupu ana ki runga i te tangata e manganui?

¹⁶ Te riro nei te vaerua o teianei ao e tona akatietie anga i tana au apinga o te oraanga ei takino i te manganui ki te tu apiapi kare e meitaki ana no ratou. Ka inangaro teianei ao kia irinaki tatou e ka apai mai te moni i te turanga tinamou e kare e na te au tu pae vaerua e puapingaia ai te tangata, mari ra na te maata e te tu meitaki o tana au apinga. Te aronga tei akavareia e teia pikikaa ka riro ratou ei tuikaa ki te aruaru anga i te au apinganui e, e apiapi ua ana rai ratou kia rauka te au apinga ou roa atu, te au mea maatamaata roa atu, e te au mea meitaki rava atu. (Mase. 18:11) Ka akatupu taua tu manako tarevake ra no te au apinga o te kopapa i te tu apiapi te ka riro ei arai i te tupuanga pae vaerua o tetai tangata.​—E tatau ia Mataio 13:18, 22.

17. Akapeea tatou i te kopae anga i te tu apiapi?

 ¹⁷ Ka rauka ua ia tatou i te kopae i te tu apiapi me akono tatou i ta Iesu akauenga e: “E na mua ra kotou i te kimi i te basileia o te Atua, e te tuatua-tika nana ra.” Te akapapu maira a Iesu kia tatou e me rave tatou i teia, ka kapitiia mai te au apinga ta tatou e anoano tikai ra. (Mata. 6:33) Akapeea tatou i te akaari anga e te irinaki ra tatou i teia taputou? Ko tetai mataara koia oki kia na mua tatou i te kimi i te tuatua tika a te Atua​—na te akono anga i to te Atua au turanga tika no runga i te au mea o te moni. Ei akatauanga, kare tatou e inangaro i te pikikaa i ta tatou tutaki anga tero me kore i te akakite i tetai au pikikaa “rikiriki ua” i roto i ta tatou au angaanga pitiniti. Kia rave tatou i te au mea ravarai tei tau i te akatupu i ta tatou au apainga i te pae moni, i te akariro anga i ta tatou “Koia, e koia” i te tutaki anga i te kaiou. (Mata. 5:37; Sala. 37:21) Penei kare taua tu tuatua tika ra e akaona i tetai tangata, inara ka rauka mai to te Atua marekaanga, ka akatupu i te akava ngakau meitaki, e ka akaiti takiri mai i te tu apiapi.

18. Eaa te akaraanga meitaki ta Iesu i akanoo no tatou, e ka akapeea tatou e puapingaia ai i te aru anga iaia?

¹⁸ I te kimi anga i te Patireia na mua te o maira te kite anga e eaa te au mea puapinga roa atu i roto i to tatou oraanga. E akamanako ana i to Iesu akaraanga. I tetai au taime, e aao ana aia i te au kakau memeitaki. (Ioa. 19:23) E reka ana aia i te kaikai e te inu i te uaina ma tona au oa meitaki. (Mata. 11:18, 19) Kareka te au apinga e te tamataoraanga, mei te au mea akareka kai rai te reira i roto i tona oraanga, kare ra e ko te reira te mea puapinga roa atu. Ko ta Iesu kai koia oki ko te akono i to Iehova anoano. (Ioa. 4:34-36) E puapinga tikai te oraanga me aru tatou i to Iesu akaraanga! E rekareka ana tatou i te tauturu i te aronga tei takinga kinoia kia rauka te pumaana mei te au Tuatua Tapu. Ka rauka ia tatou te aroa e te turuturuanga a te putuputuanga. E ka akarekareka tatou i te ngakau o Iehova. Me kite tatou eaa te au mea puapinga roa atu i roto i to tatou oraanga, kare i reira te au apinga e te au mea e navenave ei ra e riro ei akaaere ia tatou. Mari ra, e au mea ua te reira ei tauturu ia tatou i te akamori ia Iehova. E ko te maroiroi atu ia tatou i te turu i te angaanga a te Patireia o te Atua, kare i reira tatou e akaaereia e te vaerua o teianei ao.

‘Akono Atu rai i ta te Vaerua’

19-21. Akapeea tatou i te ‘akonoanga i ta te vaerua,’ e no teaa tatou ka akapera ai?

¹⁹ E na mua ana te akamanako, ka rave ei i te angaanga. Ta te manganui e manako ra e e au angaanga manako kore ua, i te maata anga o te taime e au angaanga te reira tei akakeuia e te aerenga manako o te tangata. No reira, te akamaara maira te apotetoro ko Paulo kia tatou i te anoano kia paruru i to tatou aerenga manako. Kua tata aia e: ‘Te aronga oki i tau i ta te kopapa nei, te akono ra i ta te kopapa; kareka te aronga i tau i ta te vaerua ra te akono ra ia i ta te vaerua.’​—Roma 8:5.

²⁰ Akapeea tatou i te kopae anga kia kore to tatou aerenga manako​—e ta tatou au angaanga​—e akaaereia e te vaerua o teianei ao? E paruru tatou i to tatou manako, na te tauta anga kia arai pakari atu i te au pikikaa a teianei ao. Ei akaraanga, me iki i te tamataoraanga, kare tatou e inangaro kia taviiviiia to tatou au manako e te au porokaramu e akamaroiroi ra i te tu akono tau kore e te kino. Kua kite tatou e kare to te Atua vaerua tapu e noo i roto i te tangata manako viivii. (Sala. 11:5; 2 Kori. 6:15-18) Pera katoa, te ariki nei tatou i te vaerua o te Atua ki roto i to tatou au manako na te tatau putuputu anga i te Pipiria, te pure anga, te akamanako oonu anga, e te tae anga ki te au uipaanga. E te angaanga kapiti nei tatou ma taua vaerua ra, ia tatou e piri putuputu ra ki roto i te angaanga tutu anga a te Kerititiano.

²¹ E patoi tatou i te vaerua o teianei ao e te au anoano o te kopapa ta te reira e akatupu ra. Na te rave anga i te reira ka puapingaia tikai ta tatou tauta pakari anga no te mea, mei ta Paulo i akakite mai e, ‘ko te akono oki i ta te kopapa nei, ko te mate ïa; kareka ko te akono i ta te vaerua ra, ko te ora ïa e te au.’​—Roma 8:6.

[Tataanga Rikiriki i Raro]

Maara Ainei ia Koe?

• Kia rauka mai ei te vaerua tapu, eaa ta tatou ka rave?

• Eaa tetai au mataara ka akakeu te vaerua o teianei ao ia tatou?

• Akapeea tatou i te patoi anga i te vaerua o teianei ao?

[Au Uianga Apii]

[Tutu i te kapi 21]

I mua ake ka aere ei ki te angaanga e te apii e pure no te vaerua tapu

[Au Tutu i te kapi 23]

Kia vai viivii kore ua rai to tatou manako, e akono meitaki i te rave anga i te au angaanga pitiniti, e kia tau ua te tu