Yehowa udi “musungidi” wetu

“Yehowa udi ubakuatshisha, udi ubasungila.”​—MUS. 37:40.

1, 2. Mbualu kayi budi butangila Yehowa budi butukolesha ku muoyo?

MUNDIDIMBI kautu wimana muaba umue to. Padi dîba dienda dibanda, utu wenda ushintuluka pawu. Kadi Mufuki wa dîba ne buloba katu yeye ushintuluka to. (Mal. 3:6) Bible udi wamba bua bualu buende ne: ‘Kudiye kakuena dikudimuka anyi mundidimbi wa tshintu tshidi tshinyunguluka.’ (Yak. 1:17) Bualu budi butangila Yehowa ebu budi butukolesha ku muoyo nangananga patudi mu ntatu. Bua tshinyi?

² Anu mutuvua balonge mu tshiena-bualu tshishale, Yehowa uvua ‘usungila’ bantu ku kale. (Mus. 70:5) Yeye katu ushintuluka ne utu ukumbaja malu onso adiye wamba. Ke bualu kayi batendeledi bende ba lelu mbashindike ne: “Udi ubakuatshisha, udi ubasungila.” (Mus. 37:40) Mmunyi mudi Yehowa usungila bantu badi bamutendelela lelu eu? Mmunyi mudiye mua kusungila yonso wa kutudi?

Udi utusungila kudi baluishi betu

3. Bua tshinyi tudi ne bua kushindika ne: baluishi betu kabena mua kutupangisha bua kuyisha lumu luimpe?

³ Kakuena bualu nansha bumue budi Satana mua kuenza budi mua kupangisha Bantemu ba Yehowa bua kutendelela anu Yehowa nkayende to. Dîyi dia Nzambi didi ditujadikila ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne  diakalengele; wewe neutuishe ludimi luonso ludibu babandisha bua kukubanda nalu mu tshilumbu.’ (Yesh. 54:17) Baluishi badi benza muabu muonso bua kupangisha batendeledi ba Yehowa bua kuyisha, kadi mbapangile. Tuangate bilejilu bibidi.

4, 5. Ndutatu kayi luvua batendeledi ba Yehowa bapete mu 1918, ne ntshinyi tshiakenzeka pashishe?

⁴ Mu 1918 bamfumu ba bitendelelu bakakebela Bantemu ba Yehowa dikenga bua bimanyike mudimu wabu wa kuyisha. Mu dia 7 ngondo muitanu, mbulamatadi wa ditunga dia États-Unis wakatuma diyi bua bakuate Joseph Rutherford uvua ulombola mudimu wa kuyisha pa buloba bujima tshikondo atshi ne bakuabu bantu bavuabu benza nabu mudimu. Mu ngondo ibidi patupu, bakabadingidila muvuabu bajinga kuenza malu mabi mu musokoko ne kubakoselabu buloko bua bidimu bia bungi. Baluishi bavuaku bakokeshe bua kuimanyika mudimu wa kuyisha bua kashidi anyi? Nansha kakese!

⁵ Vuluka dilaya dia Yehowa dia ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele.’ Malu akakudimuka mu mushindu wa dikema mu dituku dia 26 dia ngondo muisatu mu 1919, ngondo tshitema panyima pa bamane kuela muanetu Rutherford ne bena diende mu buloko. Bakafuta makuta ne kubapatulabu. Tshidimu tshiakalonda, mu dia 5 ngondo muitanu, bakababingisha ku malu onso avuabu babadingidile. Diakamue bana betu kudituabu tshiakabidi mu mudimu wa kuyisha Bukalenge. Ntshinyi tshiakenzeka? Kuakenzeka didiunda dia dikema! Tudi tutumbisha “musungidi” wetu bua malu onso aa.​—1 Kol. 3:7.

6, 7. (a) Ntshinyi tshiakenzelabu Bantemu ba Yehowa mu Allemagne wa bena Nazi, ne ntshinyi tshiakenzeka? (b) Ntshinyi tshidi malu adi menzekele Bantemu ba Yehowa ba mu matuku etu aa aleja?

⁶ Mpindieu tuangatayi tshilejilu tshibidi. Mu 1934, Hitler wakaditshipa bua kujikija Bantemu ba Yehowa bonso bavua mu ditunga dia Allemagne. Kavua muakule mu lupepele to. Bakatuadija kukuata Bantemu ba bungi ne kubela mu maloko. Bakakengesha ba bungi ne kushipa bakuabu mu maloko manene. Hitler wakakokeshaku bua kujikija Bantemu mu ditunga diende anyi? Wakimanyikaku mudimu wa kuyisha lumu luimpe mu Allemagne anyi? Nansha kakese! Nansha pavuabu babakengesha, bana betu bakatungunuka anu ne kuyisha mu musokoko. Pakakuluka bukokeshi bua bena Nazi, Bantemu bakatungunuka ne kuyisha. Lelu wa ndaya eu, mu Allemagne mudi bamanyishi ba Bukalenge bapite pa 165 000. Musangu eu kabidi, “musungidi” wetu mmukumbaje dilaya diende dia ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele.’

⁷ Malu adi menzekele Bantemu ba Yehowa  ba mu matuku etu aa adi aleja ne: Yehowa kakuitaba bua bajimije Bantemu bende bonso to. (Mus. 116:15) Kadi netuambe tshinyi bua muntu yonso wa kutudi? Mmunyi mudi Yehowa usungila muntu ne muntu?

Yehowa utuku utulama ku mubidi anyi?

8, 9. (a) Mmunyi mutudi bamanye ne: Yehowa ki mmutulaye bua kutusungila ku mubidi mu tshishima? (b) Ntshinyi tshitudi ne bua kumanya?

⁸ Tudi bamanye ne: Yehowa ki mmulaye bua kulama yonso wa kutudi ku mubidi misangu yonso to. Tudi tulonda tshilejilu tshia bena Ebelu basatu bakabenga bua kutendelela lupingu lua or lua mukalenge Nebukadanesâ. Bansonga bavua batshina Nzambi aba kabavua bajadike ne: Yehowa neabakube mu tshishima to. (Bala Danyele 3:17, 18.) Kadi Yehowa wakabasungila mu tshikutu tshia kapia kakole. (Dan. 3:21-27) Tshia kumanya ntshia se: nansha ku kale, Yehowa kavua utamba kusungila bantu ku mubidi mu tshishima to. Baluishi bakashipa batendeledi balelela ba Yehowa ba bungi.​—Eb. 11:35-37.

⁹ Netuambe tshinyi bua lelu? “Musungidi” wetu Yehowa udi mua kusungila yonso wa kutudi mu ntatu mikole. Tudiku mua kuamba ne dishindika dionso ne: Yehowa ke uvua mutusungile mu nsombelu kampanda anyi kansanga anyi? Tòo. Kadi muntu udi mupanduke mu lutatu lukole udi mua kumona ne: Yehowa ke udi mumuambuluishe. Bantu bakuabu kabena ne bua kumuelesha mpata to. Kadi tudi ne bua kumanya kabidi ne: Bena Kristo ba lulamatu ba bungi mbafue bua dikengeshibua anu bu muvuabi bienzeke mu tshikondo tshia bena Nazi. Bakuabu mbafue mu njiwu. (Muam. 9:11) Tudi mua kudikonka ne: ‘Yehowa uvuaku mupangile bua “kusungila” batendeledi bende bavuabu bashipe anyi?’ Kabiena nanku to.

10, 11. Bua tshinyi lufu ndupite muntu makanda, kadi ntshinyi tshialuenzela Yehowa?

¹⁰ Tukonkononayi bualu ebu: Lufu ndupite muntu makanda bualu muntu nansha umue kena mua ‘kupandisha muoyo wende mu bukole bua Muaba wa Bafue’ anyi Sheol peshi Hadès to. (Mus. 89:48) Kadi netuambe tshinyi bua Yehowa? Muanetu mukuabu wa bakaji uvua mupande mu tshikondo tshia bena Nazi udi uvuluka tshivua mamuende uvua pende Ntemu mumuambile dimue dituku bua kumukolesha ku muoyo bua bana babu bavua bafue mu maloko. Wakamuambila ne: “Bu lufu mua kulama bantu kashidi, nunku luvua mua kupita Yehowa bukole, ki mmuomu anyi?” Kadi lufu kaluena ne bukole kupita Muntu udi upesha bantu muoyo to! (Mus. 36:9) Bantu bonso badi mu Sheol anyi mu Hadès badi mu meji a Yehowa ne yeye neasungile yonso wa kudibu.​—Luka 20:37, 38; Buak. 20:11-14.

¹¹ Kadi bua mpindieu, Yehowa udi uditatshisha bua nsombelu wa bantu badi bamutendelela lelu. Tukonkononayi mishindu isatu idiye ‘utusungila.’

Yehowa udi ulama malanda etu nende

12, 13. Bua tshinyi malanda etu ne Yehowa adi ne mushinga wa bungi, ne mmunyi mudiye utuambuluisha bua kualama?

¹² Yehowa udi ulama malanda etu nende bualu adi ne mushinga wa bungi menemene. Tuetu bena Kristo balelela tudi bamanye ne: kudi tshintu tshidi tshipite muoyo utudi nawu mpindieu. Tshintu tshia mushinga mukole tshitudi natshi ke malanda etu ne Yehowa. (Mus. 25:14; 63:3) Tuetu katuyi mu malanda mimpe ne Nzambi, nsombelu wetu kakuikala ne mushinga ne katuakuikala ne ditekemena bua matuku atshilualua.

¹³ Tudi ba diakalenga bualu Yehowa udi utupesha bionso bitudi nabi dijinga bua kulama malanda etu nende. Mmutupeshe Dîyi diende, nyuma wende ne tshisumbu tshia bena Kristo ba pa buloba bujima bua kutuambuluisha. Ntshinyi tshitudi mua kuenza bua malu aa kutuambuluishawu? Tuetu ne tshibidilu tshia kulonga Bible ne tshisumi netukoleshe ditabuja dietu ne ditekemena ditudi nadi. (Lomo 15:4) Tuetu tulomba Yehowa nyuma wende, neatuambuluishe bua kutantamena malu adi mua kunyanga malanda etu nende. (Luka 11:13) Tuetu tulonda tshidi kasumbu ka mupika katuambila mu mikanda idiku kapatula, mu  bisangilu, mu mpuilu ne mpungilu netupete biakudia ‘palua dituku diabi.’ (Mat. 24:45) Malu aa adi atuambuluisha bua kushala mu malanda mimpe ne Yehowa.​—Yak. 4:8.

14. Fila tshilejilu tshidi tshileja mudi Yehowa ulama malanda etu nende.

¹⁴ Bua kuleja mudi Yehowa ulama malanda etu nende, tupinganayi ku tshilejilu tshia baledi batuvua batele ku ntuadijilu kua tshiena-bualu tshishale. Muanabu wa bakaji Theresa mumane kujimina matuku makese pashishe, bakapeta lumu ne: bavua bamushipe. * Tatuende udi uvuluka wamba ne: “Mvua musambile Yehowa bua amulame. Pakamusangabu mufue, ndi mvuluka ne: ngakadiebeja bua tshinyi Yehowa kavua muandamune masambila anyi. Kadi mvua mumanye ne: Yehowa ki mmulaye bua kuenza tshishima bua kulama muntu yonso udi umutendelela to. Ngakatungunuka ne kusambila bua meme kumvua bualu abu bimpe. Biakankolesha ku muoyo pangakamanya ne: Yehowa udi ulama malanda ende ne bantu badi bamutendelela, mmumue ne: udi utupesha bitudi nabi dijinga bua kualama. Ditulama edi didi ne mushinga wa bungi bualu didi dituambuluisha bua kuikala ne ditekemena. Ke mushindu uvua Yehowa mulame Theresa bualu uvua umuenzela mudimu ne lulamatu too ne muakafuaye. Ngakapeta ditalala pangakamanya ne: Yehowa neamuvuluke mu matuku adi kumpala.”

Udi utukolesha patudi tusama

15. Mmunyi mudi Yehowa mua kutuambuluisha patudi tusama?

¹⁵ Yehowa udi mua kutukolesha patudi pa “bulalu bua butekete bua mubidi” anu muvuaye mukoleshe Davidi. (Mus. 41:3) Nansha mudi Yehowa kayi utondopa mu tshishima lelu, udi utuambuluisha. Mushindu kayi? Mikenji idi mu Dîyi diende idi mua kutuambuluisha bua kusungula ngondapilu kampanda muimpe ne malu makuabu. (Nsu. 2:6) Tudi mua kupeta mibelu mikuabu mimpe mu biena-bualu bidi biakula bua disama ditudi nadi bidi bipatuka mu Tshibumba tshia Nsentedi ne Réveillez-vous! Yehowa udi mua kutupesha ‘bukole bupite’ ku diambuluisha dia nyuma wende bua tutantamene nsombelu eu ne tushale bamulamate nansha bia kumona lufu. (2 Kol. 4:7, MMM) Malu aa adi atuambuluisha bua kubenga kusamisha mutu bikole bua disama dietu ne kufika too ne ku dilengulula malanda etu ne Yehowa.

16. Mmunyi mudi muanetu mukuabu mutantamene disama diende?

¹⁶ Tuangate kabidi tshilejilu tshia nsongalume utuvua batele ku ntuadijilu kua tshiena-bualu tshishale. Mu 1998, bakamukuata ne disama divua ne bua kutekesha mubidi wende mujima. * Ntshinyi tshidiye muenze bua kutantamena disama edi? Udi wamba ne: “Ntu imue misangu ngumvua kanyinganyinga pantu  mvuluka ne: anu lufu ke ludi mua kujikija dikenga dianyi. Dîba dionso dindi ngumvua malu antonda, ntu ndomba Yehowa malu asatu aa: Ditalala dia mu mutshima, lutulu ne ditantamana. Ndi mumone ne: Yehowa mmuandamune masambila anyi. Ditalala dia mu mutshima didi dingambuluisha bua kuela meji ku malu adi akolesha bu mudi mushindu ungikala ngenda mu bulongolodi bupiabupia, ndia biakudia ne disanka ne nyukila kabidi ne bena mu dîku dietu. Lutulu luolu ludi lungambuluisha bua kutantamena ntatu ya disama dianyi. Ditantamana padi didi dingambuluisha bua kushala mulamate Yehowa ne kulama malanda anyi nende. Ntu ndiumvua anu bu muvua Davidi udiumvua bualu ndi mumone mudi Yehowa unkolesha mu bulalu buanyi bua disama.”​—Yesh. 35:5, 6.

Udi utupesha bitudi nabi dijinga

17. Ntshinyi tshidi Yehowa mulaye bua kutuenzela, ne bualu ebu budi bumvuija tshinyi?

¹⁷ Yehowa mmulaye bua kutupesha bitudi nabi dijinga. (Bala Matayo 6:33, 34 ne Ebelu 13:5, 6.) Bualu ebu kabuena bumvuija ne: tudi mua kutekemena bitudi nabi dijinga mu tshishima anyi kubenga bua kuenza mudimu bua kubipeta to. (2 Tes. 3:10) Kadi budi bumvuija ne: tuetu tuteka Bukalenge bua Nzambi pa muaba wa kumpala mu nsombelu wetu ne tuenza mudimu bua kupeta bitudi nabi dijinga, tudi mua kutekemena ne: Yehowa neatuambuluishe bua kubipeta. (1 Tes. 4:11, 12; 1 Tim. 5:8) Udi mua kutupeshabi mu mushindu utudi katuyi belela meji to, pamuapa dîba didi bana betu batuambuluisha anyi batukebela mudimu wa kuenza.

18. Londa bualu budi buleja ne: tudi mua kupeta diambuluisha patudi mu lutatu.

¹⁸ Vuluka mamu udi udikoleshila muanende utuvua batele ku ntuadijilu kua tshiena-bualu tshishale. Pavuaye muye kusombela muaba mukuabu ne muanende, uvua ne lutatu bua kupeta mudimu. Udi wamba ne: “Mvua nya mu buambi mu dinda ne dilolo mvua nya mu dikeba mudimu. Ndi mvuluka dituku dikuabu pangakaya mu tshisalu bua kusumba mabele. Ngakashala muimane mutangile bisekiseki ne midioko mikuabu, kadi tshivua ne makuta a kubisumba to. Ngakumvua bibi be! Pangakapingana kumbelu dituku adi, ngakasangana bantekele bitunga bia midioko ya mishindu yonso mu lutanda lua kumfundu kua nzubu wanyi. Biakudia abi bivua mua kutuambuluisha munkatshi mua ngondo ya bungi. Ngakadila ne kuela Yehowa tuasakidila.” Muanetu wa bakaji eu wakalua kumanya ne: muanetu wa balume mukuabu wa mu tshisumbu atshi utu udima midioko ayi ke uvua mumushilabi. Wakalua kumufundila mukanda wamba ne: “Nansha mumvua mukuele tuasakidila wa bungi dituku adi, ngakela kabidi Yehowa tuasakidila bua muvuaye mukusake bua kungenzela bualu buimpe abu bua kumvuluija ne: mmunange.”​—Nsu. 19:17.

19. Ndishindika kayi dikala nadi batendeledi ba Yehowa palua dikenga dinene, ne ntshinyi tshitudi ne bua kudisuika bua kuenza mpindieu?

¹⁹ Bidi bimueneka patoke ne: malu avua Yehowa wenza kale ne adiye wenza mpindieu adi atusaka bua kumueyemena yeye Mukuatshishi wetu. Mu matuku makese emu pakuata dikenga dinene bulongolodi bua Satana netuikale dijinga ne dikuatshisha dia kudi Yehowa kupita mutudi nadi dijinga mpindieu. Tshidibi, batendeledi ba Yehowa badi ne bua kumukeba ne dishindika dionso. Nebabanduluke ne nebasanke bualu nebamanye ne: lupandu luabu ludi pabuipi. (Luka 21:28) Kadi bua mpindieu, nansha ntatu ya mushindu kayi mitukuate, tuikalayi badisuike bua kueyemena Yehowa bashindike ne: Nzambi wetu utu kayi ushintuluka udi “musungidi” wetu.

[Mêyi adi kuinshi]

Udi muvuluke anyi?

• Mmunyi mudi Yehowa usungila bantu badibu bashipe?

• Bua tshinyi malanda etu ne Yehowa adi ne mushinga wa bungi?

• Padi Yehowa utulaya bua kutupesha bitudi nabi dijinga, udi usua kuamba tshinyi?

[Nkonko ya dilonga]

[Tshimfuanyi mu dibeji 8]

Bakakuata muanetu Rutherford ne bena diende mu 1918 ne kuluabu kubalekela, kubabingishabu ku malu onso avuabu babadingidile

[Tshimfuanyi mu dibeji 10]

Yehowa udi mua kutukolesha patudi pa “bulalu bua butekete”