Jesusjina Diosta munayninmanjina yupaychana

Diosqa, runasta ‘tukuy nacionesmanta, ayllusmanta, tukuy parlaykunamantawan’, payta yupaychanankupaq waqyan (Apo. 7:9, 10; 15:3, 4). Chay waqyariyta kasukuqkunaqa Jehová “may kʼacha kasqanta” rikunku (Sal. 27:4; 90:17). Salmistajina, ninku: “Jamuychej, qonqorisqas yupaychanachej. Qonqorikunachej Tata Diospa ñawpaqempi, imaraykuchus payqa ruwawarqanchej”, nispa (Sal. 95:6).

Jehovaqa, Jesús payta yupaychasqanta allinpaq qhawarqa

Jesús Diospa kʼata Churin kasqanrayku, payqa imatachus kamachisqasninta, yuyaychasqasninta ima, sumaqta yacharqa. Chantapis, Jesusqa Tatan imaynatachus yupaychanata munasqanta sumaqta yacharqa. Chayrayku pay jinata nirqa: “Noqa ñan kani, cheqa kajtaj, kawsaytaj; mana pipis Dios Tataman chayayta atinchu, mana noqanejta rispaqa”, nispa (Juan 1:14; 14:6).

Jesusqa, Tatanta kasukuq, llampʼu sunqu kasqanta ima rikuchirqa, chayrayku jinata nirqa: “Yachallankichejtaj mana imatapis sapallaymanta ruwasqayta. Jinallatataj yachankichej Dios Tataj yachachiwasqallanta parlasqayta. [...], imaraykuchus paypa munaynillanta ruwani”, nispa (Juan 8:28, 29). ¿Imasta Jesús, Tatanpa munayninmanjina ruwarqa?

Ñawpaqtaqa, Jesús Tatanpa munayninta ruwananpaq kawsayninta churarqa, chayrayku cristianospi kikillantataq ruwayta atinkuman.  Jesusqa, Tantanta mayta munakusqanrayku, kasukurqa, munaynintataq tukuy sunqu juntʼarqa, chayta ruwananrayku llakiykunata muchunan kaptinpis (Fili. 2:7, 8). Jesusqa, runasta discipulosman tukuchiyta, may sumaqpaq qhawarqa. Runaman mayta willasqanrayku, paypi mana creeqkunapis, Yachachiq niq kanku (Mat. 22:23, 24; Juan 3:2). Chantapis, tukuy sunqu Diospaq llamkʼayta munasqanrayku, tukuy imata ruwarqa runata yanapananpaq. Paypaq mana tiempoyuq kaspapis, runasta kusiywan yanapaq (Mat. 14:13, 14; 20:28). Chantapis achkha ruwanayuq kaspapis, Tatanmanta mañakunanpaqqa tiempochakuqpuni (Luc. 6:12). Mana iskaychakuspa nisunman, Jehová Diosqa, Churinpa llamkʼayninta allinpaq qhawasqanta.

Diosta kusichinapaq mayta kallpakurqa

Jehovaqa chiqa sunqu Churinpa kawsayninta rikuspa, may munasqa Churin kasqanta nirqa (Mat. 17:5). Satanaspis, Jesús Tatanman chiqa sunqu kasqanta rikurqa, chayrayku paywan mayta churanakurqa. ¿Imaptin? Imaptinchus chay tiempokamaqa ni mayqin runapis Jesusjina Diostaqa kasukusqachu nillataq munasqanmanjina yupaychasqachu, chayrayku Supayqa Jesusta pantachinanpaq tukuy imata ruwarqa (Apo. 4:11).

Satanasqa, Jesusta urmachiyta munaspa, “jatun orqo pataman [pusarqa]. Chaymantataj tukuy kay pachantimpi kaj llajtasta, qhapaj kapuyninkutawan ima rikuchispa Jesusta nirqa: Nuqa kay tukuy imata qosqayki, qonqorikuspachus yupaychawanki chayqa, nispa. Chaypacha Jesús kutichirqa: Riy kaymanta, Satanás. Diosmanta qillqasqapi nin: Señor Diosniykita yupaychanki, pay sapallantataq servinki”, nispa (Mat. 4:8-10). Jesusqa, tukuy kay pachamanta suyusta, qhapaq kaynintawan japʼinanta yachaspapis, sutʼita yacharqa, Satanasman qunqurikuy lantita yupaychaywan ninakusqanta. Chayrayku Jesusqa Jehovallata yupaychana kasqanta nirqa.

Satanasqa, payta yupaychananchikpaq ichá ñuqanchikman mana kay pachamanta suyustachu, nitaq qhapaq kaynintachu quyta munawasun. Chaywanpis, Diosta yupaychayta saqinapaq tukuy imata ruwachkan (2 Cor. 4:4, Qheshwa Biblia).

Jesucristoqa wañupunankama Diosman chiqa sunqu karqa. Chayrayku Jesusqa chiqa sunqu kasqanwan ni pi runajina Jehová Diosta jatuncharqa. Ñuqanchikpis Jesusjina, chiqa sunqu kanapaq, imamantapis ñawpata Ruwawaqninchikta yupaychanapaq mayta kallpakunchik. Charayku ñuqanchikpaqqa, Diosta yupaychay tukuy imamanta astawan valorniyuq.

Diospa munayninmanjina yupaychaymanta tʼinkas

“Diospa ñawpaqempi nisqanta cheqamanta juntʼayqa llimphu, mana chʼichiyoj kanan  tiyan”, chaymanjina kawsaytaq achkha tʼinkasta apamun (Sant. 1:27). Diosta mana yupaychaq runasrí: ‘Imallatapis paykunallapaq munaqkuna, qullqita munakuqkuna, runaykachaqkuna, tukuypa contranta millayta rimaqkuna’ ima, kanku (2 Tim. 3:1-5). Diospa llaqtanpitaq llimphu runaswan, kʼacha runaswan, Diospa kamachisqanta jatunpaq qhawaspa payta yupaychanankupaq kallpakuqkunawan, jukchasqa kanchik. ¿Manachu chay kusichiwanchik?

Kay pachap ruwayninwan mana piqtukusunchu chayqa, wak tʼinkata japʼillasuntaq: sunqu tiyasqa kayta. ¿Imaynatá sunqu tiyasqa kasunman? Diospa yuyaychasqanta kasukuspa chantá, Cesarpa kamachisqan Diospa kamachisqanwan mana churanakuptin, kasukuspa ima (Mar. 12:17; Hech. 5:27-29).

Mana chayllachu. Diosta tukuy almanchikwan yupaychasqanchikmanta kawsayninchikpi Diospa munayninta ñawpaqman churanchik chayqa, kawsayninchik astawan allin kanqa, sunqu juntʼasqataq kawsakusunchik. Chantapis “mikhuna ari, ujyanataj, imaraykuchus qʼaya wañupullasunchej”, ninanchikmantaqa, yachanchik Jallpʼanchik paraisoman tukuptin wiñay wiñaypaq kawsananchikta (1 Cor. 15:32).

Apocalipsis libroqa sutʼinchawanchik: Jehovap ñawpaqinpi llimphu kaqkuna ‘jatun ñakʼariy tiempomanta lluqsinankuta’. Chantá nillantaq: “Kamachina tiyanampi tiyajtaj toldonwan paykunata qhataykonqa”, nispa (Apo. 7:13-15). Chay kamachina tiyanapitaq Jehová Dios tiyachkan, imaptinchus Payqa tukuy imamanta astawan jatun kayniyuq. Kaypi tʼukuriy, may sumaqchá kanqa Jehovap wasinpi tiyakunanchikqa imaptinchus tukuy ima ñakʼariymanta jarkʼawasun. Kay tiempopipis Jehovaqa jarkʼachkawanchik, qhawachkawanchik ima.

Chantapis, Apocalipsis libro nillantaq, Diospa munayninmanjina yupaychaqkunaqa ‘yaku juturisman pusasqas’, kanankuta. Kay yaku juturisqa, Jehová imaymana yanapasta wiñay kawsayta tarinapaq churasqasnin kanku. Cristo ñuqanchikrayku kawsayninta qusqanrayku, Dios ‘ñawisninchikmanta tukuy waqayta pichanqa’ (Apo. 7:17). Runaqa, juntʼa runaman tukunqa, Jallpʼanchik, paraisoman tukuptin kawsayta suyaqkuna mayta kusikunqanku. Kay tiempopi Diospa kamachisninqa, kusisqas, may agradecisqas, Diosta yupaychachkanku, janaqpachapi kaqkunawantaq khuska jinata takichkanku: “Ancha jatuchaj, tʼukunapajtaj ruwasqasniykeqa, Tukuy Atiyniyoj Señor Dios. Ñankunaykeqa cheqan, cheqataj kanku. Qanqa tukuy nacionespa Reynin kanki. Pitaj mana qanta manchachikunmanchu, Señor? Pitaj sutiykita mana jatunchanmanchu? Qanllamin Santo kanki. Tukuy runas ñawpaqeykiman jamonqanku, yupaychasonqankutaj, imaraykuchus cheqanta justiciata ruwasqasniykeqa sutʼinchasqa kanku”, nispa (Apo. 15:3, 4).

[27 paginapi dibujo/foto]

¿Imatataq Satanás, Jehová Diosta manaña yupaychananchikpaq quyta munawanchik?