Mga Hapot Hale sa mga Parabasa

Sa surat ni apostol Pablo sa mga Hebreo, nasambitan nia an “pagpatong kan mga kamot.” An boot daw niang sabihon iyo an pagnombra sa kamagurangan o ibang bagay?​—Heb. 6:2.

Mayo nin dahelan na kita magin dogmatiko, alagad posibleng marhay na an boot sabihon ni Pablo iyo an pagpatong nin mga kamot tanganing magtao nin mga balaog kan espiritu.

An Biblia talagang may sinasambit na pagpatong nin mga kamot may koneksion sa teokratikong mga pagnombra. “Ipinatong ni Moises an saiyang kamot” ki Josue kan ini ninombrahan nia bilang saiyang kasalihid. (Deut. 34:9) Sa Kristianong areglo, ninombrahan an nagkapirang kualipikadong lalaki paagi sa pagpatong nin mga kamot. (Gibo 6:6; 1 Tim. 4:14) Si Pablo nagpatanid tumang sa dali-daling pagpatong nin mga kamot sa sarong tawo.​—1 Tim. 5:22.

Minsan siring, sinadol ni Pablo an Hebreong mga Kristiano na ‘maghingoang makaabot sa pagkamaygurang’ ngonyan na binayaan na ninda an “enot na katokdoan.” Dangan isinurat nia an “pagsolsol sa gadan na mga gibo, asin pagtubod sa Dios, an katokdoan dapit sa mga bautismo asin pagpatong kan mga kamot.” (Heb. 6:1, 2) An pagnombra daw sa kamagurangan saro sanang enot na katokdoan na hale dian an mga Kristiano maninigong maghingoang umoswag? Bako. An pagigin magurang sa kongregasyon sarong pasohan na maninigong hingoahon na aboton kan maygurang nang mga tugang na lalaki asin pagkatapos kaiyan maninigo nindang pahalagahan.​—1 Tim. 3:1.

Alagad igwa pang ibang gamit an pagpatong nin mga kamot. Kan enot na siglo, isinikwal ni Jehova bilang saiyang banwaan an Israel sa laman apabor sa espirituwal na Israel, an kongregasyon nin linahidan na mga Kristiano. (Mat. 21:43; Gibo 15:14; Gal. 6:16) An mga balaog kan espiritu na paggibo nin mga milagro, arog baga kan pagtaram nin laen-laen na tataramon, nagpatunay sa pagbabagong iyan. (1 Cor. 12:4-11) Kan magtubod si Cornelio asin an saiyang kasararo sa harong, an mga bagohan na ini uminako nin banal na espiritu, arog kan ipinaparisa kan saindang ‘pagtaram nin laen-laen na tataramon.’​—Gibo 10:44-46.

Kun beses, itinatao an mga balaog na paggibo nin mga milagro paagi sa pagpatong nin mga kamot. Dakol an nabautismohan kan ihulit ni Felipe an maogmang bareta sa Samaria. Isinugo duman kan namamahalang grupo si apostol Pedro asin Juan. Taano? Mababasa niato: “Dangan ipinatong [kan duwang ini] an saindang mga kamot sa [bago pa sanang nabautismohan na mga tawo], asin sinda nagpoon na umako nin banal na espiritu.” Seguradong nangahulogan iyan na nag-ako sinda kan mga balaog kan espiritu, mga abilidad na heling-heling nin iba. Aram niato ini huli ta an pagpunsionar na ini kan espiritu naheling ni Simon, na dating nagsasagibo nin mahika, asin may kahanaban niang prinobaran na bakalon an abilidad na magpatong kan mga kamot nia sa iba tanganing makatao nin banal na espiritu sa sainda, na sa siring makakagibo sinda nin mga milagro. (Gibo 8:5-20) Paghaloyhaloy, 12 katawo sa Efeso an nabautismohan. Mababasa niato: “Kan ipatong ni Pablo an saiyang mga kamot sa sainda, an banal na espiritu napasainda, asin nagpoon sinda na magtaram nin laen-laen na tataramon asin maghula.”​—Gibo 19:1-7; ikomparar an 2 Timoteo 1:6.

Huli kaini, minalataw na an boot sabihon ni Pablo sa Hebreo 6:2 iyo an pagpatong nin mga kamot tanganing magtao nin mga balaog kan espiritu sa mga bagong nagturubod.