Jehofa ke “Monamoledi” wa Rena
Jehofa ke “Monamoledi” wa Rena
“Morêna ó a ba thuša, ó a ba namolêla.”—PS. 37:40.
1, 2. Ke therešo efe ya motheo mabapi le Jehofa yeo e lego mothopo wa khomotšo le matla?
MERITI yeo e bakwago ke letšatši ga e eme felo gotee. Ge lefase le dutše le sepela, meriti e dula e šutha e bile e fetoga. Lega go le bjalo, Mmopi wa lefase le letšatši ga a fetoge. (Mal. 3:6) Beibele e re: “Go yena ga go na pheto-phetogo ya go fetoga ga moriti.” (Jak. 1:17) Therešo ye ya motheo mabapi le Jehofa ke mothopo wa kgonthe wa khomotšo le matla, kudu-kudu ge re lebeletšana le diteko le mathata. Ka baka la’ng?
2 Bjalo ka ge re bone sehlogong se se fetilego, Jehofa o ile a ipontšha e le “Monamoledi” mehleng ya Beibele. (Ps. 70:5) Ga a fetoge e bile o botegela lentšu la gagwe; ka go rialo, barapedi ba gagwe lehono ba na le lebaka le le kwagalago la go holofela gore o ‘tla ba thuša le go ba namolela.’ (Ps. 37:40) Jehofa o namoletše bahlanka ba gagwe bjang mehleng yeno? A ka re namolela bjang?
Go Phološwa go Baganetši
3. Ke ka baka la’ng re ka kgodišega gore baganetši ba ka se thibele batho ba Jehofa go bolela ditaba tše dibotse?
3 Ga go kganetšo ya Sathane yeo e ka tsogago e thibetše Dihlatse tša Jehofa go neela Jehofa borapedi bjo bo feletšego bjoo bo mo swanetšego, go sa šetšwe gore ke e kgolo gakaakang. Lentšu la Modimo le re nea kgonthišetšo e rego: “Marumô ka moka a rulêlwaxo xo lwa naxô’, a ka se kxône selô. Maleme ka moka a a Xo pharaxo O tlo a fenya thsekong.” (Jes. 54:17) Baganetši ba lekile eupša ba paletšwe ke go thibela batho ba Modimo go phethagatša thomo ya bona ya go dira boboledi. Ela hloko mehlala e mebedi.
4, 5. Batho ba Jehofa ba ile ba lebana le kganetšo efe ka 1918, gona ka mafelelo afe?
4 Ka 1918, batho ba Jehofa ba ile ba lebeletšana le tlaišo yeo e bakilwego ke baruti yeo morero wa yona e bego e le go dira gore ba se sa hlwa ba dira boboledi. Ka May 7, go ile gwa ntšhwa mangwalo a molao a gore go golegwe J. F. Rutherford, yoo a bego a okamela modiro wa boboledi wa lefase ka bophara ka nako yeo, gotee le ba bangwe ba mmalwa ba ntlong-kgolo. Ka dikgwedi tše pedi, Ngwanabo rena Rutherford le bagwera ba gagwe ba ile ba bewa molato wa maaka wa gore ba lwantšha mmušo gomme ba ahlolelwa nako e telele kgolegong. Na baganetši ba be ba atlegile ka go diriša kgoro ya tsheko go kgaotša modiro wa boboledi ka mo go feletšego? Ga go bjalo le gatee!
5 Gopola kholofetšo ya Jehofa e rego: “Marumô ka moka a rulêlwaxo xo lwa naxô’, a ka se kxône selô.” Phetogong e makatšago ya ditiragalo, ka March 26, 1919—dikgwedi tše senyane ka morago ga ge Ngwanabo rena Rutherford le bagwera ba gagwe ba ahlotšwe—bana babo rena bao ba lego kgolegong ba ile ba lokollwa ka peile. Ngwageng o latetšego, ka May 5, 1920, molato wa bona o ile wa phumolwa. Bana babo rena ba ile ba diriša tokologo ya bona go tšwela pele ka modiro wa Mmušo. Ka mafelelo afe? Ruri go ile gwa ba le koketšego e kgolo kudu ga e sa le go tloga ka nako yeo! Theto ka moka bakeng sa mafelelo a e išwa go “Monamoledi.”—1 Bakor. 3:7.
6, 7. (a) Ke lesolo lefe kgahlanong le Dihlatse tša Jehofa leo le ilego la hlongwa kua Jeremane ya Bonazi, gona le bile le mafelelo afe? (b) Histori ya mehleng yeno ya batho ba Jehofa e hlatsela ntlha efe?
6 Ga bjale ela hloko mohlala wa bobedi. Ka 1934, Hitler o ile a ikana go fediša Dihlatse tša Jehofa kua Jeremane. O be a tloga a ikemišeditše go dira bjalo. Go ile gwa golegwa batho ba bantši. Dihlatse tše dikete di ile tša tlaišwa; tše makgolo tša bolawa dikampeng tša tshwenyo. Na Hitler o ile a atlega lesolong la gagwe la go fediša Dihlatse? Na o ile a dira gore go se sa bolelwa ditaba tše dibotse kua Jeremane? Ga go bjalo le gatee! Nakong ya tlaišo, bana babo rena ba ile ba tšwela pele ba dira boboledi ka sephiring. Ka morago ga go wa ga pušo ya Bonazi, ba ile ba diriša tokologo ya bona go tšwela pele ba dira boboledi. Lehono, go na le bagoeledi ba Mmušo ba ka godimo ga ba 165 000 kua Jeremane. Mo le gona, “Monamoledi” o ile a botegela kholofetšo ya gagwe e rego: “Marumô ka moka a rulêlwaxo xo lwa naxô’, a ka se kxône selô.”
7 Histori ya mehleng yeno ya Dihlatse tša Jehofa e kgonthišetša gore Jehofa le ka mohla a ka se dumelele phedišo ya batho ba gagwe e le sehlopha. (Ps. 116:15) Lega go le bjalo, go thwe’ng ka rena re le motho ka o tee ka o tee? Jehofa o re namolela bjang?
Go Thwe’ng ka go Šireletšwa Mmeleng?
8, 9. (a) Re tseba bjang gore ga re kgonthišetšwe gore re tla šireletšwa mmeleng gona bjale? (b) Ke’ng seo re swanetšego go se amogela ka mo go kwagalago?
8 Re le motho ka o tee ka o tee, re a tseba gore ga re kgonthišetšwe gore re ka šireletšwa mmeleng gona bjale. Re bontšha boemo bjoo bo bontšhitšwego ke Baheberu ba bararo ba botegago bao ba ilego ba gana go khunamela seswantšho sa gauta sa Kgoši Nebukadinetsara. Masogana a ao a boifago Modimo a be a sa nagane gore Modimo o be a tla a phološa ka mohlolo. (Bala Daniele 3:17, 18.) Se se diragetšego ke gore Jehofa o ile a a phološa mollong o laumago. (Dan. 3:21-27) Lega go le bjalo, gaešita le mehleng ya Beibele, go phološwa ka mohlolo go be go dirwa ka sewelo. Bahlanka ba bantši ba Jehofa ba ile ba bolawa ke baganetši.—Baheb. 11:35-37.
9 Go thwe’ng ka lehono? Ka ge e le “Monamoledi,” Jehofa ruri a ka phološa batho maemong a thata. Na re ka bolela ka kgodišego gore maemong a itšego Jehofa o ile a tsena ditaba gare goba gore ga se a dira bjalo? Aowa. Lega go le bjalo, motho yo a phonyokgilego boemo bjo kotsi a ka bona eka Jehofa o tsene ditaba gare. Ge batho ba bangwe ba be ba ka ganetšana le yena ba be ba tla ba ba ikgodiša e le ruri. Ka nako e swanago, re swanetše go amogela ka tsela e kwagalago gore Bakriste ba bantši ba botegago ba ile ba bolawa ka baka la tlaišo, bjalo ka mehleng ya Bonazi. Ba bangwe ba ile ba hwa dikotsing. (Mmo. 9:11) Re ka botšiša gore, ‘Na Jehofa o paletšwe ke go ba “Monamoledi” wa batho ba gagwe ba botegago bao ba ilego ba bolawa?’ Ga se gore go bjalo.
10, 11. Ke ka baka la’ng motho a ka se dire lehu selo, eupša ke’ng seo Jehofa a ka se dirago ka lona?
10 Ela hloko se: Ga go seo motho a ka se dirago ge a e-hwa, ka gobane ga go na motho yoo a kago “iphološa, a se yê bo-dula-bahu,” goba Hadese, e lego lebitla la batho le le tlwaelegilego. (Ps. 89:48) Lega go le bjalo, go thwe’ng ka Jehofa? Kgaetšedi yo mongwe yo a phologilego pušo e thata ya Nazi o gopola seo mmagwe yo e lego Hlatse a ilego a mmotša sona e le ge a mo homotša ka ge a lahlegetšwe ke baratiwa ba gagwe bao ba hwilego ba le dikampeng tša tshwenyo: “Ge nkabe lehu e le la sa ruri, gona le be le tla ba le feta Modimo ka matla, na ga go bjalo?” Ka ntle le pelaelo, lehu ga se selo ge le bapišwa le Mothopo o matla ka go fetišiša wa bophelo! (Ps. 36:9) Bohle bao ba lego bodula-bahu goba Hadese, ba ka mogopolong wa Jehofa, gomme o tla hlakodiša yo mongwe le yo mongwe wa bona.—Luka 20:37, 38; Kut. 20:11-14.
11 Go sa dutše go le bjalo, Jehofa lehono o akaretšwa ka go lebanya maphelong a barapedi ba gagwe ba botegago. A re eleng hloko ditsela tše tharo tšeo ka ntle le pelaelo a re ‘namolelago’ ka tšona.
Go Šireletšwa Moyeng
12, 13. Ke ka baka la’ng go šireletšwa moyeng go le bohlokwa ka go fetišiša, gona Jehofa o re fa tšhireletšo e bjalo bjang?
12 Jehofa o re fa tšhireletšo ya moya, yeo e lego bohlokwa ka go fetišiša. Ka ge re le Bakriste ba therešo, re kwešiša gore go na le selo se sengwe seo se lego bohlokwa kudu go feta bophelo bja rena bja gona bjale. Selo se bohlokwa kudu seo re nago le sona ke tswalano ya rena le Jehofa. (Ps. 25:14; 63:3) Ntle le tswalano yeo, bophelo bja rena bja gona bjale bo be bo ka se be le morero gakaalo e bile re be re ka se be le tebelelo ya go phela nakong e tlago.
13 Re leboga gore Jehofa o re fa thušo ka moka yeo e nyakegago gore re dule re e-na le tswalano ya kgaufsi le yena. Re thušwa ke Lentšu la gagwe, moya wa gagwe o mokgethwa le phuthego ya gagwe ya lefase ka bophara. Re ka dira bjang gore dilo tše di re hole ka mo go tletšego? Ka go ithuta Lentšu la gagwe ka mehla le ka mafolofolo, re tla matlafatša tumelo ya rena le kholofelo ya rena. (Baroma 15:4) Ka go rapelela moya wa gagwe ka potego, re tla hwetša thušo ya go gana teko ya go itshwara ka tsela e belaetšago. (Luka 11:13) Ka go sepedišana le tlhahlo yeo sehlopha sa mohlanka se e neago ka dikgatišo tše di theilwego Beibeleng gotee le ka diboka, dikopano tše dinyenyane le tše dikgolo, re hwetša phepo ya “dijo tša [moya] ka nako e swanetšego.” (Mat. 24:45) Ditokišetšo tše bjalo di re šireletša moyeng e bile di re thuša go dula re le kgaufsi le Modimo.—Jak. 4:8.
14. Laodiša phihlelo yeo e bontšhago tšhireletšo ya moya.
14 Go bontšha mohlala wa tšhireletšo e bjalo ya moya, gopola batswadi bao go boletšwego ka bona mathomong a sehlogo se se fetilego. Matšatši a sego kae ka morago ga pego ya gore morwedi wa bona Theresa o timeletše, ba ile ba kwa ditaba tše mpe tša gore: O bolailwe. * Tatagwe o gopola ka gore: “Ke be ke kgopetše Jehofa ka thapelo gore a mo šireletše. Ke swanetše go dumela gore ge ke be ke e-kwa gore o bolailwe, mathomong ke ile ka ipotšiša gore ke ka baka la’ng dithapelo tša-ka di se tša arabja. Ee, ke a tseba gore Jehofa ga a kgonthišetše gore o tla šireletša ka mohlolo batho ba gagwe e le motho ka o tee ka o tee. Ke ile ka tšwela pele ke rapela gore ke thušwe go kwešiša. Ke be ke homotšwa ke go tseba gore Jehofa o šireletša batho ba gagwe moyeng—ke gore, o re nea seo se nyakegago gore re šireletše tswalano ya rena le yena. Tšhireletšo ya mohuta woo ke yona e lego bohlokwa ka go fetišiša, ka gobane e ka kgoma bokamoso bja rena bja ka mo go sa felego. Ka kgopolo yeo, Jehofa o ile a šireletša Theresa; o be a mo hlankela ka potego nakong ya go hwa ga gagwe. Ke ile ka ba le khutšo ka go tseba gore ditebelelo tša gagwe ka bokamoso di ka diatleng tša [Jehofa] tše lerato.”
Go Matlafatšwa Bolwetšing
15. Jehofa a ka re thuša ka ditsela dife ge re babja o šoro?
15 Jehofa a ka re matlafatša ge re ‘babja re le dilaong,’ go swana le ge a ile a matlafatša Dafida. (Ps. 41:3) Gaešita le ge mo mehleng ya rena Jehofa a sa re namolele ka go re fodiša ka mohlolo, o tloga a re thuša. Bjang? Melao ya motheo yeo e lego ka Lentšung la gagwe e ka re thuša go dira diphetho tše bohlale mabapi le tša kalafo le ditabeng tše dingwe. (Die. 2:6) Re ka hwetša tsebišo e nago le mohola le ditšhišinyo tše šomago dihlogong tšeo di gatišitšwego ka go Morokami le Phafoga! tšeo di ahla-ahlago bothata bja tša maphelo bjoo bo re wetšego. Ka moya wa gagwe, Jehofa a ka re fa “matla a fetago a tlwaelegilego” gore re lebeletšane le boemo bja rena le gore re dule re botega, go sa šetšwe seo se ka diregago. (2 Bakor. 4:7) Ka thušo e bjalo, re ka phema go tshwenyega kudu ka bolwetši bja rena moo re ka palelwago ke go dula re tsepame moyeng.
16. Ngwanabo rena yo mongwe o kgonne bjang go lebeletšana le bolwetši?
16 Ela hloko ngwanabo rena yo mofsa yoo go boletšwego ka yena mathomong a sehlogo se se fetilego. Ka 1998, go ile gwa lemogwa gore o na le bolwetši bjo šoro bja tshepedišo ya megalatšhika (amyotrophic lateral sclerosis), goba ALS, bjoo bo ilego bja feleletša ka go mo golofatša ka mo go feletšego. * O kgonne bjang go lebeletšana le bolwetši bja gagwe? O hlalosa ka gore: “Ke bile le dinako tša go kwa bohloko kudu le go aparelwa ke kgakanego ge ke be ke tlelwa ke maikwelo a gore selo se tee feela seo se bego se ka nnamolela ke lehu. Nako le nako ge ke ikwa ke imelwa, ke rapelela gore Jehofa a mphe dilo tše tše tharo: pelo e iketlilego, go se fele pelo le kgotlelelo. Ke nagana gore Jehofa o arabile dithapelo tšeo. Pelo e iketlilego e nthuša go naganišiša ka dilo tšeo di homotšago, tše bjalo ka gore lefaseng le lefsa go tlo ba bjang ge ke tla ba ke kgona go sepela, ke kgona go kwa tatso ya dijo, gotee le go kgona go bolela le ba lapa lešo gape. Go se fele pelo go nthuša go lebeletšana le ditšhitišo le ditlhohlo tša bogole. Kgotlelelo e nthuša go dula ke botega le go se lahlegelwe ke teka-tekano ya-ka ya moya. Nka swantšhwa le mopsalme Dafida, ka gobane ke bona gore Jehofa o mmatlafaditše ge ke babja ke le dilaong.”—Jes. 35:5, 6.
Go Newa sa go Iphediša
17. Jehofa o holofeditše go re direla’ng, gomme kholofetšo ye e bolela’ng?
17 Jehofa o holofetša go re hlokomela ka dilo tše di bonagalago. (Bala Mateo 6:33, 34 le Baheberu 13:5, 6.) Seo ga se bolele gore re tla fo ba le dilo tše di bonagalago ka mohlolo goba gore re swanetše go gana go šoma. (2 Bathes. 3:10) Seo se bolelwago ke kholofetšo yeo ke se: Ge re tsoma Mmušo wa Modimo pele bophelong bja rena gomme re nyaka go šoma bakeng sa go iphediša, re ka holofela gore Jehofa o tla re thuša go hwetša dinyakwa tša motheo tša bophelo. (1 Bathes. 4:11, 12; 1 Tim. 5:8) A ka re fa dinyakwa tša rena ka ditsela tšeo re ka bago re sa di nagane, mohlomongwe ka modumedi-gotee yoo a re thušago ka dilo tše di bonagalago goba yo a re fago mošomo.
18. Laodiša phihlelo yeo e bontšhago gore re ka hlokomelwa ge re le dinakong tše thata.
18 Gopola mma yo a godišago bana a nnoši yoo go boletšwego ka yena matsenong a sehlogo se se fetilego. Ge yena le morwedi wa gagwe yo monyenyane ba be ba hudugela lefelong le lefsa, o ile a thatafalelwa ke go hwetša mošomo. O hlalosa gore: “Ke be ke e-ya tirelong ya tšhemo mesong gomme thapameng e nngwe le e nngwe ke e-ya go nyaka mošomo. Ke gopola letšatšing le lengwe ge ke be ke e-ya go reka mafsi lebenkeleng. Ke ile ka ema gomme ka lebelela merogo, eupša ke be ke se na tšhelete e lekanego ya go e reka. Ke ile ka nyama kudu. Ge ke be ke boela gae ke e-tšwa lebenkeleng letšatšing leo, ke ile ka hwetša go tletše mekotla e nago merogo ya mehuta-huta mathuding a ka mafuri. Dijo tšeo e be e le tše dintši moo e lego gore re be re ka fetša dikgwedi re di ja. Ke ile ka lla, gomme ka leboga Jehofa.” Go se go ye kae kgaetšedi o ile a kwa gore mekotla yeo e be e tlišitšwe ke ngwanabo rena wa ka phuthegong yoo a bego a bjetše merogo ka serapeng sa gagwe. O ile a mo ngwalela lengwalo ka morago gomme a re: “Gaešita le ge ke ile ka go leboga kudu letšatšing lela, ke lebogile le Jehofa bakeng sa go diriša botho bja gago go nkgopotša lerato la gagwe.”—Die. 19:17.
19. Ke’ng seo bahlanka ba Jehofa ba tlago go kgodišega ka sona masetlapelong a magolo, gomme ke’ng seo re swanetšego go ikemišetša go se dira gona bjale?
19 Ka ntle le pelaelo, seo Jehofa a se dirilego mehleng ya Beibele le mehleng ya rena se bontšha gore re ka mmota bjalo ka Mothuši wa rena. Go se go ye kae, ge masetlapelo a magolo a tla be a tlela lefase la Sathane, re tla ba re nyaka thušo ya Jehofa go feta le ge e le neng pele. Lega go le bjalo, bahlanka ba Jehofa ba tla kgona go mo holofela ka mo go feletšego. Ba tla kgona go emišetša dihlogo tša bona godimo gomme ba thaba, gobane ba tseba gore topollo ya bona e a batamela. (Luka 21:28) Mo lebakeng la bjale, go sa šetšwe diteko tšeo di re welago, a re ikemišetšeng go bota Jehofa re e-na le kholofelo e feletšego ya gore Modimo wa rena yo a sa fetogego ka kgonthe ke “Monamoledi.”
[Mengwalo ya tlase]
^ ser. 14 Bona sehlogo se se rego “Go Lebeletšana le Kotsi e Šoro,” ka go Phafoga! (ya Seisemane) ya July 22, 2001, matlakala 19-23.
^ ser. 16 Bona sehlogo se se rego “Go Matlafatšwa ke Tumelo Ya-ka—Go Phela ka ALS,” ka go Phafoga! (ya Seisemane) ya January 2006, matlakala 25-29.
Na o a Gopola?
• Jehofa a ka namolela bjang bao ba bolailwego?
• Ke ka baka la’ng tšhireletšo ya moya e le bohlokwa ka go fetišiša?
• Ke’ng seo se bolelwago ke kholofetšo ya Jehofa ya go re hlokomela ka dilo tše di bonagalago?
[Dipotšišo tša Thuto]
[Seswantšho go letlakala 8]
Ngwanabo rena Rutherford le bagwera ba gagwe, ba ile ba golegwa ka 1918, ka morago ba lokollwa gomme molato wa bona wa phumolwa
[Seswantšho go letlakala 10]
Jehofa a ka re matlafatša ge re ‘babja re le malaong’