Yehova Komo “Libertadó” den Tempu Bibliko

“Pura bin serka mi, o Dios! Bo ta mi yudansa i mi libertadó.”​—SAL. 70:5.

1, 2. (a) Ki ora adoradó di Dios ta akudí na dje pa yudansa? (b) Ki pregunta ta lanta, i unda nos por haña e kontesta?

DURANTE un fakansi, mayornan di un señora kasá di 23 aña ta tende ku nan yu muhé a disparsé misteriosamente. Tin sospecho ku ta un krímen. Mesora nan ta paketá nan kosnan i kue kabes pa kas, rogando Yehova nònstòp pa yuda nan. Dòkternan ta saka afó ku un ruman hòmber Testigu di 20 aña tin un malesa ku lo lag’é keda kompletamente paralisá. Mesora e ta akudí na Yehova den orashon. Un mama soltero ku ta lucha pa haña un trabou no tin sufisiente plaka pa kumpra kuminda p’e ku su yu muhé di 12 aña. E ta deshogá su mes serka Yehova. Sí, ora adoradó di Dios haña nan ku prueba i difikultat serio, lógikamente nan ta akudí na dje pa yudansa. Abo a yega di roga Yehova pa yuda bo na momento ku bo a haña bo ku un nesesidat urgente?

² Tin un pregunta importante ku ta lanta: Di bèrdat nos por ferwagt ku Yehova lo kontestá nos orashonnan ora nos pidié yudansa? Salmo 70 ta duna nos un kontesta ku ta hasi nos fe mas firme. David ta esun ku a skirbi e salmo konmovedor akí; e tabata un adoradó leal di Yehova ku a haña su mes ku hopi prueba i situashon difísil den bida. E eskritor inspirá akí di salmo a sintié konmoví pa bisa di Yehova: “O Dios! Bo ta mi yudansa i mi libertadó.” (Sal. 70:5) Un análisis di Salmo 70 por yuda nos mira dikon nos tambe por akudí na Yehova den tempu di nesesidat i konfia plenamente ku lo e ta nos “Libertadó,” Esun ku ta yuda nos skapa.

“Bo Ta . . . Mi Libertadó”

3. (a) Salmo 70 tin ki sklamashon pa yudansa? (b) Ki konfiansa David a ekspresá na Salmo 70?

³ Salmo 70 ta kuminsá i kaba ku un sklamashon urgente na Dios pa yudansa. (Lesa Salmo 70:​1-5.) David a roga Yehova pa “pura” i “no tarda” pa libr’é. Den e versíkulonan 2 pa 4, David a hasi vários petishon i kada un a ekspresá un deseo. Versíkulo 2 i 3 ta papia tokante esnan ku a purba mat’é. David a pidi Yehova derotá e enemigunan akí i brongosá nan pa nan maldat. E siguiente dos  súplikanan, den versíkulo 4, tin di haber ku e pueblo di Dios. David a pidi pa esnan ku ta buska Yehova por ser motivá pa alegrá i engrandesé Yehova. Na konklushon di su salmo, David a bisa Yehova: “Bo ta mi yudansa i mi libertadó.” Tuma nota ku David no a bisa: “Laga abo resultá di ta,” komo si fuera hasiendo un otro petishon. Na lugá di esei, el a ekspresá su konfiansa i a bisa: “Bo ta.” David tabatin sigur ku lo el a risibí yudansa divino.

4, 5. Kiko nos ta siña tokante David for di Salmo 70, i ki konfiansa nos por tin?

⁴ Kiko Salmo 70 ta siña nos di David? Ku ora el a konfrontá enemigunan desididu ku kier a mat’é, el a skohe pa no tuma e asuntu den su mes man. Mas bien, el a konfia ku Yehova lo a tuma medida kontra e opositornan na su debido tempu i manera. (1 Sam. 26:10) David a sigui firmemente konvensí ku Yehova ta yuda i libra esnan ku ta busk’é. (Heb. 11:6) Segun David, tal adoradó berdadero tabatin tur motibu pa alegrá i engrandesé Yehova dor di konta otro hende tokante su grandesa.​—Sal. 5:11; 35:27.

⁵ Meskos ku David, nos por tin pleno konfiansa ku Yehova ta Esun ku ta yuda nos i libra nos. P’esei, ora nos ta konfrontá pruebanan difísil òf ta sinti ku nos tin mester di yudansa urgente, ta na su lugá pa nos pidi Yehova den orashon pa bin yuda nos lihé. (Sal. 71:12) Pero kiko Yehova lo hasi komo reakshon riba nos petishonnan pa yudansa? Promé ku nos bai konsiderá kon Yehova lo por yuda nos, laga nos analisá tres manera den kua el a libra òf skapa David dor di yud’é den tempu di nesesidat urgente.

Librá di Opositor

6. Kon David por a sa ku Yehova ta perkurá liberashon pa hende hustu?

⁶ For di e partinan inspirá di Beibel ku David tabatin na su disposishon, el a siña ku hende hustu por konta ku Yehova lo yuda nan. Yehova a skapa Noe i su famia deboto ora el a trese e Diluvio riba un mundu malbado. (Gén. 7:23) Yehova a yuda e hòmber hustu Lòt ku su dos yu muhénan skapa ora el a laga kandela i suafel yobe for di shelu riba e habitantenan malbado di Sodoma i Gomora. (Gén. 19:​12-26) Yehova a protehá su pueblo i asina a yuda nan skapa di un morto teribel ora el a destruí e Fárao orguyoso i su forsa militar den Laman Kòrá. (Eks. 14:​19-28) Pues anto, no ta nada straño ku den un otro salmo David a alabá Yehova komo ‘un Dios di liberashon.’​—Sal. 68:20.

7-9. (a) Ki motibu David tabatin pa pone su konfiansa den Dios su kapasidat di skap’é? (b) Ken David a duna krédito p’e echo ku el a skapa?

⁷ Ademas, David tabatin un motibu masha personal pa pone su pleno konfiansa den Yehova su kapasidat di skap’é. David mes a eksperensiá personalmente ku “e brasanan eterno” di Yehova por libra esnan ku ta sirbié. (Deu. 33:27) Na mas ku un okashon, Yehova a yuda David skapa for di gara di “enemigunan” furioso. (Sal. 18:​17-19, 48) Konsiderá un ehèmpel.

⁸ Ora ku e muhénan di Israel a kuminsá elogiá David pa su hazañanan militar, Rei Saul a bira asina yalurs ku na dos okashon el a manda su lansa riba David. (1 Sam. 18:​6-9) Tur dos biaha David a skapa di e punta skèrpi di e lansa. Akaso esei tabata djis pasobra David tabatin e abilidat i agilidat di un guerero eksperto? Nò. Beibel ta splika ku Yehova “tabata kuné.” (Lesa 1 Samuel 18:​11-14.) Mas despues, ora Saul su kòmplòt pa laga e filisteonan mata David a frakasá, “Saul a mira i a komprondé ku SEÑOR tabata ku David.”​—1 Sam. 18:​17-28.

⁹ Ken David a duna krédito p’e echo ku el a skapa? E enkabesamentu di Salmo 18 ta bisa ku David “a papia e palabranan di e kantika akí ku SEÑOR riba e dia ku SEÑOR a libr’é . . . for di man di Saul.” David a ekspresá su sintimentunan den kantika, bisando: “SEÑOR ta mi baranka i mi fòrti, i mi libertadó, mi Dios,  mi baranka, den kende mi ta tuma refugio.” (Sal. 18:2) E echo ku Yehova ta kapas pa libra su pueblo no ta hasi nos fe mas firme?​—Sal. 35:10.

Sostené Riba Kama di Malesa

10, 11. Kiko ta yuda nos determiná e tempu ku David lo tabata malu, manera Salmo 41 ta menshoná?

¹⁰ Un biaha, Rei David tabata sufri di un malesa grave, i Salmo 41 ta menshoná esaki. Durante un periodo David tabata malu na kama. E tabata asina malu ku algun di su enemigunan a pensa ku “e lo no [a] lanta mas.” (Versíkulo 7 i 8) Ta ki tempu David tabata asina malu? E sirkunstansianan menshoná den e salmo akí kisas tin di haber ku e periodo yen di tenshon den David su bida ora ku su yu Absalon a purba poderá di e trono.​—2 Sam. 15:​6, 13, 14.

¹¹ Por ehèmpel, David a referí na un amigu di konfiansa, ku tabatin kustumber di kome pan huntu kuné, ku a traishon’é. (Versíkulo 9) Esaki por laga nos kòrda riba un insidente den bida di David. Durante e rebelion di Absalon, David su konsehero di konfiansa, Ahitofel, a traishon’é i bai djòin Absalon den e rebelion kontra e rei. (2 Sam. 15:31; 16:15) Djis imaginá e rei tur débil riba su kama di malesa, sin forsa pa lanta, anto sabiendo ku e tabata rondoná pa konspiradónan ku tabata ke pa e muri pa nan por a kumpli ku nan plannan malisioso.​—Versíkulo 5.

12, 13. (a) Ki konfiansa David a ekspresá? (b) Kon kisas Dios a fortalesé David?

¹² David a keda konfia den su Libertadó, Esun ku lo a yud’é skapa. David a bisa lo siguiente tokante un sirbidó rekto di Yehova ku ta malu: “Yehova lo perkurá pa e skapa den e dia di kalamidat. Yehova mes lo sosten’é riba un kama di enfermedat; sigur lo bo kambia tur su kama durante su enfermedat.” (Sal. 41:​1, 3, NW) Tuma nota aki un biaha mas di e konfiansa ku David tabatin, i ku el a ekspresá den e palabranan “Yehova mes lo sosten’é.” David tabatin sigur ku Yehova lo a perkurá eskape p’e. Kon asina?

¹³ David no tabata ferwagt pa Yehova hasi un milager i kur’é di su malesa. Mas bien, David tabatin sigur ku Yehova lo a “sosten’é,” es desir, dun’é apoyo i fortalesa miéntras ku e tabata drumí riba su kama di malesa. David definitivamente tabatin mester di tal yudansa. Fuera di e malesa ku a debilit’é, e tabata rondoná pa enemigunan ku tabata papia malu di dje. (Versíkulo 5 i 6) Ta posibel ku Yehova a fortalesé David dor di yud’é kòrda riba pensamentunan ku a konsol’é. Ta interesante pa nota ku David a bisa: “Pa motibu di mi integridat bo a sostené mi.” (Versíkulo 12, NW) Kisas David a haña fortalesa tambe dor di reflekshoná riba e echo ku apesar di su kondishon débil i e mal kosnan ku su enemigunan tabata papia, Yehova sí a mir’é komo un hòmber di integridat. Finalmente, David a rekuperá di su malesa. No ta un alivio pa sa ku Yehova por sostené hende ku ta malu?​—2 Kor. 1:3.

Dios A Perkurá pa E Haña Alimento

14, 15. Ki tempu David i su hòmbernan a haña nan mes den gran nesesidat di alimento, i ki yudansa nan a risibí?

¹⁴ Ora David a bira rei di Israel, e por a disfrutá di e mihó kuminda i bebida i asta invitá hopi otro hende pa bin kome serka dje. (2 Sam. 9:10) Sinembargo, David tabata sa tambe kiko ke men biba ku skarsedat di kuminda. Ora su yu Absalon a organisá un rebelion i a purba poderá di e trono, David huntu ku algun sirbidó leal na dje a bandoná Yerusalèm. Nan a hui bai na e tera di Galaad, ost di Riu Hordan. (2 Sam. 17:​22, 24) Obligá na biba komo fugitivo, no a tarda mashá ku David ku su hòmbernan tabatin mester di kos di kome i bebe urgentemente i tambe di sosiegu. Pero na unda nan lo a haña esei den e área basta aislá ei?

 ¹⁵ Finalmente, David ku su hòmbernan a yega na e stat di Mahanaim. Ei nan a topa tres hòmber ku kurashi: Sobi, Makir i Barzilai. E tresnan ei tabata dispuesto pa riska nan bida pa yuda e rei apuntá pa Yehova, pasobra si Absalon a logra poderá di e reinado, sin duda lo el a kastigá severamente tur esnan ku a apoyá David. Pero e tres siguidónan leal akí a realisá den ki situashon penoso David i su hòmbernan tabata, i nan a bini ku kosnan ku esakinan tabatin gran mester di dje, entre otro, kama, trigu, puspas, maishi tostá, bonchi, lenteha, miel, lechi i karné. (Lesa 2 Samuel 17:​27-29.) E lealtat i hospitalidat ekstraordinario di e tres hòmbernan akí lo mester a konmové David mashá. Hamas lo e por a lubidá loke nan a hasi p’e!

16. Ken al fin i al kabo tabata responsabel pa perkurá alimento pa David ku su hòmbernan?

¹⁶ Pero ken al fin i al kabo tabata responsabel pa perkurá alimento pa David ku su hòmbernan? David tabata konvensí ku Yehova ta perkurá pa su pueblo. Yehova siguramente por duna otro sirbidó di dje un push, na moda di papia, pa nan yuda nan rumannan den fe ku ta den nesesidat. Ora David tabata reflekshoná riba loke a pasa na e tera di Galaad, sin duda el a mira e bondat ku e tres hòmbernan ei a demostrá komo un ekspreshon di Yehova su kuido amoroso. Kasi na final di su bida, David a skirbi: “Mi tabata yòn, i awor mi ta bieu; ma nunka mi no a mira e hustu [inkluso e mes] desampará, ni su desendientenan ta pidi pan.” (Sal. 37:25) No ta un gran konsuelo pa sa ku e man di Yehova nunka ta kòrtiku?​—Pro. 10:3.

“Yehova Sa Kon pa Libra Hende”

17. Kiko Yehova a demostrá bes tras bes?

¹⁷ David tabata apénas un di e tantísimo adoradónan ku Yehova a perkurá liberashon p’e den tempu bíbliko. For di e tempu di David en adelante, Dios a demostrá bes tras bes ku e palabranan di apòstel Pedro ta bèrdat: “Yehova sa kon pa libra hende deboto na dje for di prueba.” (2 Ped. 2:9, NW) Konsiderá dos ehèmpel mas.

18. Kon Yehova a perkurá liberashon den tempu di Ezekias?

¹⁸ Ora ku e poderoso ehérsito di Asiria a invadí Huda i a menasa Yerusalèm den siglo 8 promé ku nos era, Rei Ezekias a pidi den orashon: “O SEÑOR nos Dios, libra nos . . . pa tur reino di mundu por sa ku abo so, SEÑOR, ta Dios.” (Isa. 37:20) Ezekias su preokupashon prinsipal tabata e reproche ku lo a bini riba Dios su nòmber. Yehova a kontestá e orashon ferviente ei. Den ún anochi, un solo angel a mata 185.000 asirio, i asina a perkurá liberashon  pa e sirbidónan fiel di Yehova.​—Isa. 37:32, 36.

19. Kristiannan di promé siglo a skapa kalamidat dor di hasi kaso di ki spièrtamentu?

¹⁹ Apénas un par di dia promé ku Hesus a muri, el a duna un spièrtamentu profétiko p’e benefisio di su disipelnan na Hudea. (Lesa Lukas 21:​20-22.) Dékadanan a pasa, pero na aña 66 di nos era, un rebelion hudiu a pone e forsanan romano bini kontra Yerusalèm. E ehérsito bou di Sestio Galo a logra debilitá parti di e muraya di e tèmpel; anto diripiente nan a retirá. Kristiannan fiel a rekonosé esaki komo un oportunidat pa skapa e destrukshon ku Hesus a profetisá di dje, i nan a hui bai na e serunan. E ehérsito romano a regresá na aña 70. E biaha akí sí nan no a retirá i nan a destruí Yerusalèm kompletamente. E kristiannan ku a hasi kaso di e spièrtamentu di Hesus a skapa e kalamidat teribel ei.​—Luk. 19:​41-44.

20. Dikon nos por konfia den Yehova komo nos “Libertadó”?

²⁰ Ta bon pa reflekshoná riba e evidensia ku Yehova ta yuda su pueblo, pasobra esei ta algu ku ta fortalesé nos fe. Loke el a hasi den pasado ta duna nos base pa konfiansa. Sin importá ki situashon difísil nos por ta konfrontá awor òf lo por topa den futuro, nos tambe por pone pleno konfiansa den Yehova komo nos “Libertadó,” Esun ku ta yuda nos skapa. Pero kon Yehova por yuda nos skapa? I kiko di e personanan menshoná na prinsipio di e artíkulo akí? Kon a para ku nan? Laga nos wak den e siguiente artíkulo.

Bo Ta Kòrda?

• Salmo 70 ta duna nos motibu pa tene ki konfiansa?

• Kon Yehova a sostené David durante malesa?

• Ki ehèmpelnan ta mustra ku Yehova por libra su pueblo for di opositor?

[Preguntanan di Estudio]

[Plachi na página 14]

Yehova a kontestá e orashon di Ezekias