Hi Jehova—“Manluluwas” ha Kadaan nga Panahon
Hi Jehova—“Manluluwas” ha Kadaan nga Panahon
“Panagmit ngadi ha akon, O Dios: Ikaw an akon parabulig ngan akon parabawi [“Manluluwas,” NW].”—SAL. 70:5.
1, 2. (a) San-o an mga magsiringba han Dios nag-aampo ha iya para han bulig? (b) Ano nga pakiana an nabangon, ngan diin naton mabibilngan an baton?
SAMTANG nagbabakasyon, hinbaroan han mga kag-anak nga misteryoso nga nawawara an ira 23-anyos nga inasaw-an nga anak nga babaye. May suspetsa nga ginpatay hiya. Nag-impaki dayon hira ngan nagbiyahe tipauli, nag-inampo kan Jehova nga buligan hira. Usa nga 20-anyos nga Saksi an ginsumatan han doktor nga may sakit hiya nga makakaparalisa han iya bug-os nga lawas. Nag-ampo dayon hiya kan Jehova. Usa nga solo nga iroy nga nangangalimbasog ha pamiling hin trabaho an waray igo nga kwarta basi ipalit hin pagkaon niya ngan han iya anak nga babaye. Nanginyupo hiya kan Jehova. Oo, kon naatubang hin duro nga pagsari o kakurian, an mga magsiringba han Dios nag-aampo ha iya para han bulig. Nakimalooy ka na ba kan Jehova ha panahon nga nanginginahanglan ka gud hin bulig?
2 Nagbabangon ini hin importante nga pakiana: Makakalaom gud ba kita nga babatunon ni Jehova an aton mga pag-ampo para han bulig? An makaparig-on ha pagtoo nga baton mababasa ha Salmo 70. Inin makapadasig nga salmo iginsurat ni David, usa nga maunungon nga magsiringba ni Jehova nga nakaeksperyensya hin magkuri nga pagsari ngan problema ha kinabuhi. Inin giniyahan nga salmista napagios ha pagsiring kan Jehova: “O Dios: Ikaw an akon parabulig ngan akon parabawi.” (Sal. 70:5) An pag-usisa ha Salmo 70 makakabulig ha aton nga masabtan kon kay ano nga kita liwat makakag-ampo kan Jehova ha panahon nga kinahanglan naton hin bulig ngan bug-os nga makakasarig nga hiya an aton magigin “Manluluwas.”
‘Ikaw an Manluluwas’
3. (a) An Salmo 70 may-ada ano nga panginyupo nga bumulig dayon an Dios? (b) Ano nga pagsarig an iginpahayag ni David ha Salmo 70?
3 An Salmo 70 nagtitikang ngan nagtatapos ha panginyupo nga bumulig dayon an Dios. (Basaha an Salmo 70:1-5.) Nakimalooy hi David kan Jehova nga ‘magdagmit’ ha pagtalwas ha iya. Ha bersikulo 2-4, may-ada hiya lima nga hangyo; an duha hito may pulong nga ‘unta’ nga nagpapahayag hin hingyap o karuyag. An bersikulo 2 ngan 3 naghihisgot hadton nag-iparatay ha iya. Naghangyo hiya kan Jehova nga pirdihon ngan pakaalohan ini nga mga kaaway tungod han ira karaotan. An iba pa nga hangyo, ha bersikulo 4, may kalabotan ha katawohan han Dios. Nag-ampo hiya nga adton nagbibiling kan Jehova mapagios nga lipayon ngan pasidunggan Hiya. Ha pagtapos hini nga salmo, hi David nagsiring kan Jehova: “Ikaw an akon parabulig ngan akon parabawi.” Tigamni nga waray hiya magsiring, “Hinaot ikaw magin,” nga baga hin naghahangyo pa hin lain. Lugod, hiya nagsiring, “Ikaw an,” nga nagpapahayag han iya pagsarig. Natoo hi David nga makakarawat niya an bulig han Dios.
4, 5. Ano an nahibaroan naton mahitungod kan David tikang ha Salmo 70, ngan makakasarig kita ha ano?
4 Ano an iginpapasabot han Salmo 70 mahitungod kan David? Han nagkaproblema hiya ha mga kaaway nga determinado ha pag-iparatay ha iya, waray niya sulbara ito ha iya kalugaringon nga paagi. Lugod, sinarig hiya nga hi Jehova an maninimalos ha mga parakontra, ha Iya itinanda nga panahon ngan paagi. (1 Sam. 26:10) Nagpabilin nga kombinsido gud hi David nga bubuligan ngan tatalwason ni Jehova adton nagbibiling ha Iya. (Heb. 11:6) Natoo hiya nga an tinuod nga mga magsiringba may-ada hinungdan nga maglipay ngan magdayaw kan Jehova pinaagi ha pagsumat ha iba mahitungod han Iya pagkaharangdon.—Sal. 5:11; 35:27.
5 Pariho kan David, bug-os nga makakasarig kita nga hi Jehova an aton Parabulig ngan “Manluluwas.” Salit, kon naatubang kita hin magkuri nga pagsari o nanginginahanglan gud hin bulig, makakag-ampo kita kan Jehova nga buligan dayon kita. (Sal. 71:12) Kondi, paonan-o babatunon ni Jehova an aton mga pag-ampo para han bulig? Antes naton paghisgotan kon paonan-o kita bubuligan ni Jehova, aton usisahon an tulo nga paagi han iya pagtalwas kan David, ngan pagbulig ha iya ha panahon nga kinahanglanon gud ito.
Gintalwas Tikang ha mga Parakontra
6. Ano an nakabulig kan David nga hibaroan nga hi Jehova nagluluwas han magtadong?
6 Tikang ha rekord han bahin han Biblia nga nahisurat na ha panahon ni David, hinbaroan niya nga an magtadong makakasarig kan Jehova nga bubuligan hira. Han ginpahinabo ni Jehova an Delubyo ha diri-diosnon nga kalibotan, ginluwas niya hi Noe ngan an iya mahadlukon-ha-Dios nga pamilya. (Gen. 7:23) Han ginpauranan ni Jehova hin kalayo ngan asupre an magraot nga umurukoy han Sodoma ngan Gomorra, iya ginbuligan an matadong nga hi Lot ngan an iya duha nga anak nga babaye nga makapalagiw. (Gen. 19:12-26) Han ginbungkag ni Jehova an mapahitas-on nga hi Paraon ngan han iya kasundalohan ha Dagat nga Pula, ginpanalipdan Niya an Iya katawohan ngan ginbuligan hira nga matalwas. (Eks. 14:19-28) Salit, diri urusahon nga ha lain nga salmo gindayaw ni David hi Jehova sugad nga Dios han kaluwasan!—Sal. 68:20.
7-9. (a) Kay ano nga hi David sinarig ha gahum han Dios ha pagluwas? (b) Hin-o an ginpasidunggan ni David tungod han iya katalwasan?
7 Hi David may-ada liwat hinungdan nga sumarig gud ha gahum ni Jehova ha pagluwas ha iya. Naeksperyensyahan niya mismo nga an kan Jehova “mga butkon nga waray kataposan” makakatalwas hadton nag-aalagad ha Iya. (Deut. 33:27) Ha pipira nga higayon, ginluwas ni Jehova hi David tikang ha nasisina nga “mga kaaway.” (Sal. 18:17-19, 48) Tagda an usa nga ehemplo.
8 Han an kababayin-an ha Israel nagdayaw kan David tungod han iya kaabtik ha pakig-away, nangabugho gud hi Hadi Saul salit duha ka beses nga ginbangkaw niya hi David. (1 Sam. 18:6-9) Kondi nakalikay hito hi David. Tungod la ba ito han iya kaabtik ngan kalaksi sugad nga eksperyensyado nga girriro? Diri. An Biblia nasiring nga “hi Jehova nag-upod ha iya.” (Basaha an 1 Samuel 18:11-14.) Ha urhi, han napakyas an plano ni Saul ha pagpatay kan David pinaagi han mga Pilisteohanon, “hi Saul nakakita ngan nahibaro nga hi Jehova nag-upod kan David.”—1 Sam. 18:17-28.
9 Hin-o gud an ginpasidunggan ni David tungod han iya katalwasan? An superskripsyon han Salmo 18 nasiring nga ‘ipinamulong ni David kan Jehova an mga pulong hini nga karantahon ha adlaw han gintalwas hiya ni Jehova ha kamot ni Saul.’ Iginpahayag ni David an iya pagbati pinaagi hin kanta: “Hi Jehova amo an akon bato nga bantilis, ngan akon kuta, ngan akon Manluluwas; Dios ko, bato nga bantilis ko, ha iya maayop ako.” (Sal. 18:2) Diri ba makaparig-on han aton pagtoo nga hi Jehova makakatalwas ha iya katawohan?—Sal. 35:10.
Ginbuligan han Nagkasakit
10, 11. Ano an nabulig ha aton nga mahibaroan kon kakan-o nagkasakit hi David nga gin-unabi ha Salmo 41?
10 Makausa, nakaeksperyensya hi Hadi David hin grabe nga sakit nga gin-uunabi ha Salmo 41. Tungod hito, nakada na la hiya ha higdaan, salit naghunahuna an iba han iya mga kaaway nga diri na hiya “mabuhát.” (Bersikulo 7, 8) Kakan-o hiya nagkasakit hin grabe? An mga kahimtang nga gin-uunabi hini nga salmo bangin may kalabotan ha makuri nga panahon ha kinabuhi ni David han an iya anak nga hi Absalon nangalimbasog ha pag-agaw han pagkahadi.—2 Sam. 15:6, 13, 14.
11 Pananglitan, gin-unabi ni David an iya tinaporan nga sangkay, nga nakaon hin tinapay upod niya hadto, nga nagtraydor ha iya. (Bersikulo 9) Nagpapahinumdom ini ha aton han usa nga panhitabo ha kinabuhi ni David. Durante han pagrebelde ni Absalon, an tinaporan nga magsaragdon ni David nga hi Ahitopel nagtraydor ha iya ngan inupod kan Absalon ha pagrebelde kontra ha iya. (2 Sam. 15:31; 16:15) Handurawa la an maluya nga hadi nga may sakit ngan diri na nakakabuhát, nga maaram nga ginpapalibotan hiya hin mga traydor nga karuyag nga mamatay na hiya basi makagpadayon han ira magraot nga plano.—Bersikulo 5.
12, 13. (a) Ano nga pagsarig an ginsiring ni David? (b) Paonan-o ginparig-on han Dios hi David?
12 Padayon nga sinarig hi David ha “Manluluwas.” Mahitungod ha matadong nga magsiringba nga may sakit, hi David nagsiring: “Babawion hiya ni Jehova ha adlaw han karat-an. Hi Jehova magbibikyaw [‘mabulig,’ NW] ha iya ha higdaan han mga kangutngot: Ginhuhumok nimo an iya higdaan ha iya sakit.” (Sal. 41:1, 3) Tigamni liwat dinhi an pagsarig ni David, sugad han iya ginsiring, ‘Hi Jehova mabulig.’ Sigurado hi David nga luluwason hiya ni Jehova. Paonan-o?
13 Diri naglalaom hi David nga hi Jehova magbubuhat hin milagro ngan tatambalon an iya sakit. Lugod, bug-os nga nasarig hiya nga hi Jehova ‘mabulig ha iya’—masuporta ngan magpapakusog ha iya samtang may sakit hiya. Kinahanglanon gud niya an sugad nga bulig. Dugang pa ha sakit nga nagpaluya ha iya, ginpalibotan hiya hin mga kaaway nga nagyinakan hin magraot mahitungod ha iya. (Bersikulo 5, 6) Posible nga ginparig-on ni Jehova hi David pinaagi ha pagpahinumdom ha iya han nakakaliaw nga mga panhitabo hadto. Makapainteres, hi David nagsiring: “Tungod han akon integridad, ginbubuligan mo ako.” (Bersikulo 12, NW) Bangin naparig-on liwat hi David ha pamalandong nga bisan pa han iya kamaluya ngan han magraot nga ginyinakan han iya mga kaaway, gintagad hiya ni Jehova sugad nga tawo nga may integridad. Ha kataposan nag-opay hi David ha iya sakit. Diri ba nagpapasarig ini ha aton nga hi Jehova makakabulig ha magsakit?—2 Kor. 1:3.
Gintagan han mga Panginahanglan
14, 15. Kakan-o nanginahanglan hin bulig hi David ngan an iya mga tawo, ngan ano nga bulig an ira nakarawat?
14 Han hi David nagin hadi ha Israel, nakakapahimulos hiya han gimaopayi nga pagkaon ngan irinmon ngan nakakaimbitar pa ngani hin iba basi kumaon upod niya. (2 Sam. 9:10) Kondi, nakaeksperyensya liwat hiya hin kakulang ha pagkaon ngan irinmon. Han an iya anak nga hi Absalon nag-organisa hin pagrebelde ngan nangalimbasog ha pag-agaw han trono, binaya ha Jerusalem hi David ngan an iba han katawohan nga maunungon nga sinuporta ha iya. Pinalagiw hira ngadto ha Gilead, ha este han Salog Jordan. (2 Sam. 17:22, 24) Tungod kay napiritan nga magkinabuhi sugad nga puga, waray pag-iha nagkinahanglan gud hira hin makakaon, maiinom ngan mapapahuwayan. Kondi, diin hira makakabiling hito ha kamingawan?
15 Ha kataposan, inabot hi David ngan an iya mga tawo ha syudad han Mahanaim. Iginkita nira didto an tulo nga mag-isugon nga lalaki—hira Sobi, Makir, ngan Barsilyay. Disidido hira nga buligan an pinili han Dios nga hadi bisan kon mameligro an ira kinabuhi, kay kon maagaw ni Absalon an pagkahadi, sigurado nga sisirotan gud niya an bisan hin-o nga sinuporta kan David. Tungod kay nakita hini nga tulo nga lalaki an kahimtang nira David, nagdara hira han ira ginkikinahanglan, upod na an mga higdaan, trigo, sebada, sinanlag nga lugas, habitswelas, bataw, dugos, mantikilya ngan mga karnero. (Basaha an 2 Samuel 17:27-29.) Sigurado nga duro an pagpasalamat ni David tungod han makatirigamnan nga pagkamaunungon ngan pagkabuotan hinin tulo nga lalaki. Diri gud hingangalimtan ni David an ira ginbuhat para ha iya!
16. Hin-o gud an nagtagana kan David ngan ha iya mga tawo han ira mga panginahanglan?
16 Kondi, hin-o gud an nagtagana kan David ngan ha iya mga tawo han ira panginahanglan? Kombinsido hi David nga nagmamangno hi Jehova ha iya katawohan. Mapapagios gud ni Jehova an iba han iya mga surugoon nga buligan an igkasi-magsiringba nga nanginginahanglan. Han pinamalandong ni David an nahitabo ha Gilead, nasabtan niya nga an pagkabuotan hadton tulo nga lalaki kapahayagan han mahigugmaon nga pagmangno ni Jehova. Han lagas na hi David, hiya nagsurat: “Nagin bata ako, ngan yana lagas na ako; kondi waray pa ako makakita nga an mga magtadong [upod na hiya] pagpasibay-an, bisan ngani waray pa an iya mga katulinan pagpakilimos hin tinapay.” (Sal. 37:25) Diri ba nakakaliaw ha aton nga hi Jehova nagtatagana han mga panginahanglan han iya mga surugoon?—Prob. 10:3.
Hi Jehova “Maaram ha Pagluwas” ha mga Tawo
17. Ano an pauroutro nga ipinapakita ni Jehova?
17 Usa la hi David han damu nga magsiringba nga ginluwas ni Jehova hadto. Tikang ha iya panahon, pauroutro nga ipinapakita han Dios an pagkatotoo han ginsiring ni apostol Pedro: “An Ginoo maaram ha pagluwas han matinumanon ha Dios tikang ha panulay.” (2 Ped. 2:9) Tagda an duha pa nga ehemplo.
18. Paonan-o hi Jehova nagtagana hin kaluwasan ha panahon ni Hesekia?
18 Han ginsulong han magkusog nga kasundalohan han Asirya an Juda ngan gintarhog an Jerusalem han mga 732 A.K.P., hi Hadi Hesekia nag-ampo: “O Jehova nga amon Dios, luwasa kami . . . nga an ngatanan nga ginhadian ha tuna mahibaro nga ikaw hi Jehova,” an amo la nga Dios. (Isa. 37:20) Siyahan nga gintagad ni Hesekia an pasipara ha ngaran ngan reputasyon han Dios. Ginbaton ni Jehova iton kinasingkasing nga pag-ampo. Ha usa la ka gab-i, 185,000 nga Asiryahanon an ginpatay han usa la nga anghel, ngan ginluwas an magtinumanon nga surugoon ni Jehova.—Isa. 37:32, 36.
19. Pinaagi ha pagsugot ha ano nga pahamangno natalwas ha kalamidad an mga Kristiano ha siyahan nga siglo?
19 Pipira na la ka adlaw antes mamatay hi Jesus, nagtagna hiya basi pahamangnoan an iya mga disipulo ha Judea para ha ira kaopayan. (Basaha an Lukas 21:20-22.) Mga dekada na an naglabay, kondi han 66 K.P., tungod han pagrebelde han mga Judio, gin-atake han Romano nga kasundalohan an Jerusalem. An kasundalohan nga pinangunahan ni Cestius Gallus malampuson nga nagguba han bahin han pader han templo; katapos, tigda hira nga binaya. Tungod kay maaram an magtinumanon nga Kristiano nga higayon ini ha pakapalagiw ha kabungkagan nga igintagna ni Jesus, nagpakadto hira ha kabukiran. An Romano nga kasundalohan binalik han 70 K.P. Hini nga higayon waray na hira bumaya, ngan bug-os nga nabungkag an Jerusalem. An mga Kristiano nga sinugot ha pahamangno ni Jesus nakatalwas hiton makangingirhat nga kalamidad.—Luk. 19:41-44.
20. Kay ano nga makakasarig kita kan Jehova sugad nga aton “Manluluwas”?
20 Makaparig-on ha pagtoo an pamalandong han ebidensya nga ginbuligan ni Jehova an iya katawohan hadto. An iya ginbuhat ha naglabay naghahatag ha aton hin hinungdan nga sumarig ha iya. Anoman nga problema an aton maeksperyensyahan yana o ha tidaraon, bug-os nga makakasarig liwat kita kan Jehova sugad nga aton “Manluluwas.” Kondi, paonan-o kita luluwason ni Jehova? Ngan kumusta an mga tawo nga gin-unabi ha tinikangan hini nga artikulo? Ano an nahitabo ha ira? Aton mahibabaroan ito ha masunod nga artikulo.
Nahinunumdoman Mo Ba?
• An Salmo 70 naghahatag ha aton hin hinungdan nga sumarig ha ano?
• Paonan-o ginbuligan hi David han nagkasakit hiya?
• Ano nga mga ehemplo an nagpapakita nga hi Jehova makakatalwas ha iya katawohan tikang ha mga parakontra?
[Mga Pakiana]
[Retrato ha pahina 6]
Ginbaton ni Jehova an pag-ampo ni Hesekia