Iluga si Jesus​—Simbaha ang Dios sa Paagi nga Iya Nahamut-an

Mahigugmaon nga ginaagda sang Dios ang mga katawhan “gikan sa tanan nga pungsod kag tribo kag katawhan kag hambal” nga magsimba sa iya. (Bug. 7:9, 10; 15:3, 4) Ang mga nagabaton sini nga pangagda ‘makatan-aw sang katahuman sang GINOO.’ (Sal. 27:4; 90:17) Kaangay sang salmista, ginadayaw nila ang Dios nga nagasiling: “Magsimba kita kag magyaub, magluhud kita sa atubangan sang GINOO, nga aton Magbubuhat!”​—Sal. 95:6.

Pagsimba nga Ginapabaloran ni Jehova

Subong ang bugtong nga anak sang Dios, daku gid ang natun-an ni Jesus sa panghunahuna, mga prinsipio, kag mga talaksan sang iya Amay. Gani, si Jesus lang ang makatudlo sa aton tuhoy sa nagakaigo nga paagi sa pagsimba kay Jehova. Sia nagsiling: “Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.”​—Juan 1:14; 14:6.

Nagpakita si Jesus sing himpit nga halimbawa sa pagpasakop sa iya Amay. Nagsiling sia: “Wala ako nagahimo sang bisan ano sa akon lamang kaugalingon; kundi ginahambal ko ini nga mga butang suno gid sa gintudlo sa akon sang Amay.” Nian nagdugang sia: “Pirme ko ginahimo ang mga butang nga kalahamut-an sa iya.” (Juan 8:28, 29) Paano ni Jesus napahamut-an ang iya Amay?

Ang isa ka paagi amo ang iya pagkamatinumanon. Ginpakita ni Jesus nga amo ini ang matuod nga kahulugan sang pagsimba sa Dios. Ginpakita  niya ang iya suod nga kaangtanan sa iya Amay paagi sa pagtuman sa Iya kag paghimo sang Iya kabubut-on bisan pa nagakahulugan ini sing daku nga pagsakripisyo. (Fil. 2:7, 8) Daku gid nga bahin sa pagsimba ni Jesus ang paghimo sing disipulo amo nga gintawag sia nga Manunudlo sang mga tumuluo kag di-tumuluo. (Mat. 22:23, 24; Juan 3:2) Pirme man ginabuligan ni Jesus ang iban. Bisan pa wala na sia sing tion para sa iya kaugalingon, nalipay sia nga mag-alagad sa iban. (Mat. 14:13, 14; 20:28) Walay sapayan nga masako si Jesus, pirme sia nagapakighambal sa iya langitnon nga Amay paagi sa pangamuyo. (Luc. 6:12) Pat-od gid nga ginpabaloran sang Dios ang iya pagsimba!

Pagpanikasog nga Mapahamut-an ang Dios

Natalupangdan ni Jehova ang katutom sang iya Anak kag ginpabutyag ang Iya kahamuot. (Mat. 17:5) Natalupangdan man ini ni Satanas nga Yawa gani, nangin puntariya niya si Jesus. Ngaa? Bangod wala pa gid sing tawo nga bug-os nga nangin matinumanon sa Dios. Indi luyag sang Yawa nga ihatag ni Jesus ini nga sahi sang pagsimba nga takus gid para kay Jehova.​—Bug. 4:11.

Agod hayluhon si Jesus, may gintanyag sa iya si Satanas. Gindala niya si Jesus sa “mataas katama nga bukid, kag ginpakita sa iya ang tanan nga ginharian sang kalibutan kag ang ila himaya.” Nian, nagsiling sia: “Ini tanan nga butang ihatag ko sa imo kon magyaub ka kag maghimo sang isa ka buhat sang pagsimba sa akon.” Ano ang ginhimo ni Jesus? Nagsiling sia: “Palayo ka, Satanas! Kay nasulat na, ‘Si Jehova nga imo Dios ang dapat mo simbahon, kag sa iya ka lamang dapat maghimo sang sagrado nga pag-alagad.’” (Mat. 4:8-10) Bisan ano pa ang iya matigayon, nakahibalo si Jesus nga isa ka idolatroso nga buhat ang pagyaub kay Satanas. Indi gid sia magsimba kay bisan sin-o magluwas kay Jehova.

Mahimo indi pag-itanyag ni Satanas sa aton ang tanan nga ginharian sa kalibutan kag ang ila himaya kabaylo sang aton pagsimba. Apang, ginatinguhaan niya nga tublagon ang pagsimba sang sinsero nga mga Cristiano. Luyag sang Yawa nga simbahon naton ang bisan sin-o ukon bisan ano nga butang sa baylo ang Dios.​—2 Cor. 4:4.

Ginpamatud-an ni Jesus ang iya katutom tubtob sa kamatayon. Paagi sa paghupot sang iya integridad sa Dios, ginhimaya ni Jesus si Jehova sa paagi nga wala pa gid nahimo sang bisan sin-o nga tawo. Subong matuod nga mga Cristiano, ginasunod naton ang matutom nga dalanon ni Jesus kon unahon naton ang pagsimba sa aton Manunuga sa bisan ano nga butang. Ang suod nga kaangtanan sa Dios amo ang pinakahamili gid nga butang nga matigayon naton.

Mga Pagpakamaayo Gikan sa Pagsimba nga Ginakahamut-an sang Dios

Nagadala sing madamo nga pagpakamaayo “ang porma sang pagsimba nga matinlo kag wala sing dagta” sa pagtamod sang Dios. (Sant. 1:27) Halimbawa, nagakabuhi kita sa tion nga  madamo ang “mahigugmaon sa kaugalingon, mahigugmaon sa kuarta, nagapabugal sang kaugalingon” kag “wala sing gugma sa kon ano ang maayo.” (2 Tim. 3:1-5) Apang, sa panimalay sang Dios ukon sa kongregasyon, may pribilehiyo kita nga makig-upod sa matinlo kag matarong nga katawhan nga nagasimba sa Dios suno sa iya mga talaksan. Indi bala nga makapaumpaw gid ini?

Paagi sa pagpabilin nga walay dagta sa sining kalibutan, matigayon man naton ang matinlo nga konsiensia. Mahuptan naton ini paagi sa pagpasakop sa matarong nga mga prinsipio sang Dios kag sa pagtuman sang mga kasuguan ni Cesar nga wala nagasupak sa kasuguan sang Dios.​—Mar. 12:17; Binu. 5:27-29.

Ang bug-os kalag nga pagsimba nagadala pa gid sing dugang nga pagpakamaayo. Kon isentro naton ang aton panikasog sa paghimo sang kabubut-on sang Dios, mangin makaalayaw kag mapuslanon ang aton kabuhi. Sa baylo nga magsiling: “Magkaon kita kag mag-inom, kay buas mapatay kita,” nagasalig kita sa paglaum nga mabuhi sing walay katapusan sa paraiso nga duta.​—1 Cor. 15:32.

Ginapakita sa tulun-an sang Bugna ang tion nga ‘magagua gikan sa dakung kapipit-an’ ang mga naghupot sing matinlo nga tindog sa atubangan ni Jehova. Ini nagsiling nga “ang Isa nga nagalingkod sa trono magahumlad sang iya tolda sa ibabaw nila.” (Bug. 7:13-15) Ang isa nga nagalingkod sa trono wala na sang iban kundi si Jehova nga Dios, ang labing mahimayaon nga Persona sa uniberso. Handurawa lang kon daw ano ka makalilipay nga abiabihon ka niya subong bisita sa iya tolda, kag mahigugmaon ka nga amligan gikan sa katalagman! Bisan sa karon, mahimo naton matigayon ang iya pag-amlig kag pag-atipan.

Dugang pa, ang mga nagasimba sa Dios sa paagi nga nahamut-an niya ginalaragway subong ginatuytuyan sa “mga tuburan sang tubig sang kabuhi.” Ining makapaumpaw nga mga tuburan nagalaragway sa tanan nga ginaaman ni Jehova agod matigayon naton ang kabuhi nga walay katapusan. Paagi sa halad-gawad ni Cristo, pat-od gid nga “pahiran sang Dios ang tagsa ka luha sa ila mga mata.” (Bug. 7:17) Buligan sila nga mangin himpit, nga magaresulta sa matuod nga kalipay sa tanan nga may paglaum nga mabuhi sing dayon sa duta. Bisan sa karon, ang mga sumilimba sang Dios nagahugyaw sa kalipay sa pagpabutyag sing tinagipusuon nga pagpasalamat kag pagsimba kay Jehova upod sa mga nagaamba sa langit: “Daku kag makatilingala ang imo mga binuhatan, Jehova nga Dios, ang Labing Gamhanan. Matarong kag matuod ang imo mga dalanon, Hari nga dayon. Sin-o gid ang indi magkahadlok sa imo, Jehova, kag indi maghimaya sa imo ngalan, bangod ikaw lamang ang mainunungon? Kay ang tanan nga pungsod magakadto kag magasimba sa imo atubangan, bangod napadayag ang imo matarong nga mga kasuguan.”​—Bug. 15:3, 4.

[Piktyur sa pahina 27]

Ano ang ginatanyag sa aton ni Satanas kabaylo sang aton pagsimba?