Yehova Ka “Oryiman” Wase
Yehova Ka “Oryiman” Wase
“TER wese ve, shi wer ve” kpaa.—PS. 37:40
1, 2. Ka mimi u vesen u sha kwagh u Yehova u nyi una sur se ishima, shi una taver se ishima?
MURE til ijiir i môm ga. Er tar ka u ningir nahan kape mure kpa a ningir shi a gem je la. Nahan kpa, Un u a gbe sha man iyange la yô, gem ga. (Mal. 3:6) Bibilo kaa ér: “Un yô, ma mgem ngu ken a Na ga, shin mure u mgem tsô kpaa ga.” (Yak. 1:17) Mimi u vesen u sha kwagh u Yehova la ka kwagh u surun se ishima shi taver se ishima kpaa, hemban je yô, shighe u se tagher a atsan man mbamzeyol yô. Sha ci u nyi?
2 Se hen ken kwaghhenen u a kar la ser, Yehova lu “Oryiman” sha ashighe a tsuaa la. (Ps. 70:5) Yehova gema ga, shi kor uityendezwa nav ciii; nahan mba ve civir un nyian cii mba a ityôkyaa i suur sha a na ér a̱ ‘wase ve, shi a war ve.’ (Ps. 37:40) Yehova yem ior nav sha ayange a ase ne nena? Shi una fatyô u yiman se asange asange nyian nena?
Yehova Kor Ve sha Ikyev i Mbaahendanev
3. Se mba a vangertiôr ser mbaahendanev vea fatyô u yangen ior mba Yehova u eren tom u pasen loho u dedoo ne ga sha ci u nyi?
3 Satan una tôv Mbashiada mba Yehova a ican nan nan kpa, una fatyô u yangen ve u nan Yehova icivir i i gbe u a na un la ga. Mkaanem ma Aôndo taver se ishima ér: “Hanma ityumugh ki i var sha ci u vihin we iyol, ikyôr ia lagh ki ga; hanma zwa u ua mough ua hendan a we sha ijir kpaa, ú hemba u.” (Yes. 54:17) Mbaihyomov asev nôngo sha afatyô ve cii kpa ve kan shio u yangen ior mba Aôndo u eren tom ve u pasen kwagh la. Hen ase sha akav a ahar ne.
4, 5. Ka tôvacan u nyi ior mba Yehova tagher a mi ken inyom i 1918, man lu nyi i due kere?
4 Ken inyom i 1918 la, i tôv ior mba Yehova a ican kpen kpen, lu mbahemenev mba kwaghaôndo u aiegh hii tôvacan ne ér vea yange ve u eren tom u pasen kwagh la ye. Gomoti u tamen u ken tar u Amerika wa tindi sha iyange i Mei 7 la ér i kôr J. F. Rutherford, u lu nengen sha tom u pasen kwagh tar sha won cii hen shighe la i za wuhe, kua anmgbianev mbagenev mba ve eren tom hen ijiirtamen i Mbashiada mba Yehova la kpaa. Yange i ôr anmgbian Rutherford man akar a na la ijir sha ifer ken atô u iwer ihiar ér ve zua zwa u hendan a gomoti nahan i wuhe ve ken purusu anyom imôngo. Mbaahendanev yange ve fatyô u yaren tom a mbakuran gaadi kua mbaajiriv u cirin tom wase u pasen kwagh laa? Mayange ga!
5 Umbur ityendezwa i Yehova a er a vese ne, ér: “Hanma ityumugh ki i var sha ci u vihin we iyol [cii], ikyôl ia lagh ki ga.” Er i wuhe anmgbian Rutherford man akar a na ken purusu nahan kpa, gbande gema imo. Yange ve tsa ken purusu iwer anigheni tseegh maa i ngohol ve uwegh sha iyange i Maaci 26, 1919. I gema i wua ijir i í wa ve la sha iyange i Mei 5, 1920. Er i pase anmgbianev mban yô, ve za hemen u eren tom u pasen loho u Tartor kpoghuloo. Man lu nyi i due kere? Hii hen shighe la zan zan nyian, ior mba ve lu ngohol loho ne mba seer a seer. Iwuese cii ngi yemen hen “Oryiman” wase sha ci u mseer ne.—1 Kor. 3:7.
6, 7. (a) Mbanazi yange ve er a Mbashiada mba Yehova ken Jamani nena, man lu nyi i due kere? (b) Akaa a a lu eren ior mba Yehova nyian ne tese ér nyi?
6 Nenge ase ikyav i sha uhar ne. Hitler yange bum ken inyom i 1934 la ér una tim Mbashiada mba Yehova ken Jamani vindi vindi. Ibumun ne lu asenge ga. Hitler bum ica lu a gba ga je maa i kôr ior kpishi i za wuhe. I tôv Mbashiada udubu imôngo a ican shi i wua mbagenev uderi imôngo ken afo a mbakwarev. Hitler yange tim Mbashiada cica cii er bum nahan kpa? Shi yange kôr cio u cirin tom u pasen loho u dedoo ken Jamani kpa? Mayange ga. Anmgbianev yange ve za hemen u pasen kwagh ken myer hen shighe u i lu tôvon ve a ican la. Hemen u Mbanazi ngu karen kera yô, Mbashiada zua a ian i pasen kwagh gbar gbar. Nyian ne, mbapasenkwagh u Tartor mba ken Jamani hemba 165,000. Kwa ne kpa, “Oryiman” wase kure ityendezwa na i a er a vese ér: “Hanma ityumugh ki i var sha ci u vihin we iyol [cii], ikyôl ia lagh ki ga” la vough.
7 Akaa a a lu eren Mbashiada mba Yehova nyian ne tese ér mayange je Yehova una lumun ér i tim ior nav jimin cii ga. (Ps. 116:15) Man gema se asange asange di ye? Yehova kor se asange asange nena?
Kor Se sha Akaa a Vihin Se Iyol
8, 9. (a) Se fe ser Yehova una kura se sha akaa a vihin se iyol hanma shighe ga sha ci u nyi? (b) Gba u se cii se fa nyi kwagha?
8 Se fa ser Yehova tôndo zwa ér una kura se asange asange sha akaa a vihin se iyol hanma shighe ga. Nahan se mba eren kwagh vough er agumaior a Mbaheberu a jighjigh a atar, a yange venda u civir eev mbu zenaria mbu Tor Nebukadinesar er la nahan. Agumaior a cian Aôndo ne yange hen ér Yehova una er ivande, una kura ve sha akaa a vihin ve iyol ga. (Ôr Daniel 3:17, 18.) Kpa Yehova gema yima ve ken atô u atse a usu u yeghen ker la. (Dan. 3:21-27) Sha ashighe a tsuaa la je kpa, lu hanma shighe Yehova eren ivande yiman mbacivir un ga. Mbaahendanev yange ve wua mbacivir Yehova mba jighjigh kpishi.—Heb. 11:35-37.
9 Nyian di ye? Yehova ka “Oryiman” wase, nahan una fatyô u yiman se sha mbamzeyol mba vihin tsung. Kpa, se fatyô u ôron jighilii ser, Yehova yem se sha mbamzeyol mbagenev mba se tagher a mi la shin yem se ga ze. Nahan kpa, alaghga or u nan war ma mzeyol u vihin tsung nana nenge ér Yehova yima nan. Aluer mbagenev lumun a mnenge u nan ne ga yô, a lu shami ga. Kpa gba u se fa ser Mbakristu mba jighjigh kpishi kpe sha ci u tôvacan, er mbagenev kpishi yange ve kpe sha shighe u Mbanazi la nahan. Mbakristu mbagenev di kpe ku u vihin tsung. (Orpa. 9:11) Alaghga se pine ser, ‘Yehova yange kan shio u ‘yiman’ Mbakristu mba jighjigh, mba yange ve kpe ku swendegh nee?’ Ei, yange kan shio u yiman ve ga.
10, 11. Or hemba ku agee ga sha ci u nyi, kpa Yehova una er a ku nena?
10 Hen ase sha kwagh ne: Or môm u nan hembe ku agee kpa nan ngu ga, orumace u nana “yima uma u nan sha ikyev i Sheol” shin Hade, u a lu uwar u uumace jimin cii la je kpa nan ngu ga. (Ps. 89:48) Kpa Yehova di ye? Anmgbian u kwase ugen, u war ican i Mbanazi yô umbur kwagh u ngô na, u lu Kwaseshiada ôr un sha kwagh u anmgbianev mbagenev mba ve kpe ken afo a mbakwarev la sha u surun un ishima yô. Ngô na yange kaa a na ér: “Aluer uumace vea za hemen u kpen yô, a lu inja er ku hemba Aôndo agee nahan, shin ka nahan ga?” Kpa ku hemba Aôndo, u a lu imbor i uma la agee ga! (Ps. 36:9) Yehova ngu umbur mba ve kpe, ve lu shin Sheol shin Hade la, man una yima ve cii.—Luka 20:37, 38; Mpa. 20:11-14.
11 Yehova kor mbajighjigh mba ve civir un nyian ne. Se time ase nen sha igbenda ityar i i tese ér Yehova ka “Orkuran” wase yô.
Yehova Kor Ikyar i se ye Vea Na La
12, 13. Mkor u ken jijingi hemba ngun a inja sha ci u nyi, man Yehova kor se ken jijingi nena?
12 Yehova kor se ken jijingi, man ka gbenda u vesen u a hembe kuran se sha mi je ne. Se Mbakristu mba mimi se fa ser, kwagh ugen ngu u a hembe lun a inja a uma wase u hegen ne yô. Kwagh u hemban lun a inja u se lu a mi yô, ka ikyaryan yase vea Yehova. (Ps. 25:14; 63:3) Luun er sea ye ikyar vea Yehova ga yô, uma wase u hegen ne ma a lu a inja ga, shi mlu wase u ken hemen ma a lu gbilinkwagh.
13 Doo se kpishi er Yehova á ne se hanma kwagh u una wase se u yan ikyar a na dông nahan. A na se Mkaanem nam man icighan jijingi na, man mzough u anmgbianev tar sha won cii ér a wase se. Se er tom a akaa a Yehova a ne se ne sha inja nena? Aluer se mba timen ken Mkaanem nam hanma shighe shi se mba henen ma kpoghuloo yô, jighjigh wase man ishimaverenkeghen yase ia seer taver. (Rom. 15:4) Doo u se sônon jijingi a ishima i môm sha er una wase se se palegh ameen aa a mgbegha se u eren akaa a a vihi mlu wase vea Yehova la. (Luka 11:13) Aluer se mba eren sha akaawan a wanakiriki u jighjigh a we se ken ityakerada i i pase akaa a Bibilo kua akaawan a a we se ken mbamkombo man mbamkohol mba kiriki kua mbavesen la yô se taver ken jijingi, sha ci u “kwaghyan u sha ashighe ashighe” u wanakiriki u jighjigh a lu nan se ne. (Mat. 24:45) Mbamkombo mban vea kura ikyaryan yase vea Yehova shi vea wase se se seer sôsom a Aôndo.—Yak. 4:8.
14. Ôr vande-eren u a tese ér Yehova kor se ken jijingi yô.
14 Umbur mbamaren mba se er kwagh ve ken mhii u kwaghhenen u a kar la, ikyav ve la tese wanger wanger er Yehova a kor se ken jijingi yô. Wan ve u kwase u i yilan un ér Theresa la yange ndiir ayange nga kar kpuaa yô, ve zua a loho u vihin kpishi: Yange ve ungwa ér i wua un. * Ter u wankwase ne kaa ér: “Yange m er msen mer Yehova a kura un. Shighe u i zua a na kpenegh la, kwagh u hii van mo ken ishima yô lu ityôkyaa i i na ve Yehova ungwa mbamsen av ga la. Nahan kpa m fa mer Yehova bum ér una kura se asange asange sha ivande ga. Tsô m za hemen u eren msen mer Yehova a nam mkav. Msen ne wasem m fa mer Yehova kor ior nav ken jijingi, inja na yô, ne se akaa a a wase se u kuran ikyaryan yase vea na yô. Mkor ne hemba cii, sha ci u a bende a uma u tsôron u se va zua a mi ken hemen la. Nahan me fatyô u kaan mer Yehova kura Theresa, yange civir Yehova sha mimi zan zan kar kpen. M fa mer mlu u ken hemen u Theresa ngu sha ikyev i Yehova nahan saan mo iyol tsung.”
Kor Se Shighe u Se Lu Uange Yô
15. Yehova una wase se shighe u angev mbu ker se la nena?
15 Yehova una suwe se sha ‘gambe u uange’ er sue Davidi nahan. (Ps. 41:3) Er Yehova a kera been ior angev sha ivande ainge ga nahan kpa wasen se. Wasen se nena? Akaawan a na a doon a a lu ken Mkaanem nam la aa fatyô u wasen se u tsuan twersôron shin akaa agen sha kwaghfan. (Anz. 2:6) Shi se zua a akaawan a injaa man mbamhen mba doon ken ngeren mba ken Iyoukura man Awake! mba ve er kwagh u ma mnyoon shin mzeyol wase yô. A lu nyi je ia er se kpa, Yehova una na se jijingi na sha er se zua a “agee a hemban” la, nahan se wa ishima a mbamzeyol shi se tile sha mimi dông yô. (2 Kor. 4:7) Jijingi ne una wase se sha er se tôô ishima yase cii se har sha mnyoon wase nahan se gema se ta ikyaryan yase vea Yehova kera ga yô.
16. Anmgbian ugen yange wa ishima a angev nena?
16 Hen ase sha kwagh u anmgbian ugen u i er kwagh na sha mhii u kwaghhenen u a kar la. Ken inyom i 1998 la, i zua un a angev mbu i yer ér amyotrophic lateral sclerosis (ALS) la. Angev mbun sombo un haa inya kera zenden sha ga. * Yange nôngo a angev mbun nena? A kaa wener: “Yange mea hen er i lu ku tseegh ua yimam ken ican ne nahan i vihim shi uma a duem ishima. Ishima yange ia zam iyol kpishi yô, m sôn Yehova mer a nam akaa atar, akaa shon yô, ka ishima i bem man ishimawan man ishimataver. M na jighjigh mer Yehova ungwa mbamsen av. Ishima i bem wasem u henen sha akaa a surun mo ishima, er me va zende shi me ember uma shi me ya kwagh u doon shi me lam a tsombor wan ken tar u he la nahan. Ishimawan i wasem m wa ishima a mbamzeyol man atsan a m lu tagher a mi la. Ishimataver di wasem u civir Aôndo sha mimi shi lumun mer kwagh môm a vihi ikyaryan yam vea Aôndo ga. M na jighjigh mer Yehova kuram sha gambe u uange, vough er Davidi kpa kura un nahan.”—Yes. 35:5, 6.
Koson Se
17. Yehova tôndo zwa ér una er nyi sha ci wase, man inja i ityendezwa ne ér nyi?
17 Yehova tôndo zwa ér una koso se. (Ôr Mateu 6:33, 34 man Mbaheberu 13:5, 6.) Kwagh ne tese ér se ver ishima ser Yehova a̱ naan se kwaghyan sha ivande ga, shi tese ér se venda u eren tom kpaa ga. (2 Tes. 3:10) Ityendezwa ne tese ér: Aluer se ver Tartor u Aôndo hiihii ken uma wase shi se mba eren tom ser se koso ayol a ase yô, se lu a jighjigh u nan ser Yehova una wase se se zua a akaa a aa wase se se lu uma yô. (1 Tes. 4:11, 12; 1 Tim. 5:8) Una koso se sha gbenda u se ver ishima ga yô, alaghga una mgbegha ma anmgbian u se civir Aôndo vea nan imôngo ér nana wase se shin nana na se tom.
18. Ôr vande-eren u a tese ér Yehova una fatyô u koson se shighe u kwagh a ban se yô.
18 Umbur kwagh u ngô ugen u lun ormaren tswen, u i er kwagh na ken mhii u kwaghhenen u a kar la. Shighe u un man wan na u kwase ve yem twev hen ijiir i he yô, taver ve u zuan a tom. Á kaa ér: “Yange m due kwaghpasen pepe, atetan di m keren tom u me er yô. Iyange igen la, m za hen kenti u teen akaayan m za yam atumba. M nenge a ikyayue kpishi kpa m lu a inyaregh ki me yam ga. Ken uma wam cii, lu shighe u ishima vihim tsung je la. M hidi ken ya sha iyange shon yô, m nenge i verem ikyayue sha hunda u ken ijime ya wam kpishi. Se hingir u lun a kwaghyan kpishi u se ya iwer imôngo yô. Nahan, m sugh Yehova a mliam ashe.” Anmgbian u kwase ne va mase fan ér lu anmgbian u nomso ugen ken tiônnongo na u eren sule u ikyayue ver un akaayan la ye. Anmgbian u kwase ne nger un washika kaa ér: “Er yange m wuese we kpishi nahan kpa, m wuese Yehova kpaa sha er a yar tom a erdoo wou sha u umbur mo dooshima na nahan.”—Anz. 19:17.
19. Ka vangertiôr u nyi ior mba Yehova vea lu a mi sha shighe u zegecan laa, man se kange ishima u eren nyi hegene?
19 Akaa a Yehova yange er sha ashighe a tsuaa la, man aa a lu eren sha ayange a ase ne na se ityôkyaa i suur sha a na ser ngu Orwasen se. Kera shi ica ga tsô zegecan una va sha tar u Satan ne, man hen shighe la kwagh una hemba gban se a iwasen i Yehova cii. Ior mba Yehova vea suur sha a na a ishima i môm. Vea kende mtom vem sha, vea ember gadia vea fa ér mpaa ve mgbôghom. (Luka 21:28) Nyityô ican i alaghga se tagher a mi hegen u shighe shon a lu a va ga ne kpa, se kange nen ishima se suur sha Yehova, se lu nen a vangertiôr ser Aôndo wase u a gem ga la ngu “Oryiman” wase.
[Footnotes]
^ Ôr ngeren u Awake! u Julai 22, 2001, peeji 19-23, sha itinekwagh i i kaa ér “Coping With an Unspeakable Tragedy” la.
^ Ôr ngeren u Awake! u Janawari 2006, peeji 25-29, sha itinekwagh i i kaa ér, “Sustained by My Faith—Living With ALS” la.
Baver We Kpa?
• Yehova una yima mba ve kpe la nena?
• Mkor u ken jijingi hemba ngun a inja sha ci u nyi?
• Kanyi Yehova a tendezwa ér una koso se a mini?
[Study Questions]
[Picture on page 8]
I wuhe anmgbian Rutherford man akar a na ken inyom i 1918 kpa i va dugh ve, shi i de u wan ve aie iyol
[Picture on page 10]
Yehova una kura se sha ‘gambe u uange’