Hoihoi Gabudiai Haroro

APOSETOLO PAULO be Atena dekenai ia noho neganai, hanaihanai ia be hoihoi gabudia dekenai ia lao bona kamonai taudia dekenai Iesu ena sivarai namona ia harorolaia. (Kara 17:17) Paulo ia ura hoihoi gabudiai ia haroro, badina Atena taudia momo be unuseniai hoihoi totona idia lao momo.

Kahirakahira lagani 2,000 ia hanaia murinai, Iehova ena Witnes taudia be taunimanima momo idia davaria gabudiai Dirava ena Basileia ena sivarai namona idia harorolaia. Hari inai negai, taunimanima ita davaria gabudia haida be, maketi bona sitoa. Iehova ena Witnes taudia haida be sitoa biaguna amo gwaumaoro idia abia, bena teibolo maragina ta be sitoa dekenai idia atoa bona Baibel bukadia idia hahedinaraia diba.

Hegeregere, U.S.A. ai, New Jersey ena sitoa badana ta dekenai, Witnes haida be teibolo ai buka idauidau idia atoa, bona pepa badana ta dekenai inai hereva idia torea: “Ruma Bese Hanamoa​​—Edena Dala Ai?” Bona dahaka ia vara? Dina tamona lalonai, buka iboudiai 153 be gado idauidau 6 ai idia hariharilaia.

Hahine ta be teibolo kahirakahira ia lao, bona taihu ta ese unai buka ia herevalaidia neganai ia kamonai namonamo. Unai hahine be taihu ena hereva ia abia dae bona ia gwau, iseda mauri lalonai bona ruma bese dekenai Dirava ena ura ita laloa bada be mai anina. Ia ese inai buka: Hadibaia Tauna Badana amo Diba Ita Abia, Ruma Bese Ena Moale Havaraia Dalana, bona Memero Kekeni Edia Henanadai​​—Haere Maorodia ia abidia.

Adorahi ai, tau ta be ma sitoa ta dekenai ia ura vareai neganai, unai buka idauidau ia itaia. To Memero Kekeni Edia Henanadai bukana ese ena lalona ia veria. Teibolo kahirakahira ia gini taihuna be unai tau ia itaia. Ia nanadaia, “Oi be edena buka oi ura henia?” Vadaeni unai tau be Memero  Kekeni Edia Henanadai bukana ia poinia. Taihu ese unai buka ia henia neganai, unai tauna be taihu imana amo unai buka ia abia. Unai tau ia gwau ia be mai ena natuna memero toi. Danu, ia gwau ia bona ena natudia be wiki ta lalonai nega tamona idia herevahereva. Ena natuna ginigunadia rua edia mauri lagani be 13 ia lao 19 huanai. Unai tau be buka ia kehoa bona ena hereva ia itaia, bona ia gwau unai buka ena hereva haida do ia gaukaralaia ena ruma bese ida idia herevahereva totona. Danu, taihu ese Ruma Bese Ena Moale Havaraia Dalana bukana ia poinia bona unai tau ia hamaoroa, inai buka ena hereva namodia ese ruma bese lalonai tau bona hahine do ia durua, abia hidi namodia idia karaia totona. Unai tau be mai moale ida unai buka ia abia, kontribusen monina ia henia, bona ia ura Witnes ta ese ia bona ena ruma bese idia vadivadi henia.

Unai hoihoi gabuna dekenai idia haroro Witnes taudia edia hemami be edena bamona? Taihu ta ia gwau: “Lau be inai haroro dalana lau moalelaia. Bona ekspiriens namodia lau davaria!” Taihu ma ta ia gwau: “Iehova ia gwau Basileia ena Sivarai Namona be tanobada ibounai dekenai do ita harorolaia. Hari, Paramus, New Jersey dekenai, inai sivarai namona ese gado idauidau taudia edia kudouna ia hamarerea. Unai be haroro dalana hereadaena. Ai ibounai ai moale dainai, ai ura lasi unai gabu ai rakatania.”

Dala idauidau ai sivarai namona oi harorolaia diba, a? Momokani, ruma-ta-ruma-ta haroro gaukarana be iseda haroro dalana badana. (Kara 20:20) To, maketi o sitoa dekenai haroro gaukara oi karaia vadaeni, a?