Jehová Diosqa qespichiranmi ñawpaq tiempopi serviqninkunata

“Diosníy, ¡usqhamuy yanapaykuwanaykipaq! Qanmi yanapaykuwaqniypas qespichiwaqniypas kanki.” (SAL. 70:5.)

1, 2. a) ¿Imaynapi tarikuspan cristianokuna Diospa yanapayninta mañakunku? b) ¿Ima tapuytan kutichisunchis, maypin chay tapuypaq kutichiyta tarinchis?

HUK casado warmi qharin vacacionpi kashaspanku yacharunku 23 watanpi ususinku qonqaylla chinkasqanmanta. Yaqachus hina wañuchisqa kanman karan. Wasinkuman kutipushaspan Jehová Diospa yanapayninta tukuy sonqonkuwan mañakunku. 20 watayoq iñiqmasinchismanmi huk doctor willan onqoyniyoq kasqanmanta, hinaspa nin: “Kay onqoywanqa pisi-pisimantan llapa cuerpoyki mana kuyuripunqachu”, nispa, paypas kaq raton Jehová Diosmanta mañakun. Huk hermananchispas sapallanmi uywan 12 watanpi kaq ususinta, payqa manan llank’anata tarinchu, manañataq qolqenpas kanñachu mikhunata rantikunanpaq, chayraykun sonqomanta Diospa yanapayninta mañakun. Arí, cristianokunaqa ima llakikuypipas tarikuspankuqa Diospa yanapaynintan usqhaylla mañakunku. Qanrí, ¿hayk’aqllapas llakikuykunapi tarikuspa mañakurankichu Jehová Diospa yanapayninta?

² Ichaqa kaytapaschá tapukusunman: “¿Uyariwanmanchu Jehová yanapayninta mañakuqtiy?”, nispa. 70 Salmopin chay tapuypaq kutichiyta tarinchis, chaymanta yachasqanchisqa anchatan kallpachawasun. Davidmi chay Salmotaqa qelqaran sasachakuykunapi tarikuspa. Jehová Diostan niran: “Qanmi yanapaykuwaqniypas qespichiwaqniypas kanki”, nispa (Sal. 70:5). Chay qelqata t’aqwisqanchismi yanapawasun sasachakuypi tarikuqtinchis mana iskayaspa Diospa yanapayninta mañakunanchispaq.

Jehová Diosqa qespichiqninchismi

3. a) ¿Imakunamantan David Diosman rogakuran 70 Salmopi? b) ¿Imapin David anchata confiaran?

³ 70 Salmo qelqapin Davidqa qallariyninpi tukuyninpipas Jehová Diosta tukuy sonqomanta rogakun usqhaylla yanapananpaq (leeychis Salmo 70:1-5). 2, 3 versiculokunapin Diosta rogakun payta wañuchinankupaq  millay runakunaq yuyaykusqanta qolluchinanpaq mana allin ruwasqankumanta p’enqachinanpaqpas. Tawa versiculopitaq Davidqa mañakun Diosta maskhaqkuna kusikunankuta Diospa sutinta hatunchanankutapas. Payqa khaynatan tukupuran mañakuyninta: “Qanmi yanapaykuwaqniypas qespichiwaqniypas kanki”, nispa. Chay nisqanpin yachanchis Diospa yanapayninpi anchata confiasqanta.

4, 5. ¿Imatan 70 Salmopi Davidmanta yachanchis? ¿Imamantan ñoqanchispas mana iskayanchischu?

⁴ ¿Imatan 70 Salmopi Davidmanta yachanchis? Enemigonkuna wañuchiyta munaqtinkupas Davidqa manan vengakuranchu, aswanmi Diospa makinpi chayta saqeran (1 Sam. 26:10). Payqa manan hayk’aqpas iskayaranchu Jehová Dios tukuy sonqowan serviqninkunata yanapananta qespichinantapas (Heb. 11:6). Chaymantapas payqa sut’itan yacharan Dios serviqkunapaq askha razonkuna kusisqa kawsanankupaq kasqanta, runakunaman Jehová Diospa hatun kayninmanta willamunankupaqpas (Sal. 5:11; 35:27).

⁵ Ñoqanchispas David hinan mana iskayanchischu Jehová Dios yanapawananchista qespichiwananchistapas. Chayrayku sasachakuykunapi tarikuspaqa Diosmanta mañakusunman usqhaylla yanapawananchispaq (Sal. 71:12). Ichaqa, ¿imaynatan Jehová Dios kutichinman mañakusqanchisman? Manaraq chay tapuyta kutichishaspa, qhawarisunchis imaynata Dios necesitasqan ratopi Davidta yanaparan chayta.

Enemigonkunamanta qespichin

6. ¿Imaynapin David yacharan Jehová Dios chanin runakunata qespichisqanta?

⁶ Davidqa tiemponpi kaq Diospa Simin Qelqata leespan yacharan Jehová Dios chanin runakunata qespichisqanta. Yacharanmi millay runakunata Dios Millp’uq para unuwan wañuchishaqtin Noeta familiantapas qespichisqanta (Gén. 7:23). Sodoma Gomorra llaqtakunaman azufreta ninatawan parachimuspa millay runakunata wañuchishaqtinpas qespichiranmi Lotta iskaynin ususinkunatawan (Gén. 19:12-26). Chaymantapas yacharanmi imaynata Jehová Dios llaqtanta qespichinanpaq Faraonta ejercitontawan Puka Qochapi millp’uchispa wañuchisqanta (Éxo. 14:19-28). Chaychá Davidqa niran: Jehová Diosqa “qespichiq Diosmi”, nispa (Sal. 68:20).

7-9. a) ¿Imaraykun David Jehová Diospi astawan confiaran? b) ¿Pitan David hatuncharan mana wañusqanmanta?

⁷ Chaymantapas Davidqa pay kikinpunin rikuran Jehová Dios ‘wiñay atiyninwan’ yanapasqanta, chayraykun astawan paypi confiaran (Deu. 33:27). Arí, Jehová Diosqa askha kutipin Davidta ‘awqankunamanta’ qespichiran (Sal. 18:17-19, 48). Imayna qespichisqanmanta yachasunchis.

⁸ Huk kutinmi Israel warmikuna Davidta hatuncharanku maqanakuykunapi atipasqanmanta, chayta uyarispan rey Saulqa sinchita phiñakuran chaymi iskay kutipi lanzawan chanqaran wañuchiyta munaspa (1 Sam. 18:6-9). Davidmi ichaqa mana hap’ichikuranchu. ¿Imaraykun mana k’irisqachu rikhuriran? Manan allin maqanakuq kasqanraykuchu, Biblian nin: Diospa ‘yanapasqanraykun’, nispa (leeychis 1 Samuel 18:11-14). Saulpas yacharanmi ‘Jehová Dios Davidta yanapasqantaqa’, ¿imaynapin chayta yacharan? Saulqa munaranmi Filistea runakunaq makinpi David wañunanta ichaqa manan wañuchirankuchu (1 Sam. 18:17-28).

⁹ ¿Pitan David hatuncharan mana wañusqanmanta? 18 Salmopin ‘Saulmanta [...] Señor Dios qespichiqtin’ David takiran: “Señor Diosqa hatun Qaqaymi, pakaykuwaqniymi, qespichiwaqniymi, Diosniyqa pakakunay Qaqan”, nispa (Sal. 18:2). Arí, Jehová Diosqa qespichinmi serviqninkunata, chay yachayqa, ¡anchatan kallpachawanchis! (Sal. 35:10.)

Onqosqa kashaqtinmi yanapaykuran

10, 11. 41 Salmopi nisqanman hina, ¿hayk’aqmi David onqonman karan? ¿Imaynapi chayta yachanchis?

¹⁰ 41 Salmopi willasqan hina, huk kutinmi  Davidqa sinchi onqosqa puñunapi kasharan. Chayraykun enemigonkunaqa niranku: “Manañan hatarinqachu”, nispa (7, 8 versiculokuna). ¿Hayk’aqmi chaykuna pasaran? Yaqapaschá churin Absalón pay contra hatarispa rantinpi kamachikuyta munashaqtin. ¿Imarayku chayta ninchis? (2 Sam. 15:6, 13, 14.)

¹¹ Isqon versiculopin David riman paywan kuska mikhuq manchay amigon pay contra hatarisqanmanta. Chayqa yuyarichiwanchis Davidpa yuyaychaqnin ancha confianzan Ahitofeltan, payqa Absalonwan kuskan David contra hatariranku (2 Sam. 15:31; 16:15). Davidpa enemigonkunaqa maytapunin wañunanta munaranku, chhaynapi millay yuyaykusqankuman hina ruwanankupaq, chayta yachaspaqa, maytachá Davidqa llakikuran mana kallpayoq puñunapi kashaspa (5 versículo).

12, 13. a) ¿Davidpa ima nisqanpin yachanchis Diospi anchata confiasqanta? b) ¿Imaynatan Dios payta kallpacharan?

¹² Davidqa chhaynapiña tarikuspapas confiashallaranmi qespichiqnin Diospi. Diosqa yanapanmi serviqninkunata onqoshaqtinku, chaytan Davidqa allinta yacharan, chaymi niran: “Mana allin p’unchaypin Señor Diosqa payta qespichinqa. Señor Diosmi payta kallpachanqa nanaywan puñunapi kashaqtin, onqosqanmantan qhaliyachipunqa”, nispa (1, 3 versiculokuna). “Diosmi payta kallpachanqa” nisqanwanmi Davidqa rikuchisharan Dios yanapananpi anchata confiasqanta. ¿Imaynatan Jehová yanapanman?

¹³ Manaña David suyaranchu milagrota ruwaspa Dios qhaliyachinanta chaypas, payqa yacharanmi onqoshaqtin kallpachananta yanapanantapas, onqosqaña kashaqtinpas enemigonkunaqa mana allintan paymanta rimaranku, chaymi Davidqa necesitaran Diospa yanapayninta (5, 6 versiculokuna). Yaqapaschá Jehová Diosqa Davidta kallpacharan allin kaqkunapi yuyaykunanpaq yanapaspa. Kikin Davidmi kayta niran: ‘Mana huchachanata kawsasqayraykun’ kallpachawaranki, nispa (12 versículo). Davidtaqa allin kaqkunapi yuyaykusqanchá kallpacharan onqosqaña kashaqtinpas, millaytaña enemigonkuna paymanta rimashaqtinkupas. Tiempowanqa qhaliyapuranmi. Arí, Diosqa kallpachanmanmi onqosqakunata, chayta yachayqa ¡anchatan kusichiwanchis! (2 Cor. 1:3.)

Necesidadpi tarikuqtin yanaparan

14, 15. ¿Ima sasachakuypin David runankunapiwan tarikuranku? ¿Pikunan paykunata yanaparanku?

¹⁴ Davidqa Israelpi rey kaspan sumaq mikhunakunata mikhuran. Hukkunatapas invitaranmi paywan kuska mikhunankupaq (2 Sam. 9:10). Ichaqa yachallarantaqmi yarqaypi ch’akiypi kaytapas. Churin Absalón rantinpi kamachikunanpaq pay contra hatarishaqtinmi Davidqa runankunapiwan Jerusalenmanta Galaad hallp’aman ayqeranku, chayqa Jordán mayuq inti lloqsimunan lado orqo-orqopin tarikuran (2 Sam. 17:22, 24). Chay hallp’api tarikuspan paykunaqa necesitaranku mikhunata, unuta, maypi samanankutapas. ¿Imaynatan chay orqo-orqopi tarinkuman karan ima necesitasqankutapas?

¹⁵ David runankunapiwan Mahanaim llaqtaman chayaqtinmi Sobi, Maquir, Barzilaipiwan payman hamuranku. Kay runakunaqa tukuy atisqankutan Diospa akllasqan reyta yanaparanku. Chayta ruwaspaqa peligropin kawsayninkuta churasharanku, sichus Absalón Davidta atipanman karan chayqa, Davidta yanapaqkunataqa castiganmanmi karan. Chaywanpas paykunaqa Davidman llapa runanmanwan mikhuchinankupaqmi apamuranku, trigota, cebadata, hank’ata, chaqalluta, lentejata, miel misk’ita, ovejakunata, puñuna p’achata ima allinta samanankupaq, ch’inneqpin paykunaqa yarqayta, ch’akiyta, sayk’uyta ima muchumunku nispanku (leeychis 2 Samuel 17:27-29). Davidqa anchatachá agradecekuran chhayna yanapasqankumanta, chaytaqa manachá hayk’aqpas qonqaranchu.

16. ¿Imatan David allintan yacharan?

¹⁶ Ichaqa, ¿pin chay runakunata kallpacharan Davidta yanapanankupaq? Davidqa allintan yacharan Dios llaqtanta cuidasqanta.  Diosqa kallpachanmanmi serviqninkunata necesidadpi tarikuq iñiqmasinkuta yanapanankupaq. Davidqa allintan yacharan chay kinsantin runakunaq yanapasqan Jehová Diospa yanapaynin kasqanta. Chayraykun payqa yuyaqña kashaspa khaynata qelqaran: “Waynallan karqani, kunantaq machuyapuniña, manan hayk’aqpas rikurqanichu chanin runata Señor Diospa saqerparisqanta, manan hayk’aqpas rikurqanichu wawankunatapas mikhuna mañapakushaqta”, nispa (Sal. 37:25). Arí, Diosqa yanapanmi necesidadpi tarikuq serviqninkunataqa, chayta yachayqa ¡anchatan kallpachawanchis! (Pro. 10:3.)

Jehová Diosqa yachanmi “sasachakuymanta qespichiyta”

17. ¿Imatan yachanchis apóstol Pedroq nisqanmanta?

¹⁷ Jehová Diosqa manan Davidllatachu ñawpaq tiempopiqa qespichiran. Payqa askha serviqninkunatan qespichillarantaq, chayraykun apóstol Pedro qelqaran: “Señorqa yachanmi payta manchakuqkunata sasachakuymanta qespichiyta”, nispa (2 Ped. 2:9). Iskay ejemplota qhawarisunchis.

18. ¿Imaynatan Jehová Dios Ezequiaspa tiemponpi llaqtanta qespichiran?

¹⁸ 732 watapi hinan manaraq Jesús hamushaqtin, asirio soldadokuna Judaman haykumuspa Jerusalén llaqtata amenazaranku. Chhaynapi tarikuspan rey Ezequiasqa Diosman rogakuran: “Kunanqa, Diosnillayku Señor Dios, paypa atiyninmanta qespichiwayku, llapan teqsimuyuntin suyukuna qanllapuni Diosqa kasqaykita yachanankupaq”, nispa (Isa. 37:20). Sichus Asiria runakuna Jerusalén llaqtata thuninkuman karan chayqa, runakunan Jehová Diosta mana atiyniyoqpaq hina qhawarinkuman karan, chaymi rey Ezequiastaqa astawan llakichiran. Jehová Diosmi ichaqa reypa mañakusqanman kutichimuspa huk angelta kachamuran huk tutallapi 185.000 asirio soldadokunata wañuchinanpaq, chhaynapin Diosqa llaqtanta qespichiran (Isa. 37:32, 36).

19. Jerusalén llaqta thunichisqa kaqtin, ¿imarayku cristianokuna mana wañurankuchu?

¹⁹ Manaraq wañupushaspan Jesusqa qatikuqninkunaman willaranña: ‘Jerusalén llaqtata askha soldadokunaq muyuykusqanta rikuspaykichisqa Judea provinciapi kashaqkunaqa chaymanta ayqeychis’, nispa (leeychis Lucas 21:20-22). Jesuspa nisqan hunt’akunanpaqqa askha watakunan pasaran. Judío runakunan manaña munarankuchu romanokunaq kamachisqan kayta, chaymi 66 watapi Roma soldadokuna Jerusalenta muyuykuranku. Cestio Galoq kamachisqan soldadokunaqa ñan t’oqorankuña yupaychana wasiq ladonpi kaq perqata, ichaqa qonqayllamantan ripuranku. Chayta rikuspankun cristianokunaqa Jesuspa  nisqanta kasukuspa Jerusalenmanta orqokunaman ayqeranku. 70 watapin Roma soldadokunaqa Jerusalenman hukmanta kutimuranku, chay kutipin ichaqa llaqtantinta thuniranku. Jesuspa willasqanta kasukuq cristianokunaqa librakurankun chay ñak’ariymanta (Luc. 19:41-44).

20. ¿Imaynapin yachanchis ñoqanchistapas Jehová Dios yanapawananchista?

²⁰ Ñawpaq tiempopi Jehová Dios askha kutipi llaqtanta qespichisqanmanta yachayqa yanapawanchismi astawan paypi iñinanchispaq confiananchispaqpas. Chayrayku, kay tiempopiña otaq hamuq tiempopiña sasachakuykunapi tarikusunman chaypas, manan iskayanchischu Qespichiq Diosninchis yanapawananchistaqa. Ichaqa, ¿imaynatan Jehová Dios kay tiempopi qespichiwanchis? ¿Iman pasaran qallariy parrafopi rimasqanchis cristianokunawan? Chay tapuykunatan qatimuq estudiopi kutichisunchis.

¿Yuyarishankichu?

• ¿Imamantan mana iskayanchischu 70 Salmota leespa?

• ¿Imaynatan Jehová Dios Davidta yanaparan onqosqa kashaqtin?

• ¿Ima ejemplokunan rikuchin Jehová Dios llaqtanta qespichiq kasqanta?

[Tapuykuna]

[10 paginapi dibujo]

Jehová Diosqa kutichiranmi Ezequiaspa mañakusqanta