Ekiša Jesu Rapela Modimo ka Tsela Yeo a e Amogelago

Modimo o laletša batho ba “tšwago ditšhabeng tšohle le melokong yohle le merafong yohle le malemeng ohle” ka lerato gore ba mo rapele. (Kut. 7:9, 10; 15:3, 4) Bao ba amogelago taletšo ye ba ka “[boga] mabothakxa a Morêna.” (Ps. 27:4; 90:17) Go swana le mopsalme, ba hlaboša mantšu a bona go reta Modimo gomme ba re: “Tlang re rapêlê, re inamê, re khunamê pele xa Morêna e a re dirilexo.”—Ps. 95:6.

Borapedi Bjoo bo Tšeelwago Godimo Kudu

Bjalo ka Morwa yo a tswetšwego a nnoši wa Modimo, Jesu o bile le nako e ntši ya go ithuta ka tsela ya Tatagwe ya go nagana, melao ya gagwe ya motheo, gotee le ditekanyetšo tša gagwe. Ka gona, Jesu o be a ka bolela ka kgodišego o be a ka bontšha batho borapedi bja therešo. O itše: “Ke nna tsela le therešo le bophelo. Ga go yo a tlago go Tate ge e se ka nna.”—Joh. 1:14; 14:6.

Jesu o re beetše mohlala o phethagetšego wa go ikokobeletša Tatagwe. O itše: “Ga ke dire selo ka la-ka; eupša ke bolela dilo tše go etša ge Tate a nthutile.” Gomme o okeditše ka gore: “Ka mehla ke dira dilo tše di mo kgahlišago.” (Joh. 8:28, 29) Jesu o kgahlile Tatagwe ka ditsela dife?

Se sengwe ke gore, Jesu o be a ineetše go Tatagwe ka mo go feletšego, e lego seo go rapela Modimo e lego sona. Jesu o bontšhitše gore o be a e-na le tswalano ya kgaufsi le Tatagwe ka go Mo  kwa, le ka go dira thato ya Gagwe, gaešita le ge go be go akaretša boikgafo bjo bogolo. (Bafilipi 2:7, 8) Karolo e bohlokwa mokgweng wa Jesu wa borapedi e be e le go swarega ka mehla ka modiro wa go dira barutiwa, go fihla bokgoleng bja gore badumedi le batho bao e sego badumedi ba mmitše Morutiši. (Mat. 22:23, 24; Joh. 3:2) Go oketša moo, Jesu o be a ikgafa bakeng sa ba bangwe. Go ba ga gagwe le moya wa boikgafo go be go dira gore a be le nako e nyenyane bakeng sa go šetša dilo tša gagwe, eupša o be a thabela go direla ba bangwe. (Mat. 14:13, 14; 20:28) Go sa šetšwe go swarega ga gagwe, Jesu o be a e-na le nako ya go boledišana le Tatagwe wa legodimong ka thapelo. (Luka 6:12) Borapedi bja Jesu bo be bo le bohlokwa kudu go Modimo!

Go Katanela go Kgahliša Modimo Gabotse

Jehofa o ile a ela hloko boitshwaro bja Morwa wa gagwe gomme A bolela gore o a mo amogela. (Mat. 17:5) Lega go le bjalo, Sathane Diabolo le yena o ile a lemoga gore Jesu o be a phela ka potego. Ka gona, Jesu o ile a ba mohlaselwa yo a kgethegilego wa Sathane. Ka baka la’ng? Ka gobane go be go se motho yo a kilego a dula a e-kwa Modimo ka mo go feletšego, ke gore a mo rapela ka mo go feletšego. Le gona, Diabolo o be a nyaka go dira gore Jesu a se sa rapela Jehofa ka tsela yeo e swanetšego.—Kut. 4:11.

Maitekong a gagwe a go senya Jesu, Sathane o ile a mmatamela gomme a mo leka ka go mo holofetša mpho. O ile a iša Jesu “thabeng e telele ka mo go sa tlwaelegago, a mmontšha mebušo ka moka ya lefase le letago la yona.” Ke moka a re: “Dilo tše ka moka ke tla go nea tšona ge o ka wela fase wa ntirela tiro ya borapedi.” Jesu o ile a arabela bjang? O ile a re: “Tloga, Sathane! Gobane go ngwadilwe gwa thwe, ‘Ke Jehofa Modimo wa gago yo o swanetšego go mo rapela, gomme ke yena a nnoši yo o swanetšego go mo direla tirelo e kgethwa.’” (Mat. 4:8-10) Ee, Jesu o ile a lemoga gore e be e tla ba tiro ya go hlankela medimo ge a be a ka khunamela Sathane go sa šetšwe gore moputso wa seo. O be a se a ikemišetša go dira gaešita le tiro e tee feela ya borapedi go motho le ge e le ofe ntle le Jehofa.

Rena, Sathane a ka no se re holofetše mebušo ka moka ya lefase le letago la yona e le ge a nyaka gore re mo rapele. Eupša o sa dutše a leka go šitiša borapedi bjoo Bakriste ba botegago ba bo neago Modimo. Diabolo o nyaka gore re rapele motho yo a itšego goba selo se itšego.—2 Bakor. 4:4.

Kriste Jesu o ile a itlhatsela a botega go fihla lehung. Ka go dula a botegela Modimo, Jesu o ile a nea Jehofa letago ka tsela yeo e sa ka go ya bonwa. Bjalo ka Bakriste ba therešo lehono, re katanela go latela tsela ya Jesu ya bophelo ya potego ka go etiša borapedi bja rena go Mmopi pele ga dilo ka moka. Ee, tswalano e botse le Modimo ke selo se bohlokwa ka go fetišiša seo re nago le sona.

Ditšhegofatšo Tšeo di Tlišwago ke Borapedi bjo bo Amogelegago

Go godiša “mohuta wa borapedi bjo bo hlwekilego le bjo bo sa šilafalago” ponong ya Modimo  go tliša ditšhegofatšo tše dintši. (Jak. 1:27) Ka mohlala, re phela nakong yeo go yona batho ba bantši e lego “baithati, barati ba tšhelete, ba go ipona,” le “ba go se rate go loka.” (2 Tim. 3:1-5) Lega go le bjalo, ka lapeng la Modimo, re na le tokelo ya go tlwaelana le batho bao ba hlwekilego le ba lokilego bao ba katanelago go phagamiša ditekanyetšo tša Modimo tša borapedi bjo a bo amogelago. Na seo ga se mothopo wa tapološo?

Ka go dula re se na tšhila ya lefase le, re šegofaditšwe gape ka letswalo le lebotse. Re nyaka go dula re e-na le letswalo le lebotse ka go ikokobeletša melao ya Modimo ya motheo ya go loka le ka go kwa melao ya Kesara yeo e sa lwego le melao ya Modimo.—Mar. 12:17; Dit. 5:27-29.

Borapedi bjo bo dirwago ka pelo ka moka bo tliša ditšhegofatšo tša mohuta o mongwe. Ge re lebiša tlhokomelo go direng thato ya Modimo go e na le ya rena, maphelo a rena a ba le morero e bile a a kgotsofatša. Go e na le gore re re: “A re jeng gomme re nweng, gobane gosasa re tla hwa,” re na le kholofelo e ka botwago ya bophelo bjo bo sa felego paradeiseng mo lefaseng.—1 Bakor. 15:32.

Puku ya Kutollo e bolela ka nako yeo ka yona bao ba dulago ba e-na le boemo bjo bobotse pele ga Jehofa ba tlago go “[tšwa] masetlapelong a magolo.” Pego yeo e re, “Yo a dutšego sedulong sa bogoši o tla phurolla tente ya gagwe godimo ga bona.” (Kut. 7:13-15) Yena yoo a dutšego sedulong sa bogoši ga se yo mongwe ge e se Jehofa Modimo, Motho yo a nago le letago le legolo ka go fetišiša legohleng. Leka go akanya kamoo o tlago go thaba ka gona ge a go amogela bjalo ka moeng ka tenteng ya gagwe, gomme a go fa tšhireletšo e lerato gore o se ke wa welwa ke kotsi le ge e le efe! Le gona go fihla bokgoleng bjo itšego, re ka thabela tšhireletšo ya gagwe le tlhokomelo ya gagwe gaešita le gona bjale.

Go oketša moo, bohle bao ba rapelago Modimo ka tsela yeo a e amogelago ba hlaloswa e le bao ba išwago “methopong ya meetse a bophelo.” Methopo ye yeo e lapološago e swantšhetša ditokišetšo ka moka tšeo Jehofa a di dirago bakeng sa gore re hwetše bophelo bjo bo sa felego. Ee, ka topollo ya Kriste, “Modimo o tla phumola megokgo ka moka mahlong a bona.” (Kut. 7:17) Moloko wa batho o tla phagamišetšwa phethegong, e lego seo se tla tlišetšago bao ba nago le tebelelo ya go phela ka mo go sa felego mo lefaseng lethabo le le sa bapišwego. Gaešita le gona bjale, barapedi ba thabilego ba Modimo ba a hlalala, gomme ba leboga Jehofa go tšwa pelong le go mo rapela gotee le bao ba lego legodimong bao ba opelago ka gore: “Mediro ya gago ke e megolo le e makatšago, Jehofa Modimo Ra-matla-ohle. Ditsela tša gago ke tša go loka le therešo, wena Kgoši ya bosafelego. Ke mang yo ruri a ka se kego a boifa wena, Jehofa, gomme a reta leina la gago, gobane ke wena o nnoši yo a botegago? Gobane ditšhaba ka moka di tla tla tša rapela pele ga gago, gobane ditaelo tša gago tše di lokilego di bonagaditšwe.”—Kut. 15:3, 4.

[Seswantšho go letlakala 27]

Sathane o re holofetša’ng e le ge a nyaka gore re mo rapele?