Amwiiye Jesu—Amukombe Leza Munzila Iimukkomanisya

Leza ulabatamba bantu “bazwa kuzisi zyoonse akumisyobo yoonse akumikowa yoonse akumyaambo yoonse” kuti bamukombe. (Ciy. 7:9, 10; 15:3, 4) Bantu aabo bazumina mukutambwa ooku balakonzya “[kweebela] bubotu bwa-Jehova.” (Int. 27:4; 90:17) Mbubwenya mbwaakacita sintembauzyo, balamutembaula Leza cakoompolola kabati: “Amuboole, tumukotamine, tukombe. Atufugame kubusyu bwa-Jehova iwakatulenga.”—Int. 95:6.

Bukombi Mbwakkomanina Jehova

Mbwali Mwana wa Leza simuzyalwa alikke, Jesu wakajisi ciindi cinji cakwiiya mbobayeeya Bausyi, njiisyo alimwi azyeelelo zyabo. Aboobo, cabusicamba wakali kukonzya kwaambila bantu mbobeelede kumukomba Jehova. Wakati: “Ndime nzila, ndime bwini, ndime buumi. Takukwe uuza kuli-Taata, pele mulindime.”—Joh. 1:14; 14:6.

Jesu wakasiya cikozyanyo cilondokede cakulibombya kuli Bausyi. Wakaamba kuti: “Nsilicitili cintu ndemwini, pele ndaamba aya mbuli mbwandiisya Taata.” Mpoonya wakayungizya kuti: “Ndacita lyoonse zintu izimubotela.” (Joh. 8:28, 29) Ino muunzila nzi Jesu mbwaakabakkomanisya Bausyi?

Kaambo kamwi nkakuti, Jesu wakalilyaabide cakumaninina kuli Bausyi, alimwi eeci ncecintu cipati cibikkilizyidwe mukukomba Leza. Jesu wakatondezya kuti ujisi cilongwe ciyumu a Bausyi kwiinda mukubamvwida, kucita kuyanda  kwabo, nociba ciindi nokwakali kuyandika kulyaaba kapati. (Flp. 2:7, 8) Cibeela cipati cabukombi bwa Jesu wakali mulimo wakwe ngwaakali kucita lyoonse iwakugwasya bantu kuba basikwiiya cakuti bantu ibakali kusyoma abatakali kusyoma bakamwiita kuti Mufundisi. (Mt. 22:23, 24; Joh. 3:2) Kunze lyaboobo, ciindi cinji Jesu ncaakajisi wakacibelesya kugwasya bantu. Muuya wakwe wakulyaaba tiiwakali kumupa ciindi cinji cakucita nzyayanda, pele wakali kukukkomanina kubelekela bantu. (Mt. 14:13, 14; 20:28) Nokuba kuti wakajisi bubi, Jesu wakajana ciindi cakubandika a Bausyi bakujulu mumupailo. (Lk. 6:12) Elo kaka Leza wakakkomana Jesu mbwaakali kukomba!

Kusolekesya Kukkomanisya Leza

Jehova wakabubona bukkale bwa Mwanaakwe eelyo wakaamba mbwaakabukkomanina. (Mt. 17:5) Nokuba boobo, Saatani Diabolosi awalo wakabona mbwaakali kusyomeka Jesu. Aboobo, Jesu wakatalika kulwanwa kapati a Saatani. Ino nkaambo nzi? Nkaambo kakuti kunyina muntu aciindi eeco wakali kumvwida Leza cakulondoka, nzila eeyo Leza njayanda alimwi njayelede kukombwa. Alimwi Diabolosi wakali kuyanda kuti Jesu aleke kukomba Jehova munzila eeyo njayanda.—Ciy. 4:11.

Mukusoleka kumunyonganya, Saatani wakasika mpaakabede Jesu akumusunka. Wakamutola “kucilundu cilamfu loko, wakamutondezya zisi zyoonse zyanyika abulemu bwazyo.” Mpoonya wakati: “Ezi zyoonse ndakupa, kuti wafugama akundikomba.” Ino ncinzi Jesu ncaakacita? Wakati: “Koya, uwe Saatani, nkaambo kulilembedwe kuti, Nguwe Jehova Leza wako ngoelede kukomba, nguwenya alike ngoelede kumanina milimo.” (Mt. 4:8-10) Masimpe, Jesu wakazyiba kuti nokwakaba kukomba mutuni naakamukotamina Saatani tacikwe makani naa kwakali mpindu zijanwa mukucita boobo. Taakwe naakalibambilide kukomba muntu uuli woonse kunze buyo lya Jehova.

Swebo kutugama, Saatani inga taatupa mami oonse aali munyika alimwi abulemu bwangawo ikutegwa tumukombe. Pele ucisoleka kunyonganya bukombi Banakristo bakasimpe mbobacita kuli Leza. Diabolosi uyanda kuti katukomba muntu uumbi naa cintu cimwi buyo.—2 Kor. 4:4.

Kristo Jesu wakasyomeka mane kusikila kulufwu buya. Kwiinda mukuzumanana kusyomeka kuli Leza, Jesu wakamulemeka Jehova munzila eeyo muntu uuli woonse njaatakali kukonzya kucita. Mbotuli Banakristo bakasimpe mazuba aano, tulasoleka kusyomeka mbuli bwakali kusyomeka Jesu kwiinda mukubikka bukombi bwesu ku Mulengi mubesena bwakusaanguna. Masimpe, cilongwe cibotu ncotujisi a Leza ncecikono cipati ncotujisi.

Zilongezyo Ziboola Mukukomba Munzila Jehova Njayanda

Kusumpula “[bukombi] busalala butakwe kampenda” mumeso aa Leza kuletela zilongezyo  zinji. (Jak. 1:27) Mucikozyanyo, tupona muziindi bantu banji kapati nobali “basikuliyanda, basimuyanda mali, basimantumbwaambwa,” alimwi “batayandi bubotu.” (2 Tim. 3:1-5) Nokuba boobo, mumukwasyi wa Leza tujisi coolwe cakuba antoomwe abantu basalala alimwi bacita zyintu zili kabotu, ibantu aabo basoleka kutobela zyeelelo zya Leza zyakumukomba. Sena eeci tacili cintu cikatalusya?

Ikuti twatasofwaazyigwa anyika eeyi, tulalongezyegwa alimwi tulaba amanjezyeezya aasalala. Tuyanda kuzumanana kuba amanjezyeezya aasalala kwiinda mukulibombya kuzyeelelo zya Leza ziluleme alimwi akutobela milawo ya Kaisara eeyo iitakazyanyi amilawo ya Leza.—Mk. 12:17; Inc. 5:27-29.

Kukomba camoyo woonse kuletela zilongezyo azimwi. Ciindi notubikkila maano kukucita kuyanda kwa Leza muciindi cakucita nzyotuyanda, tulaba abuumi bujisi mpindu alimwi bukkomanisya. Muciindi cakwaamba kuti: “Atulye akunywa buyo, nkaambo junza tulafwa,” tujisi bulangizi bwini-bwini bwakuyooba abuumi butamani muparadaiso anyika.—1 Kor. 15:32.

Bbuku lya Ciyubunuzyo litondezya kuti aabo bazumanana kuba bantu baluleme kuli Jehova “[bayoozwa] kumapenzi ayo mapati.” Cibalo caamba kuti “oyo uukede acuuno cabwami uyookala akati kabo.” (Ciy. 7:13-15) Ooyo uukkede acuuno cabwami ngu Jehova Leza, walo uujisi nguzu kapati alimwi uulemekwa mububumbo boonse. Elo kaka amusoleke kweezyeezya mbociyookkomanisya ciindi nayoomutambula mucilawo cakwe, nayoomukwabilila kutegwa kutabi cintu cibyaabi cimucitikila! Alimwi munzila imwi, ulakonzya kutukwabilila nociba cino ciindi.

Kuyungizya waawo, boonse aabo bakomba Leza munzila iimukkomanisya baambwa kuti bali mukusololelwa “kutusensa twamaanzi aabuumi.” Tusensa tukatalusya ootu twiiminina bubambe boonse Jehova mbwabikka kutegwa tube abuumi butamani. Masimpe, kwiinda mucinunuzyo ca Kristo, “Leza uyoosansamuna misozi yoonse kumeso aabo.” (Ciy. 7:17) Bantu bayoogwasyigwa kutegwa balondoke, calo ciyooleta lukkomano kapati kuli baabo bajisi bulangizi bwakuyoopona kukabe kutamani anyika. Nociba ciindi cino, bakombi ba Leza baloompolola calukkomano, kulumba Jehova alimwi akumukombela antoomwe abali kujulu balo ibaimba kuti: “Milimo yako mipati, ilagambya, [Jehova] Leza Singuzuzyoonse. Ziyanza zyako nzyalusinizyo, zililuleme. Nduwe Mwami waciindi coonse. Nguni uutakuyoowi, [Jehova], akulemeka izina lyako? Nkaambo nduwe olike uusalala. Ncobeni bantu bazisi zyoonse balaboola kukukomba kunembo lyako, nkaambo imbeta zyako zyaboneka.”—Ciy. 15:3, 4.

[Cifwanikiso icili apeeji 27]

Ino ncinzi Saatani ncatupa ikutegwa tumukombe?