Iehova La “Atre Amele Së”
Ita Ne Thup göi 16 Nofeba
Nyima 03 me 21 Qene Drehu
Iehova La “Atre Amele Së”
“Kola xatua angate me thepe angate hnei Iehova.”—SAL. 37:40.
1, 2. Nemene la nyipici ka sisitria göne la pengöi Iehova, ka akeukawane la hni së me acatrene la lapaune së?
KA canga paatre hi la itre iahnuen la jö. Pine laka kola xötre kanothe la jö hnene la ihnadro, haawe, kolo mina fe a enije la itre iahnuene la jö me saze göhnen. Ngo ame la Atre Xupe la jö me ihnadro, tre, thaa ka saze kö Nyidrë. (Mal. 3:6) Önine la Tusi Hmitrötr, ka hape: “Ka tha uke kö nge ka pë hatene la hna ujë thei nyidë.” (Iako. 1:17) Ame la nyipici celë göne la pengö i Iehova, tre, eje a akeukawane la itre hni së me acatrene la lapaune së, ene la easa qëmeke kowe la itre itupath ka tru. Pine nemen?
2 Tune lo hne së hna ce wange hë ngöne lo hna cinyihane hnapan, hnei Iehova hna amamane hnyawa laka, Nyidrëti hi la ‘Atre Iamele’ ngöne lo hneijine ekö. (Sal. 70:5) Thaa saze kö Nyidrë, nge ame la hnei Nyidrëti hna qaja, tre, tro pala hi Nyidrëti a eatrën; haawe, ijije enehila kowe la itre hlue i Iehova troa mejiune laka, tro Nyidrëti a “xatua angate me thepe angate.” (Sal. 37:40) Tune kaa la aqane tro Iehova a xatuane la itre hlue i Nyidrë ngöne la hneijine së? Tune kaa la aqane tro Nyidrëti a ujë tune lai koi së isa ala caas?
Hna Thapa Qaathene La Itre Ka Icilekeu
3. Pine nemene matre ijije troa xecie e kuhu hni së laka, thatreine kö la itre ka icilekeu troa sawa la nöje i Iehova troa cainöjëne la maca ka loi?
3 Thaa tro pi kö la itre aqane icilekeu i Satana a sawa la Itretre Anyipicine i Iehova troa thili hmekuje hi koi Nyidrë. Kola akeukawane la itre hni së hnene la Wesi Ula i Akötresie, ke, eje a qaja ka hape: “Pëkö ewekë hna kuca nyine ishi me nyipo hna troa ien; nge tro nyipoti a jele ngazone la ite sesepeneqë asëjëihë itete ikelikelë me nyipo ngöne la hna amekötin.” (Is. 54:17) Hna thele pala hi hnene la itre ka icilekeu troa sawa la nöje i Akötresie troa cainöj, ngo gufa kö. Tro sa pane ce wange la lue ceitun.
4, 5. Nemene la icilekeu hna qëmeke kow hnene la nöje i Iehova ngöne lo macatre 1918, nge nemene hë la thangane lai?
4 Ame ngöne lo macatre 1918, hnene la nöje i Iehova hna qëmeke kowe la ketre icilekeu ka tru ne la itre taan la hmi ka thoi, ke, angatr a ajane troa thingijëne la huliwa ne cainöj. Ame lo 7 Mei, hnene la itre taan la musi ne Etazini hna amekötine troa akalabusi J. F. Rutherford, ene lo atre xomiujine la huliwa ne cainöj e cailo fen ngöne la hneijine cili, memine la itre xan ne la iwahutine la Sasaiatri. Thaa traqa petre kö kowe la lue treu nge kolo ha jele ngazo Rutherford memine la itre sine tronge i nyidrë, ke, kola mekune menune, ka hape, angatr a agomegomene la nöj matre troa ithepe mus; celë hi matre qea la hna akalabusi angatr. Hapeu, hune kö la hna iuti sai koi hna kootr hnene la itre ka icilekeu, göne matre troa sawa la huliwa ne cainöj? Ohea!
5 Pane mekune hmaca jë lo hna thingehnaeane hnei Iehova, ka hape: “Pëkö ewekë hna kuca nyine ishi me nyipo hna troa ien.” Ame ngöne lo 26 Maac 1919, thupene lo naene lao treu ne lapa kalabus hnei Rutherford memine la itre sine tronge i nyidrë, hna traqa la ketre ewekë ka ketre pengön: hna nue angatr hmaca qa kalabus. Ame lo macatre thupen, lo 5 Mei 1920, hna apëne lo itre ewekë hna upe zö angatre pin. Ngöne laka ase hë nue angatr, hnene lo itre trejine hna catre kuca la huliwa ne Baselaia. Nemene hë la itre thangan lai? Kolo ha kökötre catre la huliwa ne cainöj! Eje hi laka, ame la kola hetre thangane lai, tre, hnene la ‘Atre Iamele.’—1 Kor. 3:7.
6, 7. (a) Nemene la huliwa hna kuca göne matre troa lepe apaatrene la Itretre Anyipicine i Iehova e Alema, nge nemene hë la thangane lai? (b) Nemene la hna jele nyipicine hnene la aqane trongene la mele ne la nöje i Iehova ngöne la hneijine së?
6 Tro pena sa ce wange enehila la hnaaluene ceitun. Ame ngöne lo macatre 1934, hnei Hitler hna sisiny troa lepe apaatrene la Itretre Anyipicine i Iehova e Alema. Thaa tria ju kö la hna sisiny celë. Thupene la hna qaja hnei Hitler, nyimutre la itre atr hna othe me akalabusin. Itre thauzan lao Itretre Anyipicine hna axösisin; nge traqa kowe la itre hadredr la etrune la itre hna humuthe ngöne la itre lapa ne ithahluë. Hapeu, hune ju kö la huliwa i Hitler, ene la troa lepe apaatrene asë la Itretre Anyipicin? Hapeu, hnei angeice kö hna sawa la nöjei atr troa cainöjëne la maca ka loi e Alema? Ohea! Ame ngöne la icilekeu, tre, hnene pala hi la itre trejine me easë hna catre kuca la huliwa ne cainöj ngöne la ga singödr. Thupene la kola kei la musi Nazi, tre, hnei angatre hna catre troa cainöj. Ame enehila, tre, traqa koi 165 000 la etrune la itre ka cainöj e Alema. Eje hi, hnene hmaca la ‘Atre Iamele’ hna nyipici me eatrëne pala hi la hnei Nyidrëti hna thingehnaean, ka hape: “Pëkö kete ewekë hna kuca nyine ishi me nyipo hna troa ien.”
7 Kola jele nyipicine hnene la aqane trongene la mele ne la Itretre Anyipicine i Iehova enehila, ka hape, thaa tro jë kö Iehova a nue troa lepe apaatrene la nöje i Nyidrë. (Sal. 116:15) Ngo hapeue fe koi së isa ala caas? Tune kaa la aqane tro Iehova a amele së isa ala caas?
Tune Kaa La Aqane Troa Thupë Së Ngöne La Götrane La Ngönetrei?
8, 9. (a) Easa atre tune kaa laka, thaa hna thupë së kö ngöne la götrane la ngönetrei? (b) Nemene la ka nyipi ewekë tro sa atrehmekune hnyawa?
8 Ame enehila, atre hi së laka thaa hnei Iehova kö hna qaja, ka hape, tro pala hi Nyidrëti a thupë së isa ala caasi ngöne la götrane la ngönetrei. Easë a hane ujë tune lo köni thupëtresiji ne Heberu ka mele nyipici laka, hnei angatre hna xele ma thili kowe la hna saatr gool i Nebukaneza Joxu. Thaa hnene kö la itre thöthi celë ka xoue Akötresie hna mekun, ka hape, tro Iehova a kuca la ketre iamamanyikeu matre troa thupë angatr qa ngöne la akötr ngöne la götrane la ngönetrei. (E jë la Daniela 3:17, 18.) Ame ngöne la pun, hnei Iehova hna thepe angatre qa ngöne la hnaope ka mele hnei eë. (Dan. 3:21-27) Ngo ame ngöne la hneijine ekö, tre, xalaithe hi la itre iamamanyikeu ka tune lai. Nyimutre la itre hlue i Iehova ka mele nyipici hna humuthe hnene la itre ka icilekeu me angatr.—Heb. 11:35-37.
9 Tune kaa fe ngöne la hneijine së? Pine laka Nyidrëti la ‘Atre Iamele,’ haawe, ka xecie hnyawa koi së laka, atreine Iehova troa amelene la itre atr isa ala caas qa ngöne la itre akötre ka jole catr. Hapeu, atreine kö tro sa qaja hnyawa, ka hape, ame Iehova, tre, Nyidrëti a xatua së maine thaa xatua së pena, thenge la itre ewekë ka traqa koi së? Ohea. Ngo ame la kola thapa la ketre atr qa ngöne la ketre akötr ka jole catr, tre, ijije tro angeic a mekun, ka hape, hna xatua angeic hnei Iehova. Thaa ka loi kö e tro la itre xan a xele ma kapa la mekuna ne la atre celë. Ame ngöne la ketre götran, nyipi ewekë tro sa atrehmekune hnyawa laka, ame lo itre Keresiano ka mele nyipici, tre, meci hë angatr ngöne lo itre iaxösisi, ceitu memine lo itre ka mele fene lo musi Nazi. Ame lo itre xan, tre, meci hë angatr hnene la itre ewekë ka traqa koi angatr. (Ate cai. 9:11) Maine jë ijije tro sa hnyinge, ka hape, ‘Hapeu, triane hë lo hna qaja göi Iehova, ka hape, “ate [ . . . ] iamele” Nyidrë kowe la itre ka mele nyipici ka meci hë?’ Thatreine kö tro sa mekune tune lai göi Iehova.
10, 11. Pine nemene matre pëkö mene ne la ketre atr ka qëmeke kowe la mec, ngo nemene la ka ijij tro Iehova a kuca göne lai?
10 Pane ce wange jë së la mekune celë: Thatreine kö la ketre atr troa kötrene la mec, ke, thaa ijije kö troa “mele la u i angeice qa ngöne la ime i hedis,” ene lo hua hna tro kow hnene la nöjei atr. (Sal. 89:48) Ngo tune kaa fe Iehova? Kola mekune hmaca hnene la ketre trejine föe ka mele pe kö qa ngöne la iaxösisi ne la musi Nazi, la hna qaja hnene la thine i nyiidro matre troa akeukawane la hni nyiidro göne lo itre ka mec ngöne la itre lapa ne ithahluë; öni eahlo ka hape: “Maine troa musinëne pala hi la itre atr hnene la mec, haawe, ka trene mene catre kö eje hui Akötresie. Nyipici kö lai? Thatreine kö troa aceitunëne la ecatrene la mec memine la mene ka sisitria i Akötresie, Qeqe ne la mel! (Sal. 36:9) Ame la nöjei atr asë e hnine la Hua, maine Hedris, tre, angatr ngöne la mekuana i Iehova, nge tro hë Nyidrëti elanyi a amele angatre isa ala caas.—Luka 20:37, 38; Hna ama. 20:11-14.
11 Ketre, ame enehila Iehova a wanga atrune la mele ne la itre hlue i Nyidrë ka mele nyipici. Tro sa pane ce wange la köni aqane amamane Iehova laka, Nyidrëti la “ate amele” së.
Iehova a Thupë Së Ngöne La Götrane La Ua
12, 13. Pine nemene matre ka nyipi ewekë kö la ixatua ngöne la götrane la ua, nge tune kaa la aqane tro Iehova a hamë së la ixatua cili?
12 Iehova a thupë së ngöne la götrane la ua; celë hi ketre ewekë ka sisitria catr hune la itre xaa ewekë. Maine itre nyipi Keresiano së, haawe, easë ha trotrohnine laka hetre ketre ewekë ka tru alamekene catre kö hune la mele së enehila. Ame la ewekë ka sisitria hne së hna hetrenyi ngöne la mele së, tre, ene la sipu aqane imelekeu së me Iehova. (Sal. 25:14; 63:3) Maine paatre kö the së la aqane imelekeu cili, haawe, ka gufa la mele së enehila, nge tro ha luuzi la mejiune ka eje the së.
13 Ame la eloin, tre, Iehova a hamë së la ixatua ka ijij matre troa acatrene la aqane imelekeu së me Nyidrë. Kola xatua së hnene la Wesi Ula, me uati hmitrötr, memine la ekalesia i Nyidrë e cailo fen. Tune kaa la aqane tro sa kepe thangane ka loi qa ngöne la itre hnei Nyidrëti hna amekötin celë? Maine tro pala hi sa inine hnyawa la Wesi Ula i Nyidrë, haawe, tro hë sa acatrene la lapaune së memine la mejiune së. (Rom. 15:4) Maine tro sa sipone la ua i Iehova jëne la thith, haawe, tro hë Nyidrëti a xatua së troa cile catr qëmekene la itupath ka troa angazone la aqane imelekeu së me Nyidrë. (Luka 11:13) Ketre, maine tro pala hi sa trongëne la itre hna amekötine hnene la hlue jëne la itre itus hna nyitrepene hnene la Tusi Hmitrötr, memine la itre icasikeu, me itre asabele, me itre kovasio, haawe, tro hë sa kapa hnyawa la “xeni [ . . . ] ngöne la nyipi ijin.” (Mat. 24:45) Ame la itre hna amekötine celë, tre, itre eje a thupë së ngöne la götrane la ua, me xatua së troa lapa qale catre koi Akötresie.—Iako. 4:8.
14. Qaja jë la ketre hna melën, ka amamane la aqane thupëne Iehova la aqane imelekeu së me Nyidrë.
14 Pane mekune jë së lo keme me thine hna qaja ha ngöne lo hna cinyihane hnapane matre mama pi koi së la enyipiewekëne la ixatua celë ngöne la götrane la ua. Itre drai thupene la kola qaja, ka hape, paatre hë la nekö i nyidro jajiny, Tereza la ëjen, nyidroti a drenge la ketre maca ka akötre catr: Hna humuthi angeic. a Kola mekune hmaca hnene la kem, me qaja ka hape: “Hnenge pala hi hna thithi koi Iehova matre troa thupë angeic. Ame la kola atre laka hna humuthi angeic, tre, hnenge hna pane hnyingëne thele la kepin matre thaa sa kö Iehova la itre thithing. Nyipici, atrehmekune hi ni laka thaa Iehova kö a kuca la ketre iamamanyikeu matre troa thupëne la itre hlue i Nyidrë isa ala caas. Hnenge pala hi hna catre thith matre troa hetrenyi la trotrohnin. Ene pe, hna akeukawane la hning hnene la hna atre laka, Iehova a thupëne la nöje i Nyidrë ngöne la götrane la ua; kola hape, Nyidrëti a hamëne la ixatua ka ijij matre troa thupëne hnyawa la aqane imelekeu së me Nyidrë. Drei la ketre ixatua ka sisitria catr, pine laka ka troa hetre thangane lai ngöne la mele së elany. Ame ngöne la götrane cili, tre, hnei Iehova hna thupë Tereza, ke, hnei angeice hna nyihlue i Nyidrë uti hë la mec. Tingetinge hë la hning, ke, atre hë ni laka ame la mejiune ka eje thei angeic, ene la troa mele hmaca elany, tre, eje hune la hnatrapaime i Nyidrë.”
Iehova a Xatua Së Ngöne La Easa Wezipo
15. Tune kaa la aqane tro Iehova a xatua së ngöne la kola tithi së hnei mec?
15 Atreine Iehova troa xatua së “ngöne la göhnë ne inyi,” tune lo hnei Nyidrëti hna kuca koi Davita. (Sal. 41:3) Ngacama thaa Iehova kö a kuca la ketre iamamanyikeu matre troa amele së ngöne la ijine easë a aja ixatua, ngo loi pe troa atrehmekune laka, Nyidrëti a xatua së. Hna tune kaa? Ijije troa xatua së hnene la itre trepene meköti ne la Tusi Hmitrötr, matre atreine së troa axecië mekun cememine la inamacan göne la aqane inyië, maine itre xaa götrane pena. (Ite edomë 2:6) Ijije mina fe troa xatua së hnene la itre ithuemacanyi me itre mekune nyine ixatua hna eköthe ngöne la itre hna cinyihan, hna xome qa hnine la itre zonal, La Tour de Garde me Réveillez-vous ! ka ithanatane la itre pengöne meci së. Jëne la ua i Nyidrë, Iehova a hamë së “la etrune la men” matre troa elë hune la jole së me catre mele nyipici, ngacama traqa ju hë koi së la nöjei pengöne akötr. (2 Kor. 4:7) Jëne mina fe la ixatua cili, tro hë sa wanga atrune la aqane imelekeu së me Iehova ngo thaa tro kö sa nue la meci së troa ananyi së qa thei Nyidrë.
16. Nemene la hna kuca hnene la ketre trejine trahmanyi matre troa elë hune la mec i angeic?
16 Pane mekune ju së lo trejine trahmanyi hna qaja ngöne lo itre mekune ka nyiqaane lo hna cinyihane hnapan. Ame ngöne lo macatre 1998, hna öhne thei angeic la meci hna hape, sclérose latérale amyotrophique, maine SLA; meci lai ka agenyine la ngönetrei angeic. b Nemene la hnei angeice hna kuca matre troa cile kowe la meci angeic? Öni angeic e qeje pengön, ka hape: “Ame itre xaa ijin, tre, eni a akötr me hleuhleu pine laka, eni pala hi a mekune, ka hape, tro caasi hi la mec a nue amacanyi ni qa ngöne la akötreng. Ame ngöne la kola lapa kei tranyi ni hnene la itre akötr, tre, eni a thith matre tro Iehova a hamë koi ni la köni ewekë: ene la hni ka egöcatr, me xomihni, memine la xomihni ahoeany. Eni a mekun laka, Iehova a sa la itre thithing cili. Ame la hni ka egöcatr, tre, ej a aijijë ni troa mekune hmaca lo itre ewekë ka akeukawane la hning, tune la tro ni a atreine tro hmaca elany, me madrine troa xeni la ketre hnepe göxeni ka hnyapa, memine la troa ithanata hmaca memine la hnepe lapang, ngöne la fene ka hnyipixe. Kola xatua ni hnene la xomihni troa kapa me melëne la itre ejolene la mecing. Kola aijijë ni hnene la xomihni ahoeanyi troa mele nyipici, nge kolo mina fe a xatua ni troa thipetrije la itre ewekë ka troa angazone la aqane imelekeu i eni me Iehova. Eni a atrehmekune hnyawa la hna melëne hnei Davita, ene lo atre cinyihane la Salamo, ke, eni a trotrohnine laka, hnei Iehova hna xatua ni ngöne la göhnë ne inyië.”—Is. 35:5, 6.
Iehova a Ithua Së
17. Nemene la hnei Iehova hna thingehnaean troa kuca koi së, nge nemene la aliene la hna thingehnaean cili?
17 Iehova a thingehnaeane laka, tro Nyidrëti a thupë së hnyawa ngöne la götrane la ngönetrei. (E jë la Mataio 6:33, 34 me Heberu 13:5, 6.) Thaa kolo kö lai a hape, tro sa lapa treqene troa xulu xan la itre ewekë hne së hna ajane ngöne la götrane la ngönetrei, maine tro pena ha xele ma huliwa. (2 Thes. 3:10) Nemene la aliene la hna thingehnaeane celë? Maine tro sa pane thele la Baselaia i Akötresie ngöne la mele së, me ajane troa huliwa matre mel, haawe, ijije tro sa mejiune laka, tro Iehova a xatua së troa hetrenyi la itre ewekë ka sisitria kowe la mele së. (1 Thes. 4:11, 12; 1 Tim. 5:8) Ame itre xaa ijin, easa sesëkötre la Iehova a hamëne la itre hne së hna ajan, maine jë hna jëne la ketre trejine me easë ka traqa troa xatua së ngöne la götrane la ngönetrei, maine hamë huliwa së pena.
18. Qaja jë la ketre hna melën, ka amamane la aqane troa xatua së ngöne la ijine easa aja ixatua.
18 Maine mekune së lo sine föe hna qaja ngöne lo hna cinyihane hnapan. Ame ngöne la eahlo memine la nekö i eahlo jajinyi a tro troa mele ngöne la ketre nöj, tre, nango jole koi eahlo troa öhnyi huliwa. Öni eahlo e qaja, ka hape: “Ame e hmakany, eni a tro troa cainöj, nge ame e hnaipajö, eni a tro troa thele huliwa. Eni a mekune lo drai ne tro ni ngöne la setroa matre troa itö melek. Eni a pane cile me goeëne la itre dröne sil, ngo thaa ijije kö la manieng troa itöne itre ej. Eni petre hi a hane drenge la akötr e kuhu hning, me hleuhleu. Ame la eni a bëeke hmaca kowe la hnalapang, tre, tiqa hnyawa la watrengeng hnei nöjei pengöne dröne sil. Ijije hnyawa tro nyiho a xeni la hnepe göxeni celë koi lue treu. Ene pe eni a treij, me olene koi Iehova.” Itre dröne sile lai hna amë pe koi eahlo hnene la ketre trejine trahmanyi ne la ekalesia ka traa feja ngöne la gatrane i nyidrë. Ame pë hë e thupen, hnei eahlo hna cinyanyine la ketre tusi koi nyidrë, hna hape: “Maine hnenge hna pane olene atraqatr koi nyipëti ngöne la drai celë, ngo eni fe a olene koi Iehova, hnene laka hnei Nyidrëti hna jëne la aqane thiina ka menyike nyipë matre troa amekunë ni la ihnimi ne la Tretretro.”—Ite edomë 19:17.
19. Ame ngöne la akötre atraqatr, tro ha tune kaa la mejiune ne la itre hlue i Iehova, nge nemene la nyine tro sa catre kuca enehila?
19 Kola mama hnyawa laka, ame la hnei Iehova hna kuca ngöne la hneijine ekö me ngöne mina fe la hneijine së, tre, eje a hamë së la itre kepine troa lapaune pala hi koi Nyidrë, ene la Atre Xatua së. Ame la kola traqa elanyi la akötre atraqatr ngöne la fene i Satana, tre, tro ha nyipi ewekë catre koi së la ixatua qaathei Iehova. Ngo ame la itre hlue i Iehova, tre, tro ha pexeje hnyawa la mejiune i angatre koi Nyidrë. Ijije hë tro angatr a gala me madrin, ke, atrehmekune hë angatre laka, easenyi hë la ijine troa amele angatr. (Luka 21:28) Haawe, ngacama troa traqa koi së la itre jol, ngo loi e tro pala hi sa catre amë la mejiune së koi Iehova, nge troa xecie hnyawa koi së laka, ame la Akötresie së, tre, ka thaa hane kö saze nge Nyidrëti hi la “Ate amele” së.
[Ithueamacany]
a Wange ju la hna cinyihane hna hape “Une épouvantable tragédie,” ngöne Réveillez-vous ! ne 22 Julai 2001, götrane 19-23.
b Wange ju la hna cinyihane hna hape “La foi m’aide à vivre avec la SLA,” ngöne la Réveillez-vous ! ne Januare 2006, götrane 25-29.
The Thëthëhmine Kö
• Tune kaa la aqane amelene Iehova la itre atr hna canga thupa la mel?
• Pine nemene matre ka nyipi ewekë catre kö la ixatua ngöne la götrane la ua?
• Nemene la aliene la mekune ene laka, Iehova a thingehnaeane laka tro Nyidrëti a thupë së hnyawa ngöne la götrane la ngönetrei?
[Thying]