Yehovah na ’wi Frulusuman’

„Yehovah sa yepi den èn a sa frulusu den.”—PS. 37:40.

1, 2. Sortu prenspari tru tori fu Yehovah e gi wi trowstu nanga deki-ati?

DEN skaduw di de fu si fu di a son e skèin, no e tan na wan presi. Fu di grontapu e drai lontu a son, meki den skaduw e kenki doronomo. Ma a Mekiman fu grontapu nanga a son no e kenki (Mal. 3:6). Bijbel e taki: „A Tata no e kenki soleki fa skaduw e kenki” (Yak. 1:17). A no de fu taki dati wi e kisi trowstu nanga deki-ati fu di wi sabi a prenspari tru tori disi fu Yehovah. Dati de so spesrutu te wi e kisi tesi èn te wi abi problema. Fu san ede?

² Soleki fa wi si kaba na ini a fosi artikel, dan Yehovah ben de wan „Frulusuman” na ini Bijbel ten (Ps. 70:5). Yehovah no e kenki, èn ala ten a e du san a taki. Fu dati ede, den anbegiman fu en na ini a ten disi, kan de seiker taki a sa ’yepi den èn taki a sa frulusu den’ (Ps. 37:40). Fa Yehovah frulusu den futuboi fu en na ini a ten disi? Fa a kan frulusu ibriwan fu wi?

A frulusu den fu gensman

3. Fu san ede wi kan abi a dyaranti taki gensman no o man tapu a pipel fu Yehovah fu preiki a bun nyunsu?

³ Awinsi fa Satan e gens den Kotoigi fu Yehovah, toku noiti a sa man tapu den fu dini Yehovah nanga den heri ati. Èn na a anbegi dati Gado e frudini. Gado Wortu e gi wi a dyaranti disi: „Nowan fetisani di den sa meki fu feti nanga yu sa abi bun bakapisi, èn iniwan tongo di sa opo teige yu na ini a krutu, yu sa krutu” (Yes. 54:17). Gensman pruberi fu tapu a pipel fu Gado fu du a preikiwroko, ma den no ben abi bun bakapisi. Luku tu eksempre.

4, 5. Fa sma gens a pipel fu Yehovah na ini 1918, èn san ben de a bakapisi?

⁴ Na ini 1918, kerki fesiman frufolgu a pipel fu Yehovah na ala sortu fasi, fu di den ben wani tapu a preikiwroko. Tapu 7 mei, den tiriman fu Amerkankondre meki sma sroto  J. F. Rutherford nanga wan tu tra brada di ben e wroko na a edekantoro. Na a ten dati, J. F. Rutherford ben e teki fesi na ini a preikiwroko di ben e du na heri grontapu. A no ben teki tu mun srefi, di krutubangi leisi strafu gi Brada Rutherford nanga den brada di ben e wroko makandra nanga en. Krutubangi ben feni taki den brada disi ben e seti sani fu gens a tirimakti, aladi dati no ben tru. Leki bakapisi fu dati, den kisi langa strafu. Den gensman ben abi bun bakapisi di den gebroiki krutubangi fu tapu a preikiwroko? Kwetikweti!

⁵ Yu e memre ete san Yehovah pramisi? A ben taki: „Nowan fetisani di den sa meki fu feti nanga yu sa abi bun bakapisi.” Sani kenki wantronso, sondro taki sma ben fruwakti dati. Tapu 26 maart 1919, den lusu Brada Rutherford nanga den tra brada. Dati ben de neigi mun baka di den ben poti den brada disi na strafu-oso. Ma den brada ben musu pai lanti wan moni fosi. A yari baka dati, tapu 5 mei 1920, a krutubangi bosroiti fu no krutu den brada moro. Di den brada kon fri, den go doro nanga a Kownukondre wroko. San ben de a bakapisi? We, sensi a ten dati, bun furu sma kon na ini na organisâsi! A „Frulusuman” musu kisi ala grani gi dati.—1 Kor. 3:7.

6, 7. (a) San a Nazi tirimakti du nanga Yehovah Kotoigi na ini Doisrikondre, èn san ben de a bakapisi? (b) Te wi e luku den sani di miti a pipel fu Yehovah na ini a ten disi, dan san den sani dati e sori?

⁶ Luku wan tra eksempre. Na ini 1934, Hitler ben pramisi fu kiri ala Yehovah Kotoigi na ini Doisrikondre. Èn a no ben e meki spotu. Baka di Hitler taki a sani disi, skowtu grabu furu sma poti na strafu-oso. Den frufolgu dusundusun Kotoigi, èn den kiri hondrohondro fu den na ini den strafuman-kampu. Hitler ben man kiri ala Kotoigi soleki fa a ben abi na prakseri? A ben man tapu den fu preiki a bun nyunsu na ini Doisrikondre? Nôno, kwetikweti! Na a pisi ten di den brada nanga sisa ben e kisi frufolgu, den tan du a preikiwroko kibrikibri. Baka di a Nazi tirimakti fadon, den brada nanga sisa kon fri, èn den teki na okasi dati fu tan du a preikiwroko. Na ini a ten disi, moro leki 165.000 Kownukondre preikiman de na ini Doisrikondre. Agen, a „Frulusuman” hori ensrefi na a pramisi fu en. A ben taki: „Nowan fetisani di den sa meki fu feti nanga yu sa abi bun bakapisi.”

⁷ Den sani di miti Yehovah Kotoigi na ini a ten disi, e buweisi taki Yehovah noiti sa gi pasi taki sma pori a heri pipel fu en (Ps. 116:15). Ma Yehovah sa kibri ibriwan fu wi? Fa Yehovah e frulusu ibriwan fu wi?

Yehovah e kibri wi gi ogri?

8, 9. (a) Fu san ede wi no kan fruwakti taki Yehovah sa kibri ibriwan fu wi gi ogri? (b) San wi no musu frigiti?

⁸ Wi sabi taki Yehovah no pramisi taki a sa  kibri ibriwan fu wi gi ogri. Wi abi a srefi denki leki den dri Hebrew futuboi fu Gado di ben weigri fu boigi gi a bigi gowtu popki fu Kownu Nebukadnesar. Den yonkuman dati di ben abi frede gi Gado, no ben e fruwakti taki A ben o du wan wondru fu kibri den gi ogri. (Leisi Danièl 3:17, 18.) Ma toku Yehovah frulusu den fu a faya onfu (Dan. 3:21-27). Srefi na ini Bijbel ten, a no ben e pasa so furu taki Yehovah ben e frulusu anbegiman fu en na wan wondru fasi. Gensman kiri furu futuboi fu Yehovah di ben e dini en nanga den heri ati.—Hebr. 11:35-37.

⁹ Fa a de na ini a ten disi? Fu di Yehovah na wi „Frulusuman”, meki wi kan de seiker taki a man puru sma na ini situwâsi pe ogri kan miti den. Ma kon meki wi taki dati wan brada noso sisa ben man komoto na ini wan muilek situwâsi. Wi kan taki nanga overtoigi efu na Yehovah puru en na ini a situwâsi dati, noso efu a no En du dati? Nôno. Ma toku wan sma ben kan feni taki na Yehovah puru en na ini wan situwâsi pe ogri ben kan miti en. Trawan no abi a reti fu taigi a sma taki a no Gado yepi en. Ma na a srefi ten, wi no musu frigiti taki furu Kresten di ben e dini Gado nanga den heri ati, dede fu di trawan frufolgu den. A sani disi pasa tu na a pisi ten di den Nazisma ben e tiri Doisrikondre. Trawan dede fu di den kisi ongoloku (Preik. 9:11). Kande wi e aksi wisrefi: „A de so taki Yehovah no ben de wan „Frulusuman” gi den futuboi fu en di sma kiri?” A sani dati no kan de tru.

10, 11. Fu san ede libisma no man wai pasi gi dede? San Yehovah man du?

¹⁰ Luku a tori disi: Libisma no man wai pasi gi dede, fu di nowan libisma man „frulusu en sili komoto fu Syeol”, noso Hades, a grebi fu libisma (Ps. 89:48). Ma fa a de nanga Yehovah? Wan sisa di pasa na ogri-ati pisi ten fu den Nazisma libilibi, e memre san en mama di ben de wan Kotoigi, ben taigi en. A sisa disi ben e sari fu di wan tu lobiwan fu en dede na ini den strafuman-kampu. En mama ben trowstu en nanga den wortu disi: „Efu dedesma noiti no ben o man kisi libi baka, dan fu taki en leti, dede ben o tranga moro Gado, a no so?” Wi kan de seiker taki na Almaktiwan fu pe libi e komoto, tranga moro dede! (Ps. 36:9). Yehovah e memre ala den sma di de na ini Syeol noso Hades, èn a sa frulusu ibriwan fu den.—Luk. 20:37, 38; Openb. 20:11-14.

¹¹ Ma solanga den anbegiman fu en na ini a ten disi de na libi, Yehovah e yepi den. Meki wi go luku dri fasi fa Yehovah e frulusu wi.

Yehovah e yepi wi so taki wi kan tan mati fu en

12, 13. Fu san ede a de so prenspari fu de bun mati nanga Yehovah, èn fa a e yepi wi fu tan en mati?

¹² Yehovah e yepi wi so taki wi kan tan mati fu en. Dati na a moro prenspari fasi fa a e kibri wi. Leki tru Kresten, wi e frustan taki wan sani de di prenspari moro a libi fu wi now. A moro prenspari gudu di wi abi, na a matifasi di wi abi nanga Yehovah (Ps. 25:14; 63:3). Efu wi no ben de mati fu Gado, dan a libi fu wi ben o de fu soso, èn wi no ben o abi wan howpu gi a ten di e kon.

¹³ Wi de nanga tangi trutru taki Yehovah e gi wi ala yepi di wi abi fanowdu fu man tan abi wan bun matifasi nanga en. Wi abi a Wortu fu en, en santa yeye, èn den gemeente fu en na heri grontapu. Fa wi kan kisi wini dorodoro fu den seti disi? Te wi e studeri Gado Wortu doronomo, èn te wi e du dati fayafaya, dan a bribi nanga a howpu fu wi sa kon moro tranga (Rom. 15:4). Te wi e begi Gado fayafaya fu gi wi en santa yeye, dan wi sa man dwengi wisrefi fu no du sani di sa pori a matifasi di wi abi nanga en (Luk. 11:13). Te wi e teki a tiri di a srafu-grupu e gi wi nanga yepi fu Bijbel publikâsi, konmakandra, bigi konmakandra, nanga kongres, dan wi sa kisi wini fu a yeye „nyanyan” di wi e kisi „na a reti ten” (Mat. 24:45). Den seti disi e yepi wi fu tan krosibei na Gado.—Yak. 4:8.

14. Fruteri wan ondrofenitori di e sori fa Yehovah e yepi wi fu tan mati fu en.

 ¹⁴ Na eksempre fu a papa nanga mama di ben kari na ini a fosi artikel e sori wi krin fa Yehovah e yepi wi fu tan mati fu en. Wan tu dei baka di den sma disi yere taki Theresa, na umapikin fu den no ben de fu feni, dan den kisi a takru nyunsu taki sma kiri en. * A papa e taki: „Mi ben begi Yehovah fu kibri en. Di skowtu feni a dedeskin fu en, dan a fosi sani di mi aksi misrefi, na fu san ede Yehovah no arki a begi fu mi. Mi sabi taki Yehovah no pramisi a pipel fu en taki a o kibri ibriwan fu den na wan wondru fasi. Mi tan begi en fu yepi mi fu frustan fu san ede a ben gi pasi taki a sani dati pasa. A trowstu mi fu sabi taki Yehovah e gi wi ala san wi abi fanowdu fu tan mati fu en. A fasi disi fa Yehovah e kibri wi prenspari srefisrefi, fu di dati kan yepi wi fu kisi têgo libi. Èn te yu e luku en bun, dan Yehovah kibri Theresa trutru. Theresa ben e dini Yehovah nanga en heri ati na a ten di a dede. Mi kon abi wan korostu firi, fu di mi sabi taki a lobi-ati Gado disi abi a makti fu meki a libi baka na ini a ten di e kon.”

Yehovah e yepi wi te wi siki

15. Na sortu fasi Yehovah kan yepi wi te wi abi wan seryusu siki?

¹⁵ Yehovah kan yepi wi te wi de ’na tapu wi sikibedi’, neleki fa a ben yepi David (Ps. 41:3). Na ini a ten disi Yehovah no e du wondru fu meki wi kon betre baka te wi siki. Ma toku a e yepi wi. Fa a e du dati? Den gronprakseri di wi kan feni na ini en Wortu kan yepi wi fu teki koni bosroiti te a abi fu du nanga datrayepi èn nanga tra sani (Odo 2:6). Te wi abi wan spesrutu siki, dan wi kan kon sabi moro fu a siki dati te wi e leisi den artikel na ini A Waktitoren nanga na Ontwaakt! di e taki fu a siki dati. Na so wi sa kon sabi san fu du. Nanga yepi fu a yeye fu en, Yehovah kan gi wi „a krakti di bigi pasa marki”. Dati sa yepi wi fu horidoro na ini a situwâsi fu wi, èn fu tan dini Gado nanga wi heri ati, awinsi san e pasa (2 Kor. 4:7). Te wi e kisi wini fu a yepi disi, dan wi no sa broko wi ede so te nanga a siki fu wi, taki a matifasi di wi abi nanga Yehovah e kon swaki.

16. Fa wan brada man horidoro aladi a abi wan seryusu siki?

¹⁶ Luku na eksempre fu a yongu brada na ini a fosi artikel. Na ini 1998, datra kon si taki a abi wan seryusu siki di te fu kaba meki taki en heri skin kon lan. * Pe a e feni a krakti fu libi nanga a siki fu en? A brada e taki: „Son leisi mi ben abi skin-ati èn mi ben e bruya srefisrefi. Na den pisi ten dati, mi ben e firi leki na dede wawan ben kan puru mi na ini a situwâsi fu mi. Te mi e firi leki mi no man moro, dan mi e begi Yehovah fu gi mi dri  sani. Dati na wan korostu ati, pasensi, èn a krakti fu horidoro. Mi e firi taki Yehovah piki den begi dati. Te mi abi wan korostu ati, dan dati e yepi mi fu prakseri sani di e trowstu mi. Fu eksempre, mi e prakseri fa a o de na ini a nyun grontapu te mi man waka baka, te mi man nyan wan switi nyanyan, èn te mi man taki tori baka nanga mi famiri. A pasensi di mi abi e yepi mi fu horidoro te a siki fu mi e meki en muilek gi mi fu du son sani. Fu di mi e horidoro, meki mi man tan dini Yehovah nanga mi heri ati, èn mi man tan abi wan bun matifasi nanga En. Mi e agri dorodoro nanga a psalm skrifiman David, fu di mi e firi taki Yehovah yepi mi na tapu mi sikibedi.”—Yes. 35:5, 6.

Yehovah e sorgu gi wi

17. San Yehovah pramisi wi, èn san a pramisi dati wani taki?

¹⁷ Yehovah pramisi wi taki a o sorgu gi wi. (Leisi Mateyus 6:33, 34 nanga Hebrewsma 13:5, 6.) Dati no wani taki dati a o du wondru fu gi wi den sani di wi abi fanowdu. A sani disi no wani taki tu dati wi no abi fu wroko (2 Tes. 3:10). Ma disi na san a pramisi dati wani taki: Efu wi e poti Gado Kownukondre na a moro prenspari presi na ini wi libi, èn efu wi de klariklari fu wroko fu man sorgu wisrefi, dan wi kan abi a dyaranti taki Yehovah sa yepi wi fu kon abi den prenspari sani na ini a libi (1 Tes. 4:11, 12; 1 Tim. 5:8). Yehovah kan gi wi san wi abi fanowdu, èn a kan du dati na wan fasi di wi no ben fruwakti. A kan meki taki wan Kresten brada noso sisa yepi wi, noso den kan gi wi wan wroko.

18. Fruteri wan ondrofenitori di e sori taki Yehovah kan sorgu gi wi te wi de na nowtu.

¹⁸ Prakseri na uma na ini a fosi artikel, di e sorgu en pikin en wawan. Di en nanga a yongu umapikin fu en froisi go na wan tra presi, dan a no ben man feni wan wroko. Na uma disi e taki: „Te mamanten, mi ben e go na ini a preikiwroko, èn ibri bakadina mi ben e go suku wroko. Mi e memre taki wan dei, mi ben go na wenkri fu bai merki. Mi tan tanapu e luku den gruntu, ma mi no ben abi nofo moni fu bai wan tu fu den. Noiti ete na ini mi libi mi ben firi so brokosaka. Di mi doro na oso a dei dati, mi si wan lo saka nanga ala sortu gruntu na tapu a balkon na bakasei fu mi oso. A nyanyan na ini den saka ben nofo gi omeni mun. Soso krei mi ben man krei, èn mi taki Yehovah tangi.” Syatu baka dati, a sisa disi kon sabi taki na wan brada fu a gemeente ben poti den saka drape gi en. A brada disi ben e prani gruntu na tapu a dyari fu en. Bakaten, a sisa skrifi a brada wan brifi, èn a brifi ben taki so: „A dei dati, mi taigi yu tangi omeni leisi, ma mi taigi Yehovah tangi tu fu di a gebroiki yu fu sori mi taki a lobi mi.”—Odo 19:17.

19. Te a bigi banawtu bigin, dan sortu frutrow den futuboi fu Yehovah sa abi, èn sortu fasti bosroiti wi musu abi now?

¹⁹ A de krin taki den sani di Yehovah du na ini Bijbel ten èn na ini a ten fu wi, e gi wi furu reide fu si en leki wi Yepiman. Dyonsro te a bigi banawtu o kon na tapu a grontapu fu Satan, dan wi o abi a yepi fu Yehovah fanowdu moro leki iniwan ten bifo. Toku den futuboi fu Yehovah o man frutrow na en tapu dorodoro. Den o man opo den ede luku go na loktu èn den o prisiri, fu di den sabi taki a frulusu fu den de krosibei (Luk. 21:28). Ma fosi a ten dati doro, meki wi abi a fasti bosroiti fu frutrow tapu Yehovah, awinsi sortu tesi e miti wi. Èn meki wi abi a frutrow taki wi Gado di no e kenki, trutru sa de wi „Frulusuman”.

[Futuwortu]

Yu e memre disi ete?

• Fa Yehovah sa frulusu den wan di lasi den libi?

• Fu san ede a de tumusi prenspari taki Yehovah e yepi wi fu tan mati fu en?

• Yehovah pramisi wi taki a sa sorgu gi wi. San dati wani taki?

[Aksi fu a tori disi]

[Prenki na tapu bladzijde 8]

Na ini 1918, den sroto Brada Rutherford nanga wan tu tra brada, ma bakaten den lusu den èn den no ben abi fu kisi krutu moro

[Prenki na tapu bladzijde 10]

Yehovah kan yepi wi te wi de na tapu ’wi sikibedi’