Jara Nɔ Odaseyeli

BENI bɔfo Paulo yɔɔ Ateene maŋ lɛ mli lɛ, eyaa jara ni yɔɔ jɛmɛ lɛ nɔ daa ni eyashiɛɔ Yesu he sanekpakpa lɛ. (Bɔf. 17:17) Paulo sumɔɔ akɛ eya jara lɛ nɔ ejaakɛ Ateenebii lɛ fɔɔ jɛmɛ hilɛ.

Aaafee afii 2,000 sɛɛ nɛɛ lɛ, Yehowa webii kã he amɛmiishiɛ Nyɔŋmɔ Maŋtsɛyeli lɛ he sane lɛ yɛ jaji anɔ. Mɛni hewɔ? Ejaakɛ anaa mɛi babaoo yɛ jɛmɛ. Ŋmɛnɛ lɛ, ekolɛ jarayelihe nɛɛ baanyɛ afee shwapo ko mli loo shwapo wulu ko ní shwapoi pii yɔɔ mli. Odasefoi komɛi biɔ gbɛ kɛjɛɔ mɛi ni kwɛɔ shwapoi lɛ anɔ loo shwapotsɛmɛi lɛ adɛŋ, ni kɛ́ aŋmɛ amɛ gbɛ lɛ, amɛkɛ Biblia kasemɔ woji shwieɔ okpɔlɔ nɔ loo amɛfeɔ agba bibioo ni amɛkɛshwieɔ shishi koni mɛi ana.

Ákɛ nɔkwɛmɔnɔ lɛ, Odasefoi komɛi ŋma sane ni ji “Mɛɛ Gbɛ Nɔ Oootsɔ Oha Jeŋba Kpakpa Ahi Oweku lɛ Mli” ni amɛkɛkpɛtɛ shwapo wulu ko ni yɔɔ New Jersey yɛ U.S.A. lɛ mli, ni amɛkɛ woji shwie jɛmɛ koni mɛi ana. Mɛni jɛ mli ba? Amɛkɛ woji 153 ha yɛ wiemɔi srɔtoi ekpaa mli gbi kome.

Yoo ko tsi ebɛŋkɛ agba ni akɛ woji lɛ eshwie shishi lɛ, ni ebo niiamlitsɔɔmɔ ni Odasefoi lɛ ateŋ mɔ kome kɛha lɛ toi jogbaŋŋ. Yoo lɛ kpɛlɛ nɔ akɛ ehe miihia ni wɔfee Nyɔŋmɔ suɔmɔnaa nii ní wɔha ehi wɔweku lɛ mli. Eha aha lɛ woji nɛɛ: Kasemɔ Nii Kɛjɛ Tsɔɔlɔ Kpele lɛ Ŋɔɔ, Nɔ Diɛŋtsɛ ni Kɛ Weku Miishɛɛ Baa, kɛ Questions Young People Ask—Answers That Work.

Nakai gbi lɛ shwane lɛ, nuu ko batsɔ he ni akɛ woji lɛ eshwie lɛ kɛmiiya shwapo kroko mli. Ehiŋmɛi gba Young People Ask wolo lɛ eko nɔ. Nyɛmi yoo ni damɔ woji lɛ ahe lɛ yɔse akɛ  nuu lɛ yɛ wolo lɛ he miishɛɛ. Nyɛmi yoo lɛ bi lɛ akɛ, “Ani oyɛ woji nɛɛ ateŋ eko he miishɛɛ?” Ekɛ eyitso kpɛlɛ nɔ, ni ekɛ enine tsɔɔ Young People Ask wolo lɛ. Nyɛmi yoo lɛ kɔ wolo ni nuu lɛ ekpã enine mli eyaakɔ lɛ eha lɛ. Nuu lɛ tsɔɔ mli akɛ eyɛ bii etɛ. Beni nyɛmi yoo lɛ kɛ lɛ gbaa sane lɛ, nuu lɛ wie akɛ ekɛ ebii lɛ susuɔ saji ahe shikome daa otsi. Ebii enyɔ ni edara lɛ eye kɛjɛ afii 13 kɛyaa. Beni ekwɛɔ wolo lɛ mli lɛ, ewie akɛ ebaanyɛ ekɛtsu nii ní ekɛ eweku lɛ asusu saji komɛi ahe yɛ gbɛ ni waaa nɔ. Nyɛmi yoo lɛ gbala ejwɛŋmɔ kɛtee Nɔ Diɛŋtsɛ ni Kɛ Weku Miishɛɛ Baa wolo lɛ hu nɔ, ni ema nɔ mi eha lɛ akɛ, ŋaawoi kpakpai komɛi yɛ mli ni baaye abua ekɛ eŋa lɛ. Nuu lɛ hiɛ sɔ enɛ waa, etsu onia, ni ekpɛlɛ nɔ ákɛ akɛ lɛ kɛ eweku lɛ abakase nii.

Te Odasefoi lɛ nu odase ní amɛye yɛ shwapo wulu lɛ mli nakai gbi lɛ he amɛha tɛŋŋ? Nyɛmi yoo ko kɛɛ akɛ: “Minya gbɛ ni tamɔ nɛkɛ ni wɔtsɔ nɔ wɔshiɛ lɛ he waa. Miná he miishɛɛ waa!” Nyɛmi yoo kroko ko hu kɛɛ akɛ: “Yehowa kɛɛ abaashiɛ sanekpakpa lɛ kɛyashi shikpɔŋ lɛ naagbeehei lɛ. Ŋmɛnɛ lɛ, yɛ Paramus yɛ New Jersey lɛ, sanekpakpa lɛ ená mɛi ni wieɔ wiemɔi srɔtoisrɔtoi anɔ hewalɛ. Eŋɔɔ minaa waa akɛ mifata he kɛyaye odase yɛ shwapo wulu lɛ mli. Mɔ fɛɛ mɔ ni ná mli gbɛfaŋnɔ lɛ mii shɛ ehe. Beni shwapoi lɛ kpa lɛ, edɔ wɔ akɛ wɔbaashi.”

Ani obaanyɛ otsɔ gbɛ̀i srɔtoi anɔ oshiɛ sanekpakpa lɛ? Shĩa kɛ shĩa ni wɔyaa lɛ ji gbɛ titri ní wɔtsɔɔ nɔ wɔshiɛɔ. (Bɔf. 20:20) Shi kɛlɛ, ani obaasumɔ ni oye odase yɛ jara nɔ loo yɛ shwapo wulu ko mli?