‘Libraqninchik’ Jehová Diosqa, waqaycharqam ñawpaq tiempopi serviqninkunataqa

“Wakcha runa kasqayraykuyá utqamuspayki yanapaykullaway. Diosnilláy, qanmi kanki yanapawaqniyqa. Qanmi kanki libraykuwaqniyqa.” (SAL. 70:5.)

1, 2. a) ¿Imakuna pasaptinmi cristianokunaqa Diospa yanapakuyninta mañakunku? b) ¿Ima tapukuytaq kanman, hinaspa maypitaq kutichiyninta tarichwan?

HUK cristianom señoranpiwan vacacionpi kachkaspanku, uyarirurqaku 23 watayoq warmi churin qonqaymanta chinkarusqanta. Paykunam piensanku runakuna wañurachisqanta. Wasinkuman kutisqankupim Jehová Diosta anchata mañakunku yanapananpaq. Chaynataq, huk doctormi iskay chunka watayoq cristianoman willaykurqa onqosqanrayku suchuyananmanta. Chaymi utqayllaman Diosta mañakurqa. Chaymantapas, huk cristianam sapallan uywan chunka iskay watayoq warmi wawanta, hinaspam mana llamkayta tarisqanrayku mikunankupaq qollqenpas mana kaptin Jehová Diosta mañakun tukuy kallpanwan. Qawasqanchikman hinaqa, iñiqmasinchikkuna sasachakuypi tarikuspankuqa Diospa yanapakuynintam utqaylla mañakunku. ¿Yaqachu qampas Diospa yanapakuyninta mañakurqanki sasachakuykunapi tarikuspayki?

² Ichapas kaynata tapukunchikman: “¿Cheqaptachu Jehová Dios uyariwanchikman mañakusqanchikta?”, nispa. Kay tapukuymanta kallpanchaq kutichiynintam tarinchik Salmos libropa 70 capitulonpi. Kaytaqa tukuy sonqonwan Diosta serviq Davidmi qellqarqa, paypas ñakarirqam. Kaynatam Jehová Diosmanta nirqa: “Qanmi kanki yanapawaqniyqa. Qanmi kanki libraykuwaqniyqa”, nispa (Sal. 70:5). Kay Salmos libropa 70 capitulonmanta yachasqanchikmi, ñoqanchiktapas yanapawasun sasa tiempokuna kaptin Jehová Diosta mañakuptinchik Librawananchikmanta.

Jehová Diosqa Libraqmi

3. a) ¿Ima mañakuykunataq tarikun Salmos libropa 70 capitulonpi? b) ¿Imamantam Davidqa seguro karqa?

³ Davidqa Salmos 70 capitulopim qallarin hinaspa tukunpas utqaylla libraykunanpaq Jehová Diosta mañakuspan (leey Salmo 70:1-5). Iskay kaq hinaspa kimsa kaq versiculokunapim kachkan achka mañakuykuna. Chaypim Davidqa Diosta mañakun wañuchiy munaq  enemigonkunapa tanteasqankuta pantarachinanpaq hinaspa mana allin rurasqankumanta penqaypi tukuchinanpaqpas. Tawa versiculopi mañakusqanñataqmi Dios serviqkunamanta nichkan. Chaypim Davidqa mañakun Jehová Diosta maskaqkuna kusisqa kanankupaq hinaspa sutinta hatunchanankupaqpas. Hinaspam mañakusqanta kaynata tukurqa: “Qanmi kanki yanapawaqniyqa. Qanmi kanki libraykuwaqniyqa”, nispa. Mañakusqanpi allinta piensaspaqa cuentatam qokusun, Davidqa manam munasqallantachu mañakurqa aswanqa segurom karqa: Dios payta yanapaspan librananmanta.

4, 5. ¿Imatam qawachiwanchik Davidmanta Salmos 70 capitulopi? ¿Imamantam ñoqanchikpas seguro kananchik?

⁴ ¿Imatam Davidmanta Salmos 70 capitulo qawachiwanchik? Qawachiwanchikmi enemigonkuna wañuchiyta munaptinpas sapallan mana chay sasachakuyta atipay munasqanta. Aswanmi saqerqa Jehová Diosman, paykunata munasqanman hina imatapas rurananpaq (1 Sam. 26:10). Davidqa manam haykapipas iskayrayarqachu Dios maskaqkunata, Jehová Dios yanapananmanta hinaspa librananmantapas (Heb. 11:6). Chaymantapas, allintam yacharqa Dios serviqkuna kusisqa kanankumanta hinaspa paymanta willaspa alabanankumantapas (Sal. 5:11; 35:27).

⁵ David hinam, ñoqanchikpas seguro kachwan Jehová Dios Librawaqninchik hinaspa yanapawaqninchik kasqanmanta. Chaymi achka sasachakuyniyoq tarikuspapas otaq imayna allichayta mana atispapas, allinmi kanman Jehová Diosta utqayman yanapawananchikpaq mañakuyqa (Sal. 71:12). Hinaptinqa, ¿imaynatam Jehová Diosqa mañakusqanchikta kutichiwanchikman? Manaraq kay tapukuyta kutichichkaspam qawasunchik, kimsa sasachakuykunapi David tarikuptin Diospa imayna yanapasqanmanta.

Enemigonkunamantam librarqa

6. ¿Imakunamanta yachasqanwanmi Davidqa seguro karqa allin ruraq runakunata Dios salvananmanta?

⁶ Chay tiempokama kaq Diospa Palabranta David leesqanman hinaqa, yacharqam allin ruraq runakunata Dios yanapasqanmanta. Ejemplopaq, mana allin ruraq runakunata sinchi parawan Jehová Dios puchukachispanmi, Noeyta aylluntinta waqaycharqa (Gen. 7:23). Sodoma hinaspa Gomorra llaqtakunapi mana allin ruraq runakunaman azufretawan ninata parachimuspanmi, Lot sutiyoq runata hinaspa iskay warmi churinkunatapas yanaparqa lluptinankupaq (Gen. 19:12-26). Chaymantapas, hatunchakuq faraontawan llapallan runankunata Puka lamar qochapi puchukarachispanmi, llaqtanta waqaychaspa wañunankumanta librarqa (Exo. 14:19-28). Chaymi huk kutipi Davidqa Jehová Diosta nirqa “salvaykuq [. . .] Diosnillanchikmi” nispa (Sal. 68:20).

7-9. a) ¿Imanasqapiwanmi David confiarqa Diospi? b) ¿Pitam Davidqa agradecekurqa hinalla kawsasqanmanta?

⁷ Chaymantapas Davidqa confiarqataqmi Jehová Dios salvananmanta: kikinmi yacharqa Jehová Dios ‘wiñaypaq atiyninwan’ serviqninkunata waqaychasqanmanta (Deu. 33:27). Arí, Jehová Diosqa achka kutipim piñasqa ‘enemigonkunamanta’ librarqa (Sal. 18:17-19, 48). Huk ejemplota qawasun.

⁸ Israel nacionpi warmikuna Davidpa rurasqanmanta alabaptinkum, Saulqa envidiayta qallaykuspan iskay kutita lanzawan chuqarurqa (1 Sam. 18:6-9). Ichaqa chay iskaykama chuqasqantam Davidqa surtirurqa. ¿Imataq yanaparqa mana imapas pasananpaq? ¿Guerrapi allin peleaq kasqanchu? Manam. Bibliaqa kaynatam nin: ‘Davidtaqa Tayta Diosmi yanaparqa’, nispa (leey 1 Samuel 18:11-14). Saulpas Filistea runakunawan wañuchiyta mana atispanmi “aswan sumaqtaraq yacharurqa Davidtaqa Tayta Diospuni yanapasqanta” (1 Sam. 18:17-28).

⁹ ¿Pitam Davidqa agradecekurqa hinalla kawsasqanmanta? Kay tapukuypa kutichiynintam tarinchik Salmos 18 capitulo manaraq qallarichkaptin, chaypim nin kay takipa palabrankunata ‘Saulmanta Tayta Dios libraykuptin’ David qellqasqanmanta. Payqa seguro kaspanmi kaynata nirqa: “Dios Taytalláy, qamqa ñoqapaqmi qaqa hina kapuwanki. Qamqa pakakuna  wasi hinam kapuwanki. Qamqa ñoqallaytamiki libraykullawanki. Diosnilláy, amparakuykunay hatun rumim kapuwanki”, nispa (Sal. 18:2). Cheqaptamá anchata kallpanchawanchik serviqninkunata Jehová Dios libraq kasqanmanta yachasqanchikqa (Sal. 35:10).

Onqosqa kaptinpas waqaycharqam

10, 11. ¿Haykapim Davidqa onqorunman karqa Salmos 41 capitulopa nisqanman hina, imaynatam chayta yachanchik?

¹⁰ Salmos 41 capitulopa nisqanman hinaqa, Davidmi huk kutipi onqoruspan huk tiempo camanpi karqa. Llumpay onqosqa kaptinmi enemigonkunaqa piensarqaku manaña sanoyananta (7, 8 versiculokuna). ¿Haykapim kayqa pasarurqa? Kay Salmos libropa nisqanman hinaqa yaqapaschá kayqa pasarurqa rey kasqanta churin Absalon qechuyta munasqan tiempopi (2 Sam. 15:6, 13, 14).

¹¹ Ejemplopaq, kay capitulopim Davidqa riman confiasqan amigon qepancharusqanmanta, paywanmi tantatapas kuska mikurqaku (9 versiculo). Payqa Ahitofelmi karqa, confianapaq consejaqnin hinaspa paypa contranpim Absalonwan kuska hoqarikurqaku (2 Sam. 15:31; 16:15). Piensariy, imaynachá rey Davidqa camanpi sientikurqa, hatarinanpaq mana kallpan kaptin hinaspa muyuriqninpi wañuchiy munaq runakuna kaptinpas (5 versiculo).

12, 13. a) ¿Imaynatam David qawachirqa Jehová Diospi confiasqanta? b) ¿Imaynatam Jehová Dios kallpancharqa Davidta?

¹² Davidqa manam haykapipas saqerqachu Libraqninpi confiaytaqa. Arí, payqa yacharqam Jehová Diosta serviqkuna onqoptin Dios ima rurananmanta, chaymi kaynata nirqa: ‘Sasachakuy tiempopipas Tayta Diosllam libraykunqa paytaqa [. . .]. Onqosqa kaptinñapas Tayta Diosmi kallpanchanqa paytaqa. Onqoptinpas camanta allichaspam cuidallanqa paytaqa’, nispa (1, 3 versiculokuna). Kay versiculokunapi Jehová Dios serviqninkunata kallpanchananmanta David rimaspanqa, qawachichkarqam Dios yanapananpaq confiasqanta. Hinaptinqa, ¿imaynatam Jehová Dios chayta ruranman?

¹³ Jehová Dios atiyninwan hampirunanta David mana suyaspanpas, yacharqam kallpanchaspan yanapananmanta. Cheqaptamá chayta necesitarqa, onqosqa kaptinpas enemigonkunaqa llumpayllataña mana allinkunata paymanta rimarqaku (5, 6 versiculokuna). Yaqapaschá Jehová Diosqa yanaparqa allin kaqkunapi piensananpaq kallpanchaspa. Qawasunchik, kikin Davidmi kaynata nirqa: “Waqaychawankimá mana faltayoqña kawsallasqayrayku”, nispa (12 versiculo). David onqosqa kaspan hinaspa enemigonkuna mana allinta rimaptinpas, yaqapaschá kallpancharqa Jehová Diospaq allin runa kasqanta piensasqanqa. Onqosqanmantaqa sanoyarurqam. ¡Mayna allinmi onqoqkunata Jehová Dios yanapay atisqanmanta yachayqa! (2 Cor. 1:3.)

Necesitasqantapas qorqam

14, 15. ¿Imayna sasachakuypitaq tarikurqaku Davidwan runankunapas, hinaspa ima yanapakuytam chaskirqaku?

¹⁴ Davidqa Israel nacionpa reynin kaspanmi achka qollqepa chanin mikuykunata mikurqa. Hukkunatapas invitarqam paywan mikunankupaq (2 Sam. 9:10). Chayna kaspanpas, yacharqam yakunayasqa hinaspa yarqasqa kaytapas. Ejemplopaq qawasun, rey kasqanta churin Absalon qechuruyta munaptinmi, Davidqa runankunapiwan Jerusalenmanta Galaadman lluptikurqaku, kayqa tarikurqa Jordan mayu lawpim (2 Sam. 17:22, 24). Chaypim paykunaqa necesitarqaku mikuyta, yakuta hinaspa samariytapas. Ichaqa, ¿imaynatam necesitasqankuta tarinmanku karqa chunniqpiqa?

¹⁵ Davidwan runankuna Mahanaim sutiyoq llaqtaman chayaruspankum, tuparurqaku Sobí, Makir hinaspa Barzilai sutiyoq runakunawan. Kay kimsa mana manchakuq qarikunam Diospa akllasqan rey Davidta yanaparqaku. Yanapasqankuwanmi vidankuta peligropi churarqaku, rey hina Absalon qepaspanqa llumpaytachá castiganman karqa David yanapaqkunata. Davidtawan runankunata sasachakuypi kasqankuta qawaspankum kimsanku qorqaku ima necesitasqankuta:  trigota, cebadata, hamkata, habasta, lentejata, mielta, llukllupata, ovejakunata hinaspa allinta puñunankupaq camakunatapas (leey 2 Samuel 17:28, 29). * Davidtaqa kallpancharqachá kayna atiendesqanku hinaspa kuyakuywan rurasqankupas. Manachá haykapipas qonqarqachu paypaq rurasqankutaqa.

16. ¿Pitaq cheqaptapuni Davidman hinaspa runankunamanpas ima necesitasqankuta qorqa?

¹⁶ Ichaqa, ¿pitaq cheqaptapuniqa Davidman hinaspa runankunaman qorqa ima necesitasqankuta? Jehová Dios llaqtanta waqaychasqanmantam Davidqa seguro karqa. Jehová Dios munaspanqa, serviqninkunatam kallpanchanman mayqan wawqe-paninkutapas necesitasqanpi yanapanankupaq. Davidqa allintam yacharqa chay kimsa runakunapa yanapasqanqa Jehová Diospa kuyakuynin kasqanta. Chaykuna pasasqanmantam kikin yuyaqña kaspan kaynata nirqa: “Ñawpaq warma kaspaypas, kunan yuyaq kaspaypas allin runataqa manam qonqarusqataqa rikurqanichu. Wawa-churintapas manam limosnakuqtaqa rikurqanichu”, nispa (Sal. 37:25). ¿Manachu kallpanchawanchik Jehová Dios serviqninkunata ima necesitasqankupi yanapasqanta yachayninchik? (Pro. 10:3.)

“[Jehová Diosqa] yachanmi, sasachakuykunamanta” libraytaqa

17. ¿Imatam qawachiwanchik ñawpa tiempopi pasakusqankuna?

¹⁷ Manam Davidllatachu Jehová Diosqa ñawpaq tiempopi librarqa. Chay tiempokunapi lliw pasakusqankunam allinta qawachiwanchik apostol Pedropa kayna nisqan cheqap kasqanta: “[Jehová Diosqa] yachanmi, sasachakuykunamanta serviqninkuna libraytaqa” (2 Ped. 2:9). Qawasunchik iskay ejemplokunata.

18. ¿Imaynatam Ezequiaspa tiemponpi Jehová Dios llaqtanta librarqa?

¹⁸ Cristianokunapa tiemponmanta 800 wata ñawpaqtam, Asiriamanta runakuna Juda llaqtaman yaykururqaku hinaspa Jerusalentapas purmachiyta munarqaku. Chaymi rey Ezequias Jehová Diosta kaynata mañakurqa: “Yupaychasqayku Dios Taytalláy [. . .], qamlla Dios kasqaykita kay pachapi llapallan nacionkuna yachanankupaqyá Rey Senaqueribmanta salvaykullawayku”, nispa (Isa. 37:20). Qawasqanchikman hinaqa rey Ezequiasqa puntatam preocupakurqa Diospa sutin hinaspa sumaq kayninpas hatunchasqa kananmanta. Hinaptinmi Jehová Diosqa mañakuyninta kutichirqa hinaspam  huk angelta kamachimuptin huk tutallapi 185.000 Asiriamanta kaq runakunata wañurachirqa, chaynatam serviqninkunata salvarqa (Isa. 37:32, 36).

19. ¿Ima willakuymi salvarqa punta pachak watapi cristianokunata?

¹⁹ Jesucristo manaraq wañukuchkaspanmi, Judeamanta kaq qatiqninkunaman willarqa ima pasananmanta (leey Lucas 21:20-22). Chay willasqan cumplikunankamaqa pasananmi karqa achka watakuna. 66 watapim, Roma nacionmanta tropakuna Jerusalenta muyurirurqaku paykunapa contranpi hatariq judiokunata chinkachinankupaq. Roma tropakunam Cestio Galo sutiyoq runapa kamachisqan, templopa wakin murallanta dañarurqaku ichaqa qonqaymantam kutikurqaku. Kasukuq cristianokunaqa cuentatam qokurqaku Jesucristopa nisqanman hina Jerusalen tuñichisqa kaptin librakunankumanta, hinaspam orqokunaman ayqekurqaku. Ichaqa 70 watapim Roma soldadokunaqa kaqmanta kutimurqaku, kay kutipiqa Jerusalentam puchukachirqaku. Jesuspa willasqanta kasukuq qatiqninkunam ichaqa librakurqaku wañunankumanta (Luc. 19:41-44).

20. ¿Imanasqam seguro kanchik Jehová Dios Libraqninchik kananmanta?

²⁰ Ñawpa tiempopi llaqtanta Jehová Dios yanapasqanmanta yuyariyqa, Diospi iñisqanchikta hinaspa confiasqanchiktam kallpanchan. Kunan tiempopi hinaspa hamuq tiempopi imakunataña pasananchik kaptinpas, confiananchikmi Libraqninchikpiqa. Hinaptinqa, ¿imaynatam kunan tiempopi Jehová Dios librawanchik? ¿Imataq pasarqa qallariypi rimasqanchik iñiqmasinchikunawan? Kay tapukuykunamantam qatiqnin estudiopi qawasunchik.

[Willakuy]

¿Yuyachkankichu?

• ¿Imamanta seguro kanapaqmi Salmos 70 capitulo yanapawanchik?

• ¿Imaynatam David onqoptin Jehová Dios yanaparqa?

• ¿Ima ejemplokunam qawachin Jehová Dios llaqtanta libraq kasqanmanta?

[Kay yachachikuypa tapukuyninkuna]

[10 kaq paginapi dibujo]

Jehová Diosqa uyarirqam Ezequiaspa mañakusqantaqa