Sanebimɔi ni Jɛ Kanelɔi Adɛŋ

Yɛ wolo ni bɔfo Paulo ŋma eyaha Hebribii lɛ mli lɛ, ewie “niji-kɛ-nɔshwiemɔ” he. Ani no mli lɛ eewie onukpai aholemɔ he aloo nɔ kroko he ewieɔ lɛ?—Heb. 6:2.

Wɔnyɛŋ wɔwie kɛ nɔmimaa, shi eeenyɛ efee akɛ Paulo miiwie niji ni aŋɔ shwieɔ mɔ nɔ ni haa mɔ nine shɛɔ mumɔ lɛ nikeenii lɛ eko nɔ lɛ he.

Biblia lɛ wieɔ niji ni aŋɔ shwie mɛi anɔ beni aha amɛ sɔɔmɔ hegbɛ yɛ Yehowa sɔɔmɔ mli lɛ he. Mose ‘ŋɔ eniji eshwie’ Yoshua ‘nɔ’ beni ehala lɛ akɛ mɔ ni baaye esɛɛ lɛ. (5 Mose 34:9) Yɛ Kristofoi asafo lɛ mli lɛ, akɛ niji shwie hii komɛi ni sa anɔ beni ahalaa amɛ kɛha sɔɔmɔ hegbɛ lɛ. (Bɔf. 6:6; 1 Tim. 4:14) Paulo bɔ kɔkɔ eshi niji ní aaaŋɔ shwie mɔ ko nɔ oyá lɛ he.—1 Tim. 5:22.

Kɛlɛ, Paulo wo Kristofoi ni ji Hebribii lɛ hewalɛ koni ‘amɛfoŋ kɛya dalɛ mli’ akɛni amɛfɔ̃ɔ ‘shishijee saji lɛ’ ahe wiemɔ lɛ hewɔ. No sɛɛ lɛ, etsĩ “nitsumɔi gbohii ahe tsuitsakemɔ kɛ Nyɔŋmɔ nɔ hemɔkɛyeli, kɛ baptisimɔi ahe nitsɔɔmɔ kɛ niji-kɛ-nɔshwiemɔ” tã. (Heb. 6:1, 2) Ani onukpai aholemɔ lɛ ji shishijee nɔ ko ni esa akɛ Kristofoi afoŋ kɛya dalɛ mli? Dabi. Hii ni edara yɛ mumɔ ji mɛi ni aholeɔ amɛ akɛ asafoŋ onukpai, no hewɔ lɛ onukpai aholemɔ fataaa shishijee nibii lɛ ahe.—1 Tim. 3:1.

Shi nɔ kroko ko yɛ ní no hewɔ aŋɔ niji ashwie mɛi anɔ. Yɛ klɛŋklɛŋ afii 100 lɛ mli lɛ, Yehowa kpoo heloonaa Israel akɛ emaŋ, ni ekɛ mumɔŋ Israel ni ji Kristofoi asafo ni afɔ́ amɛ mu lɛ ye najiaŋ. (Mat. 21:43; Bɔf. 15:14; Gal. 6:16) Mumɔ lɛ duromɔ keenii ni yɔɔ naakpɛɛ lɛ, tamɔ lilɛi srɔtoisrɔtoi awiemɔ lɛ ji nɔ ni ha ayɔse enɛ faŋŋ. (1 Kor. 12:4-11) Beni Kornelio kɛ eshĩabii lɛ batsɔmɔ héyelilɔi lɛ, ‘amɛwie maŋsɛɛ wiemɔi srɔtoi,’ ni no ha ana akɛ amɛná mumɔ krɔŋkrɔŋ lɛ.—Bɔf. 10:44-46.

Bei komɛi lɛ, niji ní aŋɔ shwieɔ mɛi anɔ lɛ haa amɛnáa duromɔ nikeenii lɛ eko. Beni Filipo jaje sanekpakpa lɛ yɛ Samaria lɛ, abaptisi mɛi babaoo. Nɔyeli kuu lɛ tsu bɔfo Petro kɛ bɔfo Yohane kɛtee jɛmɛ. Mɛni hewɔ? Ŋmalɛ lɛ kɛɔ akɛ: “Kɛkɛ ni [hii enyɔ nɛɛ] kɛ amɛniji ŋmɛlɛ [mɛi ni abaptisi amɛ etsɛko lɛ] anɔ, ni amɛná mumɔ krɔŋkrɔŋ lɛ.” No tsɔɔ akɛ amɛnine shɛ mumɔ lɛ duromɔ keenii ni mɛi baanyɛ ayɔse lɛ nɔ. Wɔyɛ nɔmimaa yɛ enɛ he ejaakɛ Simon ni tsutsu ko lɛ eji ŋkunyaayelɔ lɛ na akɛ nakai mɛi lɛ ená mumɔ krɔŋkrɔŋ lɛ, ni etao akɛ eŋɔ shika kɛha koni aha lɛ hegbɛ bɔni afee ni kɛ́ lɛ hu ekɛ eniji shwie mɛi anɔ lɛ, amɛná mumɔ krɔŋkrɔŋ lɛ ni amɛfee naakpɛɛ nii. (Bɔf. 8:5-20) Sɛɛ mli lɛ, abaptisi mɛi 12 yɛ Efeso. Wɔkaneɔ akɛ: “Beni Paulo kɛ eniji shwie amɛnɔ lɛ, Mumɔ krɔŋkrɔŋ lɛ yi amɛnɔ, ni amɛwie wiemɔi srɔtoi ni amɛgba.”—Bɔf. 19:1-7; okɛto 2 Timoteo 1:6 lɛ he.

No hewɔ lɛ, ekã shi faŋŋ akɛ nɔ ni Paulo tsɔɔ yɛ Hebribii 6:2 lɛ kɔɔ niji ní aŋɔ shwieɔ héyelilɔi heei anɔ koni amɛnine ashɛ mumɔ lɛ nikeenii lɛ nɔ lɛ he.