Sundoga si Jesus—Simbaha ang Diyos sa Paagi nga Iyang Giuyonan

Ang Diyos mahigugmaong nagdapit sa mga tawo “gikan sa tanang kanasoran ug mga tribo ug katawhan ug mga pinulongan” sa pagsimba kaniya. (Pin. 7:9, 10; 15:3, 4) Kadtong modawat niini nga imbitasyon makakita sa “pagkakahimut-anan ni Jehova.” (Sal. 27:4; 90:17) Sama sa salmista, ilang gipatugbaw ang ilang mga tingog sa pagdayeg sa Diyos, nga nag-ingon: “Mosimba kita ug moyukbo; moluhod kita sa atubangan ni Jehova nga atong Magbubuhat.”—Sal. 95:6.

Pagsimba nga Gipabilhan Pag-ayo ni Jehova

Ingong bugtong Anak sa Diyos, si Jesus adunay daghang kahigayonan aron makakat-on sa panghunahuna, mga prinsipyo, ug mga sukdanan sa iyang Amahan. Busa, siya masaligong makasulti kon unsa ang hustong paagi sa pagsimba. Siya miingon: “Ako ang dalan ug ang kamatuoran ug ang kinabuhi. Walay makaadto sa Amahan kon dili pinaagi kanako.”—Juan 1:14; 14:6.

Gipakita ni Jesus ang hingpit nga panig-ingnan sa mapainubsanong pagpasakop ngadto sa iyang Amahan. Siya miingon: “Ako walay ginahimo sa akong kaugalingong pagbuot; apan sumala sa gitudlo kanako sa Amahan gisulti ko kining mga butanga.” Dayon siya midugang: “Ginabuhat ko kanunay ang mga butang nga makapahimuot kaniya.” (Juan 8:28, 29) Sa unsang paagi gipahimut-an ni Jesus ang iyang Amahan?

Una, si Jesus debotado kaayo sa iyang Amahan, ug mao gayod kanay tukmang paagi sa pagsimba sa Diyos. Gipasundayag ni Jesus ang iyang pagkamaunongon  ngadto sa iyang Amahan pinaagi sa pagsugot Kaniya, sa pagbuhat sa Iyang kabubut-on, bisan pag naglangkit kini ug dakong sakripisyo. (Filip. 2:7, 8) Ang usa ka hinungdanong bahin sa pagsimba ni Jesus mao ang iyang regular nga pagpakigbahin sa paghimog mga tinun-an, nga tungod niana, ang mga magtutuo ug dili-magtutuo nagtawag kaniya nga Magtutudlo. (Mat. 22:23, 24; Juan 3:2) Dugang pa, gigugol ni Jesus ang iyang panahon ug kusog sa pagtabang sa uban. Tungod sa iyang pagkaandam mosakripisyo, wala na kaayo siyay panahon alang sa iyang kaugalingon, apan nalipay siya sa pag-alagad sa uban. (Mat. 14:13, 14; 20:28) Bisag puliki kaayo siya, si Jesus kanunayng naggahin ug panahon sa pagpakigsulti sa iyang Amahan diha sa pag-ampo. (Luc. 6:12) Gipabilhan gayod sa Diyos ang pagsimba ni Jesus!

Ang Panglimbasog nga Pahimut-an ang Diyos

Nakita ni Jehova ang paagi sa pagkinabuhi sa iyang Anak ug nagpahayag sa Iyang pag-uyon kaniya. (Mat. 17:5) Apan, namatikdan usab ni Satanas nga Yawa ang pagkamatinumanon ni Jesus. Busa, iyang gihimong pangunang puntirya si Jesus. Ngano? Tungod kay wala pay tawong nakahupot sukad ug hingpit nga pagkamasinugtanon ngadto sa Diyos, nga nagsimba kaniya sa bug-os. Ug buot sa Yawa nga pahunongon si Jesus sa pagsimba nga angay lamang ihatag kang Jehova.—Pin. 4:11.

Sa tuyo nga bungkagon ang integridad ni Jesus, si Satanas miduol aron sa paghaylo kaniya. Iyang gidala si Jesus sa usa ka “bukid nga talagsaon kahabog, ug gipakita kaniya ang tanang gingharian sa kalibotan ug ang ilang himaya.” Dayon giingnan siya: “Kining tanan nga butang ihatag ko kanimo kon mohapa ka ug mohimog usa ka buhat sa pagsimba kanako.” Unsay reaksiyon ni Jesus? Siya miingon: “Pahilayo, Satanas! Kay kini nahisulat, ‘Si Jehova nga imong Diyos ang imong pagasimbahon, ug siya lamang ang imong pagahatagan ug sagradong pag-alagad.’” (Mat. 4:8-10) Busa, bisag unsa pay benepisyo nga tingali iyang madawat, nahibalo si Jesus nga ang pagyukbo kang Satanas sama rag pagsimbag diyosdiyos. Dili gayod niya buot mohimo ug bisag usa ka buhat sa pagsimba kang bisan kinsa gawas lamang kang Jehova.

Sa atong bahin, dili tingali itanyag ni Satanas kanato ang tanang gingharian sa kalibotan ug ang ilang himaya baylo sa atong pagsimba. Apan, siya nangita gihapog paagi sa paghaylo sa sinserong mga Kristohanon aron sila motalikod sa pagsimba sa Diyos. Buot sa Yawa nga mosimba kita sa uban.—2 Cor. 4:4.

Gipamatud-an ni Kristo Jesus nga siya matinumanon bisan hangtod sa kamatayon. Pinaagi sa iyang pagpabiling matinumanon sa Diyos, gihimaya ni Jesus si Jehova sa paagi nga wala pa sukad mahimo sa tawo. Alang sa matuod nga mga Kristohanon karon, maningkamot kita sa pagsundog sa pagkamatinumanon ni Jesus pinaagi sa pag-una sa atong pagsimba sa Maglalalang. Sa pagkatinuod, ang paghupot ug maayong relasyon sa Diyos mao ang labing bililhong butang nga atong nabatonan.

 Mga Panalangin sa Pagsimba sa Diyos sa Paagi nga Iyang Giuyonan

Ang pagsunod sa “dagway sa pagsimba nga hinlo ug wala mahugawi” sa panglantaw sa Diyos magdalag daghang panalangin. (Sant. 1:27) Pananglitan, kita nagkinabuhi sa panahon diin nagkadaghan ang “mahigugmaon sa ilang kaugalingon, mahigugmaon sa salapi, mapagawalon,” ug “walay gugma sa pagkamaayo.” (2 Tim. 3:1-5) Apan sulod sa panimalay sa Diyos, kita adunay pribilehiyo nga makig-uban sa hinlo ug buotan nga mga tawo nga naningkamot sa pagbayaw sa mga sukdanan sa Diyos sa pagsimba kaniya. Dili ba makapadasig kana?

Pinaagi sa pag-amping nga dili mahugawan niining kalibotana, kita dugang mapanalanginan ug usa ka hinlo nga tanlag. Padayon natong mahuptan ang usa ka hinlo nga tanlag pinaagi sa pagpasakop sa matarong nga mga sukdanan sa Diyos ug sa pagtuman sa mga balaod ni Cesar nga dili supak sa balaod sa Diyos.—Mar. 12:17; Buh. 5:27-29.

Ang tibuok-kalag nga pagsimba magdalag laing mga panalangin. Kon atong unahon ang pagbuhat sa kabubut-on sa Diyos inay ang atong kaugalingon, ang atong kinabuhi mahimong makahuloganon ug malipayon. Imbes moingon: “Mangaon kita ug manginom, kay ugma kita mangamatay,” kita adunay kasaligang paglaom nga mabuhi sa walay kataposan sa paraisong yuta.—1 Cor. 15:32.

Gipakita sa basahon sa Pinadayag nga kadtong naghupot ug hinlo nga baroganan atubangan ni Jehova ‘makalabang sa dakong kasakitan.’ Ang asoy nag-ingon nga “ang Usa nga naglingkod sa trono magbuklad sa iyang tolda sa ibabaw nila.” (Pin. 7:13-15) Ang usa nga naglingkod sa trono mao si Jehova nga Diyos, ang labing mahimayaong Persona sa uniberso. Handurawa kon unsa ka dako ang imong kalipay sa dihang siya mag-abiabi kanimo ingong dinapit sa iyang tolda, nga magtagana kanimog panalipod aron walay kadaot nga modangat kanimo! Bisan karon atong malaoman ang iyang panalipod ug pag-atiman kanato.

Dugang pa, ang tanan nga nagsimba sa Diyos sa paagi nga iyang giuyonan gihubit ingong gigiyahan ngadto sa “mga tuboran sa mga tubig sa kinabuhi.” Kining makapalagsik nga mga tuboran sa tubig naghawas sa tanang tagana ni Jehova aron makabaton kitag kinabuhing walay kataposan. Oo, pinaagi sa lukat ni Kristo, “ang Diyos magapahid sa tanang luha gikan sa ilang mga mata.” (Pin. 7:17) Ang mga tawo modangat sa kahingpitan, nga mohatag ug dakong kalipay niadtong may paglaom nga mabuhing walay kataposan dinhi sa yuta. Bisan karon, ang mga magsisimba sa Diyos malipayong nagpatugbaw sa ilang kinasingkasing nga pagpasalamat kang Jehova ug nagsimba kaniya duyog niadtong anaa sa langit nga nanag-awit: “Dako ug katingalahan ang imong mga buhat, Jehova nga Diyos, ang Labing Gamhanan. Matarong ug matuod ang imong mga dalan, Hari nga walay kataposan. Kinsa bay dili mahadlok kanimo, Jehova, ug dili maghimaya sa imong ngalan, tungod kay ikaw lamang ang maunongon? Kay ang tanang kanasoran manganhi ug mosimba kanimo, tungod kay gipadayag na ang imong matarong nga mga mando.”—Pin. 15:3, 4.

[Hulagway sa panid 27]

Unsay gitanyag ni Satanas baylo sa atong pagsimba?