Iehova be Iseda “Hamauria Tauna”

“Lohiabada ese tau namodia ia durua noho, bona idia ia veria mauri noho.”​​—SAL. 37:40.

1, 2. Baibel ese Iehova be edena bamona ia herevalaia dainai, unai ese ita ia hagoadaia?

IDAUNEGAI, taunimanima haida be hisihisi o metau idauidau idia davaria neganai, Iehova ese ia durudia. Unai hegeregerena, hari inai negai, Iehova be ita do ia durua. Baibel ia gwau: “Dirava ese iena kara ia senisia lasi.” (Iam. 1:17) Momokani, hisihisi o metau idauidau ita davaria neganai, unai hereva momokani be ita do ia hagoadaia, ani?

² Stadi ginigunana lalonai ita itaia vadaeni, Baibel negadiai Iehova be ia hamomokania ia be “Hamauria Tauna.” (Sal. 70:5) Iehova be ia idau lasi bona ena hereva ia hamomokania Diravana; unai dainai, hari inai negai, namona be Iehova idia tomadiho henia taudia idia abia dae momokani, Iehova be idia do ia durua bona hamauria. (Sal. 37:40) To, Iehova be edena dala ai Iena Witnes taudia ia hamauria? Bona edena dala ai ita ia hamauria diba?

Iehova ese Dagedage Taudia amo Ena Hesiai Taudia Ia Hamauria

3. Dahaka dainai ita diba dagedage taudia be Dirava ena taunimanima edia haroro gaukara do idia koua lasi?

³ Herevana Satani be dahaka dagedage karadia ia havaraia, to Iehova ena Witnes taudia be Iehova tomadiho henia karana do idia hadokoa lasi. Baibel be ita ia hagoadaia: “Tuari gauna ta ese oi do ia hadikaia diba lasi. Bona oi idia  samania gwauraia taudia, be oi ese idia edia hereva ibounai do oi koua diba.” (Isa. 54:17) Dagedage taudia be dala idauidau ai Iehova ena Witnes taudia edia haroro gaukara idia koua toho, to idia kwalimu lasi. Sivarai rua mani ita laloa.

4, 5. Lagani 1918 ai, Iehova ena Witnes taudia be dahaka dika idia davaria, bona dahaka ia vara?

⁴ Lagani 1918 lalonai, dubu gunalaia taudia be dagedage idia havaraia, badina idia ura Iehova ena Witnes taudia ese edia haroro gaukara idia hadokoa. May 7 ai, United States ena gavamani ena oda hegeregerena, J. F. Rutherford (unai negai, tanobada hegegemadai ena haroro gaukara ia naria tadikakana) bona hedikwota ai idia gaukara tadikaka ma haida be dibura ai idia atoa. Hua rua murinai, kota taudia idia gwau Tadikaka Rutherford bona ena bamodia be gavamani idia hadikaia dainai, idia be dibura ruma ai do idia noho daudau. Dagedage taudia be kota taudia amo haroro gaukara idia koua dainai, anina be idia kwalimu, a? Lasi vaitani!

⁵ Iehova ena gwauhamata ita laloatao: Ia gwau: “Tuari gauna ta ese oi do ia hadikaia diba lasi.” March 26, 1919 ai, Tadikaka Rutherford bona ena bamodia be dibura ruma idia rakatania. May 5, 1920 ai, kota taudia idia gwau, unai tadikaka be kerere ta idia karaia lasi. Tadikaka idia kwalimu unai, bona haroro gaukara idia goadalaia. Vadaeni, dahaka ia vara? Unai nega amo ema bona hari, Iehova ena Witnes taudia edia namba be ia bada daekau noho! Unai dainai, iseda “Hamauria Tauna” ita hanamoa.​​—1 Kor. 3:7.

6, 7. (a) Nazi Germany ai Hitler be dahaka ia gwau Iehova ena Witnes taudia dekenai, bona dahaka ia vara? (b) Iehova ena Witnes taudia dekenai idia vara gaudia ese dahaka idia hamomokania?

⁶ Sivarai iharuana mani ita laloa. Lagani 1934 ai, Hitler ia gwauhamata Germany ai idia noho Iehova ena Witnes taudia ibounai be do ia haorea. Bona ia ura unai gwauhamata ena anina ia hagugurua. Daudau lasi murinai, pulisi ese tadikaka taihu momo idia dogoatao, bona dibura kamepadia ai idia atoa. Tausen momo be dika idia davaria, bona handred momo be dibura kamepadia dekenai idia hamasea. Hitler ia kwalimu, a? Ia ese Germany dekenai sivarai namona harorolaia gaukarana ia koua, a? Lasi vaitani! Unai dagedage negana lalonai, iseda tadikaka be hehuni dalanai haroro gaukara idia karaia. Nazi gavamani ia moru neganai, tadikaka taihu be gwaumaoro idia abia bona haroro gaukara idia karaia noho. Hari, Germany dekenai pablisa taudia ibounai be 165,000 mai kahana idia noho. Ita gwau diba, “Hamauria Tauna” be ena gwauhamata ia hamomokania lou, ia gwau: “Tuari gauna ta ese oi do ia hadikaia diba lasi.”

⁷ Iehova ena Witnes taudia dekenai idia vara gaudia ese idia hamomokania, Iehova ia ura  lasi haida ese ena taunimanima ibounai idia hamasea ore. (Sal. 116:15) Ita ta ta be edena bamona? Edena dala ai Iehova be iseda Hamauria Tauna?

Nega Ibounai Dagedage Lalonai Iehova be Ita Do Ia Hamauria, A?

8, 9. (a) Edena bamona ita diba nega haida dika do ita davaria? (b) Dahaka lalohadai ita abia dae be maoro?

⁸ Ita ibounai ita diba, nega haida dika do ita davaria. To, Heberu memero toi mai edia abidadama edia haheitalai ita tohotohoa be namo​​—idia be King Nebukanesa ena golo kaivakuku idia tomadiho henia lasi. Unai memero toi idia gwau, dika lalonai Iehova be hoa dalanai idia do ia hamauria, a? Lasi, idia be unai lalohadai idia abia lasi. (Daniela 3:​17, 18 duahia.) To, Iehova ese unai memero toi be lahi siahuna dekena amo ia hamauridia. (Dan. 3:​21-​27) Anina be Baibel negadiai, Iehova be nega ibounai hoa dalanai ena taunimanima ibounai ia hamauria, a? Lasi, kamonai hesiai taudia momo be dagedage taudia ese idia hamasea.​​—Heb. 11:​35-​37.

⁹ Hari inai negai be edena bamona? Iehova be “Hamauria Tauna” dainai, Ia ese dika lalonai taunimanima ia hamauria diba. To ita gwau diba Iehova ese haida ia hamauria bona ma haida be ia hamauria lasi be maoro, a? Lasi. Bema tadikaka ta be dika amo ia roho mauri, reana do ia gwau Iehova ese ia hamauria. Ma haida ese unai tadikaka ena lalohadai idia abia dae be namo. Danu, namona be ita abia dae abidadama tadikaka momo be dagedage lalonai idia mase​​—Nazi gavamani ia lohia neganai, ia vara bamona. Ma haida be dika ma haida lalonai idia mase. (Had. 9:​11) To ita henanadai, ‘Bema Iehova be “Hamauria Tauna” to ena abidadama taudia be dika lalonai ia hamauridia lasi bena idia mase​​—anina be Iehova ia kwalimu lasi, a? Lasi, nega ibounai Iehova be Hamauria Tauna.

10, 11. Dahaka dainai taunimanima idia mase? Iehova be mase dekenai dahaka ia karaia diba?

¹⁰ Mani oi laloa: Ta be hegeregere lasi mase ia koua totona o “guria gabuna ena siahu dekena amo ia heau mauri diba” lasi. (Sal. 89:48) Iehova be edena bamona? Nazi gavamani ena dagedage karadia ia haheaukalaia taihu ta be ena sinana ena hereva ia laloatao. Iena sinana be Witnes hahinena bona dibura kamepa ai ena turadia bona ruma bese idia mase neganai, ia be ena natuna dekenai inai bamona ia gwau: “Bema mase be noho hanaihanai gauna, reana mase ena siahu be Dirava ena siahu ia hanaia.” To, mase ena siahu be mauri ia henia Diravana ena siahu ia hanaia lasi! (Sal. 36:9) Iehova be idia mase taudia ibounai ia laloatao, bona idia ibounai do ia hamauria lou.​​—Luka 20:​37, 38; Apok. 20:​11-​14.

¹¹ Hari inai negai, Iehova be ena hesiai taudia ia laloa bada. Namona be dala toi ita kikilaia, badina unai ese do idia hahedinaraia Iehova be iseda “Hamauria Tauna.”

Iehova be Ita Ia Durua Ia Kahirakahira Ita Noho Totona

12, 13. Dahaka dainai Iehova ese ita ia durua ia kahirakahira ita noho totona be mai anina bada? Iehova be edena dala ai unai bamona heduru ia henia?

¹² Iehova be ita ia durua ia kahirakahira ita noho totona​​—unai bamona heduru be mai anina bada. Ita be Keristani taudia momokanidia dainai, ita laloparara eda mauri lalonai gau ta be mai anina bada. Unai gau hereadaena be, Iehova ita tura henia karana. (Sal. 25:14; 63:3) Bema Iehova ita tura henia lasi, iseda mauri hari inai negai be anina lasi bona vaira negana ai gau namodia momo do ita haboioa.

¹³ Iehova ita tanikiu henia badina dala idauidau ai ita ia durua ia kahirakahira ita lao totona. Hegeregere, Iehova be Baibel, lauma helaga, bona kongrigeisen amo ita ia durua. To edena dala ai unai gaudia ese ita idia durua diba? Bema hanaihanai Baibel ita stadilaia namonamo, unai ese iseda abidadama bona helaro do ia hagoadaia. (Roma 15:4) Bema mai eda lalona ibounai ida Iehova ita noia ena lauma helaga ia henia, unai ese ita do ia durua kara dikadia ita karaia lasi totona. (Luka 11:13) Bema horoa orena taudia ese buka bona  hebouhebou badadia bona maragidia amo idia halasia hakaua herevadia ita badinaia, anina be “nega korikori ai” idia halasia “aniani” ita abia unai. (Mat. 24:45) Oibe, Dirava be unai dala amo ita ia durua Ia kahirakahira ita noho totona.​​—Iam. 4:8.

14. Iehova be ita ia durua ia kahirakahira ita noho totona, bona unai kara ia hamomokania ena ekspiriens ta mani oi gwauraia.

¹⁴ Momokani, Iehova be ita ia durua ia kahirakahira ita noho totona. Stadi ginigunana ena paragraf 1 ai ita kikilaia tama sina edia sivarai be unai ia hahedinaraia. Matamanai, unai tama sina idia kamonai, edia natuna Theresa be ia boio. To dina haida murinai, idia kamonai Theresa be ta ese ia alaia mase. * Tamana ia gwau: “Lau guriguri Iehova ese egu natuna ia naria totona. To egu natuna ena mase ena sivarai lau kamonai neganai, sibona lau nanadaia; ‘Dahaka dainai Iehova be egu guriguri ia haerelaia lasi?’ To, lau diba nega haida Iehova ena taunimanima dekenai dika do idia vara. Iehova lau noia lalohadai namona ia henia totona. Lau moale badina lau diba Iehova be ena taunimanima ia durua Ia kahirakahira idia noho totona. Hegeregere, Iehova be ai dekenai lalohadai maorona Ia henia dainai, unai ese ai ia durua Ia kahirakahira ai noho totona. Oibe, Iehova tura henia karana be gau badana, badina unai amo vaira neganai ta be mauri hanaihanai ia abia diba. Hegeregere, Iehova be Theresa ia durua; ia be Iehova ia badinaia ela bona ia mase. Lau moale badina lau diba vaira neganai, Iehova ese Theresa be mase amo do ia hatorea isi lou.”

Ita Gorere Neganai, Dirava be Ita Ia Naria

15. Iehova be edena dala idauidau ai ita ia durua gorere ita haheaukalaia totona?

¹⁵ Ita “gorere neganai,” Iehova be ita ia naria diba, Davida ia naria bamona. (Sal. 41:3) Ena be hari Iehova be hoa dalanai iseda gorere ia kokia lasi, to edena dala ai Ia be ita ia durua? Baibel ena hakaua herevadia be ita ia durua medikol heduru dala maorodia ita abia hidi totona. (Aon. 2:6) Gima Kohorona bona Awake! lalonai be gorere haida idia kikilaia, bona unuseniai idia torea heduru herevadia be ita idia durua bada diba. Iehova be ena lauma helaga amo “siahu badana” ia henia, unai amo hekwakwanai ita hanaia bona Dirava badinaia karana ita rakatania lasi, herevana dahaka do ia vara. (2 Kor. 4:7) Unai bamona heduru idia noho dainai, ita be eda gorere do ita laloa momo lasi, to Iehova kahirakahira ita noho karana do ita laloa bada.

16. Edena dala ai tadikaka ta be ena gorere ia haheaukalaia diba?

¹⁶ Stadi ginigunana ena paragraf 1 ai ita kikilaia merona ita laloa. Lagani 1998 ai, ia be ALS gorerena (eiava amyotrophic lateral sclerosis) ia abia, bona gabeai ia paralais. * Unai gorere be edena bamona ia haheaukalaia? Ia gwau: “Unai  gorere dainai lau lalohisihisi, bona lau laloa lau mase be namo. To lau lalohekwarahi neganai, nega ibounai Iehova lau noia lau ia durua lau manau bona haheauka totona. Lau mamia Iehova be egu guriguri ia haerelaia. Badina manau karana ese lau ia durua tanobada matamatana lau laloa totona; unai negai, lau be do lau raka namonamo, aniani namodia do lau ania, bona egu ruma bese ida do ai herevahereva lou. Haheauka karana ese lau ia durua paralais gorere ena metau idauidau lau haheaukalaia totona. Danu, haheauka karana ese lau ia durua Iehova lau badinaia noho bona Ia kahirakahira lau lao totona. Davida bamona, lau mamia egu gorere dainai bedi ai lau hekure lalonai, Iehova be lau ia durua bada.”​​—Isa. 35:​5, 6.

Iehova ese Tauanina Durua Gaudia Ia Henia

17. Iehova be dahaka gwauhamata ia gwauraia? Unai gwauhamata ena anina be dahaka?

¹⁷ Iehova ia gwauhamata Ia be tauanina durua gaudia do ia henia. (Mataio 6:​33, 34 bona Heberu 13:​5, 6 duahia.) Anina be moni gaukara do ita karaia lasi, to ita naria ela bona Iehova be hoa dalanai tauanina durua gaudia ia henia, a? Lasi. (2 Tes. 3:​10) Iehova ena gwauhamata ena anina be inai: Bema eda mauri lalonai Dirava ena Basileia ita atoa guna bona ita gaukara goada eda mauri durua gaudia ita abia totona, ita diba momokani Iehova be ita do ia durua iseda mauri durua gaudia ita abia totona. (1 Tes. 4:​11, 12; 1 Tim. 5:8) Ia be dala idauidau ai ita tahua gaudia ia henia diba, hegeregere reana ita hoa badina nega haida tadikaka o taihu ta be ita dekenai aniani o moni gaukara ia henia.

18. Heduru ita ura negadiai, Iehova ese ita ia durua diba ena ekspiriens ta mani oi gwauraia.

¹⁸ Stadi ginigunana ena paragraf 1 dekenai ita kikilaia sinana oi laloatao, a? Ia bona ena natuna be gabu matamata dekenai idia lao neganai, ia hekwarahi moni gaukara ia davaria totona. Ia gwau: “Dabai be lau haroro, bona adorahi be moni gaukara lau tahua. Nega ta ai, lau be sitoa dekenai lau lao, milk lau hoia totona. Lau gini bona uma aniani lau itaia. Lau ura lau hoia, to egu moni be hegeregere lasi. Unai negai, lau lalometau bada. To, ruma dekenai lau giroa lou neganai, egu ruma ena dehe dekenai be baege ta mai ena uma aniani idauidau ia noho. Unai aniani be momo herea dainai, hua haida lalonai ai be unai ai gaukaralaia. Lau tai, bona Iehova lau tanikiu henia.” Gabeai, taihu ia kamonai, unai baege be kongrigeisen tadikaka ta ese ia atoa, bona unai tadikaka be mai ena uma. Taihu be unai tadikaka ia tore henia neganai, ia gwau: “Unai aniani lau davaria neganai, lau be oi lau tanikiu henia bada, to danu, Iehova lau tanikiu henia. Badina Ia ese oi ia gaukaralaia ai oi durua totona. Emu kara namona dainai, lau diba Iehova be lalokau Diravana.”​​—Aon. 19:17.

19. Hisihisi badana dekenai, Iehova ena hesiai taudia idia diba momokani Iehova be dahaka do ia karaia? To hari, dahaka ita karaia be gau badana?

¹⁹ Oibe, Baibel negadiai bona iseda nega lalonai, Iehova be dala idauidau amo ia hamomokania Ia be iseda Durua Tauna. Kahirakahira, Satani ena tanobada dekenai hisihisi badana do ia vara, unai nega lalonai Iehova ena heduru ita abia be gau badana. To, Iehova ena hesiai taudia idia diba momokani Iehova be idia do ia durua. Edia kwarana do idia abia isi, badina idia diba edia hamauria negana be ia kahirakahira vadaeni. (Luka 21:28) Herevana dahaka hisihisi ita davaria, to Iehova ita abidadama henia noho be gau badana. Bona ita abia dae momokani Iehova, ia idau lasi Diravana be iseda “Hamauria Tauna.”

[Footnotes]

Oi Laloatao, A?

• Edena dala ai Iehova be idia mase taudia ia hamauria diba?

• Dahaka dainai Iehova ese ita ia durua ia kahirakahira ita noho be mai anina bada?

• Iehova ia gwauhamata ita dekenai tauanina durua gaudia do ia henia ena anina be dahaka?

[Study Questions]

[Picture on page 8]

Tadikaka Rutherford bona ena turadia be lagani 1918 ai idia hadiburaia. Gabeai dibura ruma idia rakatania, badina kota taudia idia gwau, idia be kerere ta idia karaia lasi

[Picture on page 10]

Gorere dainai bedi ai ita hekure neganai, Iehova be ita ia naria diba