Akakitekite Anga i Ko i te Makete

IAIA i roto i te oire o Atene, e aere ana te apotetoro ko Paulo i te au ra katoatoa ki te makete i te tutu aere i te tuatua meitaki no runga ia Iesu. (Anga. 17:17) Kua iki a Paulo i te makete no te mea e ngai okooko maata te reira no te au tangata o Atene.

Vaitata rai e 2,000 mataiti i muri mai te aere ra rai te iti tangata o Iehova ki te makete i te akatotoa aere i te karere o te Patireia o te Atua. No teaa ra? No te mea e maata te tangata i reira. I teia tuatau, penei e rave ana te tangata i ta ratou okookoanga i ko i te are toa maatamaata. Me rauka mai te tikaanga no ko mai i te manitia me kore i te ona, e akaariari ana tetai Au Kite i te au puka Pipiria ki runga ua i te kaingakai.

Ei akaaraanga, i ko i tetai are toa maatamaata i New Jersey, i Marike, kua akanooia tetai ngai akaariari anga puka no runga i te tumu tuatua “Akono Tamou Anga i te Au Mea Puapinga o te Ngutuare Tangata​—Akapeea ra?” Eaa tei tupu? E 153 puka i roto i te ono reo tei orongaia i taua ra okotai ra.

Ko tetai vaine tei aere mai ki ko i te kaingakai vairanga puka kua akarongo meitaki atu aia i te akamaramaanga a tetai o te Au Kite. Kua ariki taua vaine ra e e puapinga rai kia akamanako tatou i te Atua i roto i to tatou oraanga e to tatou ngutuare tangata. Kua rave aia i teia au puka nei: Learn From the Great Teacher, The Secret of Family Happiness, e te Questions Young People Ask​—Answers That Work.

I te avatea, kua na te pae mai tetai tangata i te ngai e akaariia ra te au puka iaia e aere ra ka tomo ki roto i te are toa i te pae mai. Kua kite aia i te puka Young People Ask. Kua kite atu te tuaine e tu ra i te pae i te kaingakai vairanga puka e te inangaro ra taua tangata ra i te puka. Kua ui atu aia kiaia, “E puka taau e inangaro ra?” Kua tungou mai aia e kua tou ki te puka Young People Ask. Kua oake atu te tuaine i te puka kiaia, iaia e  itae maira i te reira. Kua karanga aia e e toru ana tamariki. Ia raua e pukapuka ra, kua taiku mai aia e e uriuri kapiti ana aia kia ratou e tai taime i te epetoma. Ko tana nga tamariki mua e nga mapu. Iaia e akara ra i te puka, kua karanga atu te tuaine e ka rauka ua iaia i te akariro i te reira ei aratakianga no ta ratou uriurianga ngutuare tangata. Kua akaari katoa atu te tuaine i te puka The Secret of Family Happiness kiaia, i te akapapu atu anga e ka kite raua ko tana vaine i tetai akoanga puapinga tikai no runga i te au ikianga a te ngutuare tangata. Kua rekareka tikai taua tangata ra e kua oronga mai i tetai moni tauturu, e kua ariki mai kia atoro atu tetai Kite ia ratou.

Eaa ra te manako o te Au Kite no runga i to ratou ra i te akakitekite anga i roto i te are toa maatamaata? “Kua mataora tikai au i teia mataara no te tutuanga,” i karanga ai tetai tuaine. “E tupuanga manea tikai te reira noku!” Kua karanga tetai tuaine ke mai e: “Te karanga ra a Iehova e ka tutu aereia te tuatua meitaki e tae ua atu ki te openga o te enua. I teia tuatau, i Paramus, i New Jersey, kua riro teia tuatua meitaki i te akakeu i te au tangata no te au reo ke ke. E mea umere tikai kia piri atu ki roto i te akakitekite anga i ko i te are toa maatamaata. Mataora tikai te katoatoa tei piri atu. Kare matou i inangaro ana i te oki ki te kainga i te openga o taua ra ra.”

Ka rauka ainei ia koe i te tutu aere i te tuatua meitaki i roto i te au mataara tukeke? Ta tatou ravenga maata koia oki te aere mei tera are ki tera are. (Anga. 20:20) Inara, ka inangaro ainei koe i te akakitekite i ko i te makete me kore i roto i te are toa maatamaata?