Ko Iehova to Tatou ‘Akaora’

“E tauturu mai a Iehova, e ka akaora aia ia ratou.”​—SALA. 37:40.

1, 2. Eaa te tuatua mou puapinga maata no runga ia Iehova tei riro ei tumuanga no te pumaana e te maroiroi no tatou?

KO TE au ata tei akatupuia e te ra kare te reira e noo tinamou ana. Me neke te enua ka taui rai te ngai o te ata. Inara, kare Tei Anga mai i te enua e te ra, e tuke ana me kore e taui ana. (Mala. 3:6) “Kare e tuke i te urianga o te ata kiaia,” i karanga ai te Pipiria. (Iako. 1:17) E tumuanga pumaana tikai e te maroiroi teia tuatua mou puapinga no runga ia Iehova kia tatou, me aro atu tatou i te au turanga ngata e te au akaaoanga. No teaa ra?

² Mei ta tatou i kite mai ana i roto i te atikara i mua akenei, ko Iehova te ‘Akaora’ i te au tuatau o te Pipiria. (Sala. 70:5) Kare aia e taui ana, e ka rave ua rai aia i tana i akakite mai; no reira, ka irinaki ua rai tona aronga akamori kiaia kia ‘tauturu mai e kia akaora mai ia ratou.’ (Sala. 37:40) Akapeea a Iehova i te akaora anga i tona au tavini i teia au tuatau? Akapeea aia i te rave anga i te reira no tatou uaorai?

Akaoraia Mai mei te Aronga Patoi

3. No teaa ra i papu ei ia tatou e kare e rauka i te aronga patoi i te tapu i te au tangata o Iehova mei te tutu aere anga i te tuatua meitaki?

³ Kare rava e rauka i tetai patoianga pakari a Satani i te tapu i te Au Kite o Iehova mei te akamori anga ia Iehova kia tau kiaia. Te akapapu maira te Tuatua a te Atua kia tatou e: “Te taoonga ra noou i angaiaʼi ra, kare ïa e manuia; e te au vaa katoa e patoi ia koe, i te akava anga ra, naau ïa e akaapa atu.” (Isa. 54:17) Inara, kare e rauka ana i te aronga patoi i te tapu i te au tangata o te Atua mei te rave anga i ta ratou angaanga tutu aere. E akamanako ana i nga akaraanga e rua.

4, 5. Eaa te patoianga ta te au tangata o Iehova i aro atu i te mataiti 1918, e eaa ra tei tupu mai?

 ⁴ I te mataiti 1918, kua maata te takinga kino anga ki te au tangata o Iehova tei akatupuia e te au orometua tei inangaro i te tapu i ta ratou angaanga tutuanga. I roto ia Me ra 7, kua tuku mai te kavamani o Marike i tetai au akaueanga i te opu ia J. F. Rutherford, koia te akaaere ra i te angaanga tutuanga i te ao katoa i taua taime ra, e i tetai atu au taeake i roto i te au opati maata. E rua ua rai marama, kua akaapaia te Taeake ko Rutherford ratou ko tona au oa no te orureau anga e kua akautunga tarevakeia no tetai tuatau roa ki roto i te are auri. Kua autu ainei te aronga patoi i te taangaanga anga i te au akavaanga kia tapu takiriia te angaanga tutuanga? Kare rava!

⁵ E akamaara i ta Iehova taputou e: “Te taoonga ra noou i angaiaʼi ra, kare ïa e manuia.” Na roto i tetai tauianga tupu poitirere ua, e kare i tapapaia atu ana, i roto ia Mati ra 26, i te mataiti 1919​—e iva marama i muri ake te akautungaia anga te Taeake ko Rutherford, ratou ko tona au oa—​kua tataraia mai te au taeake tei opuia na te tutakiia anga kia tataraia mai. I roto ia Me ra 5, i te mataiti 1920, kua akaateaia te au akaapaanga no runga ia ratou. Kua taangaanga te au taeake i to ratou turanga rangatira kia rave ua atu rai i te angaanga o te Patireia. Eaa tei tupu mai? E maata tikai te mea tei tupu mei taua tuatau maira! Ka aere pouroa te akameitakianga tei tupu mai ki te ‘Akaora.’​—1 Kori. 3:7.

6, 7. (a) Eaa te ravenga tei raveia ki te Au Kite o Iehova i Tiamani Nazi, e eaa tei tupu mai? (e) Eaa ta te papaanga o te au tangata o Iehova i teia tuatau e akapapu maira?

⁶ E akamanako ana i te rua o tetai akaraanga i teianei. I te mataiti 1934, kua taputou a Hitler e ka takore aia i te Au Kite o Iehova i roto ia Tiamani. Kua akakoro tikai aia i te rave i taua taputou ra. E maata te au tangata tei opuia e tei tapekaia. E tauatini ua atu Au Kite tei takinokinoia; e anere ua atu tei mate i roto i te au puakapa tapekaanga. Kua autu ainei a Hitler i tana ravenga i te takore atu i te Au Kite? Kua rauka ainei iaia i te tapu pouroa i te tutu aere anga i te tuatua meitaki i Tiamani? Kare rava! I te tuatau takinokino anga, kua rave muna ua to tatou au taeake i te angaanga tutuanga. I muri ake i te topaanga te patireia o te Nazi, kua taangaanga ratou i to ratou turanga rangatira kia rave ua atu i te tutuanga. I teia tuatau, tere atu i te 165,000 papuritia Patireia i Tiamani. Kua rave tikai te ‘Akaora’ i tana i taputou mai e: “Te taoonga ra noou i angaiaʼi ra, kare ïa e manuia.”

⁷ Te akapapu maira te papaanga o teia tuatau o te Au Kite o Iehova e kare rava a Iehova e akatika kia takoreia tona au tangata ei pupu. (Sala. 116:15) Akapeea ra tatou tataki tai? Akapeea a Iehova i riro ei ei akaora no tatou uaorai?

Peea te Paruruanga i te Pae Kopapa?

8, 9. (a) Akapeea tatou i kite ei e kare a Iehova e paruru ua ana ia tatou i te pae kopapa? (e) Eaa tikai ta tatou ka ariki?

⁸ Kua kite tatou e kare a Iehova i taputou mai  ana e ka paruru ua rai aia ia tatou i te pae kopapa i teia tuatau ei au tangata tataki tai. E aru tatou i te turanga tei akakiteia mai no runga i te puke tangata Epera akarongo mou e toru, kua patoi ratou i te tupou atu ki mua i te tiki auro o te Ariki ko Nebukanesa. Kare taua aronga mapu tei mataku i te Atua i tapapa atu ana e kia paruru mai a Iehova ia ratou mei te kino na roto i te tu temeio. (E tatau ia Daniela 3:17, 18.) Tei tupu mai, kua akaora mai a Iehova ia ratou mei roto mai i te mura ai o te umu ai ka. (Dani. 3:21-27) Pera katoa i te au tuatau o te Pipiria, tokoiti ua te au akaora anga na roto i te tu temeio. E manganui te au tavini akarongo mou o Iehova tei mate i roto i te rima o te aronga patoi.​—Ebe. 11:35-37.

⁹ Akapeea ra teia tuatau? Ei ‘Akaora,’ ka rauka ia Iehova i te akaora mai i te au tangata tataki tai mei roto mai i te au turanga kino. Ka rauka ainei tikai ia tatou i te karanga e me kua akao mai rai a Iehova iaia na roto i te au turanga takake tikai e me kare? Kare! Noatu rai, penei ka manako rai tetai tangata tei akaoraia mai mei roto i tetai turanga kino e na Iehova i tauturu iaia. E ngakau parau tikai no tetai aronga kia akavaavaa atu i tona manako. I taua taime rai, e mea tau kia ariki tikai tatou e, e manganui te au Kerititiano akarongo mou tei mate no te takinga kino anga, mei tei tupu ana i te tuatau o te Nazi. Kua mate tetai papaki tangata i raro ake i te au turanga kino. (Kohe. 9:11) Penei ka ui tatou e, ‘Kua puapinga kore ainei a Iehova ei ‘Akaora’ no te aronga akarongo mou tei tamateia?’ Kare te reira e tika ana.

10, 11. Eaa ra i kore ei e rauka i tetai tangata i te paruru iaia uaorai mei te mate, inara eaa ta Iehova ka rave no runga i te reira?

¹⁰ E akamanako ana i teia: Kare e rauka i tetai tangata i te paruru iaia uaorai mei te mate, no te mea kare e rauka i tetai tangata i te ‘akaora mai i tona vaerua i te rima o ade,’ te vaarua tanumanga o te tangata. (Sala. 89:48) Akapeea ra a Iehova? Te maara ra i tetai tuaine tei ora mai i te tuatau takinga kino a te Nazi, ta tona metua vaine Kite i akakite mai kiaia ei akapumaana iaia, no runga i te tamateia anga te aronga akaperepereia i roto i te au puakapa tamamaeanga: “Naringa e e tinamou te tapekaanga o te mate, e ririnui atu i reira te reira i te Atua, me kare ainei?” Papu tikai e, kare te mate i ririnui atu i te mana katoatoa koia oki te Tumu o te ora! (Sala. 36:9) Pouroa te aronga i roto ia Ate, tei roto anake ratou i te manako o Iehova, e ka akaora aia ia ratou ravarai.​—Luka 20:37, 38; Apo. 20:11-14.

¹¹ I taua taime rai, te o tika maira a Iehova i roto i te au oraanga o tona aronga akamori mou i teia tuatau. Ka akamanako ana tatou i teianei e toru mataara te riro tikai ra aia ei ‘Akaora’ no tatou.

Paruruia i te Pae Vaerua

12, 13. Eaa ra te paruruanga pae vaerua i riro ei ei mea puapinga maata, e i akapeea a Iehova i te oronga mai anga i te reira no tatou?

¹² Te oronga maira a Iehova i te paruru i te pae vaerua kia tatou, e paruruanga puapinga maata tikai te reira. Te riro anga ei au Kerititiano mou, te marama ra tatou e e apinga puapinga maata atu tetai i to tatou oraanga i teianei. Ta tatou apinga akaperepere maata roa atu, koia oki, to tatou uaorai pirianga kia Iehova. (Sala. 25:14; 63:3) Me kare taua pirianga ra, kare e puapingaia to tatou oraanga i teianei e ka ngaro rai to tatou manakonakoanga no te ora i te tuatau ki mua.

¹³ Te mea meitaki, te oronga maira a Iehova kia tatou katoatoa i te tauturu ta tatou e anoano ra kia akono tamou i tetai pirianga vaitata kiaia. Tei ia tatou tana Tuatua, tona vaerua tapu, e tana putuputuanga i te ao katoa ei tauturu ia tatou. Eaa te mataara meitaki ka rauka ia tatou i te taangaanga i te au mea ta Iehova i oronga mai kia tatou? Na te apii putuputu anga i tana Tuatua ma te maroiroi, ka akaketaketaia to tatou akarongo e to tatou manakonakoanga. (Roma 15:4) Na te pure ngakau tae anga no tona vaerua, ka tauturuia tatou kia patoi atu i te timataanga kia rave i te au mea te ka takino i to tatou pirianga kiaia. (Luka 11:13) Na te aru anga i te aratakianga ta te pupu tavini i oronga mai na roto i te au puka Pipiria, pera katoa te au uipaanga, te au akaputuputuanga, e te au uruoaanga, ka angaiia tatou ki te ‘kai pae vaerua i te ora mou.’ (Mata. 24:45) Ka paruru taua au akanoonooanga ra ia tatou e ka tauturu ia tatou kia akapiri vaitata atu ki te Atua.​—Iako. 4:8.

14. E akakite mai i tetai tupuanga te akakite maira i te paruruanga pae vaerua.

 ¹⁴ Ei akaraanga e akapeea a Iehova i te paruru anga i to tatou pirianga kiaia, ka akamaara ana i nga metua tei taikuia mai i te akamataanga o te atikara i mua akenei. I nga mea ra i muri ake i te akakiteia mai anga e kua ngaro ta raua tamaine, ko Theresa, kua tae mai te tuatua tumatetenga kia raua e: Kua taiaia aia. * Te maara ra i te papa e: “Kua pure ana au kia Iehova kia paruru iaia. Te kiteaia mai anga e kua taiaia aia, ka akakite tika atu au e i te akamataaanga kua manako au e eaa ra a Iehova i kore ei i pau mai i taku pure. E tika rai, kua kite au e kare a Iehova i taputou mai ana e ka paruru tataki tai aia i tona au tangata. Kua pure ua atu rai au kia rauka te marama. Kua akapumaanaia au i te kiteanga e te paruru ra a Iehova i tona au tangata i te pae vaerua​—koia oki, te oronga maira aia i ta tatou e anoano ra kia paruru i to tatou pirianga kiaia. E puapinga maata tikai taua tu paruruanga ra, no te mea ka akatuke te reira i to tatou oraanga mutu kore no te tuatau ki mua. Na roto i taua tu, kua paruru rai a Iehova ia Theresa; i te taime i mate ei aia te tavini akarongo mou ra aia iaia. Kua rauka iaku te au i te kite anga e tei roto tona au manakonakoanga no te oraanga ki mua i tona rima aroa.”

Akamaroiroiia i te Maki Anga

15. Na roto i teea au mataara ka tauturu mai ei a Iehova ia tatou me rokoia tatou e te maki?

¹⁵ Ka rauka ia Iehova i te akamaroiroi ia tatou i runga i te “roi maki,” mei tana rai i rave ana kia Davida. (Sala. 41:3) Noatu e kare a Iehova e akaora temeio maira ia tatou i teia tuatau, te tauturu maira ra aia ia tatou. Akapeea ra? Penei ka tauturuia mai tatou e te au kaveinga tei kiteaia i roto i tana Tuatua, kia rave i te au tukuanga tika no runga i te rapakauanga e e tetai atu au mea. (Mase. 2:6) Penei ka rauka mai ia tatou te akakiteanga tauturu e te au manako tau i roto i te au atikara tei neneiia i roto i Te Punanga Tiaki e te makatini E Ara! te uriuri manako tikai ra i to tatou manamanata no te maki. Na roto i tona vaerua, penei ka oronga mai a Iehova kia tatou ‘i te mana maata meitaki atu’ i te akakoromakianga i to tatou turanga e kia akono tamou i to tatou tu tiratiratu, noatu e eaa te ka tupu mai. (2 Kori. 4:7) Na roto i taua tauturu, ka rauka ia tatou i te kopae kia kore e manako ua i to tatou maki, e oti ngaropoina atu i reira to tatou pirianga kia Iehova.

16. Akapeea tetai taeake i te akakoromaki ua anga i te maki?

¹⁶ E akamanako ana i te taeake mapu tei taikuia mai i te akamataanga o te atikara i mua akenei. I te mataiti 1998, kua kiteaia mai e kua tuia aia i te maki tei akamate takiri i tona kopapa. * Akapeea aia i te akakoromaki ua anga i tona maki? Kua akamarama mai aia e: “E au taime rai toku me tupu mai te mamae e te taitaia ko te ravenga ua rai kia akamaru mai i toku mamae e ngari ake au kia mate. Me maata roa toku mamae, ka pure au kia Iehova kia oronga mai e toru au mea: te ngakau maru, te akakoromaki, e te maroiroi. Kua kite au e kua pau mai a Iehova  i taua au pure ra. Kua riro te ngakau maru i te tauturu iaku kia akamanako i te au mea akapumaana kiaku, mei te tu rai i roto i te ao ou e rauka ai iaku i te aere aere, te reka tikai i te kaianga i te kai, e te tuatua akaou anga ki toku ngutuare tangata. Na te akakoromaki e tauturu mai iaku kia akakoromaki ua i te au manamanata e te au akaaoanga no te maki akamate. Na te maroiroi e tauturu mai iaku kia vai akarongo mou ua e kia kore e riro tetai au apinga ke ei takino i toku pirianga kia Iehova. Kua kite tikai au i ta te tata taramo ko Davida i na roto ana, no te mea kua kite au e te akamaroiroi maira a Iehova iaku i runga i toku roi maki.”​—Isa. 35:5, 6.

Orongaia Mai te Kai

17. Eaa ta Iehova i taputou mai kia tatou e ka rave aia, e eaa ra te aiteanga o teia taputou?

¹⁷ Te taputou maira a Iehova e ka oronga mai aia i te au apinga o te kopapa na tatou. (E tatau ia Mataio 6:33, 34 e Ebera 3:5, 6.) Kare te aiteanga e ka tapapa ua atu tatou e kia oronga temeio uaia mai te au apinga i te pae kopapa, me kare tatou e inangaro ana i te angaanga. (2 Tesa. 3:10) Te aiteanga o taua taputou ra ko teia: Me kimi tatou i te Patireia o te Atua na mua i roto i to tatou oraanga e te inangaro puareinga ra i te angaanga, ka rauka ia tatou i te irinaki kia Iehova kia tauturu mai ia tatou kia rauka mai te au mea te anoanoia ra i roto i te oraanga. (1 Tesa. 4:11, 12; 1 Timo. 5:8) Ka rauka iaia i te oronga mai i ta tatou e anoano ra na roto i tetai au mataara kare tatou i manako atu ana, penei na roto i tetai taeake akamori tei aere mai i te tauturu ia tatou me kore tei oronga mai i tetai angaanga na tatou.

18. E akakite mai i tetai tupuanga te akaari maira e ka akonoia tatou i te au tuatau te anoano maataia ra te tauturu.

¹⁸ E akamaara ana i te metua vaine koia anake ua te metua, tei taikuia i te akamataanga o te atikara i mua akenei. Te neke atu anga raua ko tana tamaine ki tetai ngai ou, kare i rauka ana iaia tetai angaanga. Kua akamarama mai aia e: “E aere ana au ki runga i te angaanga tutuanga i te popongi, e i te au avatea pouroa e aere ana au i te kimi i tetai angaanga. Maara iaku tetai ra i te aere anga au ki te are toa i te oko mai i tetai u. Kua tu ua au e kua akara ua i te au kai raurau, inara kare e rava ana taku moni i te oko mai i te reira. Taitaia tikai au i toku oraanga. Te oki atu anga au ki te kainga mei te are toa i taua ra ra, kua ki ua toku porotito i muri i te au kete kai raurau tukeke. Ka rava ua rai ta maua au kai no tetai au marama. Kua aue ua au, e kua akameitaki au ia Iehova.” Kua kite viviki mai teia tuaine e na tetai taeake i roto i te putuputuanga i akaruke mai i te au kete kai, e nana rai i tanu i te au kai raurau i roto i tona aua kai. I muri mai kua tata atu aia kiaia e: “Noatu e te akameitaki maata atu nei au ia koe no taua ra ra, te akameitaki katoa nei au ia Iehova no te taangaanga anga i toou takinga meitaki ei akamaara anga kiaku i tona aroa.”​—Mase. 19:17.

19. I te tuatau o te tumatetenga maata, eaa te irinakianga papu o te au tavini o Iehova, e eaa ta tatou ka tauta i te rave i teianei?

¹⁹ Te taka meitaki ra e, ko ta Iehova i rave ana i te au tuatau o te Pipiria, pera katoa i to tatou tuatau nei te oronga maira i te au tumuanga kia irinaki tatou iaia ei Tauturu no tatou. Kare e roa atu, me tae mai te tumatetenga maata ki runga i to Satani ao, ka inangaro maata roa atu tatou i ta Iehova tauturu tei kore rava i tupu ana i mua ana. Inara, ka rauka i te au tavini o Iehova i te akara kiaia ma te irinaki pu tikai. Ka rauka ia ratou i te akateitei i to ratou au upoko e kia rekareka, i te kite anga e te vaitata maira to ratou ora. (Luka 21:28) I taua taime rai, noatu e eaa te au timataanga ka tupu mai kia tatou, e tauta tatou i te tuku i to tatou irinakianga kia Iehova, i te irinaki pu tikai anga e ko to tatou Atua taui kore ra, koia tikai to tatou ‘Akaora.’

[Au Tataanga Rikiriki i Raro]

Maara Ainei ia Koe?

• Akapeea a Iehova i te riro anga ei akaora no te aronga kua tamateia?

• Eaa ra te paruruanga pae vaerua i riro ei ei mea puapinga maata?

• Eaa te aiteanga o ta Iehova taputou e ka oronga mai aia i te au apinga i te pae kopapa na tatou?

[Au Uianga Apii]

[Tutu i te kapi 8]

Kua opuia i te mataiti 1918, i muri mai, kua tataraia te Taeake ko Rutherford ratou ko tona au oa, e kua akaateaia te au akaapaanga no runga ia ratou

[Tutu i te kapi 10]

Ka rauka ia Iehova i te akamaroiroi ia tatou i runga i te “roi maki”