Panagpulong ed Panaglakoan

NEN walad syudad na Atenas si apostol Pablo, sikatoy inagew-agew a linma ed plaza odino panaglakoan pian ipulong so maong a balita nipaakar ed si Jesus. (Gawa 17:17) Pinili nen Pablo so panaglakoan lapud ta mabetbet a wadtan iray taga Atenas.

Natan, a ngalngali 2,000 taon lay apalabas, saray totoo nen Jehova et siansia nin manpupulong diad panaglakoan pian nipakabat so mensahe na Panarian na Dios. Akin? Lapud ta dakel so totoon naromog ditan. Diad modernon panaon tayo, say panaglakoan et nayarin say shopping center odino mall. Say gagawaen na arum a Tasi et mangaala ray permiso manlapud manedyer odino akan-gawa, insan ira mangusar na lamisaan odino mangalay melag a puesto pian makapangidispley na literatura na Biblia.

Alimbawa, diad sakey a shopping mall ed New Jersey, U.S.A., inlilira da iray literatura tayo diad paraan a makapasagyat na imano, diad teman “Panon a Napansiansia so Maabig Iran Estandarte ed Pamilya?” Antoy resulta? Diad sanagew labat et akapangiyopresi ira na 153 a libro diad anemiran lenguahe.

Sakey a bii ya inmasingger ed melag a puesto na literatura so tinmalineng ed eksplinasyon na sakey a Tasin wadman. Inmabobon itan a bii ya importante ed bilay tayo tan diad pamilya tayo so panggawa ed linawa na Dios. Sikatoy angala na saray libron Manaral Manlapud Sankamaongan a Managbangat, Say Sekreto na Liket ed Pamilya, tan Questions Young People Ask​—Answers That Work.

Kayari ugto, walay lakin akadalan ed saramay akadispley a literatura tayo antis ton onloob ed ontumbok a puesto. Asagur so mata to ed samay libron Young People Ask. Naimano na agin bii ya akaalagey ed puesto ya interesado imay laki ed satan. Kanian tinepetan to so laki, “Walay agustoan yon libro?” Sikatoy tinmanger tan inturo toy  libron Young People Ask. Kanian, inderew na agin bii so libro ed samay laki ya akaawat lay lima to. Imbaga na samay laki a walay taloran anak to. Diad pantotongtong dan dua, imbaga na samay laki a maminsan ed sakey simba et walay igagana ran panaon pian mantotongtong iran sanaama. Say panguloan tan say komaduan anak to et tinedyer. Legan ton bubukayen so libro, imbaga ton balibalin usaren iya a pinagkabasiyan diad arum a pantotongtong da bilang sankapamilyaan. Impanengneng met na agi so libron Say Sekreto na Liket ed Pamilya, tan impaseguro to a dia et nabasa dan sanasawa so pigaran suhestion a makatulong ed sikaran manggawa na saray desisyon nipaakar ed pamilya ra. Akisalamat so laki ed suhestion, angiter na donasyon, tan sikatoy inmabuloy a pasyaren na saray Tasi.

Antoy liknaan na sarayan agagi kayari sanagew ya impanpulong da’d mall? Oniay imbaga na sakey ya agin bii: “Talagan nanliketan ko iyan paraan na panagpulong. Balibali iyan eksperiensyak!” Sakey met ya agin bii so angikuan: “Imbaga nen Jehova a say maong a balita et nipulong anggad kasampotan na dalin. Diad sayan agew, sayan maong a balita et atenyeg toy liknaan na saray totoon nandurumay lenguahe diad Paramus, New Jersey. Balibali mibiang ed sayan uksoyan. Amin mi et malikeliket. Anggapo ed sikami so malabay ya onalis kasabi ngarem.”

Sarag yo kasin ipulong so maong a balita diad nanduruman paraan? Tua, say manunan paraan tayo et say pampulong ed kabkaabungan. (Gawa 20:20) Anggaman ontan, labay yo ta met a saliey manpulong ed panaglakoan odino mall?