Yehova Diyi ‘Mukwakutupulwisha’

“Yehova wayikwashañaku, wayipulwishaña.”—MASAMU 37:40.

1, 2. Wunsahwinyi walema wahosha hadi Yehova watukundejaña nikutukolesha?

 NYEVULU yamwekanaña neyi itañwa dinatoñeki hiyashalaña hohamuku. Iseki chidanyeñumukaña, nyevulu niyena yashitumukaña nikuhimpa mpinji yejima. Ilaña, Nleñi yeseki niitañwa, habalumukañaku. (Malaki 3:6) Bayibolu yahosha nawu, “Kudi yena hikwekala kubalumuka, hela mwevulu wakushetumukaku.” (Yakoba 1:17) Iwu wunsahu walema wahosha hadi Yehova watukundejaña nikutukolesha chikupu, sweje neyi tutalañana nakweseka nikukala kwasweja. Muloñadi?

² Neyi chitwadizili muchibaba chinafumuhu, Yehova wadiña “mukwakupulwisha” mumpinji yakunyima. (Masamu 70:5) Hahimpañaku nawa mpinji yejima wakoñaña mwahoshañayi, dichi akwakudifukula indi makonu atela kukuhwelela nawu, ‘wakayikwashañaku, nikuyipulwisha.’ (Masamu 37:40) Indi Yehova wapulwishaña ñahi antu jindi makonu? Nateli kutupulwisha ñahi hamuntu hamuntu?

Atupulwishaña Kudi Akwankunyi

3. Muloñadi wutwatelela kwiluka chikupu netu akwankunyi hiyakalekesha antu jaYehova kukalakala mudimu wakushimwina nsañu yayiwahuku?

³ Kwosi ikañesha dasatana datela kulekesha aYinsahu jaYehova kudifukula kudi yena munjila yatelela. Izu daNzambi datukonkomwenaña nawu: “Hikwakekala chitwa, chakachilawu nawu akukatishi nachu, chakakolaku. Madimi  ejima akakunyamukila nawu akusompeshi, wakayitanyisha.” (Isaya 54:17) Akwakunyi aneseki kukañesha antu jaNzambi kukalakala mudimu wakushimwina ilaña anakañanyi. Shinshikenu hayakutalilahu yiyedi.

4, 5. Indi antu jaYehova atalañeni nekañesha damuchidinyi mu 1918, nawa chumanyi chafuminumu?

⁴ Mu 1918, antu jaYehova ayimwesheli ikezeñi kudi akulumpi jansakililu akeñeleña kulekesha mudimu wawu wakushimwina. HaMay 7 nfulumendi yamuUnited States yahanini nshimbi yakukwata J. F. Rutherford, wadiña nakulombola mudimu wakushimwina mukaayi kejima hayina mpinji, niantu amakwawu adiña hayishina. Mutukweji tuyedi hohu, Mana kwetu Rutherford nialunda nindi ayitwikili muloña nawu ekala hakafuta nawa ayishili mukaleya hadi mpinji yayilehi. Komana akwakunyi atwesheli kuzatisha yota yanyiloña kulonda kulekesha mudimu wakushimwina? Hiyatwesheluku!

⁵ Anukenu chakanayi Yehova nindi: “Hikwakekala chitwa, chakachilawu nawu akukatishi nachu, chakakolaku.” Mukukasumwisha yuma yabalumukili, chimwahitili tukweji tutanu natuwana kufuma hamushiluwu Mana kwetu Rutherford nialunda nindi mukaleya, haMarch 26, 1919, amana kwetu ashiliwu mukaleya ayifweteleli mali nakuyumbaku kushika nihakasompawu muloña. Chaaka chalondeleluhu, haMarch 5, 1920, nyiloña yejima ayimanishili. Chiyayumbiluku amana kwetu atwalekeluhu kukalakala mumudimu waWanta. Chumanyi chafuminumu? Kufuma hayina mpinji kudi kuvulilaku chikupu! Kuhameka kwejima kwayaña kudi “mukwakupulwisha” hayuma yejima yinafumimu.—1 Akorinda 3:7.

6, 7. (a) Indi aYinsahu jaYehova ayilili ñahi kudi aNazi muGermany, nawa chumanyi chafuminumu? (b) Indi nsañu yamakonu yawantu jaYehova yamwekeshaña chumanyi?

⁶ Shinshikenu hachakutalilahu chamuchiyedi. Mu 1934, Hitler wasanyikili kujilumuna aYinsahu jaYehova ejima muGermany. Iku kusanyika hikwadiña kwakuchinisha hohuku. Chelili Hitler nahoshi dehi awa mazu, antu amavulu ayikwatili nikuyisha mukaleya. A Yinsahu amavulu ayiyandishili chikupu; nawa amavulu ayijahilili muyilombu yakukabishilamu. Komana Hitler watwesheli kujilumuna aYinsahu ejima kwesekeja nachasanyikiliyi? Komana walekesheli mudimu wejima wakushimwina nsañu yayiwahi muGermany? Wakañenyi! Hampinji yayikabishileñawu, amana kwetu atwalekeluhu namudimu wakushimwina mukuswamujoka. Chamanini chiyulu chaNazi, amana kwetu ekalili akasunuka nakutwalekahu kushimwina. Makonu, muGermany mudi akwakushimwina aWanta akubadika ha 165,000. Cheñi, “mukwakupulwisha” nakoñi chikupu chuma chakaniniyi chakwila nawu: “Hikwakekala chitwa, chakachilawu nawu akukatishi nachu, chakakolaku.”

⁷ Nsañu yawaYinsahu jaYehova makonu yinamwekeshi wunsahu wakwila nawu Yehova haketeja  antu jindi kuyijilumuna neyi izanvuku. (Masamu 116:15) Komana, Yehova wakatukiña hamuntu hamuntu? Indi Yehova watupulwishaña ñahi hamuntu hamuntu?

Komana Yehova Watwakamenaña lwakuMujimba?

8, 9. (a) Twelukaña ñahi netu Yehova hatukana nindi wakatukiñaña mpinji yejima lwakumujimbaku? (b) Chumanyi chitwatela kwiluka chikupu?

⁸ Makonu, tweluka netu Yehova hatukana nindi wakatukiñaña lwakumujimba mpinji yejima hamuntu hamuntuku. Twalondelaña chakutalilahu chamwekesheli Aheberu asatu ashinshika akanini kufukamina mukishi wawuru watuñiliyi Mwanta Nebukaneza. Awa atwansi asatu amutiyileña Nzambi woma hiyakuhweleleli nawu Yehova wukuyikiña muchihayamisha kuwubanji wakumujimbaku. (Tañenu Danyeli 3:17, 18.) Chafuminimu, Yehova wayipulwishili nakuyifumisha muluteñi lweneni lwakesi. (Danyeli 3:21-27) Hela tuhu kumafuku akunyima, antu hiyavulileña kuyipulwisha muchihayamishaku. Ambuña aYehova ashinshika amavulu ayijahili kudi akwankunyi nawu.—Aheberu 11:35-37.

⁹ Indi makonu? Chineli diyi “mukwakupulwisha,” chakadi nikujina Yehova nateli kupulwisha antu muwubanji. Komana tunateli kuhosha chikupu netu Yehova wadiñijili hela hadiñijili munsañu jikwawuku? Inehi. Hela chochu, muntu wunapuluki muwubanji nateli kutoñojoka nindi Yehova namupulwishi. Chikwikala chatama neyi amakwawu akumutadikisha. Hampinji yoyimu, twatela kwiluka netu akwaKristu amavulu ashinshika anafwi hamuloña wakuyikabisha, neyi chichadiña muchiyulu chaNazi. Amakwawu anafwi munjila jatama. (Mukwakutaŋisha 9:11) Tunateli kudihula netu, ‘Komana Yehova wakañenyi kwikala “mukwakupulwisha” antu ashinshika ajahiluwu?’ Inehi.

10, 11. Muloñadi muntu chakañenyayi kukañesha kufwa, ilaña chumanyi chinateli kukoñayi Yehova?

¹⁰ Toñojokenu hanichi: Muntu hanateli kukañesha kufwaku, muloña kwosi muntu “wakaamwina wumi windi kuñovu yakaluña” hela Hadesi, kumajamu kwayaña antu ejima. (Masamu 89:48) Komana Yehova nateli kukañanya? Muhela wumu wapulukili hampinji yayandishileñawu antu muchiyulu chaNazi, wanukaña mazu amulejeli mama yindi Chinsahu akumukundeja hakufwisha antu akeñawu muyilombu yakuyandishila, nindi: “Neyi kufwa kwekala kwahaya nyaka, chiña kwekala nañovu kubadika Nzambi, hidimuku?” Chakadi nikujina, kufwa hikukweti ñovu yakubadika Kaseloki kawumi wabadika ñovuku. (Masamu 36:9) Antu ejima adi muShelu, hela muHadesi, Yehova wayanukaña nawa wakayipulwisha wejima wawu.—Luka 20:37, 38; Chimwekeshu 20:11-14.

¹¹ Hayinu mpinji, Yehova nakwakamena chikupu akwakudifukula indi ashinshika. Ichi dinu tushinshikenu hajinjila jisatu jamwekeshaña nawu diyi ‘Mukwakutupulwisha.’

Yehova Wakiñaña Wubwambu Wetu naYena

12, 13. Muloñadi kukiñewa kwakuspiritu chikwalemena chikupu, nawa Yehova watuloñeshela ñahi yuma yakuspiritu?

¹² Yehova watukiñaña lwakuspiritu, muloña dikukiñewa kwalema chikupu. Hakwikala akwaKristu alala, tweluka netu kwekala chuma chabadika kulema kubadika chihandilu chamakonu. Iheta detu dasweja kulema hiwubwambu wetu naYehova. (Masamu 25:14; 63:3) Neyi tukañanya kwikala naniwu wubwambu, chihandilu chetu chakatataka chikwikala chamukunkulwayi nawa hitukwikala nakuchiñeja kwakumbiduku.

¹³ Tudi amuzañalu, muloña Yehova watwinkaña yuma yejima yitwakeñaña kulonda kutwalekahu kwikala nawubwambu wakola nayena. Tukweti Izu dindi, spiritu yindi yajila, nichipompelu chamukaayi kejima yatukwashaña. Njilanyi yayiwahi yitwatela kuzatishilamu iyi yuma yatwinkayi Yehova? Kuhitila mukudiza chikupu Izu dindi, tunateli kukolesha chikuhwelelu chetu nikuchiñeja kwetu. (Aroma 15:4) Kuhitila mukulomba chikupu spiritu yindi, Yehova wukutukwasha kutondolwela kweseka kunateli kutuleñela kwila yuma yinateli kukisañana wubwambu wetu nayena. (Luka 11:13) Kuhitila mukulondela nshimbi yaloñeshaña izanvu danduñu munyikanda yashindamena haBayibolu  kubombelahu nikupompa, kwamaneni nikwanyanya, tukukoleshewa ‘nayakudya yahampinji yatelela.’ (Matewu 24:45) Yuma yatuloñeshelayi Yehova yakiñaña wubwambu wetu nayena nawa yatuleñelaña kukundama kudi Nzambi.—Yakoba 4:8.

14. Shimunenu chakuhumañana chinakumwekesha Yehova chakamenañayi wubwambu wetu nayena.

¹⁴ Hakumwekesha ochu Yehova chatukiñañayi lwakuspiritu, anukenu anvwali atenawu hakutachika kwachibaba chinafumuhu. Chimwahitili mafuku antesha kufuma hashimwinuwu nawu mwanawu wamumbanda Theresa najimbali, atambwilili mazu awushona akwila nawu: Anamujahi. * Tata yawantu wahosheli nindi: “Nalombeli kudi Yehova nami yamukiñi. Chamuwaninuwu anamujahi, chuma chatachi chinatoñojokeli chadiña chakwila nami, muloñadi Yehova chabula kwakulayi kulomba kwami. Hela chochu, neluka nami Yehova hakana kukiña antu jindi hamuntu hamuntu muchihayamishaku. Natwalekeluhu kulomba kulonda nilukishi. Nidi namuzañalu hakwiluka nami Yehova wakiñaña antu jindi lwakuspiritu, dikwila nawu watuloñeshelaña yuma yitwakeñaña kulonda kukiña wubwambu wetu nayena. Iku kukiña kwakuspiritu kwalema chikupu, muloña kukatuleñela kwikala nawumi wahaya nyaka. Muniyi njila, Yehova wamwakameneneña Theresa, muloña wadiña nakumukalakela nakashinshi kushika nimpinji yakufwa kwindi. Nidi wamuzañalu hakwiluka nami kuchiñeja kwindi kwawumi wakumbidi kunashindameni hadi Yehova.”

Watukwashaña muYikatu

15. Munjilanyi Yehova mwatela kutukwashilayi neyi twiñila mukankati kwasweja?

¹⁵ Yehova nateli kutukwasha ‘chitwakakamujoka hakadidi nakuzeya’ neyi chamukwashiliyi Davidi. (Masamu 41:3) Hela chakwila hayinu mpinji Yehova hanakutupulwisha kuhitila mukutuuka muchihayamishaku, watukwashaña. Munjilanyi? Nshimbi yekala Mwizu dindi yinateli kutukwasha chakufukulahu chachiwahi kutalisha hakuuka niyuma yikwawu. (Yishimu 2:6) Tunateli kuwana nsañu yayiwahi nijinjila jajiwahi muyibaba yasonekañawu muKaposhi Kakutalila nimuAwake! yinakuhosha hachikatu chitukweti. Kuhitila muspiritu yindi, Yehova nateli kutwinka “ñovu jabadika nankashi” kulonda kuumika nakukala nikutwalekahu kwikala ashinshika, hichidi namuloña nayuma yatela kumwekanaku. (2 Akorinda 4:7) Kuhitila muniwu wukwashu, tunateli kutondolwela kubula kusweja kusha maana kuyikatu chakwila tuleka kusha kashinshi kuwubwambu wetu naYehova.

16. Indi mana kwetu wumu womika ñahi nayikatu?

¹⁶ Toñojokenu hadi mana kwetu wakansi watenawu hakutachika kwachibaba chinafumuhu. Muchaaka cha 1998 amuwanini nachikatu chatenañawu nawu amyotrophic lateral sclerosis, hela ALS chikatu chenichi chamuleñeleli  kwikala nakalepa. * Womikaña ñahi nanichi chikatu? Wahoshaña nindi: “Kumuchima kwakataña chikupu nawa natiyaña chikela chinatoñojoka nami kufwa hohu diyi njila yinatela kunookelamu. Chinasweja kutiya chikela, nalombaña kudi Yehova nami yanyiki yuma yisatu: muchima wakuwunda, kudiwujika, nikutatakena. Neluki nami Yehova wakula kulomba kwami. Muchima wakuwunda wanleñelaña kutoñojoka hayuma yinateli kunkundeja, chidi neyi chihandilu chakekala mwituña dadiha hampinji yinakatweshaña kwenda, kwikala nachipepa chakudya, nikuhosha nachisaka chami cheni. Kudiwujika kunankwashi kuumika nakukala kwenzaña nachikatu chakalepa. Kuumika kunankwashi kutwalekahu kwikala washinshika nikubula kwiteja yuma yikwawu kwikala yalema nankashi kubadika wubwambu wami naYehova. Neteji mazu ahosheliyi Davidi ñimbi yamasamu, muloña neluki nami Yehova nakwashi nichinakamujokaña hakadidi nakuzeya.”—Isaya 35:5, 6.

Watwinkaña Yakudya

17. Chumanyi chatukanayi Yehova kutukoñela, nawa ichi chikaninu chalumbulukadi?

¹⁷ Yehova watukana kutwakamena lwakumujimba. (Tañenu Matewu 6:33, 34 niAheberu 13:5, 6.) Ichi hichinakulumbulula nawu tunateli kukuhwelela kutwinka yuma yakumujimba muchihayamisha hela kukaana kuzataku. (2 Atesalonika 3:10) Ichi chikaninu chinakulumbulula nawu: Neyi tutwamijaku Wanta waNzambi muchihandilu chetu nikuzata nañovu kulonda kudikwasha muchihandilu, tunateli kukuhwelela netu Yehova wukutukwasha kwikala nayuma yitunakukeña. (1 Atesalonika 4:11, 12; 1 Timotewu 5:8) Yehova nateli kutwinka yuma yitunakukeña munjila yitunabuli kukuhwelela, hadaha kuhitila mudi mana kwetu wunateli kutwinka yuma yakumujimba hela kutwiñija mudimu.

18. Shimunenu chakuhumañana chinakumwekesha nawu anateli kutukwasha hampinji yitunakankili.

¹⁸ Anukenu mama yawantu mujiki yatenawu hakutachika kwachibaba chinafumuhu. Hampinji yavilukiliyi namwanindi wamumbanda kwiluña dadiha, chamukalilili kuwana mudimu. Wahosheli nindi: “Natentemena nayileña mumudimu wakushimwina, nawa namwaana nayileña nakukeña mudimu. Nanukaña ifuku dimu dinayili musitolu nakulanda mayeli. Nemeni nakutala hatentekeluwu mafu, ilaña hinadiña namali ashikila akulanda nachuku. Naneñeli chikupu. Chinafuntili kwitala hadina ifuku, nawanini jinjeki jamafu amboka mboka muchisambu. Awa mafu adiña akudya tukweji twatuvulu. Nadilili, nawa namusakilili Yehova.” Iwu muhela wenjili nakwiluka nindi yina njeki yamafu yafumini kudi mana kwetu wamuchipompelu wadimineña mafu mwitempa dindi. Nkumininaku wamusonekeleli nindi: “Hela chakwila nakusakililili chikupu hadina ifuku, namusakilili cheñi Yehova hakuzatisha luwi lweyi kulonda kuñanukisha kukeña kwindi.”—Yishimu 19:17.

19. Indi ambuña Yehova akakuhweleladi halukadi lwasweja, nawa chumanyi chitwatela kufwila kwila hayinu mpinji?

¹⁹ Chakadi nikujina, yuma yakoñeliyi Yehova kumpinji yakunyima niyinakoñiyi makonu yatuleñelaña kumukuhwelela hamu neyi Nkwashi yetu. Katataka, yihuñu yasweja chiyakashikena hakaayi kaSatana, dihu hitukakeña chikupu wukwashu waYehova. Ilaña, ambuña aYehova akakeña wukwashu kudi yena namuchima wumu. Akabandula nyitu yawu nakuzañalala, muloña kukuula kwawu kukashika kwakwihi. (Luka 21:28) Hela chakwila tunakutalañana nakweseka kwamuchidinyi hayinu mpinji, tufwilenu kumukuhwelela Yehova chikupu, nakwiluka netu Nzambi yetu wabulaña kuhimpa, diyi ‘Mukwakutupulwisha.’

[Tumazu twaheshina]

Munakwanuka?

• Indi Yehova nateli kwikala ñahi mukwakupulwisha antu ajahañawu?

• Muloñadi kukiñewa lwakuspiritu chikwalemena nankashi?

• Indi kukana kwaYehova kwakutuloñeshela yuma yakumujimba kwalumbulukadi?

[Malwihu aKuzatisha haKudiza]

[Mwevulu wudi hefu 14]

Mana kwetu Rutherford nialunda nindi ayikasili mu 1918, nkumininaku ayumbiluku ninyiloña yawu yamanini

[Mwevulu wudi hefu 16]

Yehova nateli kutukwasha ‘chitwakakamujoka hakadidi nakuzeya’