Si Jehova Iyo an Satong “Paratao nin Dudulagan”

“Tatabangan sinda ni Jehova asin tatawan sinda nin dudulagan.”​—SAL. 37:40.

1, 2. Anong pundamental na katotoohan manongod ki Jehova an gikanan nin karangahan asin kosog para sa sato?

AN MGA aninong huli sa saldang dai nagdadanay sa sarong lugar. Mantang naghihiro an daga, an mga anino padagos na naghihiro asin nagliliwatliwat. Minsan siring, an Kaglalang kan daga asin saldang dai nagliliwat. (Mal. 3:6) “Dian sa saiya,” an sabi kan Biblia, “mayo lamang nin pagkaliwat sa pagbago kan anino.” (Sant. 1:17) An pundamental na katotoohan na ini manongod ki Jehova talagang gikanan nin karangahan asin kosog para sa sato, nangorogna kun nakakaeksperyensia kita nin grabeng mga pagbalo asin kadepisilan. Taano?

² Siring kan nasabotan niato sa naenot na artikulo, si Jehova nagin “an Paratao nin dudulagan” kan mga panahon kan Biblia. (Sal. 70:5) Sia dai nagliliwat asin totoo sa saiyang tataramon; huli kaini, an saiyang mga parasamba ngonyan igwa kan gabos na dahelan na magtiwala sa saiya na sia ‘matabang asin matao sa sainda nin dudulagan.’ (Sal. 37:40) Paano si Jehova nagtatao nin dudulagan sa saiyang mga lingkod sa presenteng mga panahon? Paano nia iyan puedeng gibohon sa sato personalmente?

Ilinigtas sa mga Nagtutumang

3. Taano ta makakasierto kita na an mga nagtutumang dai makakapapondo sa banwaan ni Jehova sa paghuhulit kan maogmang bareta?

³ Mayo nin ano man na pagtumang ni Satanas na makakapapondo sa Mga Saksi ni Jehova sa pagtao ki Jehova kan dai nababangang pagsamba na maninigo sa saiya. Sinisierto sa sato kan Tataramon nin Dios: “Ano man na armas na gigibohon tumang  sa saimo dai magkakaepekto, asin kokondenaron mo an arin man na dila na matumang sa saimo sa paghokom.” (Isa. 54:17) An mga nagtutumang nagmamaigot alagad dai nagigin mapanggana na papondohon an banwaan nin Dios sa paggibo kan sugo sa sainda na maghulit. Helingon niato an duwang halimbawa.

4, 5. Anong pagtumang an inatubang kan banwaan ni Jehova kan 1918, asin ano an nagin resulta?

⁴ Kan 1918, napaatubang an banwaan ni Jehova sa sunod-sunod na persekusyon na sutsut nin klero na an katuyohan iyo na papondohon an saindang paghuhulit. Kan Mayo 7, ilinuwas an mga mandamiento pederal para sa pag-arestar ki J. F. Rutherford, na iyo an nagdidirehir sa pambilog na kinaban na paghuhulit kan panahon na idto, asin sa nagkapirang iba pa na nasa opisina prinsipal. Sa laog nin mayo pang duwang bulan, si Tugang na Rutherford asin an saiyang kairiba bakong makatanosan na sinentensiahan sa kasong pakipagkasapakat asin sinentensiahan nin halawig na pagkabilanggo. An mga nagtutumang daw nagin mapanggana sa paggamit kan mga korte tanganing permanenteng mapapondo an paghuhulit? Siempre dai!

⁵ Girumdomon an panuga ni Jehova: ‘Ano man na armas na ginibo tumang sa saimo dai magkakaepekto.’ Sa pambihirang pagkabaliktad nin mga pangyayari, kan Marso 26, 1919​—siyam na bulan pakalihis na masentensiahan si Tugang na Rutherford asin an saiyang kairiba—​an nabilanggong mga tugang na ini pinaluwas huli sa piansa. Kan suminunod na taon, kan Mayo 5, 1920, naabsuelto sinda sa mga akusasyon sa sainda. Ginamit kan mga tugang na ini an saindang katalingkasan tanganing ipadagos an pang-Kahadean na gibohon. Ano an nagin resulta? Tara, nagkaigwa nin pambihirang pag-oswag poon kaidto! An igwa kan gabos na kredito huli sa resultang iyan iyo an “Paratao nin dudulagan.”​—1 Cor. 3:7.

6, 7. (a) Anong kampanya tumang sa Mga Saksi ni Jehova an ginibo sa Alemania na sakop kan mga Nazi, asin ano an nagin resulta? (b) Anong katotoohan an pinapatunayan kan kasaysayan kan banwaan ni Jehova sa presenteng panahon?

⁶ Isip-isipa ngonyan an ikaduwang halimbawa. Kan 1934, suminumpa si Hitler na popohoon nia an Mga Saksi ni Jehova sa Alemania. Seryoso sia sa humang iyan. Kasunod kaiyan, dakol an inarestar asin ibinilanggo. Rinibong Saksi an nagin biktima; ginatos an ginadan sa mga kampo de konsentrasyon. Nagin mapanggana daw si Hitler sa saiyang kampanya na pohoon an mga Saksi? Biyo daw niang napapondo an paghuhulit kan maogmang bareta sa Alemania? Dai nanggad! Durante kan persekusyon, an mga tugang niato naghulit nin patago. Pagkatapos kan pagbagsak kan rehimen na Nazi, ginamit ninda an saindang katalingkasan tanganing padagos na maghulit. Ngonyan, igwa nin labing 165,000 na parahayag kan Kahadean sa Alemania. Sa giraray, inotob kan “Paratao nin dudulagan” an saiyang panuga: ‘Ano man na armas na ginibo tumang sa saimo dai magkakaepekto.’

⁷ Pinapatunayan kan kasaysayan kan Mga Saksi ni Jehova sa presenteng panahon na nungkang totogotan ni Jehova na mapoho an saiyang banwaan bilang sarong grupo. (Sal. 116:15) Pero, kumusta man  kita bilang mga indibiduwal? Paano si Jehova nagtatao nin dudulagan sa sato personalmente?

Kumusta Man an Pisikal na Proteksion?

8, 9. (a) Paano niato naaaraman na mayong garantiya na tatawan tolos kita nin pisikal na proteksion? (b) Ano an dapat na realistiko niatong akoon?

⁸ Bilang mga indibiduwal, aram niato na mayong garantiya na tatawan tolos kita nin pisikal na proteksion. Igwa kita kan paninindogan na kapareho kan ipinahayag kan tolong maimbod na Hebreo na nagsayumang dumoko sa imahen na bulawan na ginibo ni Hadeng Nabucodonosor. Dai inisip kan matatakton sa Dios na hoben na mga lalaking idto na si Jehova matao sa sainda nin milagrosong proteksion sa pisikal na kapahamakan. (Basahon an Daniel 3:17, 18.) Siring kan nangyari, talagang ilinigtas sinda ni Jehova sa mga laad kan nagkakalayong horno. (Dan. 3:21-27) Minsan siring, dawa kan mga panahon kan Biblia, bihira an milagrosong pagliligtas. Dakol na maimbod na lingkod ni Jehova an nagadan sa kamot kan mga nagtutumang.​—Heb. 11:35-37.

⁹ Kumusta man ngonyan? Bilang “an Paratao nin dudulagan,” tunay nanggad na kayang iligtas ni Jehova an mga indibiduwal sa peligrosong mga situwasyon. Masasabi daw niato nin may pagkasegurado kun baga si Jehova nag-interbenir o dai sa espesipikong mga kamugtakan? Dai. Minsan siring, an indibiduwal na nakaligtas sa peligrosong situwasyon tibaad naniniwala na nag-interbenir si Jehova. Magigin kapangahasan kun kokontrahon nin iba an saiyang paniniwala. Kadungan kaiyan, dapat na realistiko niatong akoon na dakol na maimbod na Kristiano an nagadan huli sa persekusyon, arog kan nangyari durante kan kapanahonan nin Nazi. An iba nagadan sa makaturotristeng mga kamugtakan. (Ecl. 9:11) Tibaad maghapot kita, ‘Dai daw si Jehova nagin “Paratao nin dudulagan” para sa mga maimbod na nagadan na mayo pa sa panahon?’ Dai puedeng magin totoo iyan.

10, 11. Taano ta dai mapupugolan nin tawo an saiyang kagadanan, alagad ano an kayang gibohon ni Jehova manongod dian?

¹⁰ Isip-isipa ini: Dai mapupugolan nin tawo an saiyang kagadanan, huling mayong tawo na ‘makakatao nin dudulagan para sa saiyang kalag hale sa kamot nin Sheol,’ o Hades, an pangkagabsan na lolobngan nin katawohan. (Sal. 89:48) Pero, kumusta man si Jehova? Nagigirumdoman nin sarong tugang na babae, na nakaligtas sa panahon kan karingisan nin Nazi, an sinabi sa saiya kaidto kan ina niang Saksi tanganing rangahon sia huli sa pagkagadan nin mga namomotan sa mga kampo de konsentrasyon: “Kun an kagadanan nin tawo permanente, magigin mas makosog iyan kisa sa Dios, bako daw?” Siertong an kagadanan bakong mas makosog kisa sa makapangyarihan sa gabos na Gikanan nin buhay! (Sal. 36:9) An gabos na nasa Sheol, o Hades, yaon sa memorya ni Jehova, asin tatawan nia nin dudulagan an lambang saro sa sainda.​—Luc. 20:37, 38; Kap. 20:11-14.

¹¹ Mientras tanto, si Jehova direktang kalabot sa buhay kan saiyang maimbod na mga parasamba ngonyan. Pag-olayan niato ngonyan an tolong paagi na sia nanggad an satong “Paratao nin dudulagan.”

Pinoprotehiran sa Espirituwal

12, 13. Taano ta pinakamahalaga an espirituwal na proteksion, asin paano iyan itinatao sa sato ni Jehova?

¹² Tinatawan kita ni Jehova nin espirituwal na proteksion, na iyo an pinakamahalaga. Bilang tunay na mga Kristiano, nasasabotan niato na igwa nin sarong bagay na mas mahalaga kisa sa buhay niato sa presente. An pinakamahalagang rogaring niato iyo an satong personal na relasyon ki Jehova. (Sal. 25:14; 63:3) Kun mayo an relasyon na iyan, magigin daing kahulogan an buhay niato sa presente asin mawawara an satong oportunidad na mabuhay sa ngapit.

¹³ Marahay sana ta itinatao sa sato ni Jehova an gabos na tabang na kaipuhan niato tanganing mapagdanay an dayupot na relasyon sa saiya. Yaon sa sato an saiyang Tataramon, an saiyang banal na espiritu, asin an saiyang pambilog na kinaban na kongregasyon na makakatabang sa sato. Paano niato lubos na maaaprobetsaran an mga probisyon na ini? Paagi sa regular asin mahigos na pag-adal sa saiyang Tataramon, mapapakosog niato an satong pagtubod asin paglaom. (Roma 15:4) Paagi sa sinserong pamimibi na logod itao sa sato an saiyang espiritu, aakoon niato an tabang na labanan an sugot na gumawe nin kuestionable. (Luc. 11:13) Kun nakakasunod kita sa paggiya na itinatao kan grupong oripon paagi sa mga publikasyon na basado sa Biblia saka paagi sa mga pagtiripon, asamblea, asin kombension, aakoon niato an espirituwal na “kakanon sa tamang  panahon.” (Mat. 24:45) An siring na mga probisyon nakakaprotehir sa sato sa espirituwal asin nakakatabang sa sato na magdanay na dayupot sa Dios.​—Sant. 4:8.

14. Magsaysay nin eksperyensia na itinatampok an espirituwal na proteksion.

¹⁴ Tanganing itampok an siring na espirituwal na proteksion, girumdomon an mga magurang na sinambit sa kapinonan kan naenot na artikulo. Pirang aldaw pagkatapos maaraman na nawawara an saindang aki na si Theresa, may uminabot sa sainda na nakakapanluyang bareta: Sia ginadan. * Nagigirumdoman kan ama: “Namibi ako ki Jehova na logod protehiran sia. Kan sia manompongan na ginadan, inaadmitir ko na sa primero inisip-isip ko kun taano ta dai sinimbag an sakong mga pamibi. Siempre, aram ko na si Jehova dai naggagarantiya nin milagrosong proteksion sa saiyang banwaan bilang mga indibiduwal. Padagos akong namibi na logod tawan ako nin pakasabot. Nararanga ako sa pakaaram na pinoprotehiran ni Jehova an saiyang banwaan sa espirituwal​—an boot sabihon, itinatao nia an kaipuhan niato tanganing maingatan an satong relasyon sa saiya. An klaseng iyan nin proteksion an pinakamahalaga, huling maaapektaran kaiyan an satong daing sagkod na ngapit. Sa paaging iyan, talagang prinotehiran ni Jehova si Theresa; sia maimbod na naglilingkod sa Saiya kan sia magadan. Nakanompong ako nin katoninongan sa pakaaram na an oportunidad nia na mabuhay sa ngapit yaon sa Saiyang mamomoton na mga kamot.”

Tinatabangan sa Panahon nin Paghelang

15. Sa anong mga paagi na si Jehova puedeng tumabang sa sato kun kita napupurisaw huli sa helang?

¹⁵ Kaya kitang tabangan ni Jehova mantang kita nasa “ibabaw nin sopa nin kahelangan,” arog kan ginibo nia ki David. (Sal. 41:3) Minsan ngani si Jehova dai ngonyan nagtatao nin dudulagan paagi sa milagrosong pagpaomay, talagang tinatabangan nia kita. Paano? An mga prinsipyo na yaon sa saiyang Tataramon puedeng tumabang sa sato sa paggibo nin madonong na mga desisyon manongod sa pagbolong asin iba pang bagay. (Tal. 2:6) Puede kitang makakua nin nakakatabang na impormasyon asin praktikal na mga suhestion sa mga artikulo na ipinublikar sa An Torrengbantayan saka Awake! na nagtotokar dapit sa satong partikular na problema sa salud. Paagi sa saiyang espiritu, puede kitang tawan ni Jehova kan “puersa na labi sa ordinaryo” tanganing makaya an satong situwasyon asin mapagdanay an satong integridad, ano man an tibaad mangyari. (2 Cor. 4:7) Paagi sa siring na tabang, malilikayan niato na magin grabeng pagabat sa sato an helang niato na huli kaiyan nawawara na an satong pokus sa espirituwal.

16. Paano nakaya nin sarong tugang na lalaki an saiyang helang?

¹⁶ Isip-isipa an hoben na tugang na lalaki na sinambit sa kapinonan kan naenot na artikulo. Kan 1998, nadiskobre na sia igwa nin amyotrophic lateral sclerosis, o ALS, na kan huri nagin dahelan na sia magin biyong paralisado. * Paano nia nakaya an saiyang helang? Sia nagpaliwanag: “May mga panahon na nakokologan an boot ko asin nadedesganar ako kun iniisip ko na kagadanan sana an solamenteng  paagi tanganing matapos na an sakong pagsakit. Kun namamatean ko na dai ko na makakaya, namimibi ako ki Jehova na tawan logod nia ako nin tolong bagay: kalmadong puso, pasensia, asin pakatagal. Naniniwala ako na sinimbag ni Jehova an mga pamibing idto. An kalmadong puso nakakatabang sa sako na horophoropon an nakakarangang mga kaisipan, siring baga kan magigin buhay sa bagong kinaban na dian mahihimo ko giraray na maglakaw, mag-ogma sa masiram na kakanon, asin makipag-olay sa sakong pamilya. An pasensia nakakatabang sa sako na tioson an mga kadepisilan nin pagigin paralisado. An pakatagal nagpapangyari sa sako na magdanay na maimbod asin dai mawara an sakong espirituwal na pagkatimbang. Totoo nanggad na nasasabotan ko an nagin pagmate ni salmistang David, huling naniniwala ako na tinatabangan ako ni Jehova mantang ako nasa ibabaw kan sakong sopa nin kahelangan.”​—Isa. 35:5, 6.

Itinatao an mga Pangangaipo

17. Ano an ipinapanuga ni Jehova na gigibohon nia para sa sato, asin ano an kahulogan kan panugang ini?

¹⁷ Si Jehova nanunuga na itatao nia an satong materyal na mga pangangaipo. (Basahon an Mateo 6:33, 34 asin Hebreo 13:5, 6.) Dai iyan nangangahulogan na maghahalat na sana kitang itao sa sato an materyal na mga pangangaipo niato o na dai na kita magtatrabaho. (2 Tes. 3:10) An talagang kahulogan kan panugang iyan iyo ini: Kun ineenot niato an Kahadean nin Dios sa satong buhay asin andam kitang maghanap-buhay, makakapagtiwala kita ki Jehova na tatabangan nia kita na makua an satong mga pangangaipo sa buhay. (1 Tes. 4:11, 12; 1 Tim. 5:8) Puede niang itao an pangangaipo niato sa mga paagi na tibaad dai niato inaasahan, tibaad paagi sa sarong kapwa parasamba na matao sa sato nin tabang o trabaho.

18. Magsaysay nin eksperyensia na nagpapaheling na puedeng itao an satong mga pangangaipo sa mga panahon na kaipuhan niato iyan.

¹⁸ Girumdomon an nagsosolong ina na sinambit sa kapinonan kan naenot na artikulo. Kan sia asin an saiyang hoben na aking babae magbalyo sa ibang lugar, nadepisilan siang makakua nin trabaho. Sia nagpaliwanag: “Nagluluwas ako sa paglilingkod sa langtad sa aga, asin ginagamit ko an kada hapon sa paghanap nin trabaho. Nagigirumdoman ko na sarong aldaw nagduman ako sa groseriya tanganing bumakal nin gatas. Nakatindog ako asin hineling ko an mga gulay, alagad mayo ako nin igong kuarta tanganing makabakal nin arin man kaiyan. Dai pa ako noarin man nakamate nin siring kagrabeng kamondoan sa buhay ko. Kan magpuli ako sa harong hale sa tindahan kan aldaw na iyan, an beranda sa likod kan sakong harong pano nin mga bag na may laog na manlaenlaen na klase nin gulay. Igwa nin igong kakanon duman para sa samo sa laog nin nagkapirang bulan. Naghibi nanggad ako, asin pinasalamatan ko si Jehova.” Dai nahaloy naaraman kan tugang na babaeng ini na an mga bag na iyan iwinalat nin sarong lalaking kakongregasyon na nagtanom nin mga gugulayon sa hardin kaini. Paghaloyhaloy sinuratan nia an tugang na lalaking ini: “Minsan ngani pinasalamatan ta kang marhay kan aldaw na iyan, pinasalamatan ko man si Jehova huling ginamit nia an saimong kabootan tanganing ipagirumdom sa sako an saiyang pagkamoot.”​—Tal. 19:17.

19. Pag-abot kan dakulang kahorasaan, magkakaigwa nin anong kompiansa an mga lingkod ni Jehova, asin ano an maninigo na determinado niatong gibohon ngonyan?

¹⁹ Malinaw nanggad, an ginibo ni Jehova kan mga panahon kan Biblia saka sa panahon niato nagtatao sa sato nin dahelan na magtiwala sa saiya bilang Paratabang niato. Sa dai na mahahaloy, kun mag-abot na an dakulang kahorasaan sa kinaban ni Satanas, kakaipuhanon niato an tabang ni Jehova nin orog kisa kasuarin man. Pero, an mga lingkod ni Jehova makakaasa sa saiya na may lubos na kompiansa. Ikakatingag ninda an saindang payo asin sinda maggagayagaya, mantang naaaraman ninda na harani na an saindang kaligtasan. (Luc. 21:28) Mientras tanto, ano man na pagbalo an mapaatubang sa sato, magin determinado kita na magtiwala ki Jehova, na igwa nin lubos na kasiertohan na an satong dai nagliliwat na Dios tunay nanggad na iyo an satong “Paratao nin dudulagan.”

[Mga Nota sa Ibaba]

Nagigirumdoman daw Nindo?

• Paano si Jehova makakatao nin dudulagan sa mga nagadan na mayo pa sa panahon?

• Taano ta pinakamahalaga an espirituwal na proteksion?

• Ano an kahulogan kan panuga ni Jehova na itatao nia an satong materyal na mga pangangaipo?

[Mga Hapot Para sa Pag-adal]

[Ritrato sa pahina 8]

Kan inarestar kan 1918, si Tugang na Rutherford asin an saiyang kairiba pinaluwas paghaloyhaloy, asin naabsuelto sinda sa mga akusasyon sa sainda

[Ritrato sa pahina 10]

Kaya kitang tabangan ni Jehova mantang kita nasa ibabaw nin “sopa nin kahelangan”