Bukambausi Bwamumusika

NAAKALI mucisi ca Atene, mwaapostolo Paulo wakali kuunka kumusika abuzuba kuyookambauka makani mabotu aajatikizya Jesu. (Inc. 17:17) Paulo wakasala kuunka kumusika akaambo kakuti bantu bamu Atene nkobakali kujanika ziindi zinji.

Kwamyaka iitandila ku 2,000 kuzwa ciindi eeco, bantu ba Jehova bacibelesya musika kuba busena bwakukambaukila mulumbe wa Bwami bwa Leza. Ino nkaambo nzi? Nkaambo kakuti bantu banji nkobajanika. Mazuba aano, musika ulakonzya kubikkilizya busena kuyakidwe zintoolo zinji. Bazumizyigwa amulangizi wacintoolo naa mukamwini cintoolo, Bakamboni bamwi balabelesya tafwule kubikka mabbuku aamba zyamu Bbaibbele.

Mucikozyanyo, abusena aayakidwe zintoolo zinji mudolopo lya New Jersey ku U.S.A., kwakabikkwa mabbuku aabandika kaambo kajatikizya mikwasyi mboikonzya kuzumanana kutobela njiisyo zyakulilemeka. Ino ncinzi cakatobela? Mubuzuba bomwe, kwakaabilwa mabbuku aali 153 aamumyaambo iili cisambomwe.

Umwi mukaintu iwakasika aafwaafwi atafwule aakabikkidwe mabbuku wakaswiililisya kubupanduluzi mbwaakapa mucizyi umwi. Mukaintu ooyu wakazumina kuti cilayandika kubikkila maano kukucita kuyanda kwa Leza mubuumi bwesu alimwi amumukwasyi wesu. Wakabweza mabbuku aaya: Amwiiye ku Mwiiyi Mupati, Inzila Yakujana Lukkomano Mumukwasyi, alimwi alyakuti Mafunso Achichepere Akufunsa—Mayankho Amene Amathandiza.

Masyikati, mulombwana umwi wakainda munsi-munsi aakabikkidwe mabbuku ciindi naakali kuyanda kunjila mucintoolo cimbi. Bbuku lya Achichepere Akufunsa lyakamukkomanisya. Mucizyi wakaimvwi munsi lyatafwule wakabona kuti mulombwana ooyu wakaliyandisya bbuku eeli. Mucizyi wakabuzya mulombwana ooyu kuti, “Sena kuli bbuku lyamubotela akati kayaaya?” Wakaguna-guna akutondeka bbuku lya Achichepere Akufunsa. Mucizyi wakatambika bbuku eeli kumulombwana ooyu iwakatambikide kale janza lyakwe kuti alibweze. Wakaamba kuti ujisi bana basankwa  botatwe. Nobakazumanana kubandika, mulombwana ooyu wakaamba kuti ulabandika abana bakwe twaambo tumwi kwaciindi comwe ansondo. Bana bakwe bobile mbakubusi. Naakali kulanga-langa zili mubbuku, wakaamba kuti ulakonzya kulibelesya kapati ikuti kalimusololela mumibandi imwi yamumukwasyi. Sikumwaya alimwi wakamutondezya bbuku lya Inzila Yakujana Lukkomano Mumukwasyi akumusyomezya mulombwana ooyu kuti walo amukaintu wakwe bayoojana malailile aagwasya aajatikizya mbobakonzya kusala zyintu zijatikizya buumi bwamukwasyi. Mulombwana ooyu wakalumba kumalailile aayo, wakasanga mali alimwi akuzumina kuti sikumwaya umwi akamuswaye amukwasyi wakwe.

Ino Bakamboni aaba bakalimvwa buti kujatikizya buzuba oobu mbobakakambaukila mubusena buyakidwe zintoolo zinji? Mucizyi umwi wakaamba kuti: “Ndakaikkomanina nzila yabukambausi eeyi. Elo kaka cakali kukkomanisya kucitikilwa zyintu eezyi!” Aumwi mucizyi wakaamba kuti: “Jehova waamba kuti makani mabotu ayookambaukwa munyika yoonse. Mazuba aano, mudolopo lya Paramus, mucooko ca New Jersey, makani mabotu aaya akabakulwaizya bantu bamyaambo yiindene-indene. Cakali cintu cikkomanisya kukambaukila mubusena muli zintoolo zinji. Muntu oonse wakali kutola lubazu mubukambausi oobu wakali kkomene. Kunyina uuli woonse akati kesu wakali kuyanda kuunka kuŋanda kumazuba.”

Sena mulakonzya kukambauka makani mabotu munzila ziindene-indene? Nzila njotubelesya kapati njakwiinka kuŋanda aŋanda. (Inc. 20:20) Nokuba boobo, sena inga mwayanda kucita bukambausi bwamumusika naanka mubusena muli zintoolo zinji?