Jéeoba áantikoʼon yéetel kanáantikoʼon

«Yuumtsil áantikoʼob ka páatak u púutsʼuloʼob.» (SAL. 37:40.)

1, 2. ¿Baʼax beetik u jach líikʼil k-óol?

JEʼEX u bin u kaʼantal wa u chíinil le Kʼiinoʼ, u yoochel wa u boʼoyil tuláakal le baʼaloʼoboʼ bey u bin u kʼexpajloʼoboʼ. Baʼaleʼ le máax beetmil le Kʼiin yéetel le Luʼumaʼ maʼatech u kʼexpajal (Mal. 3:6). Le Bibliaoʼ ku yaʼalik: «Jajal Dioseʼ mix bikʼin ku kʼexpajal, yéetel tiʼ letiʼeʼ minaʼan u yoocheloʼob jelpajalil» (Sant. 1:17). K-ojéeltik lelaʼ jach ku líiʼsik k-óol, maases ken yanaktoʼon talamiloʼob. ¿Baʼaxten?

² Jeʼex t-kanaj teʼ xook máanikoʼ, Jéeobaeʼ tu yáantaj le máaxoʼob meyajt úuchjeakiloʼ (Sal. 70:5). Tumen letiʼ maʼatech u kʼexpajleʼ, jach k-ojel yaan xan u yáantik yéetel yaan u kanáantik le máaxoʼob meyajtik teʼ kʼiinoʼobaʼ (Sal. 37:40). ¿Bix tsʼoʼok u beetik yéetel u kaajal teʼ kʼiinoʼobaʼ? Yéetel ¿bix u kanáantikoʼon cada utúul tiʼ toʼon?

Ku tokik u kaajal tiʼ le máaxoʼob pʼekmiloʼ

3. ¿Baʼaxten le máaxoʼob pʼekmil u kaajal Jéeobaoʼ mix bikʼin ken u beetoʼob u xuʼulul le kʼaʼaytaj ku beetaʼaloʼ?

³ Jeʼel baʼalak ka u beet Satanaseʼ mix bikʼin ken u beet u xuʼulul u adorartaʼal Jéeoba tumen u j-jaajkunajoʼob. Le Bibliaoʼ ku yaʼalik: «Maʼ yanak máax beetik u nuʼukul baʼateʼel utiaʼal a xuʼulsaʼaliʼ. Bíin a mak u chiʼ tuláakal máax ku táabal u tak a pool» (Isa. 54:17). Kex  le máaxoʼob pʼekmil u kaajal Jéeoba tsʼoʼok u yilik u xuʼulskoʼob tiʼ le kʼaʼaytaj ku beetaʼaloʼ maʼ béeychajkoʼobiʼ. Koʼox ilik kaʼapʼéel baʼaxoʼob uchaʼan bey u yeʼesikoʼoboʼ.

4, 5. ¿Baʼax talamil tu aktáantaj u kaajal Jéeoba tu jaʼabil 1918, yéetel bix tsʼoʼokik?

⁴ Tu jaʼabil 1918, u nuuktakil le religionoʼoboʼ tu beetoʼob u chʼaʼapachtaʼal u kaajal Jéeoba utiaʼal ka xuʼuluk le kʼaʼaytajoʼ. Tu kʼiinil 7 tiʼ mayo teʼ jaʼab jeʼeloʼ u gobiernoi Estados Unidoseʼ tu yaʼalaj ka maʼachak J. F. Rutherford, le máax nuʼuktik kaʼach le kʼaʼaytajoʼ, bey xan le sukuʼunoʼob áantikoʼ. Aʼalaʼab táan kaʼach u tsʼáaikubaʼob tu contra le gobiernooʼ. Ka máan óoliʼ kaʼapʼéel mesoʼobeʼ juzgartaʼaboʼob, baʼaleʼ maʼ jeʼex u yaʼalik le leyoʼ, tsʼoʼoleʼ aʼalaʼab xan yaan u kʼalaʼaloʼob yaʼab jaʼaboʼob. Le máaxoʼob pʼekmil u kaajal Jéeobaoʼ ¿yaan wa túun u beetikoʼob kaʼach u xuʼulul u kʼaʼaytaʼal le maʼalob péektsiloʼ? Maʼatech.

⁵ Kʼaʼajaktoʼon le baʼax u yaʼalmaj Jéeobaaʼ: «Maʼ yanak máax beetik u nuʼukul baʼateʼel utiaʼal a xuʼulsaʼaliʼ». Tu kʼiinil 26 tiʼ marzo tiʼ 1919, nueve meses kʼalaʼakoʼobeʼ Rutherford yéetel le máaxoʼob áantikoʼ, ka tsʼoʼok u boʼotikoʼob le bajux ku kʼáatik le leyoʼ chaʼab u jóokʼoloʼob. Tu kʼiinil 5 tiʼ mayo tiʼ 1920, xuʼul u bisaʼaloʼob tu táan le juesoʼoboʼ tumen ilaʼab maʼ jaaj le baʼax ku yaʼalaʼal kaʼach tu contraʼoboʼ. Ka tsʼoʼokeʼ le sukuʼunoʼobaʼ tu maas tsʼáaj u yóoloʼob teʼ meeyjil kʼaʼaytajoʼ. Jach maʼalob úuchik u bintiʼob yéetel le meyaj tu chʼaʼajoʼoltoʼoboʼ, tumen desde teʼ kʼiinoʼoboʼ káaj u maas yaʼabtal le máaxoʼob ku kʼaʼaytajoʼoboʼ. Yéetel chéen Jéeoba beet u kʼamikoʼob yaʼab utsiloʼob (1 Cor. 3:7).

6, 7. 1) ¿Baʼax talamil tu aktáantaj le sukuʼunoʼob yanoʼob Alemaniaoʼ, yéetel bix úuchik u tsʼoʼokol? 2) ¿Baʼax tsʼoʼok u yeʼesik le baʼaxoʼob uchaʼan tiʼ u j-jaajkunajoʼob Jéeoba teʼ kʼiinoʼobaʼ?

⁶ Koʼox ilik le uláakʼ baʼax úuchaʼ. Tu jaʼabil 1934 Adolf Hitlereʼ tu yaʼalaj yaan u xuʼulsik tiʼ le u j-jaajkunajoʼob Jéeoba yanoʼob Alemaniaoʼ, yéetel bey tu yilaj u beetikoʼ. Maʼ sen úuch tiʼ lelaʼ tu beetaj u kʼalaʼal yaʼab sukuʼunoʼob. U milesi tiʼ letiʼobeʼ chʼaʼapachtaʼaboʼob yéetel maas tiʼ doscientos cincuenta kíimsaʼaboʼob teʼ kúuchiloʼob tuʼux ku sen beetaʼal u meyajoʼob kaʼachoʼ. ¿Béeychaj wa túun Hitler u xuʼulsik tiʼ le J-jaajkunajoʼob bey xan tiʼ le kʼaʼaytaj ku beetkoʼob kaʼachoʼ? Maʼatech. Kex táan kaʼach u chʼaʼapachtaʼaloʼobeʼ le sukuʼunoʼoboʼ maʼ jáaw u kʼaʼaytajoʼobiʼ. Ka tsʼoʼok u xuʼulsaʼal tiʼ u gobiernoi Hitlereʼ béeychaj u maas kʼaʼaytajoʼob. Bejlaʼeʼ yaan maas tiʼ ciento sesentaicinco mil j-kʼaʼaytajoʼob tu luʼumil Alemania. Jeʼex k-ilkoʼ, Jéeobaeʼ tu kaʼa béeykuntaj le baʼax u yaʼalmaʼ: «Maʼ yanak máax beetik u nuʼukul baʼateʼel utiaʼal a xuʼulsaʼaliʼ».

⁷ Le baʼaxoʼob uchaʼan tiʼ u j-jaajkunajoʼob Jéeoba teʼ kʼiinoʼobaʼ ku yeʼesikeʼ Dioseʼ mix bikʼin  ken u chaʼa u xuʼulsaʼal tiʼ u kaajal (Sal. 116:15). Baʼaleʼ ¿ku kanáantik wa Jéeoba cada utúul tiʼ toʼon? Wa beyoʼ ¿bix túun u beetik?

¿Yaan wa k-kanáantaʼal utiaʼal maʼ u yúuchultoʼon loob?

8, 9. 1) ¿Baʼax eʼesik Jéeobaeʼ maʼ ken u kanáant cada utúul tiʼ toʼon tiʼ jeʼel baʼaxak loobileʼ? 2) ¿Baʼax tsʼoʼok u yúuchul tiʼ yaʼab sukuʼunoʼob kex jach chúukaʼan u yóoloʼob kaʼach tiʼ Dios?

⁸ Jéeobaeʼ maʼ u yaʼalmaj wa yaan u kanáantik cada utúul tiʼ toʼon tiʼ jeʼel baʼaxak loobileʼ. Le oʼolal k-tuukul jeʼex le óoxtúul xiʼipalal hebreoʼob maʼ tu yóotoʼob chintal tu táan le imagen de oro tu beetaj le rey Nabucodonosoroʼ. Letiʼobeʼ maʼ tu yaʼaloʼob wa Jéeobaeʼ yaan u beetik upʼéel milagro utiaʼal maʼ u kíimsaʼaloʼobiʼ (xokaʼak Daniel 3:17, 18). Kex beyoʼ, Jéeobaeʼ tu tokoʼob utiaʼal maʼ u kíimloʼob teʼ horno sen chokokíintaʼanoʼ (Dan. 3:21-27). Baʼaleʼ unaj k-kʼaʼajskeʼ Jéeobaeʼ maʼ mantatsʼ tu beetaj milagroʼob utiaʼal u tokik le máaxoʼob meyajt úuchjeakiloʼ. U jaajileʼ yaʼabeʼ kíimsaʼaboʼob tumen le máaxoʼob pʼekmiloʼoboʼ (Heb. 11:35-37).

⁹ Baʼaleʼ ¿baʼax jeʼel u páajtal k-aʼalik yoʼolal le máaxoʼob meyajtik Dios teʼ kʼiinoʼobaʼ? U jaajileʼ Jéeobaeʼ yaan u páajtalil u kanáantik jeʼel máaxakeʼ. ¿Jeʼel wa túun u páajtal k-aʼalikeʼ Jéeobaeʼ tsʼoʼok u beetik upʼéel milagro utiaʼal u kanáantik wa máax? Maʼatech. Baʼaleʼ, wa yaan máax ku yaʼalik tsʼoʼok u kanáantaʼal tumen Jéeoba utiaʼal maʼ u yúuchul loob tiʼeʼ, maʼ tu páajtal k-aʼalik wa maʼ jaajiʼ. Kex beyoʼ, yaʼab sukuʼunoʼobeʼ jach yaj bix úuchik u kíimloʼob yoʼolal upʼéel nojoch talamil wa yoʼolal le chʼaʼapachtajiloʼ, jeʼex le tu aktáantaj le sukuʼunoʼob kajaʼanoʼob kaʼach Alemaniaoʼ (Ecl. 9:11). ¿Jeʼel wa túun u páajtal k-aʼalik maʼ kanáantaʼaboʼob tumen Diosiʼ? Maʼatech.

10, 11. ¿Baʼaxten wíinikeʼ maʼ tu páajtal u jechik le kíimiloʼ? Baʼaleʼ, ¿baʼax jeʼel u páajtal u beetik Jéeobaeʼ?

¹⁰ Tuukulnakoʼon tiʼ lelaʼ, wíinikeʼ maʼ tu páajtal u jechik le kíimiloʼ, tumen le Bibliaoʼ ku yaʼalik: «Mix máak jeʼel u páajtal u tokikuba tiʼ u páajtalil le kíimiloʼ» (Sal. 89:48). Baʼaleʼ Jéeobaeʼ, ¿jeʼel wa túun u páajtal u tokikoʼon tiʼ le kíimiloʼ? Utúul kiik sen chʼaʼapachtaʼab teʼ Alemania nazioʼ, tu kʼaʼajsaj le baʼax aʼalaʼabtiʼ tumen u maama utiaʼal maʼ u jach lúubul u yóol úuchik u kíimsaʼal yaʼab tiʼ le máaxoʼob u kʼaj óoloʼ, le kiikaʼ tu yaʼalaj: «Wa mix máak jeʼel u páajtal u tokikuba tiʼ le kíimiloʼ, ¿máasaʼ jeʼel u chíikpajal le kíimiloʼ bey maas yaan u páajtalil tiʼ Dioseʼ?». Tsʼoʼoleʼ, u jaajileʼ Jéeobaeʼ maas yaan u páajtalil tiʼ le kíimiloʼ, tumen letiʼ u sayabil le kuxtaloʼ (Sal. 36:9). Tuláakal le máaxoʼob kimenoʼob yéetel tiaʼanoʼob teʼ Seol wa Hadesoʼ, maʼ tuʼubsaʼanoʼob tumen Diosiʼ yéetel yaan páajtalil tiʼ utiaʼal u láaj kuxkíintkoʼob (Luc. 20:37, 38; Apo. 20:11-14).

¹¹ Baʼaleʼ tak bejelaʼeʼ Jéeobaeʼ ku kanáantik le máaxoʼob u kʼubmaj u yóoloʼob tiʼoʼ. Koʼox ilik óoxpʼéel bix u kanáantkoʼon.

Ku kanáantikoʼon utiaʼal maʼ k-náachtaltiʼ

12, 13. ¿Baʼaxten jach kʼaʼanan u kanáantkoʼon Jéeoba utiaʼal maʼ k-náachtaltiʼ, yéetel bix u beetik?

¹² Jéeobaeʼ ku kanáantikoʼon utiaʼal maʼ k-náachtaltiʼ, tumen leloʼ upʼéel baʼal jach kʼaʼanan. Toʼoneʼ k-ojeleʼ le k-bisikba maʼalob tu yéeteloʼ upʼéel baʼal maas yaan u tojol ke le kuxtal yantoʼonoʼ (Sal. 25:14; 63:3). ¿Baʼaxten? Tumen letiʼe baʼax tsʼáaik u beelal k-kuxtaloʼ yéetel ku tsʼáaiktoʼon u páajtalil u yantaltoʼon le kuxtal minaʼan u xuuloʼ.

¹³ Jéeobaeʼ ku tsʼáaiktoʼon tuláakal baʼax kʼaʼabéettoʼon utiaʼal maʼ k-náachtaltiʼ, jeʼex le Bibliaoʼ, u kiliʼich muukʼoʼ yéetel u kaajal. ¿Bix jeʼel u meyajtoʼon tubeel tuláakal le baʼax ku tsʼáaiktoʼonoʼ? Wa sáamsamal k-xokik le Bibliaoʼ yaan u maas muʼukʼaʼantal k-fe (Rom. 15:4). Wa k-kʼáatik xan tiʼ Dios u kiliʼich muukʼeʼ, yaan u yáantkoʼon utiaʼal maʼ k-lúubul tiʼ upʼéel baʼal ku bin tu contra le baʼax ku yaʼalikoʼ (Luc. 11:13). Wa k-beetik le baʼaxoʼob ku yaʼaliktoʼon le palitsil teʼ jóoʼsaʼaniloʼoboʼ, teʼ muchʼtáambaloʼoboʼ yéetel teʼ asambleaʼoboʼ yaan k-maas yaabiltik Jéeoba, tumen le baʼaloʼobaʼ  ku keʼeteloʼob yéetel «janal» ku tsʼaʼabal «tu yorai» (Mat. 24:45). Tuláakal le baʼaloʼobaʼ ku yáantkoʼon utiaʼal k-maas natsʼikba tiʼ Dios (Sant. 4:8).

14. Tsikbalt upʼéel baʼax uchaʼan ku yeʼesik u kʼaʼananil k-antal naatsʼ tiʼ Jéeoba.

¹⁴ Koʼox ilik upʼéel baʼax uchaʼan ku yeʼesik u kʼaʼananil k-antal naatsʼ tiʼ Jéeoba. Teʼ xook máanikoʼ tʼaanajoʼon tiʼ utúul sukuʼun yéetel u yatan jach chiʼichnakchajoʼob tumen maʼ u yojloʼob tuʼux tsʼoʼok Theresa, u hijaʼobiʼ. Ka máan wa jaypʼéel kʼiinoʼobeʼ tu yojéeltoʼob kíimsaʼabi. * Le sukuʼunoʼ tu yaʼalaj: «Teneʼ tin kʼáataj tiʼ Jéeoba ka u kanáant kaʼach Theresa [...]. Le ka tin wojéeltaj kíimsaʼabeʼ joʼopʼ in tuklik baʼaxten maʼ núukaʼab in payalchiʼobiʼ. In wojel Jéeobaeʼ maʼ ken u beet upʼéel milagro utiaʼal u kanáantik cada utúul tiʼ le máaxoʼob meyajtikoʼ, baʼaleʼ maʼ xuʼul in kʼáatiktiʼ ka u yáanten in naʼat baʼaxten úuch leloʼ. In naʼatik bix u kanáantik Jéeoba le máaxoʼob meyajtik utiaʼal maʼ u náachtaloʼob tiʼeʼ jach tsʼoʼok u líiʼsik in wóol. Lelaʼ letiʼe baʼax maas kʼaʼananoʼ tumen jeʼel u beetik u yantaltoʼon kuxtal minaʼan u xuuleʼ. Jéeobaeʼ tu kanáantaj Theresa utiaʼal maʼ u náachtal tiʼ tumen chúukpaj u yóol tak ka kíimi. Jach ku líiʼsik in wóol in wojéeltik maʼ tuʼubsaʼan tumen Diosiʼ».

Ku yáantkoʼon ken kʼojaʼanchajkoʼon

15. ¿Bix u yáantkoʼon Jéeoba ken kʼojaʼanchajkoʼon?

¹⁵ Jeʼex tu beetil yéetel Davideʼ, Jéeobaeʼ ku yáantik le máaxoʼob meyajtik «tu kʼiinil chʼuyukbal[oʼob] tu kʼaan táan u mukʼyaj[oʼoboʼ]» (Sal. 41:3). Kex tumen maʼ tu beetik upʼéel milagro utiaʼal u tsʼakikoʼoneʼ, jejeláas bix u yáantkoʼon. Le tsolnuʼukoʼob ku taasik le Bibliaoʼ ku yáantkoʼon k-chʼaʼatukult tubeel bix maas maʼalob ka tsʼaʼakkoʼon bey xan uláakʼ baʼaloʼob (Pro. 2:6). Tsʼoʼoleʼ le revistaʼob U Pʼíich Tulumil Kanan yéetel ¡Despertad! ku taaskoʼob xookoʼob ku tʼaanoʼob tiʼ jejeláas kʼojaʼaniloʼob yéetel baʼax jeʼel u beetik máak utiaʼal u aktáantikoʼobeʼ. Jéeobaeʼ ku tsʼáaiktoʼon u kiliʼich muukʼ utiaʼal u yantaltoʼon u «nojoch páajtalil» k-aktáantik le kʼojaʼanil yantoʼonoʼ yéetel utiaʼal maʼ u xuʼulul k-meyajtik kex ka maaschajak k-kʼojaʼaniloʼ (2 Cor. 4:7). Beyoʼ maʼ kun lúubul k-óol ka tak náachchajkoʼon tiʼ Jéeoba.

16. ¿Baʼax ku beetik utúul sukuʼun utiaʼal maʼ u jach lúubul u yóol yoʼolal le kʼojaʼanil yantiʼoʼ?

¹⁶ Teʼ xook máanikoʼ tʼaanajoʼon xan tiʼ utúul xiʼipal yaan upʼéel yaayaj kʼojaʼanil tiʼ. Tu jaʼabil 1998, aʼalaʼab yantiʼ esclerosis lateral amiotrófica, lelaʼ upʼéel kʼojaʼanil tu beetaj u xuʼulul u péeksik u wíinklil. * ¿Baʼax ku beetik utiaʼal  maʼ u jach lúubul u yóol? Letiʼeʼ tu yaʼalaj: «Yaan kʼiineʼ jach ku yaatal in wóol yoʼolal baʼax ku yúuchulten yéetel kin wuʼuyik mix baʼal in beelal, le oʼolal kin tuklik maas maʼalob ka kíimken. Baʼaleʼ ken in wuʼuy jach lubaʼan in wóoleʼ kin kʼáatik tiʼ Jéeoba ka u yáanten utiaʼal ka jéetsʼek in wóol, maʼ in sen chiʼichnaktal yéetel ka chúukpajak in wóol. Yéetel Jéeobaeʼ jach ku núukik in payalchiʼob. Ken pʼáatak jeetsʼel in wóoleʼ ku joʼopʼol in tuukul tiʼ baʼaxoʼob ku líiʼsik in wóol, jeʼex le túumben luʼum tuʼux yaan u páajtal in xíimbal, in jaantik kiʼikiʼ janaloʼob bey xan in kaʼa tsikbal yéetel in láakʼtsiloʼob. Le maʼ in sen chiʼichnaktaloʼ ku yáantken utiaʼal maʼ u jach lúubul in wóol yoʼolal le talamiloʼob ku taasikten le kʼojaʼanilaʼ. Yéetel le chúukaʼan óolaloʼ ku yáantken utiaʼal maʼ u xuʼulul in meyajtik Jéeoba. Jeʼex tu beetil yéetel Davideʼ, Jéeobaeʼ tsʼoʼok xan u yáantken utiaʼal in aktáant le yaayaj kʼojaʼanilaʼ» (Isa. 35:5, 6).

Ku tsʼáaiktoʼon le baʼaxoʼob kʼaʼabéettoʼonoʼ

17. ¿Baʼax u yaʼalmaj Jéeoba u beetik t-oʼolal, yéetel baʼax u kʼáat u yaʼal leloʼ?

¹⁷ Jéeobaeʼ u yaʼalmaj u tsʼáaiktoʼon le baʼaxoʼob kʼaʼabéettoʼonoʼ (xokaʼak Mateo 6:33, 34 yéetel Hebreob 13:5, 6). Baʼaleʼ leloʼ maʼ u kʼáat u yaʼal wa yaan k-kutal k-páaʼt u tsʼaʼabaltoʼoniʼ, wa k-tuklik maʼ kʼaʼabéet k-meyajiʼ (2 Tes. 3:10). U jaajileʼ Jéeoba u yaʼalmeʼ, wa k-tsʼáaik táanil ichil k-kuxtal le Reino yéetel k-meyaj utiaʼal k-kaxtik k-kuxtaleʼ, letiʼeʼ yaan u yáantkoʼon utiaʼal ka yanaktoʼon le baʼaxoʼob kʼaʼabéettoʼonoʼ (1 Tes. 4:11, 12; 1 Tim. 5:8). Toʼoneʼ maʼ k-ojel bix ken u yáantiloʼon Jéeobaiʼ, maʼ xaaneʼ jeʼel u péeksik utúul sukuʼun utiaʼal ka u tsʼáatoʼon meyajeʼ wa ka u yáantoʼon yaanal bixeʼ.

18. Tsikbalt upʼéel baʼal uchaʼan ku yeʼesik Jéeobaeʼ ku tsʼáaik baʼax kʼaʼabéettoʼon.

¹⁸ Beoraaʼ koʼox tʼaan tiʼ le maamatsil t-aʼalaj teʼ xook máanikoʼ. Le ka bin kajtal yéetel u hija táanxel tuʼuxeʼ, talamchaj u kaxtik meyaj. Letiʼeʼ tu yaʼalaj: «Tu jaʼatskabil kaʼacheʼ kin jóokʼol kʼaʼaytaj, yéetel ken joʼopʼok u chíinil kʼiineʼ kin jóokʼol in kaxt meyaj. Kʼajaʼanten utéenjeakeʼ binen in man leche tiʼ upʼéel tienda. Chéen joʼopʼ in sen chaʼantik le verduraʼoboʼ, baʼaleʼ kex in kʼáat kaʼach in maneʼ xuʼupten le taakʼinoʼ. Jach lúub in wóol yoʼolal leloʼ. Baʼaleʼ le ka kʼuchen tin wotocheʼ jach jaʼakʼ in wóol tumen tu jool in wotocheʼ yaan yaʼab bolsaʼob chuupoʼob yéetel u jejeláasil verduraʼob. Tumen jach yaʼabeʼ tin wilaj yantoʼon utiaʼal k-jaant yaʼab mesoʼobiʼ». Ka máan kʼiineʼ le kiikaʼ tu yojéeltaj utúul sukuʼun yaan u chan parcela bis le verduraʼob tiʼoʼ. Le kiik túunaʼ tu túuxtajtiʼ upʼéel carta tuʼux ku yaʼalik: «Nib óolal yoʼolal le baʼax ta beetaj tolajeakoʼ, kin tsʼáaik xan u nib óolalil tiʼ Jéeoba úuchik u péeksikech a wáanten tumen letiʼeʼ u yaabiltmen» (Pro. 19:17).

19. ¿Baʼax k-ojel jach tu jaajil yaan u beetik Jéeoba t-oʼolal ken taalak le nojoch yaayaj óolaloʼ, yéetel baʼax unaj k-chʼaʼatuklik k-beetik?

¹⁹ Le baʼax tu beetaj Jéeoba úuchjeakil bey xan le baʼax ku beetik teʼ kʼiinoʼobaʼ ku yeʼesiktoʼon mantatsʼ ken u yáantoʼon. Maʼ kun xáantal ken káajak le nojoch yaayaj óolaloʼ, yéetel tiʼ le kʼiinoʼob jeʼeloʼ yaan u kʼaʼabéettal k-jach áantaʼal tumen Dios. Le máaxoʼob meyajtikoʼ u yojloʼob jach yaan u yáantaʼaloʼob yéetel yaan u kiʼimaktal u yóoloʼob tumen naatsʼ yanil u kʼiinil u jáalkʼabtaʼaloʼob (Luc. 21:28). Le maʼ kʼuchuk le kʼiin jeʼeloʼ, unaj k-chʼaʼatuklik maʼ u jáawal k-kʼubik k-óol tiʼ Jéeoba, tumen letiʼeʼ yaan u kanáantkoʼon. Kʼaʼajaktoʼoneʼ Jéeobaeʼ jach upuliʼ maʼatech u kʼexpajal yéetel mantatsʼ ken u kanáantoʼon.

[Tsolajiloʼob]

¿Kʼajaʼan wa tech?

• Jéeobaeʼ, ¿bix u jáalkʼabtik le máaxoʼob tsʼoʼok u kíimloʼoboʼ?

• ¿Baʼaxten maas maʼalob ka u kanáantoʼon Jéeoba utiaʼal maʼ k-náachtaltiʼ?

• ¿Baʼax u kʼáat u yaʼal Jéeobaeʼ yaan u tsʼáaiktoʼon le baʼaxoʼob kʼaʼabéettoʼonoʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 8]

Le sukuʼunoʼobaʼ kʼalaʼaboʼob tu jaʼabil 1918. Ka máan kʼiineʼ chaʼaboʼob yéetel ilaʼab maʼ jaaj le baʼax ku yaʼalaʼal tu contraʼoboʼ

[U tsolajil le oochel teʼ táan juʼun 10]

Jéeobaeʼ ku yáantik le máax meyajtik «tu kʼiinil [...] táan u mukʼyaj[oʼ]»