Aru ia Iesu​—Oronga i te Akamorianga Marekaia ki te Atua

Te pati aroa maira te Atua i te au tangata “no te pa enua ravarai, e te au kopu ravarai, e te au iti-tangata ravarai, e te au reo katoa oki,” kia akamori iaia. (Apo. 7:9, 10; 15:3, 4) Te aronga tei ariki i teia patianga ka rauka ‘kia akara i te meitaki o Iehova.’ (Sala. 27:4; 90:17) Mei te tata taramo rai, kua akateitei ratou i to ratou au reo i te akapaapaa anga i te Atua, i te na ko anga e: “E aere mai tatou, e akamori ma te tupou ki raro; e tuturi tatou ki mua i te aroaro o tei anga ia tatou nei ia Iehova.”​—Sala. 95:6.

Akamorianga Akaperepere Maataia

Ei Tamaiti anau tai na te Atua, e maata ua atu to Iesu taime no te apii i te aerenga manako o tona Metua, te au kaveinga, e te au turanga. No reira, ka rauka ia Iesu i te akakite papu ua mai i te mataara mou tikai i te akamori ia Iehova. Kua akakite aia e: “Ko au te mataara, e te tuatua-mou e te ora; kare ua e tangata e tae ki te Metua ra, mari ra ei iaku.”​—Ioa. 1:14; 14:6.

Kua akanoo a Iesu i te akaraanga apa kore no te kauraroanga akaaka ki tona Metua. Kua akakite aia e: “Kare aku peu rave ua; ko ta taku Metua ra i apii mai iaku ra, ko taku ïa e tuatua nei.” E oti kua tuatua katoa atu aia e: “Kare oki au i tukumoe i te rave i te mea e mareka mai ei aia.” (Ioa. 8:28, 29) Na teea au mataara i akamareka ai a Iesu i tona Metua?

Okotai apinga, kua akamori ngakau katoa tikai a Iesu i tona Metua, e ko te tumu tikai te reira o te aiteanga kia akamori i te Atua. Kua akaari mai a Iesu i tetai pirianga vaitata tikai ki tona Metua na te akarongo anga Kiaia, te rave anga i Tona anoano, noatu e te o maira te turanga ngata. (Phili. 2:7, 8) Tetai tuanga puapinga no ta Iesu akamorianga  koia oki te o putuputu ua anga aia ki roto i te angaanga akariro anga i te tangata ei pipi, i kapiki putuputuia ai aia e te aronga tei irinaki e tei kore e irinaki e ko te Orometua. (Mata. 22:23, 24; Ioa. 3:2) Pera katoa, kua akapou maata a Iesu i tona uaorai taime e te maroiroi i te tauturu i etai ke. No tona tu akaatinga uaorai kare i reira ona taime nona uaorai, inara kua mataora ua aia i te tavini atu i etai ke. (Mata. 14:13, 14; 20:28) Noatu te maata o te angaanga, e tuku ua ana a Iesu i tetai taime i te tuatua atu ki tona Metua i te rangi na roto i te pure. (Luka 6:12) Kua akaperepere maata tikai te Atua i ta Iesu akamorianga!

Te Tautaanga Pakari kia Akamareka i te Atua

Kua kite mai a Iehova i te tu o tana Tamaiti e kua akakite mai i Tona mareka. (Mata. 17:5) Inara, kua kite katoa rai te Tiaporo ko Satani i to Iesu oraanga akarongo mou. No reira, kua riro mai a Iesu ei takete tikai na Satani. No teaa ra? No te mea kare ake rai e tangata i rauka ake i te akarongo i te Atua ma te apa kore, na te mataara tikai tana e inangaro ra kia akamoriia. E te inangaro ra te Tiaporo i te tapu ia Iesu mei te oronga anga i te akamorianga tei tau tikai ia Iehova.​—Apo. 4:11.

I te tauta anga kia akataruri ke ia Iesu, kua aere maira a Satani kiaia e kua oronga atura i tetai apinga ei akavare aia. Kua apai atura aia ia Iesu “ki runga i tetai maunga teitei rava, e kua akakite maira kiaia i te au basileia katoa o te ao nei, e to ratou kakā.” I reira kua karanga atu aia e: “E oronga atu au i teianei au mea katoa kia koe, kia akatopa mai koe ki raro e akamori mai iaku.” I akapeea atu ra a Iesu? Kua karanga atura aia e: “E aere ke atu koe e Satani, kua oti oki i te tataia, ‘Ko toou Atua ra ko Iehova taau e akamori, e koia anake rai taau e akarongo.’” (Mata. 4:8-10) Ae, kua kite a Iesu e e akamori itoro te tupou atu ki mua ia Satani noatu eaa te puapinga ka rauka mai. Kare rava aia i inangaro ana i te oronga i tetai ua atu akamorianga ki tetai tangata mari ra kia Iehova anake ua.

I roto i to tatou turanga, penei kare a Satani e oronga mai i te au patireia katoatoa o teianei ao e to ratou kaka ei tupau no ta tatou akamorianga. Inara te tauta nei rai aia i te tamanamanata i te akamorianga a te au Kerititiano ngakau tae e oronga ra ki te Atua. Te inangaro ra te Tiaporo ia tatou kia akamori i tetai tangata me kore i tetai apinga ke atu.​—2 Kori. 4:4.

Kua akapapu te Karaiti ko Iesu i tona uaorai akarongo mou e mate ua atu aia. Na te tamou marie anga i tona tiratiratu ki te Atua, kua akakaka a Iesu ia Iehova na roto i te mataara kare i rauka ana i tetai tangata i te rave. No te au Kerititiano mou i teia tuatau, te tauta nei tatou i te aru i to Iesu oraanga akarongo mou na te tuku anga i ta tatou akamorianga no Tei Anga mai ia tatou ki runga rava atu i te au mea ravarai. E tika rava e, ko te pirianga meitaki ki te Atua ta tatou apinga akaperepere maata rava atu.

Au Akameitakianga no te Oronga Anga i te Akamorianga Marekaia

I to te Atua manako, ko te turuturuanga i “te tu akamorianga tei ma e te viivii kore” e maata ua atu te au akameitakianga ka rauka. (Iako. 1:27, NW) Ei akaraanga, te noo nei tatou i  roto i tetai tuatau e maata ua atu te tangata tei riro “ei akaperepere ia ratou uaorai, ei noinoi, ei akatietie,” e te “akavaavaa i te tangata memeitaki ra.” (2 Timo. 3:1-5) Inara i roto i to te Atua iti tangata, e tikaanga manea to tatou i te taokotai atu anga ki tetai iti tangata viivii kore e te tau, te tauta ra i te akono i to te Atua au turanga no te akamorianga iaia. Kare ainei tera i te tumu no te akamaroiroianga?

Na te vai viivii kore ua anga i teianei ao, ka rauka ia tatou tetai akameitakianga ke mai no te akava ngakau ma. Ka inangaro tatou i te tamou marie i tetai akava ngakau ma na te kauraro anga ki to te Atua au kaveinga tuatua tika e na te kauraro anga ki te au ture a Kaisara kare e patoi ana i te au ture a te Atua.​—Mare. 12:17; Anga. 5:27-29.

Te apai maira te akamorianga ngakau katoa i tetai au akameitakianga ke mai. Me akamou tatou ki runga i te rave anga i te anoano o te Atua eiaa to tatou uaorai, ka puapingaia e ka mareka ua to tatou oraanga. Kare tatou e karanga e: “E kai tatou, e e inu oki; apopo oki tatou e mate ei,” no te mea e manakonakoanga papu to tatou no te oraanga mutu kore i roto i tetai parataito i te enua nei.​—1 Kori. 15:32.

Te tou maira te puka o Apokalupo ki tetai tuatau e “aere mai” ei te aronga tei tamou marie i tetai turanga ma i mua i te aroaro o Iehova “mei roto i te mate maata.” Te karanga maira te papaanga e “tei noo ki runga i te terono ra [“ka akatotoa aia i tona puakapa ki rungao,” NW] ia ratou.” (Apo. 7:13-15) Ko tei noo ki runga i te terono kare atu mari ra ko te Atua ko Iehova, te Peretana kaka rava atu i te ao katoa e pini ua ake. Ka akamanako ua ana e mei teaa ra te rekareka me turou mai aia ia koe ei manuiri i roto i tona puakapa, te oronga anga mai kia koe i tana paruruanga aroa kia kore koe e rokoia e te kino! E ko tetai turanga, ka mataora tatou i tana paruruanga e te tiakianga i teia tuatau katoa.

Pera katoa, pouroa te aronga tei oronga i te akamorianga tei marekaia mai e te Atua, kua akatakaia mai e te aratakiia ra ki te “au pupui anga o te vai ora.” Te akatutu maira teia au pupui anga vai oraora i te au akanoonooanga katoatoa ta Iehova e oronga maira kia rauka ia tatou te ora mutu kore. Ae, na roto i te oko o Karaiti, “na te Atua e orei i to ratou roi-mata katoa i to ratou mata.” (Apo. 7:17) Ka akateiteiia te tangata ravarai nei ki te turanga apa kore, te oronga anga mai i te rekareka aite koreia ki te aronga e manakonakoanga to ratou no te noo anga i te enua nei e tuatau ua atu. E teia taime katoa, te maeva rekareka nei te aronga akamori mataora o te Atua, i te akakite anga i to ratou ngakau rekareka kia Iehova e te akamorianga iaia ma te aronga i runga i te rangi tei imene e: “E angaanga maata e te taka ke taau, e te Atu ra, e te Atua mana katoatoa; e aerenga tika e te tuatua-mou taau, e te Ariki o te aronga tapu e! Koai oki te ka kore e mataku ia koe, e te Atu, e te akakakā i toou ingoa? ko koe anake oki Tei Tapu; e ope katoa te pa enua i te aere mai ki mua i toou aroaro e akamori ei; kua akakite uaia taau ra au tutaki anga tika.”​—Apo. 15:3, 4.

[Tutu i te kapi 27]

Eaa ta Satani e oronga maira kia tatou ei tupau no ta tatou akamorianga?