Tanginina Yesu Muna Sambila Nzambi mu Mpila ina Ketondanga

Nzambi muna zola kwawonso obokelanga wantu a “zula yawonso, yo makanda, ye nsi, ye ndinga” beza kunsambila. (Lus. 7:​9, 10; 15:​3, 4) Awana betambulwilanga e mbok’andi balenda “tala wete wa Yave wa Nzambi.” (Nku. 27:4; 90:​17) Nze ntozi a nkunga, bezangulanga e ndinga zau mu kembelela Nzambi oku vo: “Nwiza twakunda yo yizama; twafukamèna Yave wa mvangi eto.”​—⁠Nku. 95:⁠6.

Nsambila ina Keyangalelanga Yave

Yesu wa Mwan’amosi kaka a Nzambi wakala y’elau dia longoka ngindu ye nkanikinu mia S’andi. Muna kuma kiaki, Yesu wazayisa akaka e mpila yambote ya sambila Yave. Wavova vo: “Mono kwame i nzila, i ludi, i moyo mpe: ke ven’on’okwiza kwa Se ko, ovo ke mu mono ko.”​—⁠Yoa. 1:14; 14:⁠6.

Yesu wasisa mbandu yalunga muna lemvokela S’andi kuna lulembamu lwawonso. Wavova vo: “Omono mpe kikuvangila diambu ko, wauna yalongwa kaka kwa Se, i nsamuna mama.” Wakudikila vo: “Lumbu yawonso mvangang’oma mekunyangidikanga.” (Yoa. 8:​28, 29) Yesu aweyi kayangidikilanga S’andi?

Yesu wayiyekola emvimba kwa S’andi, ediadi i diambu diamfunu divavwanga muna sambila Nzambi. Yesu wayikama S’andi  muna kulemvokela yo vanga luzolo lwandi kana nkutu vava diavavanga vo kamona e mpasi. (Fili. 2:​7, 8) Muna sambila Nzambi Yesu wayivana emvimba muna salu kia kitula wantu se alongoki yo yikilwa vo Nlongi kw’akwikidi ye mindembi kwikila. (Mat. 22:​23, 24; Yoa. 3:⁠2) Yesu wasadila ntangwa ye ngolo zandi mu sadisa akaka. Wau vo wayivana kuna mvevo, Yesu ntangwa yakete kaka kakala yau mu lungisa nsatu zandi, kansi wakala ye kiese mu sila wantu akaka umbangi. (Mat. 14:​13, 14; 20:​28) Kanele vo wakala ye salu kiayingi, Yesu ntangwa zawonso wamokenanga yo S’andi ezulu muna sambu. (Luka 6:​12) Nzambi wayangalela kikilu e mpila ina Yesu kansambila.

Ngolo Zivavwanga Muna Yangidika Nzambi

Yave wazaya e fu ya Mwan’andi yo kunyangalela. (Mat. 17:⁠5) Satana wa Nkadi Ampemba mpe wamona e kwikizi kia Yesu. Muna kuma kiaki, Yesu watontwa kwa Satana. Ekuma? E kuma kadi ke vena muntu ko walemvokela Nzambi yo kunsambila una ufwene. Nkadi Ampemba wavava sima Yesu kayambula sambila Yave.​—⁠Lus. 4:⁠11.

Satana wavana Yesu tukau mu vava kumvukumuna. Watombola Yesu “vana mongo anda kikilu, unsongele yintinu yawonso ya nza, yo nkembo au.” I bosi wamvovesa vo: “Eyayi yawonso ikuvana yo, ovo ofukama, wankunda.” Yesu adieyi kavanga? Wamvovesa vo: “Katuka, e Satana. Kadi diasonama vo, o Yave wa Nzambi aku, i’fwete kunda, yandi kaka i’fwete sadila.” (Mat. 4:​8-​10) Elo, Yesu wazaya dio vo kana nkia nluta diadi kuntwasila, ofukamena Satana vangu dia sambila teke. Kasidi zola sambila muntu akaka ko, Yave kaka.

Satana nanga ke kutuvana yintinu yawonso ya nza ko yo nkembo au kimana twansambila. Kansi, ovavanga vengomona Akristu mu lembi sambila Nzambi. Nkadi Ampemba ozolele vo twasambila muntu yovo lekwa kiakaka.​—⁠2 Kor. 4:⁠4.

Kristu Yesu wasonga e kwikizi kiandi yamuna lufwa. Muna simbinina e kwikizi kiandi kwa Nzambi, Yesu wakembelela Yave mu mpila ina kaisidi vanga muntu akaka ko. Wau vo tu Akristu, tufwete sia e ngolo yo tanginina e kwikizi kia Yesu muna sianga e nsambila ya Mvangi va fulu kiantete muna zingu kieto. Vana ntandu, e ngwizani eto yambote yo Nzambi i diambu disundidi o mfunu.

Nsambu za Nsambila Iyangidikanga Nzambi

‘Nsambila yavelela ye kondwa nsafu’ nsambu yitwasanga vana meso ma Nzambi.  (Yak. 1:​27) Kasikil’owu, e tandu tuzingilanga kia wantu ‘akwa kuzola, minzola-nzimbu, akwa lusanu ye mindembi zola Nzambi.’ (2 Tim. 3:​1-5) Kansi, wau vo tu nkangu a Nzambi, tuvwidi elau dia kala vamosi ye nkangu avelela, awana besianga ngolo mu lemvokela nkanikinu mia Nzambi yo kunsambila. Nga ke nto a luvuvamu ko?

Muna lembi kuyisia mu mambu ma usafu ma nza yayi, tuna ye nsambu za Nzambi yo kala ye ntona zavelela. Tuzolele kala ye ntona zavelela muna lemvokelanga nkanikinu miansongi mia Nzambi yo zitisa nsiku mia Kaisa emi ke mikululanga nsiku mia Nzambi ko.​—⁠Maku 12:17; Mav. 5:​27-29.

E nsambila ya nsi a ntima nsambu itwasanga. Avo tusidi luzolo lwa Nzambi vana fulu kiantete, tukala ye kiese, e zingu kieto kikala ye nsasa. Vana fulu kia vova vo: “Tudia, tunua, kadi mbazi tufwa,” tuna ye vuvu kiasikila kia moyo a mvu ya mvu muna paradiso ova ntoto.​—⁠1 Kor. 15:⁠32.

O nkanda Lusengomono usonganga vo awana bena ye ntona zavelela betelama vana meso ma Yave ‘betuka muna mpasi zayingi.’ Lusansu lusonganga vo “ndion’ovwende vana kunda, okubayàlangesel’e saba kiandi.” (Lus. 7:​13-​15) Ndion’ovwende vana kunda ke muntu akaka ko, i Yave wa Nzambi on’osundidi nkembo muna nsema wawonso. Yindula e kiese omona vava okala muna saba kiandi yo kulunga-lunga kimana walembi mona e mpasi. Avo dilendakana, tulenda taninwa yo lungwa-lungwa kwa yandi tuka wau.

Ozevo, awana besambilanga Nzambi muna mpila ina ketondanga beyikilwanga vo befilwanga kuna “nto za maza ma moyo.” E nto zazi za maza zisonganga e nkubika zawonso za Yave kimana twavwa moyo a mvu ya mvu. Elo, muna lusadisu lwa kimenga kia Kristu, “Nzambi okunguna mansanga mawonso muna meso mau.” (Lus. 7:​17) Wantu bekituka se alunga ye vuvu kia zingila ova ntoto yakwele mvu ye kiese. Kana nkutu owau, awana besambilanga Nzambi bekalanga ye kiese, besonganga luyangalalu lwau lwa ntima kwa Yave yo kunsambila kumosi y’awana beyimbilanga kun’ezulu vo: “O mavangu maku manene y’esivi, e Yave wa Nzambi ampungu; e fu yaku yansongi ye ludi, e Ntinu a mvu ya mvu. E Yave, nani olembi vumina yo kembel’e nkumbu aku; kadi ngeye kaka wavauka; e zula yawonso ikwiza kunda vana ndose aku; kadi o mavangu maku mansongi masengomweno.”​—⁠Lus. 15:​3, 4.

[Mvovo mia Fwaniswa mina muna lukaya lwa 27]

O Satana nkia lekwa kevavanga kutuvana kimana twansambila?