O Ieova o le “Faaola” mo i Tatou

“E fesoasoani . . . Ieova iā te i latou, ma laveaʻi iā te i latou.”—SALA. 37:40.

1, 2. O le ā le mea moni e faatatau iā Ieova, ua avea ma puna o faamāfanafanaga ma faamalosiauga mo i tatou?

O ATA lafoia ona o le gasologa o le lā, e lē tumau i se mea e tasi. A o faataamilo le lalolagi i le lā, e faapena foʻi ona suia le mea e paʻū i ai ata lafoia o mea. Peitaʻi, e lē suia pe liliu Lē na foafoaina le lalolagi ma le lā. (Mala. 3:6) Ua taʻua i le Tusi Paia, “E lē fesuisuiaʻi pe liliu o ia.” (Iako. 1:17) Ua avea lenei mea moni e faatatau iā Ieova, o se puna o faamāfanafanaga ma faamalosiauga mo i tatou, aemaise lava pe a tatou fesagaʻi ma tofotofoga faigatā ma luʻi. Aiseā?

² E pei ona tatou mātauina i le mataupu muamua, sa faamaonia le avea o Ieova ma “faaola” po o le laveaʻi i taimi o le Tusi Paia. (Sala. 70:5) E lē suia o ia ma e na te faataunuu mea ua ia fetalai o le a ia faia; o lea, ua iai i ona tagata tapuaʻi i aso nei māfuaaga uma e faatuatua ai iā te ia, e “fesoasoani . . . iā te i latou, ma laveaʻi iā te i latou.” (Sala. 37:40) E faapefea ona laveaʻi pe faasaoina e Ieova ana auauna i aso nei? E faapefea ona ia faia faapea iā i tatou?

Laveaʻi Mai Ē Tetee

3. Aiseā e tatou te mautinoa ai o le a lē mafai e tagata tetee, ona taofia tagata o Ieova mai le talaʻia o le tala lelei?

³ O le a lē mafai e teteega mai iā Satani ona taofia ai Molimau a Ieova mai le tuuina atu o le tapuaʻiga iā Ieova, lea ua onomea ona avatu iā te ia. Ua faamautinoa mai e le Afioga a le Atua iā i tatou: “O auupega uma e faia e tau ma oe e lē manuia ia; o laulaufaiva uma e finau atu iā te  oe i le faamasinoga e te faasalaina ia.” (Isa. 54:17) O loo taumafai ē tetee e taofia tagata o le Atua mai le faataunuuina o lo latou tofiga o le talaʻi, ae peitaʻi ua lē taulau i latou. Seʻi manatu i ni faaaʻoaʻoga se lua.

4, 5. O le ā le teteega na fesagaʻi ma tagata o Ieova i le 1918, ma o le ā le iʻuga?

⁴ I le 1918, na fesagaʻi ai tagata o Ieova ma sauāga ogaoga na uunaʻia e taʻitaʻi lotu, o ē na mananaʻo e taofia la latou galuega talaʻi. Iā Me 7, na tuuina atu ai ni tusi saisai mo le puʻea faapagota o J. F. Rutherford, o lē sa vaavaaia le galuega talaʻi i le lalolagi aoao i lenā taimi, faapea ma nisi sa i le ofisa ulu. Mulimuli ane a o leʻi atoa le lua masina, na faasalaina ai ma le lē tonu le uso o Rutherford ma ana aumea e faapea, na latou faufau e tetee i le malo, ma faafalepuipuiina ai mo se taimi umi. Pe na taulau ai tagata tetee i le faaaogāina o faamasinoga e taofia ai e faavavau le galuega talaʻi? E leai!

⁵ Manatua le folafolaga a Ieova: “O auupega uma e faia e tau ma oe e lē manuia ia.” Iā Mati 26, 1919, na suia ai mea na tutupu i se tulaga faafuaseʻi ma e leʻi faatalitalia—i le iva masina talu ona faafalepuipuiina le uso o Rutherford ma ana aumea—na totogi ai ni tupe ae tatala mai i tua e faatali ai o latou faamasinoga. I le tausaga na sosoo ai, iā Me 5, 1920, sa faalēaogāina ai moliaga na faia faasaga iā i latou. Sa faaaogā e uso lo latou saʻolotoga e faaauilumaina ai le galuega o le Malo. O le ā le iʻuga? Talu mai lenā taimi, ua iai nei se faatelega mataʻina! O lea, e avatu ai le viiga uma i Lē ua avea ma “faaola” po o le laveaʻi ona o nei iʻuga manuia.—1 Kori. 3:7.

6, 7. (a) O le ā le taumafaiga sa faia faasaga i Molimau a Ieova i Nasi i Siamani, ma o le ā na iʻu i ai? (e) O le ā le mea moni ua faamaonia mai i le talafaasolopito o tagata o Ieova i aso nei?

⁶ Seʻi iloilo nei le faaaʻoaʻoga lona lua. I le 1934, na folafola atu ai e Hitila o le a ia matuā tafiesea Molimau a Ieova i Siamani. Ma o le mea tonu lava lenā na ia fuafua e fai. Ina ua mavae ona ia faia lenei folafolaga, e toʻatele tagata na puʻeina ma faafalepuipuiina. E faitau afe Molimau na sauāina; ma e faitau selau i latou na fasiotia i nofoaga o faasalaga mamafa. Pe na taulau ai Hitila i lana taumafaiga e matuā tafiesea Molimau? Pe na ia taofia atoatoa le talaʻia o le tala lelei i Siamani? E leai! A o faagasolo sauāga, sa faaauau pea ona fai faalilolilo e o tatou uso le galuega talaʻi. Sa latou faaaogā lo latou saʻolotoga e faaauau ai ona talaʻi, ina ua paʻū le faigāmalo a Nasi. I aso nei, e silia i le 165,000 tagata talaʻi o le Malo ua iai i Siamani. Ua toe faamaonia mai ai foʻi i inei, e faataunuu e le “faaola” lana folafolaga e faapea: “O auupega uma e faia e tau ma oe e lē manuia ia.”

⁷ Ua faamaonia mai i le talafaasolopito o Molimau a Ieova i aso nei le mea moni e faapea, o le a lē taitai ona faatagaina e Ieova le soloia atoatoa o ona tagata. (Sala. 116:15) Peitaʻi,  po o le a puipuia e Ieova i tatou taʻitoʻatasi? E faapefea ona laveaʻia i tatou e Ieova?

Ae Faapefea le Puipuiga Faaletino?

8, 9. (a) E faapefea ona tatou iloa e lē o taimi uma tatou te maua ai le puipuiga faaletino? (e) O le ā le mea moni e ao ona tatou iloa?

⁸ I le avea ma tagata taʻitoʻatasi, ua tatou iloa e lē o taimi uma e tatou te maua ai le puipuiga faaletino a Ieova. Ua pei i tatou o talavou Eperu faamaoni e toʻatolu, ia na teena le ifo atu i le tupua auro a le tupu o Nepukanesa. E leʻi faatalitalia e na talavou e matataʻu i le Atua e faapea, o le a faavavega ona puipuia i latou e Ieova mai mea e afāina ai o latou tino. (Faitau le Tanielu 3:17, 18.) E pei ona aliaʻi mai, sa laveaʻi e Ieova i latou mai le aasa o le ogaumu. (Tani. 3:21-27) Peitaʻi, e oo lava foʻi i taimi o le Tusi Paia, sa seāseā ona tupu ai se laveaʻiga faavavega. O le toʻatele o auauna faamaoni a Ieova na fasiotia e tagata tetee.—Epe. 11:35-37.

⁹ Ae faapefea aso nei? I le avea ai ma “faaola,” e mautinoa e mafai e Ieova ona laveaʻi i tatou taʻitoʻatasi mai tulaga e lamatia ai. Pe mafai ona tatou faapea atu ma le mautinoa na gaoioi Ieova pe leai foʻi, i ni tulaga patino na tulaʻi mai? E leai. Ae ui i lea, atonu e mafaufau se tasi na sao mai se tulaga e lamatia ai e faapea, sa fesoasoani Ieova iā te ia. O le a avea o se manatu faualuga mo isi le tetee atu i le manatu o lenā tagata. I le taimi e tasi, e ao ona tatou iloa lelei le mea moni e faapea, e toʻatele Kerisiano faamaoni ua maliliu ona o sauāga, e pei o le tulaga na iai i le pulega a le ʻau Nasi. O isi na maliliu ona o tulaga mataʻutia. (Fai. 9:11) Atonu tatou te fesili e faapea, ‘⁠Po lona uiga ea e leʻi avea Ieova ma “faaola” mo tagata faamaoni na fasiotia?’ E lē o le tulaga lenā.

10, 11. Aiseā e lē mafai ai e le tagata ona taofia le oo mai o le oti, ae o le ā e mafai ona faia e Ieova?

¹⁰ Seʻi manatu i le mea lenei: E lē mafai e le tagata ona taofia le oo mai o le oti, auā e leai se tagata e mafai ona ia ‘⁠laveaʻiina lona agaga ai le pule a le tuugamau.’ (Sala. 89:48) Ae faapefea Ieova? E manatua e se tasi o tuafafine na sao mai i le vaitaimi o faiga leaga a Nasi, le tala na fai atu e lona tinā Molimau iā te ia, ina ia faamāfanafana ai o ia i le maliliu o ē pele iā te ia i nofoaga o faasalaga mamafa: “Pe afai e faavavau ona oti le tagata, o lona uiga la ua malosi atu le oti nai lo le Atua.” O le mea moni, e lē faatusaina le malosi o le oti i le malosi silisili o lē ua avea ma Puna o le ola! (Sala. 36:9) O i latou uma lava o loo i tuugamau, o loo manatua pea e Ieova, ma o le a ia laveaʻiina i latou uma lava.—Luka 20:37, 38; Faaa. 20:11-14.

¹¹ I le taimi nei, o loo aafia tuusaʻo Ieova i olaga o ona tagata tapuaʻi faamaoni. Seʻi o tatou iloilo ni auala se tolu e mautinoa ua avea ai o ia ma “faaola” mo i tatou.

Puipuia i le Itu Faaleagaga

12, 13. Aiseā e sili atu ai ona tāua le puipuiga faaleagaga, ma ua faapefea ona saunia e Ieova lenā puipuiga mo i tatou?

¹² Ua aumaia e Ieova iā i tatou le puipuiga faaleagaga, o le puipuiga lea e sili ona tāua. I le avea ma Kerisiano moni, ua tatou malamalama e iai se mea e sili atu ona tāua nai lo o tatou olaga i le taimi nei. O la tatou faiā lelei ma Ieova, o le mea aupito sili lea ona tāua iā i tatou. (Sala. 25:14; 63:3) Pe a aunoa ma lenā faiā, o le a itiiti le tāua o o tatou olaga i le taimi nei, ma o le a leai so tatou faamoemoe i le lumanaʻi.

¹³ O le itū e lelei ai, ona ua aumai e Ieova iā i tatou le fesoasoani sili tatou te manaʻomia, ina ia tausisia ai se faiā māfana ma ia. Ua iā i tatou lana Afioga, o lona agaga paia, ma lana faapotopotoga i le lalolagi aoao, ina ia fesoasoani iā i tatou. E faapefea ona tatou faaaogā tatau nei sauniuniga? E ala i le suʻesuʻeina e lē aunoa ma le filigā o lana Afioga, o le a faamalosia ai lo tatou faatuatua ma lo tatou faamoemoe. (Roma 15:4) E ala i le tatalo faatauanau atu mo lona agaga, o le a tatou mauaina ai le fesoasoani e teena ai le tofotofoina ina ia fai amioga lē talafeagai. (Luka 11:13) E ala i le tausisi atu i le taʻitaʻiga ua saunia mai e le vasega o le pologa, mai lomiga faale-Tusi Paia faapea foʻi ma sauniga, fonotaga, ma tauaofiaga, o le a fafagaina ai i tatou i “meaʻai [faaleagaga] i le taimi tatau.” (Mata. 24:45) O nei sauniuniga e puipuia ai i  tatou i le itu faaleagaga, ma fesoasoani iā i tatou e mafuta vavalalata atu ai i le Atua.—Iako. 4:8.

14. Faamatala mai se mea na tupu e faamatilatila ai le puipuiga faaleagaga.

¹⁴ Ina ia faamatilatila lenā puipuiga faaleagaga, seʻi toe manatu i mātua na taʻua i le amataga o le mataupu ua mavae atu. I ni nai aso ina ua uma ona lipotia ua leiloa le la tama teine, o Terisa, sa la mauaina ai se tala e faateʻia ai: Ua fasiotia o ia. * E manatua e le tamā e faapea: “Sa ou tatalo iā Ieova e puipui o ia. Ina ua maua o ia ua fasiotia, ou te taʻu saʻo atu, sa muamua lava ou tau mafaufau pe aiseā ua lē tali mai ai Ieova i aʻu tatalo. Ioe, ou te iloa e lē o faamautinoa mai e Ieova e faavavega ona ia puipuia ona tagata taʻitoʻatasi. Sa faaauau pea ona ou tatalo ina ia malamalama loʻu mafaufau. Ua faamāfanafanaina aʻu i le iloaina e faapea, e puipuia e Ieova ona tagata i le itu faaleagaga—o lona uiga, e na te saunia mai mea tatou te manaʻomia ina ia puipuia ai la tatou faiā ma ia. O le ituaiga puipuiga lenā e sili ona tāua, auā e mafai ona aafia ai lo tatou lumanaʻi e faavavau. E tusa ai o lenā tulaga, sa puipuia e Ieova Terisa; sa ia auauna ma le faamaoni iā Ieova seʻia oo i le taimi o lona maliu. Sa ou maua le filemu i le iloaina o loo i aao agalelei o Ieova lona faamoemoe i le ola i le lumanaʻi.”

Tausia a o Feagai ma Maʻi

15. O ā auala atonu e fesoasoani mai ai Ieova iā i tatou pe a tatou aafia i maʻi?

¹⁵ E mafai e Ieova ona tausia i tatou a o ‘⁠taooto i maʻi,’ e pei ona sa ia faia iā Tavita. (Sala. 41:3) E ui lava e lē o faavavega ona faamālōlōina i tatou e Ieova i aso nei, peitaʻi o loo ia fesoasoani mai iā i tatou. E faapefea? E ono fesoasoani iā i tatou mataupu silisili o loo i lana Afioga, i le faia o ni filifiliga atamai e faatatau i togafitiga ma isi mataupu. (Faata. 2:6) Tatou te ono maua ni faamatalaga ma ni fautuaga aogā mai mataupu sa lomia i Le Olomatamata ma le Ala Mai! lea o loo talanoaina ai o tatou faafitauli tau le soifua mālōlōina. E ono aumaia e Ieova iā i tatou le “mana lea e sili atu i le malosi o le tagata,” e ala mai i lona agaga, ina ia fesagaʻia ai o tatou tulaga, ma tausisia ai pea lo tatou faamaoni e tusa lava po o le ā e ono tupu mai. (2 Kori. 4:7) Ona o na fesoasoani, e mafai ai ona tatou ʻalofia le soona lofitūina ona o o tatou maʻi, ma mou atu ai la tatou vaaiga faaleagaga.

16. Ua faapefea ona feagai se tasi uso ma maʻi?

¹⁶ Seʻi manatu i le uso talavou lea na taʻua i le amataga o le mataupu ua mavae atu. I le 1998, na maua ai o ia i le maʻi e taʻu o le amyotrophic lateral sclerosis (ALS), lea na iʻu ai ina pē atoa lona tino ma lē mafai ai ona toe gaoioi. * Na faapefea ona ia fesagaʻia lona maʻi? Ua ia faamatala mai: “E iai taimi ou te lagona ai le  tigā ma le mafatia, pe a ou manatu e faapea e pau le auala ou te mapu ai, o le oti. O so o se taimi lava ou te lagona ai le lofitūina, e tolu ni mea ou te tatalo ia aumai e Ieova iā te aʻu: o se loto toʻafimālie, le onosaʻi, ma le tumau. Ou te lagona e tali mai Ieova i na tatalo. O se loto toʻafimālie ou te mafaufau ai i mea e faamāfanafanaina ai aʻu, e pei o le tulaga o le a iai i le lalolagi fou pe a oo ina mafai ona ou savali, olioli i le tofo o taumafataga, ma toe talanoa ma tagata o loʻu aiga. Ua fesoasoani iā te aʻu le onosaʻi e lavātia ai tulaga faalētonu ma luʻi o le pē atoa o le tino, ua lē mafai ai ona toe gaoioi. O le tumau ua mafai ai ona ou faamaoni pea, ma tausisia loʻu paleni faaleagaga. Ou te ioe faatasi ma le faisalamo o Tavita, auā ou te manatu e tausia aʻu e Ieova a o feagai ma maʻi.”—Isa. 35:5, 6.

Mauaina le Tausiga Faaletino

17. O le ā ua folafola mai e Ieova e na te faia mo i tatou, ma o le ā le uiga o lenei folafolaga?

¹⁷ Ua folafola mai e Ieova e na te tausia i tatou i le itu faaletino. (Faitau le Mataio 6:33, 34 ma le Eperu 13:5, 6.) E lē uiga ai faapea o le a tatou faatalitali e faavavega ona saunia mai o tatou manaʻoga faaletino, ia pe lē toe fia faigaluega foʻi. (2 Tesa. 3:10) O le uiga o lenā folafolaga: Pe afai tatou te faamuamua ona saʻilia le Malo o le Atua i o tatou olaga, ma naunau e galulue e tausia i tatou lava, e mafai la ona tatou maufaatuatuaina Ieova e fesoasoani mai iā i tatou ia maua mea e manaʻomia o le olaga. (1 Tesa. 4:11, 12; 1 Timo. 5:8) E na te saunia mai mea tatou te manaʻomia i ni auala atonu tatou te lē o faatalitalia, pe atonu e ala mai i se uso Kerisiano e fesoasoani mai iā i tatou pe ofo mai iā i tatou se galuega.

18. Faamatala mai se mea na tupu e faaalia ai e tatou te maua mea i le taimi e manaʻomia ai.

¹⁸ Seʻi manatu i le tinā nofo toʻatasi lea na taʻua i le faatomuaga o le mataupu ua mavae atu. Ina ua la siitia atu ma lana tama teine i se nofoaga fou, sa faigatā ona maua sana galuega. Ua ia faamatala mai: “Ou te alu i le talaʻiga i le taeao, ae ou te faaaogā aoauli e suʻe ai se galuega. Ou te manatua se tasi aso ina ua ou alu atu i le faleoloa e faatau mai se pepa susu. Sa ou tū ma tilotilo i fualaau faisua, peitaʻi e leʻi lava laʻu tupe e faatau ai se fualaau faisua. O le taimi muamua lea o loʻu olaga ua ou matuā mafatia ai. Ina ua ou toe foʻi atu i le fale i lenā aso, ua tumu le polotito pito i tua o loʻu fale i tagapepa o fualaau faisua eseese. Sa lava meaʻai e ma te ola ai mo le tele o masina. Sa na ona ou tagi ma faafetai atu iā Ieova.” Sa iloa mulimuli ane e lenei tuafafine, o nei tagapepa fualaau faisua, na avatu i se uso i le faapotopotoga sa iai sana faatoʻaga o fualaau faisua. Sa mulimuli ane ia tusi atu i le uso: “E ui lava na ou faafetai atu iā te oe i lenā aso, ae sa ou faafetai foʻi iā Ieova, ona e ala i lou agalelei ua faamanatu mai ai iā te aʻu lona alofa.”—Faata. 19:17.

19. O le ā le mautinoa o le a iai i auauna a Ieova i le taimi o le puapuaga tele, ma o le ā e ao ona tatou maumauaʻi e fai i le taimi nei?

¹⁹ E manino mai, o mea na faia e Ieova i taimi o le Tusi Paia faapea ma o tatou aso, ua aumaia ai iā i tatou māfuaaga e faatuatuaina ai o ia o lo tatou Fesoasoani. Ua lē o toe umi ona oo mai lea o le puapuaga tele i luga o le lalolagi a Satani, ma o le a sili atu ona tatou manaʻomia le fesoasoani a Ieova nai lo se isi lava taimi. Ioe, o le a vāai atu ma le matuā mautinoa auauna a Ieova iā te ia. O le a ea i luga o latou ulu ma olioli ona ua iloa ua lata ona laveaʻiina i latou. (Luka 21:28) O lea la, i le taimi nei, e tusa lava po o ā faigatā tatou te fesagaʻia, seʻi o tatou maumauaʻi e tuu atu lo tatou faatuatuaga iā Ieova, e ala lea i le mautinoa atoatoa, e lē masuia pe liliu lo tatou Atua, o ia o lo tatou “faaola.”

[Faaopoopoga i lalo]

Pe E te Manatua?

• E faapefea ona laveaʻi e Ieova i latou ua maliliu?

• Aiseā ua sili ai ona tāua le puipuiga faaleagaga?

• O le ā le uiga o le folafolaga a Ieova e na te tausia i tatou i le itu faaletino?

[Fesili mo le Suʻesuʻega]

[Ata i le itulau 8]

Na puʻea faapagota le uso o Rutherford ma ana aumea i le 1918, ae na mulimuli ane toe faasaʻolotoina ma na faalēaogāina moliaga faasaga iā i latou

[Ata i le itulau 10]

E mafai e Ieova ona tausia i tatou a o ‘⁠taooto i maʻi’