Si Jehova so “Manangiliktar” Tayo
Si Jehova so “Manangiliktar” Tayo
“Si Jehova tulongan to ra, tan iliktar to ra.”—SAL. 37:40.
1, 2. Anton katuaan nipaakar ed si Jehova so makaligliwa tan makapabiskeg ed sikatayo?
SAY anino a pawawalaen na agew et agmansiasiansia ed saksakey a pasen. Legan ya ontetelek so Dalin, say anino et manguuman-uman. Balet, say Manamalsa na Dalin tan agew et agmanguuman. (Mal. 3:6) Onia so kuan na Biblia: “Sikato so agbalot manguman-uman, aliwan singa say anino a mansalatsalat.” (Sant. 1:17, NW) Sayan katuaan nipaakar ed si Jehova et talagan makapaligliwa tan makapabiskeg ed sikatayo, nagkalautla no makakaeksperiensya tayo na mair-irap iran subok tan problema. Akin?
2 Naamtaan tayo ed inmunan artikulo a nensaman et pinaneknekan nen Jehova a sikato so “Manangiliktar.” (Sal. 70:5) Lapud agmanguuman si Jehova tan lawas ton totooren so salita to, saray managdayew to met natan et talagan makapanmatalek a “tulongan . . . tan iliktar to ra.” (Sal. 37:40) Panon ya ililiktar nen Jehova iray lingkor to ed sayan panaon tayo? Panon ton ililiktar so balang sinansakey ed sikatayo?
Iyaagel ed Saray Onsusumpa
3. Akin et makaseguro itayon agnapatunda na saray onsusumpa iray totoo nen Jehova ed panangipulong na maong a balita?
3 Anggan antoy gawaen nen Satanas pian sumpaen iray Tasi nen Jehova, agto ran balot napatunda ed panagdayew da’d si Jehova a kanepegan To lambengat. Papaseguroan itayo na Salita na Dios: “Anggapo so ayura ya agawa a sumpa ed sika ya onaligwas naani; tan balang sakey a dila ya onsumpa ed sika ed pangukom dusaen mo naani.” (Isa. 54:17) Sinali na saray onsusumpa a patundaen so totoo na Dios ed kimey da a panagpulong, balet ta sinmaew ira. Konsideraen pa so duaran alimbawa.
4, 5. Anton isusumpa so asagmak na totoo nen Jehova nen 1918, tan anto so resulta?
4 Nen 1918, saray totoo nen Jehova et akasagmak na graben panamasegsegang ya insugsog na saray lider na relihyon pian patundaen ira ed kimey dan panagpulong. Nen Mayo 7 ed satan a taon, angipaakseb na ganggan so gobierno na Estados Unidos pian arestoen so mangaasikaso ed sankamundoan a panagpulong a kimey ed saman, a si J. F. Rutherford, pati saray arum nin walad hedkuarter. Anggapo ni duay bulan et agmakatunongan ya indeklara a si Brother Rutherford tan saray kakaiba to so nankokomplot kuno sumpad gobierno tan senentensiaan ira na mabayag a kipriso. Apatunda kasi na saray onsusumpa so panagpulong a kimey lapud sayan desisyon na korte? Andin balot!
5 Tandaan imay sipan nen Jehova: “Anggapo so ayura ya agawa a sumpa ed sika ya onaligwas.” Lapud biglan impanguman na saray kipapasen, si Brother Rutherford tan saray kakaiba to et nibulos panamegley na piyansa nen Marso 26, 1919, siameran bulan labat so apalabas manlapu nen sikaray asentensiaan. Diad tinmumbok a taon, nen Mayo 5, 1920, naabsuelto la’ra ed saray akusasyon ed sikara. Inanamot na sarayan agagi so kawayangan da pian itultuloy so kimey ed Panarian. Et anto so resulta? Manlapu la’d saman et agaylay indakel na saray manangiyabawag na Panarian! Say manepeg labat a pangiteran na amin a dayew lapud sayan indaak et say “Manangiliktar” tayo.—1 Cor. 3:7.
6, 7. (a) Antoray asagmak na saray Tasi nen Jehova diad uley na Nazi ed Alemanya, tan anto so resulta? (b) Anto so papaneknekan na agawgawa ed saray Tasi nen Jehova diad apalabas iran dekada ya anggad natan?
6 Konsideraen so komaduan alimbawa. Nen 1934, insamba nen Hitler ya upoten to so amin a Tasi nen Jehova diad Alemanya. Aliwan anggad salita labat si Hitler, noagta, sikatoy talagan desidido a manggawa ed satan. Kayari ton imbaga itan, dakerakel so inaresto tan impriso. Nilibon Tasi so pinasegsegang tan nilasus so pinapatey diad saray panangipangawan a kampo. Ayarian kasi nen Hitler ya upoten iray Tasi? Sigpot to kasin apatunda so panagpulong na maong a balita diad Alemanya? Andi, andin balot! Kaleganan na panamasegsegang, intultuloy nin siansia na saray agagi tayo so panagpulong a kimey, diad paraan ya agnaliklikas. Sanen akusbo la so uley na Nazi, inanamot da so kawayangan da pian itultuloy so panagpulong. Natan et wala lay masulok a 165,000 iran manangipalapag na Panarian diad Alemanya. On, tinoor lamet na “Manangiliktar” tayo imay sipan to: “Anggapo so ayura ya agawa a sumpa ed sika ya onaligwas.”
7 Say agawgawa ed saray Tasi nen Jehova diad apalabas iran dekada ya anggad natan so mamapaneknek ya agbalot abuloyan nen Jehova a napagit so totoo to bilang sakey a grupo. (Sal. 116:15) Balet, kasin salimbengan itayo nen Jehova bilang indibidual? Panon ya ililiktar nen Jehova so balang sinansakey ed sikatayo?
Wala Ta so Pisikal a Salimbeng?
8, 9. (a) Panon tayon amta ya ag-itayo lawas sasalimbengan nen Jehova ed pisikal a paraan? (b) Anto so nepeg a realistiko tayon bidbiren?
8 Amta tayon ag-insipan nen Jehova a lawas ton salimbengan so balang sinansakey ed sikatayo diad pisikal a paraan. Say panmoria tayo et mipara ed saramay taloran matoor a Hebreon agdinmakmomo ed balitok ya imahen ya impaalagey nen Arin Nabucodonosor. Ag-inisip na sarayan matoor a kalangweran a mamilagro iran protektaan nen Jehova ed pisikal a pakasakitan. (Basaen so Daniel 3:17, 18.) Balet, inliktar ira nen Jehova ed mandarlang a palbaan. (Dan. 3:21-27) Anggaman ontan, matalag so pankanawnawa a saray matoor a lingkor nen Jehova nensaman et mamilagron inliktar. Diad tua, dakel ed sikara so pinatey na saramay onsusumpa.—Heb. 11:35-37.
9 Diad panaon tayo ey? Bilang “Manangiliktar,” sarasarag nen Jehova a salimbengan so balang sakey ed sikatayo manlapud peligro. Balet, talaga ta’n nibiig tayo no kasin si Jehova et tinmulong odino andi ed sakey ya inkagawa? Andi. Anggaman ontan, nayarin moriaen na sakey ya indibidual ya aliktaran toy peligro lapud sikatoy tinulongan nen Jehova. Anggapoy kanepegan tayon kuestionen so panmoria na satan a too. Diad biek a dapag, nepeg a realistiko tayon bidbiren a dakerakel a matoor a Kristiano so inatey lapud panamasegsegang, a singa nen panaon na uley na Nazi. Arum met so inatey lapud nanduruman trahedya tan ag-inilaloan iran inkagawa. (Ecl. 9:11) Nayarin oniay nitepet tayo, ‘Agta sinmaew si Jehova a magmaliw a “Manangiliktar” ed saramay matoor a lingkor ton asakbay ya inatey odino ag-inilaloan so impatey da?’ Petepeteg a say ebat et andi.
10, 11. Akin et agsarag na too ya amperen so ipapatey to, balet ta antoy sarag nen Jehova a gawaen nipaakar ed satan?
10 Nonoten pa iya: Agsarag na too ya amperen so ipapatey to lapud anggapoy toon “niliktar to so kamarerwa to ed pakayari [na] Sheol,” odino Hades, salanti, say kaslakan a lubok na katooan. (Sal. 89:48) Si Jehova balet ey? Sankanonot ni na agin bii ya akaliktar ed maruksan uley na Nazi imay inkuan na nanay ton Tasi pian sikatoy ligliwaen ed impatey na saray inad-aro da’d bilay diad panangipangawan a kampo: “No say patey ana’ko et permanente, labay ton ibaga sirin, mas mabiskeg itan nen say Dios?” Petepeteg, anggapon balot so pakayari na patey no ikompara’d pakayari na makapanyarin-amin a Subol na bilay! (Sal. 36:9) Amin a walad Sheol, odino Hades, et walad pakanodnonotan nen Jehova, tan iliktar to so balang sakey ed sikara diad kioli.—Luc. 20:37, 38; Apo. 20:11-14.
11 Kaleganan to, kombinsido itayo a peteg ya iyaansakit nen Jehova iray matoor a mandadayew ed sikato diad sayan panaon. Natan et konsideraen tayo pa so taloran paraan a si Jehova so talagan “Manangiliktar” tayo.
Sasalimbengan ed Espiritual a Paraan
12, 13. Akin a sankaimportantian so espiritual a salimbeng, tan panon itan ya iiter nen Jehova ed sikatayo?
12 Sasalimbengan itayo nen Jehova ed espiritual a paraan, tan satan so sankaimportantian a salimbeng. Bilang tuan Kristiano, amta tayon walay mas mabli ni nen say bilay tayo natan. Say sankamablian a kayarian tayo et say personal a relasyon tayo’d si Jehova. (Sal. 25:14; 63:3) No anggapo itan, andiay kabaliksan so kaplesan a bilay tayo tan anggapoy ilalo tayo ed arapen.
13 Misalsalamat itayo ta iiter nen Jehova so amin a nakaukolan a tulong pian mansiansian maapit so relasyon tayo ed sikato. Wadtan so Salita to, say masanton espiritu to, tan say sankamundoan a kongregasyon to ya ontulong ed sikatayo. Panon itayon sigpot a nagunggonaan ed sarayan probisyon? Diad regular tan maseet a panagaral na Salita to, napabiskeg so pananisia tan ilalo tayo ed arapen. (Roma 15:4) Diad masimoon ya ikerew na espiritu to, naawat tayo so tulong pian naresistian so tukso a manggawa na bengatlan maneral ed relasyon tayo’d sikato. (Luc. 11:13) Diad itulok tayo ed panangiwanwan ya itatarya na matoor tan makabat ya aripen panamegley na nibase’d Biblia iran publikasyon, ontan met diad saray aral, asemblea, tan kombension, napabiskeg itayo na espiritual a “tagano ed panaon a kinepeg to.” (Mat. 24:45) Sarayan probisyon so manasalimbeng ed sikatayo ed espiritual a paraan tan ontutulong ed sikatayon mansiansian maapit ed Dios.—Sant. 4:8.
14. Isalaysay so sakey ya eksperiensyan mangipapabitar ed espiritual a salimbeng.
14 Pian nipabitar itan ya espiritual a salimbeng, pawilen tayo pa imay atateng ya abitla ed introduksion na inmunan artikulo. Pigaran agew kayari na impakaamta ra a nababalang so anak dan si Theresa, akaawat ira na makapasinagem a balita: Si Theresa et pinatey. * Onia so inkomento na samay ama: “Nampikasi ak ed si Jehova a protektaan toy ana’ko. Balet sanen nalmo so bangkay to, aksobien kon say naisip kon tampol et no akin ya ag-inebatan nen Jehova iray pikakasik. Balet siempre, amtak ya ag-ipapaseguro nen Jehova a mamilagro ton protektaan so balang lingkor to. Nantultuloy ak a nampikasi ya ikdan to ak na pakatalos. Aligliwa ak ed pakaamtan si Jehova et manasalimbeng ed saray totoo to ed espiritual a paraan, salanti, iiter to no anto so nakaukolan tayo pian naprotektaan so relasyon tayo’d sikato. Satan so sankaimportantian a klase na salimbeng, lapud say nalalanor et say andi-anggaan ya arapen tayo. Diad satan a paraan, sinalimbengan nen Jehova si Theresa, ta sikatoy nanmatoor ed Dios anggad impatey to. Maligen so nonot ko lapud amtak a walad si Jehova so ilalo nen Theresa a pakapambilay ed arapen.”
Papabiskegen Legan na Pansasakit
15. Diad antoran paraan a nayari itayon tulongan nen Jehova sano nagogonigon itayo lapud sakit?
15 Sarag itayon pabiskegen nen Jehova diad “tapew na dukolan na pansasagpot [odino pansasakit]” tayo, a singa ginawa to ed si David. (Sal. 41:3) On, tua a diad panaon tayo et agmanggagawa si Jehova na mamilagron panagtambal, balet ta siansia nin sikatoy ontutulong. Panon? Saray prinsipyo a walad Salita to et ontulong pian makapanggawa tayo na dugan desisyon no nipaakar ed panagpatambal tan arum ni ran bengatla. (Uli. 2:6) Makala itayo na makatulong ya impormasyon tan praktikal iran suhestion ed saray artikulo na Say Panag-Bantayan tan Awake! a mangipapaliwawa ed espisipikon problema tayo ed bunigas. Ontan met, panamegley na masanton espiritu nen Jehova et nayari to itayon ikdan na “sankatageyan ya inkabaleg na pakayari” pian anggan antoy nagawa et napidenengan tayo so situasyon tan napansiansia so katooran tayo. (2 Cor. 4:7) Satan so ontulong ed sikatayon agmasyadon manaburido ed sakit tayo, diad ontan et agtayo napaulyanan iray espiritual a bengatla.
16. Panon ya apidenengan na sakey ya agin laki so sakit to?
16 Pawilen tayo pa imay kalangweran ya agin abitla ed gapo na inmunan artikulo. Nen 1998, nalmoan a sikatoy walaan na sakit ya amyotrophic lateral sclerosis, odino ALS, a lapud satan et sikatoy nagmaliw a sigpot a paralisado. * Panon ton apidenengan so sakit to? Oniay kuan to: “Walaray bektan makakalikna ak na ot-ot tan nadidismaya ak, ya isipen kon makainawa ak labat sano ompatey ak la. Diad saray panaon a pirmi so pakakagonigon ko, manpipikasi ak ed si Jehova ya ikdan to ak na taloran bengatla: kalmadon puso, panag-anos, tan panagsungdo. Aliknak ya inebatan nen Jehova iratan a pikakasik. Tinmulong ed siak so kalmadon puso a nonoten iray makaligliwan bengatla, a singa say nipaakar ed bilay diad balon mundo, a ditan et makaakar ak la, natawayan ko la ray mananam a naakan, tan napitongtongan ko lamet iray kapamilyak. Say panag-anos so tinmulong ed siak a saragen iray irap tan angat na pagmaliw a paralisado. Say panagsungdo balet so tinmulong ed siak a mansiansian matoor tan balanse ed espiritual. Talagan tudtua imay kuan nen salmistan David lapud aliknak a papabiskegen ak nen Jehova legan na pansasakit ko.”—Isa. 35:5, 6.
Tataryaan na Pankaukolan
17. Anto so insipan nen Jehova a gawaen to parad sikatayo, tan anto so kabaliksan na saya?
17 Isisipan nen Jehova ya asikasoen to so pankaukolan tayo ed materyal. (Basaen so Mateo 6:33, 34 tan Hebreos 13:5, 6.) Balet, aglabay ya ibaga na satan a manmeneng tayo labat odino agtayo la mantrabaho. (2 Tes. 3:10) Noagta say kabaliksan na satan et onia: No iyuna tayo’d bilay tayo so Panarian na Dios tan makulin mananap na pambilay, makapanmatalek itayon ontulong si Jehova pian niwala’d sikatayo iray pankaukolan tayo. (1 Tes. 4:11, 12; 1 Tim. 5:8) Sarag ton itarya iray nakaukolan tayo diad paraan ya agtayo iilaloan, nayarin panamegley na sakey a kaagian a mangiter na materyal a tulong odino mangiyopresi na trabaho ed sikatayo.
18. Isalaysay so sakey ya eksperiensya a mangipapanengneng a nayarin taryaan itayo nen Jehova ed panaon na pankaukolan tayo.
18 Pawilen tayo pa met imay mansusulon ina ya abitla’d introduksion na inmunan artikulo. Sanen sikato tan say ugaw nin anak ton bii et inmalis na ayaman, sikatoy nairapan a mananap na trabaho. Oniay inkuan to: “Manpulong ak na kabuasan, insan kada ngarem et mananap ak na trabaho. Aminsan et linma ak ed tindaan pian mangaliw na gatas. Akanengneng ak na pisipising balet ta anggapoy nisaliw ko. Talagan maer-ermen ak ed saman. Kapawil ko’d abung, dakdakel tan nanduruman pisipising so walad balkonahe mi. Satan et magenap a kanen mi ed pigaran bulan. Akaakis ak, tan akisalamat ak ed si Jehova.” Naamtaan lanlamang na sayan mansusulon ina a say angiter et sakey ya agin laki a kakongregasyon to a walaray tanem ton pising. Sinulatan na ina imay agin laki tan oniay inkuan to: “Anggaman akisalamat ak a maong ed sika diad saman ya agew, akisalamat ak met ed si Jehova ed impangusar to’d kaabigan mo pian ipaseguro so panangaro to ed siak.”—Uli. 19:17.
19. Legan na baleg a kairapan, anto so matalek a nailaloan na saray lingkor nen Jehova, tan anto so nepeg a determinado tayon gawaen natan?
19 Malinew sirin a saray ginawa nen Jehova nensaman tan anggad natan et mangiiter ed sikatayo na rason pian manmatalek ed sikato bilang say Mananulong tayo. Asingsingger lan onsabi so baleg a kairapan ed mundo nen Satanas, tan diad satan et lalo tayon nakaukolan so tulong nen Jehova nen say kapiganman. Ingen, saray lingkor nen Jehova et makapanilalo ed tulong to tekep na sigpot a panagmatalek. Sarag dan itangwa so ulo ra tan manliket, lapud amta ran asingger la so kililiktar da. (Luc. 21:28) Kaleganan to balet, antokaman so onsabin subok ed sikatayo, determinado itayo komon a manmatalek ed si Jehova, lapud apaseguroan itayo a say Dios tayon agmanguuman so peteg a “Manangiliktar” tayo.
[Saray paimano ed leksab]
^ par. 14 Nengnengen so artikulon “Coping With an Unspeakable Tragedy,” diad Awake! na Hulyo 22, 2001, pahina 19-23.
^ par. 16 Nengnengen so artikulon “Sustained by My Faith—Living With ALS,” diad Awake! na Enero 2006, pahina 25-29.
Kasin Nanonotan Mo?
• Panon so pangiliktar nen Jehova ed saramay asakbay ya inatey odino ag-inilaloan so impatey da?
• Akin a sankaimportantian so espiritual a salimbeng?
• Anto so kabaliksan na samay insipan nen Jehova ya asikasoen to so pankaukolan tayo ed materyal?
[Tepetepet Parad Panagaral]
[Litrato ed pahina 8]
Inaresto si Brother Rutherford tan saray kakaiba to nen 1918, balet ta sikaray nibulos lanlamang tan naabsuelto ed saray akusasyon ed sikara
[Litrato ed pahina 10]
Sarag itayon pabiskegen nen Jehova legan na pansasakit