Subara hi Jesus—Singbaha an Dios ha Paagi nga Iya Naruruyagan

Mahigugmaon nga gin-iimbitar han Dios an mga tawo “ha tagsa-tagsa nga nasud ngan ha ngatanan nga mga panon, ngan mga katawohan ngan mga yinaknan” ha pagsingba ha iya. (Pah. 7:9, 10; 15:3, 4) An mga nakarawat hini nga imbitasyon mahimo “makatan-aw han katahom ni Jehova.” (Sal. 27:4; 90:17) Pariho han salmista, hira nagsinggit ha pagdayaw ha Dios: “Pagsingba kita ngan dumuko; pagluhod kita ha atubangan ni Jehova nga aton Magburuhat.”—Sal. 95:6.

Pagsingba nga Ginpapabilhan Gud

Sugad nga bugtong nga Anak han Dios, damu an higayon ni Jesus basi hibaroan an panhunahuna, mga prinsipyo, ngan suruklan han iya Amay. Tungod hito, may pagsarig nga naisusumat niya an husto nga paagi han pagsingba. Hiya nagsiring: “Ako amo an dalan, ngan an kamatuoran, ngan an kinabuhi: Waray bisan hin-o nga maabot ha Amay, kon diri maagi ha akon.”—Juan 1:14; 14:6.

Ipinakita ni Jesus an hingpit nga susbaranan han mapainubsanon nga pagpasakop ha iya Amay. Hiya nagsiring: “Diri ako nagbubuhat ha akon la kalugaringon, kondi nagyayakan la ako han igintutdo ha akon han Amay.” Katapos hiya nagdugang: “Dayoday ko binubuhat an nakakalipay ha iya.” (Juan 8:28, 29, Maopay nga Sumat) Ano an mga ginbuhat ni Jesus basi malipay an iya Amay?

Siyahan, bug-os nga ginpahinungod ni Jesus an iya kinabuhi ha iya Amay, nga amo an kahulogan han pagsingba ha Dios. Ipinakita niya an gugma kan Jehova pinaagi ha pagin masinugtanon ha Iya, pagbuhat han Iya kaburut-on, bisan  kon kinahanglan niya magsakripisyo gud. (Fil. 2:7, 8) Usa nga importante nga bahin han iya pagsingba amo an regular nga pakigbahin ha paghimo hin disipulo, salit gintawag hiya nga Magturutdo han mga tumuroo ngan han diri. (Mat. 22:23, 24; Juan 3:2) Ikaduha, daku han iya panahon ngan kusog an iya gin-gamit ha pagbulig ha iba. Tungod han iya nagsasakripisyo nga disposisyon, gutiay la an iya panahon para ha iya kalugaringon, kondi nalipay hiya ha “pagmangno” ha iba. (Mat. 14:13, 14; 20:28) Bisan kon sagipo, pirme hiya may panahon ha pakiistorya ha iya langitnon nga Amay ha pag-ampo. (Luk. 6:12) Sigurado nga ginpabilhan gud han Dios an pagsingba ni Jesus!

An Pangalimbasog nga Mapalipay Gud an Dios

Naobserbahan ni Jehova an panggawi han iya Anak ngan nagpahayag Hiya hin pag-uyon. (Mat. 17:5) Kondi, naobserbahan liwat ni Satanas nga Yawa an pagkamatinumanon ni Jesus. Salit, hiya an nagin nangunguna nga puntirya ni Satanas. Kay ano? Tungod kay waray pa tawo nga bug-os nga nagin matinumanon ha Dios—an paagi han pagsingba nga Iya naruruyagan. Karuyag han Yawa nga paundangon hi Jesus ha pagsingba kan Jehova ha paagi nga takos gud ha Iya.—Pah. 4:11.

Ha pangalimbasog nga masulay hi Jesus, may nakakadani nga igintanyag hi Satanas ha iya. Gindara niya hi Jesus ha “hitaas gud nga bukid, ngan ipinakita ha iya an ngatanan nga ginhadian han kalibotan, ngan an ira himaya.” Katapos hiya nagsiring: “Ngatanan ini nga mga butang akon ihahatag ha imo, kon ikaw lumuhod ngan yumukbo ngan magsingba ha akon.” Ano an nagin reaksyon ni Jesus? Hiya nagsiring: “Iwas ka dinhi, Satanas, kay nahisurat na: Magsingba ka ha imo Ginoo nga Dios, ngan ha iya la ikaw mag-aalagad.” (Mat. 4:8-10) Oo, maaram hi Jesus nga idolatroso nga buhat an pagyukbo kan Satanas bisan kon maghatag ito hin bentaha. Disidido hiya nga diri maghimo hin bisan usa nga buhat hin pagsingba ha bisan kan kanay gawas kan Jehova.

Ha aton bahin, bangin diri itanyag ni Satanas an ngatanan nga ginhadian han kalibotan ngan an himaya hito kabalyo han aton pagsingba. Kondi nangangalimbasog pa gihapon hiya nga pugngan an sinsero nga mga Kristiano ha pagsingba ha Dios. Karuyag han Yawa nga magsingba kita ha iba nga persona o butang.—2 Kor. 4:4.

Pinamatud-an ni Kristo Jesus nga matinumanon hiya tubtob ha kamatayon. Pinaagi ha pagtipig han integridad ha Dios, iya ginhimaya hi Jehova ha paagi nga waray pa mahimo hin tawo. Para ha aton nga tinuod nga mga Kristiano yana, nangangalimbasog kita ha pagsunod han pagkamatinumanon ni Jesus pinaagi ha pag-una han pagsingba ha Maglalarang labaw ha ngatanan. Oo, an maopay nga relasyon ha Dios an aton pinakabirilhon nga panag-iya.

Mga Bendisyon Tungod ha Pagsingba nga Kinakarawat han Dios

An pagsuporta ha paagi han pagsingba nga “putli ngan waray buring” ha paniplatan han Dios nagriresulta hin damu nga bendisyon.  (Jak. 1:27) Pananglitan, nagkikinabuhi kita ha panahon nga nagtitikadamu an ‘mahigugmaon ha ira kalugaringon, mahigugmaon ha salapi, hambog,’ ngan “waray gugma ha kaopayan.” (2 Tim. 3:1-5) Kondi, ha sulod han organisasyon ni Jehova, pribilehiyo naton nga makaupod an limpyo ngan mag-opay nga tawo nga nangangalimbasog ha pagtuman han iya suruklan ha pagsingba. Diri ba ito nakakaliaw ha aton?

Pinaagi ha pagpabilin nga waray buring hini nga kalibotan, nakakarawat naton an dugang nga bendisyon nga limpyo nga konsensya. Karuyag naton tipigan ito pinaagi ha pagtuman han magtadong nga prinsipyo ngan ha pagsunod han mga balaud ni Cesar nga diri supak ha balaud han Dios.—Mar. 12:17; Buh. 5:27-29.

An bug-os-kalag nga pagsingba gintitikangan liwat hin iba nga klase hin bendisyon. Kon nakasentro kita ha pagbuhat han kaburut-on han Dios imbes han aton, nagigin may katuyoan ngan makapatagbaw an aton kinabuhi. Imbes nga sumiring: “Pangaon ngan panginom kita, kay buwas mapatay kita,” may-ada kita masasarigan nga paglaom nga mabuhi ha waray kataposan ha paraiso nga tuna.—1 Kor. 15:32.

An libro han Pahayag naghihisgot han panahon diin adton limpyo an kahimtang ha atubangan ni Jehova ‘magkakagowa tikang ha daku nga kagol-anan.’ Nasiring ito nga “hiya nga nalingkod ha lingkuranan nga hadianon magbubuklad han iya payag ha igbaw nira.” (Pah. 7:13-15) Iton nalingkod ha lingkuranan nga hadianon waray iba kondi hi Jehova nga Dios, an pinakamahimayaon nga Persona ha uniberso. Handurawa an imo magigin kalipay kon karawaton ka niya sugad nga bisita ha iya “payag,” nagpapanalipod basi waray maraot nga mahitabo ha imo. Ngan bisan yana, mapapahimulosan naton an iya panalipod ngan pagmangno.

Dugang pa, an ngatanan nga nagsisingba ha Dios ha paagi nga iya naruruyagan iginhuhulagway nga ginigiyahan tipakadto ha “burabod ha mga tubig han kinabuhi.” Inin makarepresko nga burabod nagrirepresentar ha ngatanan nga tagana ni Jehova nga makakabulig ha aton basi magkaada kinabuhi nga waray kataposan. Oo, pinaagi han halad-lukat ni Kristo, “an Dios magpapahid han ngatanan nga luha tikang ha ira mga mata.” (Pah. 7:17) An katawohan bubuligan nga magin hingpit, nga magriresulta hin diri-matupngan nga kalipay para hadton may paglaom nga mabuhi ha waray kataposan ha tuna. Bisan yana, an maglipayon nga magsiringba han Dios nagsisinggit hin kinasingkasing nga apresasyon kan Jehova ngan nagsisingba ha iya upod han aadto ha langit nga nagkakanta: “Dagku ngan magpakaurosa an imo mga buhat, O Ginoo nga Dios, nga Makagagahum; magtadong ngan mga totoo an imo mga dalan, Hadi ha mga katuigan. Hin-o ba an diri mahadlok ha imo, O Ginoo, ngan maghimaya ha imo ngaran? Kay ikaw la an maputli; kay an ngatanan nga mga nasud makanhi ngan magsisingba ha imo atubangan; kay an imo magtadong nga mga buhat iginpahayag na.”—Pah. 15:3, 4.

[Retrato ha pahina 27]

Ano an igintatanyag ni Satanas ha aton nga kabalyo han aton pagsingba ha iya?