Molimau Atu i le Maketi

A O IAI le aposetolo o Paulo i le aai o Atenai, sa ia alu ai i aso uma i le maketi e talaʻi atu le tala lelei e uiga iā Iesu. (Galu. 17:17) Sa filifili Paulo e alu i le maketi ona o inā na tele ina maua ai le toʻatele o tagata Atenai.

E tusa ma le 2,000 tausaga mulimuli ane, o loo molimau atu pea e tagata o Ieova le feʻau o le Malo o le Atua i maketi. Aiseā? Auā e toʻatele tagata e maua i inā. I aso nei, atonu o se nofoaga autū e fai ai faatauga, po o se fale faapitoa mo faatauga ua pei o se maketi. Pe a maua le faatagaga mai se pule po o sē e ana le faleoloa, ua mafai e nisi Molimau ona faaaogā se laulau, po o se tulaga e tuu ai lomiga faale-Tusi Paia ina ia faaali atu i tagata.

Mo se faaaʻoaʻoga, i se fale faapitoa e fai ai faatauga i New Jersey, i Amerika, sa faatulaga ai lomiga i se auala e tosina i ai le vaai i lalo o le matua e faapea, “Faatāuaina o Aiga—E faapefea?” O le iʻuga, na mafai ai ona tufatufaina ni tusi e 153 i gagana e ono i le aso e tasi.

Sa faalogologo ma le naunau se fafine na alu atu i le mea na iai le laulau e tuu ai tusi, a o faia se faamatalaga a se tasi o Molimau. Sa talitonu le fafine i le tāua o le iai o le Atua i o tatou olaga ma o tatou aiga. Sa ia aveina tusi nei: Ia Faalogo i le Faiaʻoga Sili, Le Ala e Maua ai le Fiafia i le Aiga, Fesili ua Fesili Mai ai Talavou—Tali e Aogā.

I se taimi o le aoauli, na pasi ane ai se tamāloa i luma o le mea o loo faaalia ai lomiga a o toetoe lava ulu atu i le faleoloa o sosoo ane ai. Na tosina atu lana vaai i le tusi, Fesili Mai Talavou. Na mātauina e le tuafafine o loo i le mea e tuu ai tusi, le naunau fiafia o le tamāloa i le tusi. Na ia fesili atu iā te ia: “Pe e iai se tusi e te fiafia i ai?” Na lue lona ulu ma tusi atu lona  lima i le tusi Fesili Mai Talavou. Sa tuu atu loa e le tuafafine le tusi lea ua ia muamua tago mai i ai. Na ia fai atu i le tuafafine e iai lana fanau e toʻatolu. A o faaauau pea le talanoaga, na ia taʻua e faatasi i le vaiaso ona latou talanoa ma lana fanau. O lana fanau toʻalua matutua, o ni talavou. A o ia suʻeina itulau o le tusi, na ia faapea mai atonu o le a faigofie ona ia faaaogā le tusi e fai ma taʻiala i nisi o a latou talanoaga faaleaiga. Na faaali atu foʻi e le tagata talaʻi le tusi o Le Ala e Maua ai le Fiafia i le Aiga, ma taʻu atu, o le a la maua ma lana avā i lenā tusi le tele o fautuaga aogā mo le faia o faaiʻuga po o filifiliga i le aiga. Sa fiafia le tamāloa i le fautuaga, avatu lana foaʻi tupe, ma taliaina le ofo e asiasi atu se Molimau iā i latou.

O ā ni faalogona o Molimau a o latou talaʻi atu i nofoaga e fai ai faatauga? Na faapea mai se tasi o tuafafine: “Sa ou matuā fiafia tele i lenei auala mo le talaʻiga. O se auala lelei tele lea mo aʻu!” Na faapea mai se isi tuafafine: “Na fetalai Ieova o le a talaʻiina atu le tala lelei i vaega pito sili ona mamao o le lalolagi. I aso nei, i Paramus, i New Jersey, ua matuā pāʻia e le tala lelei loto o le toʻatele o tagata mai gagana eseese. O se mea matagofie le faia o se sao i lenei faatulagaga. Sa fiafia tele i latou uma na auai ai. E leai ma se isi o i matou na manaʻo e ō i le fale ina ua uma le aso.”

Pe e mafai ona e talaʻi atu le tala lelei i ni auala eseese? O le auala autū lava tatou te talaʻi ai, o le ō atu i lea fale i lea fale. (Galu. 20:20) Peitaʻi, po o e mafaufau e molimau atu i le maketi pe i se nofoaga e fai ai faatauga?