Kpebe Jesus—Tuak Ibuot Nọ Abasi nte Enye Oyomde

Abasi ada esịt ima okot mme owo “eke ẹtode ke kpukpru idụt ye esien ye obio ye usem” ẹdituak ibuot ẹnọ imọ. (Edi. 7:9, 10; 15:3, 4) Mbon oro ẹyerede ikot emi ẹkeme ‘ndikụt uyai Jehovah.’ (Ps. 27:4; 90:17) Ukem nte andiwet psalm, mmọ ẹmenede uyo mmọ ẹtoro Abasi ẹte: “Ẹdi, nnyịn ituak ibuot inyụn̄ inụhọ: inyụn̄ itọn̄ọ edọn̄ ke iso Jehovah andinam nnyịn.”—Ps. 95:6.

Utuakibuot Oro Jehovah Enen̄erede Ama

Sia Jesus edide ikpọn̄-ikpọn̄ edibon Eyen Abasi, enye ama enyene akwa ifet ndikpep ekikere, mme edumbet, ye mme idaha Ete esie. Ntem, Jesus ama ekeme ndinen̄ede nsian mbon en̄wen nnennen usụn̄ oro ẹkpetuakde ibuot ẹnọ Abasi. Enye ọkọdọhọ ete: “Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.”—John 1:14; 14:6.

Jesus ama enịm mfọnmma uwụtn̄kpọ ke ndisụhọde idem nsụk ibuot nnọ Ete esie. Enye ọkọdọhọ ete: “Nnamke baba n̄kpọ kiet ke odudu idemmi; edi kpa nte Ete ekekpepde mi kpa ntre ke ntịn̄ mme n̄kpọ emi.” Ekem enye ama adian do ete: “[Nnam] n̄kpọ eke enemde enye esịt kpukpru ini.” (John 8:28, 29) Didie ke Jesus ekenem Ete esie esịt?

Akpa, Jesus ama ayak idem ofụri ofụri ọnọ Ete esie, ndien se ndituak ibuot nnọ Abasi ọwọrọde  edi oro. Jesus ama owụt ke imọ imenyene ọkpọkpọ itie ebuana ye Ete imọ ebe ke ndikop uyo Esie nnyụn̄ nnam uduak Esie, idem ke ini emi okoyomde akwa n̄waidem. (Phil. 2:7, 8) Akpan ikpehe edinam utuakibuot Jesus ekedi enye ndinam utom edinam mbet kpukpru ini, tutu mme andinịm ke akpanikọ ye mbon oro mîkenịmke ẹkot enye Andikpep. (Matt. 22:23, 24; John 3:2) Akan oro, Jesus akada ofụri uwem esie an̄wam mbon en̄wen. Edu n̄waidem emi enye ekenyenede ikayakke enye enyene ekese ini ndida nnam n̄kpọ idemesie, edi enye ama okop inemesịt ndinam n̄kpọ nnọ mbon en̄wen. (Matt. 14:13, 14; 20:28) Kpa ye oro Jesus ekenyenede ekese ndinam, enye ama esifak ifet ọbọn̄ akam ọnọ Ete esie eke heaven. (Luke 6:12) Ke akpanikọ, Abasi ekenen̄ede ada utuakibuot Jesus ke ọsọn̄urua n̄kpọ.

Ndidomo Ndinen̄ede Nnem Abasi Esịt

Jehovah ama okụt edu uwem Eyen esie onyụn̄ owụt ke imọ imenyịme enye. (Matt. 17:5) Nte ededi, Satan kpa Devil n̄ko ama etiene okụt ke Jesus anam akpanikọ ọnọ Abasi. Ntem, Jesus ama akabade edi akpan iso en̄wan Satan. Ntak-a? Koro ikodụhe owo oro okokopde uyo ọnọ Abasi kan̄a ọyọhọ ọyọhọ, ndien ke ntem atuak ibuot ọnọ enye nte enye oyomde. Ndien Devil okoyom ndibiọn̄ọ Jesus ndituak ibuot nnọ Jehovah nte odotde.—Edi. 4:11.

Satan ama ọnọ Jesus enọ idomo man abiat Jesus. Enye ama ada Jesus aka “ata edikon̄ obot, onyụn̄ owụt enye kpukpru mme obio ubọn̄ ererimbot ye ubọn̄ mmọ.” Ekem ọdọhọ enye ete: “Nyọnọ fi kpukpru mme n̄kpọ emi edieke afo ọduọde ke isọn̄ atuak ibuot ọnọ mi.” Jesus akanam nso? Enye ọkọdọhọ ete: “Daha mi, Satan! Koro ẹwet ẹte, ‘Edi Jehovah Abasi fo ke ana afo atuak ibuot ọnọ, onyụn̄ edi enye ikpọn̄ ke ana afo anam edisana utom ọnọ.’” (Matt. 4:8-10) Ih, Jesus ama ọfiọk ke edidi ukpono ndem ndiduọ ke isọn̄ nnọ Satan, inamke n̄kpọ m̀mê nso ikpedi utịp. Enye ikenyịmeke ndituak ibuot ọkpọkọm ini kiet kpọt nnọ owo en̄wen ekededi ke mîbọhọke Jehovah.

Ekeme ndidi Satan idinọhọ nnyịn kpukpru mme obio ubọn̄ ererimbot ye ubọn̄ mmọ man ituak ibuot inọ enye. Edi enye ke ododomo ndisabade utuakibuot oro ata mme Christian ẹtuakde ẹnọ Abasi. Devil oyom nnyịn ituak ibuot inọ owo en̄wen m̀mê n̄kpọ en̄wen.—2 Cor. 4:4.

Christ Jesus ama anam akpanikọ tutu esịm n̄kpa. Jesus ndikọsọn̄ọ nda nnam akpanikọ nnọ Abasi ama anam enye ọnọ Jehovah ubọn̄ ke usụn̄ oro akanam owo en̄wen mînọhọ. Amaedi ata mme Christian mfịn, nnyịn idomo ndikpebe usụn̄ uwem edinam akpanikọ Jesus ebe ke ndinịm utuakibuot Andibot ke ebeiso n̄kpọ. Ke akpanikọ, akakan inyene nnyịn edi eti itie ebuana oro inyenede ye Abasi.

 Mme Edidiọn̄ Oro Ẹtode Edituak Ibuot Nnọ Abasi nte Enye Oyomde

Ndika iso ke “orụk utuakibuot oro asanade mînyụn̄ isabakede” ke enyịn Abasi ada ediwak edidiọn̄ edi. (Jas. 1:27) Ke uwụtn̄kpọ, nnyịn idu uwem ke ini emi ata ediwak owo ẹdide “mme ama idem, mme ama okụk, ẹwụt idem,” mînyụn̄ “imaha eti ido.” (2 Tim. 3:1-5) Edi nnyịn imenyene ifet ndidụk nsan̄a ye ndisana, nti owo ke otu mbonufọk Abasi, emi ẹdomode ndidu uwem ekekem ye mme idaha emi Abasi enịmde ẹda ẹtuak ibuot ẹnọ imọ. Ndi emi idịghe n̄kpọ inemesịt?

Edieke nnyịn mîyakke ererimbot emi asabade nnyịn, nnyịn iyenyene edidiọn̄ en̄wen emi edide edisana ubieresịt. Nnyịn iyom ndika iso nnyene edisana ubieresịt ebe ke nditiene ndinen edumbet Abasi ye ke ndinịm eke mbet Caesar emi mîtuahake ye mbet Abasi.—Mark 12:17; Utom 5:27-29.

Utuakibuot ofụri esịt ada mme edidiọn̄ en̄wen edi. Ke ini iwụkde ntịn̄enyịn ke edinam uduak Abasi utu ke uduak idem nnyịn, uwem nnyịn enen̄ede enyene se ọwọrọde onyụn̄ enem. Utu ke ndidọhọ ete: “Ẹyak nnyịn idia inyụn̄ in̄wọn̄, koro nnyịn iyakpa n̄kpọn̄,” nnyịn imenyene idotenyịn uwem nsinsi ke Paradise isọn̄ oro ẹkemede ndiberi edem.—1 Cor. 15:32.

N̄wed Ediyarade etịn̄ aban̄a ini emi mbon oro ẹkade iso ẹnyene edisana idaha ke iso Jehovah ‘ẹditode ke akwa ukụt ẹwọn̄ọ.’ Itien̄wed oro ọdọhọ ke “Enye emi etiede ke ebekpo ayatat ataya esie ofụk mmọ.” (Edi. 7:13-15) Enye emi etiede ke ebekpo edi Jehovah Abasi, Owo emi enyenede ubọn̄ akan ke ofụri ekondo. Kere nte esịt edidatde fi ke ini enye adarade fi nte andidụn̄ ke ataya esie, onyụn̄ ekpeme fi mbak n̄kpọ edinam fi! Enye onyụn̄ ekeme ndikpeme nnyịn idem idahaemi.

Akan oro, ẹdọhọ ke ẹda kpukpru mbon oro ẹtuakde ibuot ẹnọ Abasi nte enye oyomde ẹka “obube mmọn̄ uwem.” Edinem mmọn̄ emi ada aban̄a kpukpru n̄kpọ oro Jehovah ọnọde man nnyịn ikpenyene nsinsi uwem. Ih, ebede ke ufak Christ, “Abasi ọyọkwọhọde kpukpru mmọn̄eyet ke enyịn mmọ efep.” (Edi. 7:17) Ẹyenam ubonowo akabade edi mfọnmma, ndien emi ayanam mbon oro ẹnyenede idotenyịn ndidu uwem nsinsi ke isọn̄ ẹkop idatesịt oro mînyeneke mbiet. Idem idahaemi, mbon oro ẹtuakde ibuot ẹnọ Abasi ke inemesịt ẹsio n̄kpo idara, ẹwụt esịtekọm ke ofụri esịt ẹnọ Jehovah ẹnyụn̄ ẹdiana ye mbon heaven ẹtuak ibuot ẹnọ enye; mbon heaven emi ẹkwọ ẹte: “Mme utom fo ẹkponi ẹnyụn̄ ẹdi utịbe, Jehovah Abasi, Ata Ọkpọsọn̄. Mme usụn̄ fo ẹnen ẹnyụn̄ ẹdi akpanikọ, nsinsi Edidem. Anie mîdibakke fi, Jehovah, inyụn̄ inọ enyịn̄ fo ubọn̄, koro afo ikpọn̄ enyene nsọn̄ọnda? Koro kpukpru mme idụt ẹyedi ẹnyụn̄ ẹdituak ibuot ke iso fo, koro ẹma ẹyarade ndinen ewụhọ fo.”—Edi. 15:3, 4.

[Ndise ke page 27]

Satan ọnọ nnyịn nso man ituak ibuot inọ enye?