Preiki na presi pe furu sma e go bai sani

DI NA apostel Paulus ben de na ini a foto Ateine, dan a ben go na wowoyo ibri dei fu preiki a bun nyunsu fu Yesus (Tori. 17:17). Paulus ben e go na a wowoyo dati, fu di furu sma na ini Ateine ben lobi go drape.

Pikinmoro 2000 yari pasa sensi a ten dati, èn a pipel fu Yehovah e preiki a bun nyunsu fu Gado Kownukondre ete na presi pe sma lobi fu go bai sani. Fu san ede? Fu di den kan miti furu sma drape. Na ini a ten disi, furu sma lobi fu go na bun bigi wenkri, noso mall. Son Kotoigi ben kisi primisi fu preiki na ini den sortu wenkri disi. Den Kotoigi disi seti Bijbel publikâsi na so wan fasi, taki sma ben kan si den sani disi.

Fu eksempre, na ini wan mall na ini a foto New Jersey, na Amerkankondre, wan tu Kotoigi seti buku nanga tijdschrift di abi fu du nanga na osofamiri-libi. Den seti den sani disi na so wan fasi taki den ben e hari sma prakseri. San ben de a bakapisi? Na ini wán dei nomo, den Kotoigi prati 153 buku na ini siksi tongo.

Wan uma di waka kon luku den buku, ben e arki bun di wan fu den Kotoigi ben e taki fu na osofamiri-libi. Na uma ben agri taki a de prenspari fu meki Gado tiri wi eigi libi èn sosrefi na osofamiri-libi fu wi. Disi na den buku di na uma teki: Teki leri fu a Bigi Leriman, A sroto gi wan kolokoe osofamiri, nanga a buku Wat jonge mensen vragen — Praktische antwoorden (Sani di yongu sma e aksi—Piki di kan yepi den).

A bakadina dati, wan man waka pasa a presi pe den Kotoigi ben seti den buku fu den, fu di a ben wani go na ini a pikin wenkri na sei. En ai ben fadon tapu a Jonge mensen vragen-buku, èn a tan luku a buku dati. A sisa di ben e tanapu drape, ben si fa a man ben e luku a buku. A aksi en: „Yu wani wan fu den buku dyaso?” A man seki en ede taki iya, èn a sori go na a Jonge mensen  vragen-buku. Di a sisa ben e gi a man a buku, dan a man ben e langa en anu kaba fu teki en. A fruteri a sisa taki a abi dri pikin. Di den ben e taki moro fara, dan a taigi a sisa taki ibri wiki a e hori wan takimakandra nanga den pikin fu en. Den tu moro owru pikin fu en pasa 13 yari kaba. Aladi a man ben e luku san skrifi na ini a buku, a taigi a sisa taki a ben kan gebroiki a buku disi te a e hori takimakandra nanga en osofamiri. A sisa sori a man wan tra buku di nen A sroto gi wan kolokoe osofamiri. A taigi a man taki a buku abi moi rai di ben o yepi en nanga en wefi fu teki bun bosroiti di abi fu du nanga na osofamiri fu den. Fu di a man ben breiti fu yere den sani disi, meki a teki a buku, èn a gi a sisa wan moni fu horibaka gi a wroko. A ben feni en bun tu taki wan Kotoigi kon na en oso.

Fa den Kotoigi ben feni en fu preiki na ini a mall a dei dati? Wan sisa ben taki: „Mi lobi fu preiki na a fasi disi. A ben de wan tumusi moi dei gi mi!” Wan tra sisa ben taki: „Yehovah taki dati a bun nyunsu ben o preiki te na den moro farawe presi fu grontapu. Tide, a bun nyunsu naki na ati fu sma di e taki difrenti tongo dyaso na ini Paramus, New Jersey. Mi ben lobi en srefisrefi taki mi ben man gi kotoigi na a fasi disi. Ala den Kotoigi di ben teki prati, ben de koloku trutru. Na a kaba fu a dei, nowan fu wi ben wani gowe.”

Yu ben o wani preiki a bun nyunsu na tra fasi tu? A moro prenspari fasi fa wi e du a preikiwroko, na taki wi e preiki oso fu oso (Tori. 20:20). Ma yu ben o wani go preiki na den mall pe furu sma lobi fu go?